Rektori dhe Presidenti i UBT-së, Prof. Dr. Edmond Hajrizi, në një prononcim për Albanian Post, ka theksuar se Metaversi përfaqëson një fazë të re të evolucionit teknologjik dhe njerëzor, duke e konsideruar atë si një mjet për rritjen e produktivitetit, efikasitetit dhe zhvillimit në të gjitha sferat e jetës.

“Metaversi është një teknologji, një proces, një zgjidhje që njerëzimi e kërkon për të rritur produktivitetin, efikasitetin, zhvillimin. Për hir të këtyre qëllimeve, shumë mendojnë se bota reale nuk është e mjaftueshme, prandaj duhet të krijohet edhe një botë virtuale”, u shpreh Hajrizi.

Sipas Hajrizit, kjo hapësirë digjitale na mundëson të përjetojmë përvoja që ndryshe do të ishin të paarritshme për shkak të kostos apo kufizimeve fizike.

“Mund të përjetojmë diçka që, ndoshta, për shkak të kostos financiare apo kohës, nuk do të arrinim ndryshe” tha Hajriziduke shtuar se “sigurisht që kemi ende shumë për të shtjelluar; duhet ta trajtojmë me kujdes, por gjithsesi ndikimi tashmë është i dukshëm”, shtoi ai.

Hajrizi, gjithashtu vuri në pah konceptin e “Digital Twin” – përfaqësimi virtual i realitetit në kohë reale. Ky koncept, që për shumëkënd mund të tingëllojë si shkencë fiktive, në të vërtetë është një nga drejtimet më konkrete dhe praktike të zhvillimit të Metaversit.

Në këtë drejtim, UBT ka qenë një nga institucionet e para në rajon që ka eksperimentuar dhe investuar në integrimin e koncepteve të tilla digjitale në infrastrukturën arsimore. Kampusi i UBT-së është shndërruar në një hapësirë model për aplikimin e teknologjive të avancuara si Internet of Things(IoT), sensorë të zgjuar, platforma interaktive dhe sisteme të menaxhimit inteligjent, duke u shndërruar në një shembull konkret se si një “Digital Twin” mund të funksionojë në praktikë.

“’Digital Twin’ do të thotë që jeta reale të përfaqësohet në kohë reale në botën virtuale. Kjo është një përjetim virtual i realitetit të asaj që ndodh në kampus. Unë, nga këtu ku jam, mund ta shoh kampusin tim, lëvizjet, parametrat, temperaturën, energjinë – gjithçka që dikush tjetër e sheh fizikisht, unë mund t’i qasem në mënyrë virtuale, edhe pse fizikisht nuk jam aty”, thekson Hajrizi./Albanian Post/

UBT ka dëshmuar edhe një herë përkushtimin e tij ndaj cilësisë dhe zhvillimit të qëndrueshëm, duke u renditur në mesin e universiteteve më të mira në rajon sipas THE Impact Rankings 2025 – klasifikimi global që mat performancën e universiteteve në përmbushjen e Qëllimeve të Zhvillimit të Qëndrueshëm (SDGs) të Kombeve të Bashkuara.

UBT qëndron larg përpara të gjitha universiteteve të tjera në Kosovë, duke dëshmuar përkushtimin e tij të vazhdueshëm për ndikim real në shoqëri, ekonomi dhe mjedis. Në këtë edicion të rankimit, UBT ka shënuar progres të theksuar krahasuar me vitet e kaluara, veçanërisht në disa fusha kyçe të qëndrueshmërisë globale si:

SDG 5 – Barazi gjinore: Me politika aktive për gjithëpërfshirje, barazi dhe fuqizimin e grave në edukim dhe menaxhim,

SDG 9 – Industri, Inovacion dhe Infrastrukturë: Përmes zhvillimit të ekosistemeve të inovacionit dhe teknologjisë, si dhe infrastrukturës së avancuar kërkimore,

SDG 11 – Qytete dhe komunitete të qëndrueshme: Me projekte të shumta në planifikimin dhe ndërtimin e kampuseve të mençura, reziliente dhe miqësore me mjedisin

SDG 12 – Konsum dhe prodhim i qëndrueshëm: Me integrimin e parimeve të ekonomisë qarkore në edukim dhe praktika institucionale.

Ky sukses është dëshmi e vizionit të UBT-së si institucion lider në arsimin e lartë, inovacion dhe zhvillim të qëndrueshëm, i cili jo vetëm që konkurron denjësisht në nivel ndërkombëtar, por edhe kontribuon ndjeshëm në ndërtimin e një të ardhmeje më të mirë për komunitetet lokale dhe më gjerë.

Times Higher Education (THE) Impact Rankings vlerëson dhe rangon universitetet në mbarë botën bazuar në kontributet e tyre në raport me promovimin dhe implementimin e Qëllimeve të Zhvillimit të Qëndrueshëm (SDGs) të Kombeve të Bashkuara. Ky rangim global përqendrohet në ndikimin shoqëror dhe mjedisor të një universiteti përmes mësimdhënies, kërkimit shkencor, angazhimit me komunitetin dhe politikave të brendshme – përtej aktivitetit klasik akademik dhe shkencor.

Institucionet ndër të tjera vlerësohen edhe për SDG 17 (Partneritet për Qëllimet), SDG 4 (Arsimi Cilësor), SDG 5 (Barazia Gjinore) dhe SDG 13 (Veprimi për Klimën). SDG-të tjera përfshijnë shëndetin, inovacionin dhe qytetet e qëndrueshme. Këto renditje promovojnë transparencën dhe inkurajojnë universitetet të harmonizojnë punën e tyre me sfidat globale, duke theksuar rolin e tyre në avancimin e zhvillimit të qëndrueshëm.

Në ambientet moderne të UBT-së në “Dukagjini Centre” në Prishtinë, u bë hapja e ekspozitës “Intermission” – një manifestim artistik që vjen si rezultat i punës njëvjeçare të studentëve të vitit të tretë të programit Art dhe Media Digjitale.

Kjo ekspozitë jo vetëm që dëshmon për angazhimin dhe talentin e studentëve, por gjithashtu shërben si platformë e fuqishme për promovimin e një prej programeve më të avancuara dhe multidisiplinare në UBT.

Art dhe Media Digjitale – një program në hap me kohën

Programi Art dhe Media Digjitale është ndërtuar për të përgatitur studentë që jo vetëm të zotërojnë teknikat tradicionale të artit, por edhe të eksperimentojnë me mediat digjitale, teknologjitë e reja dhe konceptet kuratoriale bashkëkohore.

Ekspozita “Intermission” është një pasqyrë e gjallë e kësaj qasjeje. Çdo vepër e prezantuar – nga instalacionet, te performancat dhe veprat me mesazh të thellë konceptual – reflekton një proces të plotë krijimtar, që fillon nga hulumtimi i mirëfilltë artistik, eksplorimi i materialeve e deri te përgatitja për publik.

Kuratorët e rinj: Studentët që praktikojnë që në vitin e parë

Një nga veçantitë e këtij programi, siç shpjegon profesori Gazmend Ejupi, është përfshirja e studentëve në procesin kuratorial që nga viti i parë. Ai thekson se roli i tij si profesor bëhet gjithnjë e më minimal në vitin e tretë, pasi studentët vetë marrin përgjegjësinë për zhvillimin e ekspozitës:

“Nga semestri i pestë nisim përgatitjet për ekspozitën – me hulumtim, zhvillim koncepti, eksplorim të materialeve dhe hapësirës, e në fund finalizohet ekspozita. Studentët praktikojnë realisht si të jenë artistë dhe kuratorë”, tha Ejupi.

Kjo qasje pedagogjike ka për qëllim që t’i përgatisë studentët për tregun real të artit, i cili sot kërkon aftësi shumëdimensionale: nga krijimi artistik e deri te menaxhimi dhe prezantimi i veprës.

Ekspozita u pasurua me vepra që sfidojnë normat dhe hapin debat rreth çështjeve të rëndësishme sociale, artistike dhe ekzistenciale. Bora Banishta, përmes instalacionit të saj “Author not Cited”, i vuri vetes dhe publikut një pyetje thelbësore:

Ndërkohë, studenti Art Çibukçiu, me veprën “Kjo nuk është një histori dashurie”, solli një kritikë të drejtpërdrejtë ndaj diskursit global të frikës dhe militarizimit, duke e konceptuar një “arsenal artistik” që kurrë të mos shndërrohet në armë të vërteta.

Ekspozita “Intermission”, e hapur deri më 27 qershor 2025, është më shumë se një ngjarje artistike: ajo është një demonstrim i kapaciteteve që po ndërtohen brenda UBT-së dhe një ftesë e hapur për të gjithë të rinjtë që duan të ndjekin një karrierë në fushën e artit bashkëkohor, dizajnit, medias digjitale dhe kuratorisë.

UBT, përmes programeve të tilla si Art dhe Media Digjitale, vazhdon të mbetet programi për ata që synojnë jo vetëm edukim, por transformim personal dhe profesional në një botë ku arti dhe teknologjia ndërthuren çdo ditë e më shumë.

UBT ka uruar sot të gjithë maturantët e Kosovës, të cilët po i nënshtrohen Provimit Shtetëror të Maturës, duke e cilësuar këtë proces si një hap kyç drejt të ardhmes akademike dhe profesionale të tyre.

Presidenti dhe Themeluesi i UBT-së, Prof. Dr. Edmond Hajrizi, ka theksuar rëndësinë e këtij momenti për të rinjtë e vendit.

“Provimi Shtetëror i Maturës është një moment ku do të reflektoni mbi dijet, përvojat dhe aftësitë që keni ndërtuar ndër vite. Jemi të bindur se jeni të përgatitur për të dhënë më të mirën nga vetja dhe për të hapur rrugën drejt një të ardhmeje të ndritur”, ka deklaruar Rektori Hajrizi.

UBT, si një nga institucionet lider të arsimit të lartë në vend, ofron një gamë të gjerë fushash studimi, qindra bursa, bashkëpunime me mbi 500 universitete ndërkombëtare, si dhe laboratorë të avancuar me teknologji të fundit.

UBT është i pranishëm në të gjitha qytetet kryesore të Kosovës, me kampuse në Prishtinë, Lipjan, Ferizaj, Pejë, Prizren, si dhe me qendra ndërkombëtare në Korçë, Budapest, Vjenë dhe Londër, duke i mundësuar studentëve një përvojë të gjerë akademike dhe ndërkombëtare.

UBT i fton të gjithë maturantët që të shohin drejt një rruge të re ku dijet, teknologjia dhe vizioni takohen për të ndërtuar të ardhmen.