Lajmet nga UBT

UBT shton mundësitë praktike për studentët e Inxhinierisë së Ndërtimit me kompaninë Euroaditiv

Published

on

Fakulteti i Inxhinierisë së Ndërtimit dhe Infrastrukturës në UBT ka nënshkruar një marrëveshje të rëndësishme bashkëpunimi me kompaninë italiane Euroaditiv, lider në fushën e aditivëve dhe shtesave mineralogjike për industrinë e ndërtimit.

Marrëveshja u nënshkrua në një ceremoni solemne nga Prof. Visar Krelani, Dekan i Fakultetit të Ndërtimtarisë, dhe Z. Elhami Rexhi, udhëheqës i kompanisë Euroaditiv, në praninë e koordinatores së fakultetit, Blertë Retkoceri.

Ky bashkëpunim ka për qëllim forcimin e lidhjeve mes akademisë dhe industrisë, duke ofruar mundësi të reja për studentët dhe stafin akademik të fakultetit. Pjesë e marrëveshjes është ofrimi i mundësisë për përdorimin e pajisjeve të avancuara për testimin e materialeve të ndërtimit, një mundësi e rëndësishme për përgatitjen e studentëve për tregun e punës.

Po ashtu, marrëveshja synon t’u ofrojë studentëve mundësinë për të fituar njohuri praktike në fushën e prodhimit të betonit dhe përbërësve të tij, duke rritur kështu cilësinë e arsimit dhe përgatitjen praktike për sfidat e industrisë së ndërtimit.

UBT institucion lider në edukimin inxhinierik dhe inovacionin në ndërtimtari, vazhdon të krijojë mundësi për bashkëpunim me partnerë ndërkombëtarë. Ky bashkëpunim me Euroaditiv është një tjetër hap përpara në përpjekjen e UBT-së për të sjellë standarde të reja në industrinë e ndërtimit dhe infrastrukturës në Kosovë dhe për të ofruar mundësi të reja zhvillimi për studentët dhe profesionistët e fushës./UBTNews/

Aktualitet

Profesori Alban Kuriqi renditet në mesin e shkencëtarëve më të mirë në botë sipas Stanford/Elsevier 2025

Published

on

Universiteti prestigjioz Stanford dhe shtëpia botuese shkencore Elsevier, në renditjen ndërkombëtare “World’s Top 2% Scientists” për vitin 2025, kanë përfshirë sërish Prof. Alban Kuriqin ndër shkencëtarët më me ndikim në botë, duke e përfaqësuar denjësisht UBT-në.

Profesori Kuriqi ka arritur renditjen më të lartë në Kosovë dhe në të gjithë hapësirën shqiptare, me një diferencë të dukshme krahasuar me studiuesit e tjerë, si në kategorinë e ndikimit për një vit të vetëm (2024), ashtu edhe në kategorinë e ndikimit shkencor gjatë gjithë karrierës.

Ky vlerësim dëshmon reputacionin gjithnjë në rritje të UBT-së si një universitet lider në mësimdhënie dhe kërkim shkencor, duke e pozicionuar atë në pararojë të ekselencës akademike dhe inovacionit në rajon.

Renditja e Stanford/Elsevier bazohet në një analizë të gjerë të citimeve shkencore, ndikimit të kërkimit dhe kontributit në karrierë në të gjitha fushat. Përfshirja në 2% më të mirët konsiderohet një nga arritjet më prestigjioze në botën akademike, e rezervuar për studiuesit puna e të cilëve formëson njohurinë dhe praktikat shkencore globale.

Kontributet e Prof. Kuriqit përfshijnë fusha si inxhinieria civile, menaxhimi i burimeve ujore, energjia e rinovueshme dhe përshtatja ndaj ndryshimeve klimatike, me punime që janë cituar dhe vlerësuar gjerësisht në nivel ndërkombëtar për ndikimin e tyre në zhvillimin e qëndrueshëm.

Continue Reading

Aktualitet

Nga farmakologjia te nanoteknologjia – UBT hap thirrjen për pjesëmarrje në Konferencën e 14-të Ndërkombëtare

Published

on

UBT ka kënaqësinë të ftojë studiues, profesionistë, akademikë dhe studentë nga mbarë bota që të marrin pjesë në Konferencën Ndërkombëtare për Shkencat Farmaceutike dhe Natyrore (IC-PNS 2025), e cila do të mbahet në kuadër të Konferencës së 14-të Ndërkombëtare të UBT-së për Biznes, Teknologji dhe Inovacion.

Ky edicion synon të shërbejë si një platformë unike shkencore për shkëmbimin e njohurive, prezantimin e kërkimeve më të fundit dhe diskutimin e ideve inovative në fushën e shkencave farmaceutike dhe natyrore.

Qëllimi dhe objektivat

Konferenca ka për synim të nxisë bashkëpunimin dhe shkëmbimin e përvojave mes studiuesve të rinj, doktorantëve, akademikëve, ekspertëve të fushës dhe profesionistëve të industrisë. Përmes këtij forumi ndërkombëtar do të trajtohen sfida dhe zhvillime të reja në farmaci, shkencat natyrore dhe ndikimin e tyre në shëndetin publik, teknologjinë dhe zhvillimin e qëndrueshëm.

Fushat dhe temat e konferencës

Temat e konferencës janë të gjera dhe ndërdisiplinore, duke përfshirë:

  • Farmaci dhe farmakologji;
  • Farmakognozi & fitokimi;
  • Bioteknologji farmaceutike;
  • Kimi farmaceutike dhe kimia medicinale;
  • Farmaci klinike dhe shëndeti publik;
  • Farmakogjenomikë dhe farmacovigjilencë;
  • Sisteme të reja të shpërndarjes së barnave dhe nanoteknologji;
  • Biokimi, kimi organike, fizike dhe analitike;
  • Biologji, bioteknologji, biologi molekulare dhe toksikologji;
  • Shkencat e ushqimit dhe nutricionit;
  • Shkenca mjedisore dhe biofizikë;
  • Ekonomia e barnave dhe digjitalizimi në shëndetësi;
  • Kërkime në onkologji dhe gjenetikë.

Ky spektër i gjerë tematik krijon hapësirë për diskutim multidisiplinar dhe bashkëpunim mes kërkuesve dhe praktikuesve.

Afatet e rëndësishme

Dorëzimi i abstrakteve: 10 tetor 2025

Njoftimi për pranim: 17 tetor 2025

Afati i hershëm i regjistrimit: 17 tetor 2025

Afati i vonuar i regjistrimit: 20 tetor 2025

Dorëzimi i punimeve të plota: 14 nëntor 2025

Vlerësimi shkencor (peer review): 17 tetor 2025

Udhëzime për autorët

Të gjitha materialet e dorëzuara duhet të jenë origjinale dhe të papublikuara më parë. Punimet që nuk janë në përputhje me kriteret e formatimit nuk do të merren parasysh. Gjatësia maksimale e punimit është 6 faqe. Udhëzimet e plota mbi standardet e pranimit dhe formatimin mund të gjenden në faqen zyrtare të konferencës: Konferenca e UBT-së

Continue Reading

Aktualitet

Arti dhe Media Digjitale në fokus – UBT mbledh studiues e profesionistë nga mbarë bota

Published

on

UBT ka kënaqësinë të ftojë studiues, profesionistë dhe krijues nga fusha të ndryshme për të marrë pjesë në Konferencën e 14-të Ndërkombëtare për Artin dhe Median Digjitale, e cila këtë vit zhvillohet në kuadër të Konferencës Ndërkombëtare të UBT-së për Biznes, Teknologji dhe Inovacion. Ky edicion vjen me fokus të veçantë mbi “Qëndrueshmërinë dhe Reziliencën”, si dy shtylla kryesore të zhvillimit në epokën digjitale.

Konferenca do të jetë një platformë e rëndësishme për shkëmbimin e dijeve dhe përvojave mes akademikëve, studentëve të programeve pasuniversitare, kandidatëve të doktoraturës, studiuesve të rinj dhe ekspertëve të industrisë. Synimi është të krijohet një hapësirë bashkëpunimi ku diskutohen tendencat më të reja dhe sfidat që lidhen me ndërthurjen e artit dhe teknologjisë.

Fushat që do të trajtohen:

  • Konferenca mbulon një spektër të gjerë temash, përfshirë:
  • Sfidat e artit dhe medias digjitale në epokën moderne;
  • Përdorimi i teknologjisë kreative në art dhe media digjitale;
  • Teknologjitë e reja që po transformojnë artin;
  • Performanca artistike në kohën e artit digjital;
  • Ndikimi i artit digjital në kulturën bashkëkohore;
  • E ardhmja e galerive dhe muzeve;
  • Ndikimi i teknologjisë në art dhe edukim;
  • Shprehjet kreative dhe interaktive;
  • Ndërveprimi njeri-kompjuter.

Datat kryesore të konferencës:

Dorëzimi i abstrakteve: 10 tetor 2025

Njoftimi për pranimin: 17 tetor 2025

Rishikimi shkencor (peer review): 17 tetor 2025

Regjistrimi i hershëm: 17 tetor 2025

Regjistrimi i vonuar: 20 tetor 2025

Dorëzimi i punimeve të plota: 14 nëntor 2025

Udhëzime për aplikim:

Punimet e paraqitura duhet të jenë origjinale, të papublikuara më parë dhe jo në proces shqyrtimi në konferenca apo revista të tjera. Tekstet duhet të jenë deri në 6 faqe dhe të përmbushin standardet e pranuara të konferencës. Punimet që nuk përmbushin kriteret e formatimit nuk do të merren në shqyrtim.

Për më shumë informacion mbi kriteret e aplikimit dhe procesin e regjistrimit, pjesëmarrësit ftohen të vizitojnë faqen zyrtare të konferencës në webfaqen e UBT-së: Konferenca e UBT-së

Kjo konferencë pritet të shndërrohet në një ngjarje unike ku arti, teknologjia dhe inovacioni takohen për të ndërtuar një të ardhme më kreative, më të qëndrueshme dhe më gjithëpërfshirëse.

Continue Reading

Aktualitet

UBT hap thirrjen për pjesëmarrje në Konferencën Ndërkombëtare mbi Artet Performuese 2025

Published

on

UBT ka hapur thirrjen për pjesëmarrje në Konferencën e 14-të Ndërkombëtare për Arte Performuese, e cila organizohet në kuadër të Konferencës së 14-të Ndërkombëtare të UBT-së për Biznes, Teknologji dhe Inovacion, me fokus të veçantë këtë vit tek Qëndrueshmëria dhe Rezilienca.

Ky aktivitet shkencor ndërkombëtar është i rishikuar nga ekspertë akademikë (peer reviewed) dhe ka për synim të sjellë së bashku studiues, praktikues, doktorantë, studentë pasuniversitarë, si dhe profesionistë të industrisë për të shkëmbyer njohuri, përvoja dhe qasje të reja në fushën e artit performues.

Datat e rëndësishme:

  • Dorëzimi i abstrakteve: 10 tetor 2025
  • Njoftimi i pranimit: 17 tetor 2025
  • Rishikimi nga ekspertët: 17 tetor 2025
  • Afati i hershëm i regjistrimit: 17 tetor 2025
  • Afati i vonshëm i regjistrimit: 20 tetor 2025
  • Dorëzimi i punimeve të plota: 14 nëntor 2025

Fushat që mbulon konferenca përfshijnë, por nuk kufizohen vetëm tek:

  • Zhvillimi i teatrit pas luftës në Kosovë
  • Roli i muzikës në ndërtimin e karakterit skenik
  • Përgatitja psikologjike e aktorit në interpretimin e roleve
  • Përgatitja fizike dhe rëndësia e saj për zhvillimin e aktorit
  • Kinematografia para dhe pas luftës në Kosovë dhe trajtimi i temave të luftës
  • Ndikimi i maskave greke në krijimin e maskave të teatrit modern
  • Audicionet, monologët dhe përzgjedhja e tyre
  • Teatri për fëmijë dhe të rinj
  • Teatri si terapi për fëmijë dhe të rritur
  • Inteligjenca Artificiale (AI) në aktrim

Konferenca synon të nxisë dialogun ndërdisiplinar dhe të krijojë një platformë unike për të diskutuar sfidat dhe prirjet e reja në artet performuese, duke i lidhur ato me zhvillimet globale në teknologji dhe shoqëri.

Punimet e paraqitura duhet të jenë origjinale, të papublikuara më parë dhe jo në proces shqyrtimi në ndonjë konferencë tjetër. Gjatësia maksimale e punimit është 6 faqe, sipas standardeve të specifikuara në faqen zyrtare të konferencës.

Për më shumë detaje dhe aplikim, vizitoni: KONFERENCA E UBT-së

Continue Reading

Të kërkuara