Në kuadër të Global UBT Fest 2025, u hap zyrtarisht Akademia Verore e Dizajnit, një prej aktiviteteve më frymëzuese të kësaj vere, ku studentët patën mundësinë të angazhohen në sesione praktike dhe diskutime kreative me fokus në dizajnin e veshjeve dhe shprehjen vizuale.

Aktiviteti u zhvillua në Kampusin e UBT-së në Lipjan dhe nisi më 7 korrik, me fjalën përshëndetëse dhe prezantimin e strukturës nga Furkan Rada, i cili udhëhoqi tërë ditën e parë të akademisë me tema motivuese dhe praktike.

Furkan Rada foli për:

• Rëndësinë e dizajnit të veshjeve si formë shprehjeje vizuale,
• Procesin kreativ nga koncepti deri te produkti final në treg,
• Përfitimet praktike dhe profesionale për studentët pjesëmarrës, si dhe
• Udhëzime për përgatitjen e punimeve për publikim online – duke nënvizuar rëndësinë e ndërtimit të portofolios digjital për karrierën e të rinjve në industrinë e modës dhe dizajnit.

Dita e dytë, më 8 korrik, solli në skenë profesorët Uran Krasniqi dhe Besfort Salihu, të cilët drejtuan një seancë reflektuese me vetë studentët:

• Prezantime të punimeve të realizuara nga vetë pjesëmarrësit,
• Komente dhe vlerësime profesionale nga juria akademike,
• Këshilla për përmirësimin e teknikave të dizajnit dhe
• Diskutim të hapur mbi rrugën e zhvillimit të mëtejshëm në këtë fushë.

Akademia Verore e Dizajnit në UBT është krijuar për të nxitur shprehjen artistike, të zhvillojë aftësitë praktike të studentëve dhe për t’i përgatitur ata për sfidat reale të industrisë kreative. Përmes një kombinimi të ligjëratave, punës praktike dhe vlerësimeve profesionale, studentët përfitojnë njohuri të vlefshme që tejkalojnë teorinë dhe i afron drejt tregut të punës.

Kjo akademi mbetet një shembull i përkushtimit të UBT-së për edukim cilësor, inovativ dhe të orientuar drejt suksesit të studentit.

Në ambientet moderne të Bibliotekës Qendrore të UBT-së në Kampusin e Lipjanit, më 7 dhe 8 korrik 2025 u zhvillua me sukses Akademia Verore e Fakultetit të Stomatologjisë, si pjesë e ngjarjes më të madhe akademike dhe shkencore në vend – Global UBT Fest 2025.

Ky aktivitet shërbeu si platformë ndërkombëtare për shkëmbim profesional, hulumtim shkencor, dhe inovacione teknologjike në stomatologji, duke mbledhur një numër të madh të folësve ndërkombëtarë, ekspertëve vendorë, studentëve, dhe profesionistëve të shëndetësisë orale.

Dita e parë nisi me fjalët përshëndetëse nga Prof. Dr. Agim Prokshaj, i cili theksoi përkushtimin e UBT-së për t’i sjellë studentëve dhe profesionistëve stomatologjinë e së ardhmes – duke integruar inteligjencën artificiale, teknologjitë digjitale dhe protokollet më të avancuara terapeutike.

Pas fjalimeve hyrëse, vijuan prezantimet nga folës ndërkombëtarë:

• Dr. Mohamed Nasreddine (Beirut) – për rolin e AI në diagnostikim
• Dr. Budima Pejkovska (Shkup) – analiza funksionale e overdentures
• Dr. Marjan Petkov (Shkup) – protokollet moderne në rehabilitimin protetik digjital
• Dr. Alban Olluri – trajtim mbi osteonekrozën e nofullës
• Dr. Aneta Mijoska – AI në stomatologji si asistencë, jo zëvendësim
• Thomas Garrod-Pullar (Amsterdam) – sfidat në qasjen në kujdes dentar për viktimat e dhunës seksuale në konflikte

Pas një pauze për drekë, folësit vendorë dhe rajonalë sollën prezantime me theks në praktikën klinike:

• Dr. Fitim Shabani – përdorimi i mikroskopit dentar
• Dr. Behar Ismajli – infeksionet në regjionin maksilofacial
• Arlind Celina – prezantim për MiYO Liquid Ceramic
• Dr. Albert Syla – krahasim mes implantëve monofazikë dhe bifazikë
• Dr. Yllka Gashi – prezantim për kompozitet dentarë restaurativë
• Dr. Nart Ajeti – roli i PRP në shërimin e indeve të buta dhe rigjenerimin e kockave

Dita e dytë ishte e dedikuar prezantimeve studentore, ku mbi 20 punime nga studentët u shpalosën përpara një paneli akademik dhe profesional. Temat varionin nga:

• ndikimi i ortodoncisë në vetëbesim dhe psikologjinë e buzëqeshjes,
• inteligjenca artificiale në stomatologji,
• zhvillimet në protezat maksilofaciale,
• përdorimi i printimit 3D për alignerë ortodontikë,
• trajtimi i dhëmbëve përmes ndërhyrjeve gjenetike,
• evolucioni i perceptimit estetik dhe përdorimi i softuerëve të “smile design”.

Kjo pjesëmarrje e gjerë studentore u përmbyll me diskutime të hapura dhe “Round Tables”, që ofruan reflektim dhe rrugë konkrete për avancimin e kërkimit dhe inovacionit në stomatologji.

Akademia Verore e Stomatologjisë në UBT dëshmoi edhe një herë angazhimin e institucionit për të ofruar edukim cilësor, të përditësuar dhe ndërkombëtar për gjeneratat e reja të profesionistëve të shëndetit oral, duke forcuar lidhjen midis dijes, teknologjisë dhe praktikës klinike.

Në kuadër të Global UBT Fest 2025, aktivitetit më të madh ndërdisiplinar në Kosovë dhe rajon, u zhvillua me sukses hapja zyrtare e Akademisë Verore të Fakultetit Juridik të UBT-së, e cila këtë vit është fokusuar në një nga mekanizmat më bashkëkohorë dhe efektivë të drejtësisë – ndërmjetësimin në zgjidhjen e mosmarrëveshjeve.

Ceremonia u mbajt në Dukagjini Center, ku të pranishmit u mirëpritën nga koordinatorja e kësaj akademie Prof. Asoc. Dr. Egzone Osmanaj. Në fjalët hyrëse, Osmanaj theksoi rëndësinë e akademive verore si platforma edukative që i tejkalojnë kufijtë e teorisë dhe nxisin përvojat praktike, duke krijuar ura të forta ndërmjet edukimit universitar dhe realitetit të profesionit juridik.

Pjesa qendrore e ditës së parë të akademisë ishte ligjërata dhe sesioni praktik i udhëhequr nga Ganimete Xhelili, Kryetare e Odës së Ndërmjetësve të Kosovës, e cila së bashku me Prof. Asoc. Dr. Jorida Xhafaj, prezantuan temën:

“Roli i ndërmjetësimit në zgjidhjen e mosmarrëveshjeve”, përmes një ligjërate interaktive dhe një seance të simuluar të ndërmjetësimit, duke përfshirë të gjitha etapat dhe rolet kyçe të procesit.

Studentët e Fakultetit Juridik dhe pjesëmarrësit patën mundësinë që jo vetëm të kuptojnë në teori këtë metodë të re, por edhe të përjetojnë në mënyrë praktike se si ndërmjetësuesit ndihmojnë palët të arrijnë marrëveshje me mirëkuptim dhe konsensus – pa qenë e nevojshme ndërhyrja e gjykatës.

Kjo përvojë u vlerësua si shumë e vlefshme për zhvillimin profesional të të rinjve juristë dhe një hap i rëndësishëm në formimin e tyre si profesionistë të së drejtës me aftësi ndërmjetësimi dhe menaxhimi të konflikteve.

Akademia Verore e Juridikut është pjesë e strategjisë së Fakultetit për të ofruar arsimim të integruar me tregun e punës, duke përfshirë trajnime, simulime, ligjërues nga praktika dhe ekspertë të fushave të ndryshme juridike.

Në ditët në vijim, kjo akademi do të vazhdojë me aktivitete tematike, punëtori dhe ligjërata të fokusuara në drejtësinë bashkëkohore, duke përfshirë çështje të rëndësishme të të drejtës civile, penale, ndërkombëtare dhe kushtetuese.

Në kuadër të aktivitetit më të madh akademik dhe kulturor në vend, Global UBT Fest 2025, është hapur zyrtarisht Akademia Verore e Fakultetit të Inxhinierisë së Mekatronikës, me temën qendrore: “Elektronika Energjetike dhe Ngasësit”.

Aktiviteti u zhvillua në Kampusin e UBT-së në Lipjan, ku morën pjesë studentë, profesorë, inxhinierë dhe të apasionuar pas teknologjisë dhe energjisë, për të diskutuar mbi trendet e fundit në fushën e elektronikës energjetike – një ndër fushat kyçe për të ardhmen e industrisë, automatizimit dhe energjisë së ripërtërishme.

Në fjalën hyrëse gjatë ceremonisë së hapjes, përfaqësues të fakultetit theksuan rolin kritik të inxhinierisë së mekatronikës në zhvillimet moderne teknologjike dhe industrinë 4.0. Ata nënvizuan rëndësinë që UBT i kushton përgatitjes profesionale të studentëve përmes edukimit praktik, laboratorëve të avancuar dhe shkëmbimit të përvojave në nivel ndërkombëtar.

Programi i Akademisë Verore nisi me ligjëratën: “Hyrje në elektronikën energjetike dhe komponentët kryesorë”, ku pjesëmarrësit u njohën me bazat dhe funksionimin e komponentëve më të rëndësishëm në qarkoret energjetike – përfshirë transistorët, diodat, rregullatorët dhe sistemet e menaxhimit të energjisë.

“DC/AC konvertuesit dhe aplikimet e tyre”, u trajtua përdorimi praktik i konvertuesve në sisteme industriale, energji të ripërtërishme dhe automjetet elektrike. U diskutua për rëndësinë e efikasitetit energjetik, menaxhimin e ngarkesës dhe integrimin në rrjete inteligjente.

Akademia Verore e Inxhinierisë së Mekatronikës në UBT synon të shërbejë si një platformë praktike dhe ndërdisiplinare ku studentët dhe profesionistët ballafaqohen me zgjidhje reale, pajisje moderne dhe risi që ndihmojnë në përgatitjen e gjeneratës së ardhshme të inxhinierëve.

Ky aktivitet është pjesë e qindra punëtorive, trajnimeve dhe ngjarjeve që po zhvillohen në kuadër të Global UBT Fest 2025, i cili përfshin fushat më të rëndësishme të arsimit, teknologjisë, shëndetësisë, kulturës dhe inovacionit.