Studenti i programit master Shkencat Ushqimore dhe Bioteknologji në UBT, Jasin Kadrija, ka shënuar një sukses të rëndësishëm akademik, pasi rezultatet e studimit të tij shkencor mbi pijen tradicionale të fermentuar boza janë publikuar në revistën ndërkombëtare Food. Science. Technology. Quality, me seli në Poloni dhe të indeksuar në bazën prestigjioze Scopus.

Punimi është realizuar në kuadër të temës së masterit, nën mentorimin e stafit akademik të UBT-së, duke trajtuar karakteristikat dhe potencialin e kësaj pijeje tradicionale përmes metodave bashkëkohore të kërkimit shkencor.

Ky publikim paraqet një tjetër dëshmi të cilësisë së studimeve pasuniversitare në UBT dhe të përkushtimit të institucionit për ta integruar kërkimin shkencor në procesin mësimor. Përmes angazhimit në projekte kërkimore dhe publikimeve në revista të njohura ndërkombëtare, studentët e UBT-së kanë mundësinë të kontribuojnë në avancimin e dijes dhe të bëhen pjesë e komunitetit shkencor global.

Publikimi në një revistë të indeksuar në Scopus konfirmon standardet e larta akademike të punimit dhe rëndësinë e bashkëpunimit ndërmjet studentëve dhe profesorëve në zhvillimin e kërkimit shkencor.

Profesorët e UBT-së po vazhdojnë të japin kontribut të rëndësishëm në kërkimin shkencor ndërkombëtar përmes publikimit të punimeve në revista me ndikim të lartë, duke afirmuar edhe një herë cilësinë akademike dhe angazhimin kërkimor të institucionit.

Një nga publikimet më të fundit është punimi shkencor “Multidisciplinary Orthodontic Management of Non-syndromic Delayed Tooth Eruption and Impacted Maxillary Canine Complicated by Traumatic Mandibular Fracture in a Healthy Adolescent: A Case Report”, i autores Prof. Miranda Sejdiu Abazi, në bashkëpunim me Saranda Sejdiu Sadiku, Alban Olluri dhe Arben Abazi, i botuar në revistën prestigjioze European Journal of Dentistry.

Punimi paraqet një rast klinik kompleks, ku trajtohet menaxhimi i eruptimit të vonuar të shumë dhëmbëve të përhershëm, kaninit maksilar të impaktuar dhe kafshimit të thellë, përmes një qasjeje të integruar ortodontike, kirurgjikale dhe biomekanike. Vlerën shkencore të studimit e rrit edhe trajtimi i një komplikimi të paparashikuar – frakturës traumatike të mandibulës gjatë procesit terapeutik – që kërkoi koordinim të ngushtë multidisiplinar deri në përfundimin me sukses të trajtimit.

Përveç rëndësisë klinike, studimi ofron një kontribut të vlefshëm edukativ për profesionistët dhe studentët e stomatologjisë, duke paraqitur një model praktik të planifikimit të trajtimit, vendimmarrjes terapeutike dhe menaxhimit të rasteve komplekse. Publikimi në European Journal of Dentistry, revistë e renditur në kategorinë Q1 në Scopus, me CiteScore 5.1 dhe Impact Factor 2.2, dëshmon nivelin e lartë shkencor të këtij kontributi.

Një tjetër arritje e rëndësishme është publikimi i artikullit “Can Artificial Intelligence Replace the Orthodontist’s Hand?”, me Prof. Miranda Sejdiu Abazi si autore e vetme, në European Journal of General Dentistry.

Artikulli trajton një nga temat më aktuale të ortodoncisë moderne, duke analizuar ndikimin gjithnjë e më të madh të inteligjencës artificiale në diagnostikim, planifikimin e trajtimit dhe vendimmarrjen klinike. Në të njëjtën kohë, punimi ngre një pyetje thelbësore për të ardhmen e profesionit: nëse zhvillimi i inteligjencës artificiale mund ta zëvendësojë ekspertizën, gjykimin klinik dhe përgjegjësinë profesionale të ortodontit.

Në analizën e saj, autorja argumenton se, megjithëse inteligjenca artificiale dhe sistemet robotike po transformojnë mënyrën e punës në ortodonci dhe rrisin saktësinë e proceseve diagnostikuese e terapeutike, ato mbeten mjete mbështetëse që nuk mund të zëvendësojnë përvojën, arsyetimin klinik dhe vendimmarrjen njerëzore.

Këto publikime dëshmojnë angazhimin e vazhdueshëm të stafit akademik të UBT-së në zhvillimin e kërkimit shkencor dhe kontribuojnë në avancimin e njohurive në fushën e stomatologjisë dhe ortodoncisë, duke rritur njëkohësisht prezencën dhe reputacionin ndërkombëtar të UBT-së në komunitetin akademik.

Fakulteti i Psikologjisë në UBT ka pranuar një donacion prej 200 ekzemplarësh të librit “Beni, Lilly dhe Omid”, të shkruar nga autorja Marianne Herzog. Ky libër, me vlera të veçanta edukative dhe psikologjike, do të shërbejë si një literaturë e çmuar për pasurimin profesional dhe zhvillimin e mendimit kritik te studentët.

Librat u pranuan zyrtarisht nga Prof. Emrush Thaçi, i cili dha edhe një kontribut profesional në redaktimin e botimit, dhe Prof. Fatbardha Osmani-Qehaja. Me këtë rast, stafi akademik shprehu mirënjohje të thellë ndaj autores Herzog për humanizmin dhe mbështetjen e treguar ndaj psikologëve të ardhshëm.

Për realizimin e këtij donacioni, UBT falënderon veçanërisht Dr.  Xhezide Lumi për ndërmjetësimin e saj, si dhe znj. Drita Ibrahimi, e cila përfaqësoi autoren në organizimin dhe dorëzimin e librave.

Një falënderim i veçantë i dedikohet edhe kompanisë “Ballkan Petrol” Sh.P.K., e cila tregoi përgjegjësi të lartë sociale duke mundësuar transportin e librave nga Zvicra në Kosovë.

Ceremonia e hapjes mblodhi studentë, profesorë dhe pjesëmarrës të interesuar për zhvillimet bashkëkohore në fushën e medias, komunikimit dhe teknologjisë, duke krijuar një hapësirë për shkëmbimin e njohurive, përvojave dhe ideve inovative.

Në kuadër të programit të ditës së parë, Prof. Votim Hanolli mbajti ligjëratën me temën “Teknologjia Arsimore dhe Mjetet Digjitale”, ku trajtoi ndikimin e teknologjive moderne në procesin e mësimdhënies dhe të të nxënit. Gjatë prezantimit u diskutua rëndësia e përdorimit të platformave dhe mjeteve digjitale në edukim, si dhe roli i tyre në zhvillimin e kompetencave të reja profesionale, komunikimit efektiv dhe përshtatjes me kërkesat e epokës digjitale.

Po ashtu, Prof. Halil Ponik mbajti ligjëratën me temën “Aktiviteti i përbashkët me Universitetin e Elbasanit”, ku prezantoi bashkëpunimin akademik ndërinstitucional dhe rëndësinë e projekteve të përbashkëta në avancimin e arsimit të lartë.

Gjatë sesioneve u zhvilluan diskutime interaktive me pjesëmarrësit, të cilët patën mundësinë të ndajnë përvoja, të parashtojnë pyetje dhe të diskutojnë mbi sfidat dhe mundësitë që teknologjia dhe bashkëpunimi akademik sjellin për profesionistët e ardhshëm të medias dhe komunikimit.

Akademia Verore e Fakultetit të Media dhe Komunikimit do të vazhdojë edhe në ditët në viim me ligjërata, punëtori dhe aktivitete në terren, duke ofruar një platformë të rëndësishme për zhvillimin akademik dhe profesional të studentëve, si dhe për promovimin e inovacionit dhe bashkëpunimit në fushën e medias dhe komunikimit. /E.S/