Në kuadër të Kongresit të 15-të Kombëtar të Studentëve të Mjekësisë, i mbajtur nga data 12-14 prill 2025 në Universitetin Trakya, një delegacion i UBT-së zhvilloi një vizitë zyrtare në Shoqatën e Kërkimeve Shkencore të Universitetit Trakya (TÜBAT).

Gjatë takimit u diskutuan mundësitë për thellimin e bashkëpunimeve akademike dhe shkencore mes dy institucioneve, me fokus në projekte të përbashkëta, shkëmbime studentore dhe zhvillim profesional.

Delegacioni i UBT-së u përfaqësua nga Prof. Dr. Fisnik Laha, Dekan i Fakultetit të Biokimisë Mjekësore dhe Bioteknologjisë, dhe Prof. Dr. Cengiz Çesko. Takimi u përmbyll me shkëmbimin e dhuratave simbolike dhe me një ndjenjë të ndërsjellë respekti dhe bashkëpunimi.

UBT shpreh mirënjohjen për mikpritjen e ngrohtë dhe organizimin e shkëlqyer të kongresit, duke falënderuar në veçanti Kryetarin e TÜBAT-it, Ömer Bolat, si dhe të gjithë ekipin organizator për angazhimin dhe profesionalizmin.

Nëntë përfaqësues nga UBT morën pjesë së fundmi në një javë mobiliteti, organizuar nga Universiteti Teknologjik Sllovak në Bratislavë (STU). Gjatë javës u zhvilluan aktivitete të shumta interesante, që kishin për qëllim shkëmbimin e përvojave dhe forcimin e bashkëpunimit institucional.

Mobiliteti filloi me një takim mirëseardhjeje, duke krijuar një atmosferë bashkëpunuese dhe entuziaste për javën. Stafi i UBT-së pati gjithashtu mundësinë të takohej me ekipin e Green Team, ku u diskutua për Formula student dhe mënyrën e organizimit të ekipit, makinës dhe detaje tjera që mund të shërbejnë si frymëzim për zhvillime të ngjashme në UBT.

Për forcimin e mëtejshëm të lidhjeve akademike, u zhvillua një takim me Prof. Maroš Finka, udhëheqës i Qendrës së Ekselencës Spectra, ku u diskutuan mundësi bashkëpunimi kërkimor dhe shkëmbimi njohurish në fusha që lidhen me zhvillimin e qëndrueshëm urban dhe planifikimin hapësinor.

Për më tepër, përfaqësuesit e UBT-së u takuan me Zyrën për Marrëdhënie Ndërkombëtare (IRO), ku u trajtuan mundësitë për forcimin e mëtejshëm të shkëmbimeve të studentëve dhe stafit, projekteve të përbashkëta dhe bashkëpunimit akademik ndërkombëtar.

Java e mobilitetit u përmbyll me sukses, duke shënuar një tjetër arritje të rëndësishme në angazhimin e UBT-së për ndërkombëtarizim dhe përsosmëri akademike.

Në kuadër të bashkëpunimit të vazhdueshëm ndërkombëtar dhe nxitjes së debatit akademik në UBT, u mbajt ligjërata e dytë nga Ambasadori i Finlandës në Kosovë, Matti Nissinen, me temën “Zgjerimi i BE-së – Një moment i ri”.

Gjatë sesionit, Ambasadori Nissinen ndau me studentët një pasqyrë të thelluar mbi dinamikat në ndryshim të procesit të zgjerimit të BE-së, duke përfshirë perspektivën dhe rolin e Finlandës në këtë proces të rëndësishëm evropian. Ai theksoi rëndësinë strategjike të Ballkanit Perëndimor dhe vendin që zë Kosova në këtë kontekst të ri politik dhe institucional.

Ligjërata u shoqërua me diskutime të hapura dhe interaktive, ku studentët e UBT-së shfaqën një interes të jashtëzakonshëm. Ata parashtruan pyetje thelbësore mbi të ardhmen e Kosovës në Bashkimin Evropian, sfidat e integrimit, dhe mënyrat se si BE-ja mund të mbetet efikase edhe gjatë procesit të zgjerimit.

Energjia dhe kurioziteti i studentëve sollën një atmosferë dinamike, duke e kthyer ligjëratën në një përvojë të vlefshme mësimore, ku u shkëmbyen ide dhe qëndrime për çështje kyçe që ndikojnë të ardhmen e kontinentit.