Lajmet

UBT e nis vitin 2022 me një hapësirë shtesë me mbi 22 mijë metra katrorë

Të gjitha këto investime kanë për synim që të nxisin të diplomuarit që të përballen suksesshëm me sfidat e ardhshme.

Publikuar

UBT ka zgjeruar infrastrukturën e tij edhe me mbi 22 mijë metra katrorë më shumë, duke modernizuar deri në detajin e fundit kushtet për studime të avancuara e komode për studentët e saj. Po ashtu, duke krijuar një ambient frymëzues e relaksues të punës për komunitetin e saj të madh që përbëhet nga mbi një mijë të punësuar.

Me hapësirën e re, një objekt modern e me arkitekturë bashkëkohore e me standardet më të larta të ndërtimit, përfshirë kujdesin e jashtëzakonshëm për izolimin e tij sipas standardeve më të mira eco, me vendosjen e paneleve solare për energjinë e ripërtëritshme, UBT krahas kualitetit të lartë të studimeve tani po vendos një standard të ri në arsimin e lartë edhe në fushën e infrastrukturës e ndërtimit, duke e bërë këtë institucion model edhe për universitetet përtej Kosovës me kushtet që ofron.

Rektori i UBT-së, prof.dr. Edmond Hajrizi, konsideron se infrastruktura është një prej parametrave kryesorë krahas cilësisë, që garanton një shkollim të suksesshëm.

“Ne punojmë çdo ditë për të rritur kualitetin e studimeve, duke përmirësuar infrastrukturën, duke sjellë teknologjinë më të avancuar, laboratorët më modern e duke e kombinuar mësimdhënien me punë praktike brenda ekosistemit që kemi krijuar në UBT”, është shprehur rektori Hajrizi, duke e parë si çelësin e suksesit ndërlidhjen e mësimdhënies teorike me angazhim në prodhim apo shërbim, si testin final për kualifikimin e profesionistëve të rinj, e për çka infrastruktura e avancuar e moderne është parakushti themelor.

“Me infrastrukturën që ofron sot UBT, studenti ynë ka gjithçka çka i nevojitet brenda ekosistemit për të korrur sukses në studimet e tij dhe për t’i shërbyer me kapacitete të forta profesionale e akademike shoqërisë”, ka shtuar ai.

UBT aktualisht ka mbi njëmijë të punësuar, mbi 15 mijë studentë aktivë, mbi 150 specializime të ndryshme studimi, mbi 200 laboratorë të ndryshëm, poliklinikën, qendrat më të mëdha në rajon për teknologji dhe inovacion, qendrën 5G, qendrën e realitetit virtual dhe të shtuar, fabrikat e mençura, serat bujqësore, kopshtin botanik, infrastrukturën e modernizuar sportive e rekreative, kampuse në të gjitha qendrat kryesore në Kosovë, si dhe Hub-et më të mëdha teknologjike në Korçë – Shqipëri, Prishtinë dhe Prizren.

Të gjitha këto investime kanë për synim që të nxisin të diplomuarit që të përballen suksesshëm me sfidat e ardhshme, duke i shërbyer me krenari familjes, shtetit e kombit të tyre.

Lajmet

​Në Austri, nga shkurti vaksinimi bëhet i detyrueshëm për të gjithë mbi 18-vjeç

Pothuajse dy muaj më parë, qeveria njoftoi se në fillim të këtij viti do të vendoste vaksinimin e përgjithshëm të detyrueshëm.

Publikuar

nga

Austria po bën të detyrueshëm vaksinimin kundër koronavirusit për të rriturit në fillim të shkurtit, nën kërcënimet për dënime të larta, tha kancelari austriak Karl Nechamer, duke deklaruar se është i vetëdijshëm për natyrën “sensitive” të një vendimi të tillë, vendimi i parë i tillë në Evropë.

“Siç ishte planifikuar, ne po vendosim vaksinimin e detyrueshëm për njerëzit mbi 18-vjeç në fillim të shkurtit”, u tha gazetarëve kreu i qeverisë konservatore, të cilën ai e drejton së bashku me ambientalistët.

Qeveria propozoi sot një plan të rishikuar për vaksinimin e detyrueshëm, i cili tani do të zbatohet për këdo mbi moshën 18-vjeç, në vend të 14, siç ishte planifikuar fillimisht. Zyrtarët thanë se prezantimi gradual i planit do t’u jepte njerëzve mundësi të mjaftueshme për t’u vaksinuar.

Pothuajse dy muaj më parë, qeveria njoftoi se në fillim të këtij viti do të vendoste vaksinimin e përgjithshëm të detyrueshëm. Aspektet kryesore të planit mbeten në versionin përfundimtar, që do të debatohet në parlament të enjten, por zyrtarët thanë se konsultimet me dy parti opozitare dhe të tjera kanë treguar se nevojiten ndryshime në disa detaje.

Nechamer tha se ka pasur shqetësime për faktin se adoleshentët po ndëshkohen, ndaj është bërë një ndryshim dhe është futur vaksinimi i detyrueshëm që në moshën 18-vjeçare.

Për javë të tëra, ka pasur debate të ashpra në Parlament mbi planin në një vend ku 78.5 për qind e popullsisë që mund të vaksinohet është vaksinuar plotësisht deri më tani.

Qeveria austriake ka një shumicë të madhe në parlament, përveç konservatorëve dhe të gjelbërve, këtë propozim e mbështesin edhe krerët e Partive Socialdemokrate dhe Liberale. Kundër tij është vetëm partia e ekstremit të djathtë, në emër të “mbrojtjes së lirive individuale”.

Kancelari tha se ishte një “plan i ndjeshëm”, por se ishte “në përputhje me Kushtetutën” dhe se kishte një fazë rregullimi që lejonte ata që hezitonin të vaksinoheshin deri në mes të marsit.

Të shtunën, 27.000 njerëz demonstruan në Vjenë kundër masës së diskutueshme, e cila besohet se shkel liritë individuale.

Në fillim të shkurtit do të vendosen kontrollet dhe personat e pa vaksinuar do të gjobiten nga 600 deri në 3600 euro në rast të përsëritjes së krimit.

Pjesë të ligjit mund të pezullohen me miratimin e komisionit parlamentar, nëse, për shembull, variantet e ardhshme të virusit janë më të buta ose ekspertët vlerësojnë se vaksinimi nuk është më rruga përpara.

Vaksinimi po bëhet i detyrueshëm në një numër në rritje vendesh për profesione të caktuara, kategori popullsie apo aktivitete të caktuara. Por vaksinimi antiCOVID-19 i detyrueshëm për të gjithë është ende një përjashtim.

Një masë e tillë hyri në fuqi në Ekuador, Taxhikistan, Turkmenistan, Indonezi dhe Mikronezi.

Në Gjermani, një propozim i ngjashëm, i mbrojtur nga kancelari socialdemokrat Olaf Scholz, mund të shqyrtohet në Bundestag në fund të janarit.

Qeveria austriake e justifikon këtë masë me mbingarkesën e spitaleve dhe dëshirën për të arritur një shkallë vaksinimi prej 90 për qind, që do të mundësonte, sipas këshillave të ekspertëve, arritjen e imunitetit kolektiv.

Sipas qeverisë, deri sot, 5.8 milionë njerëz kanë certifikatë vaksinimi në Austria, e cila ka 7.4 milionë njerëz që mund të vaksinohen.

Vazhdo të lexosh

Lajmet

​Masa të reja për hyrje në Slloveni

Vendimi hyn në fuqi të hënën, më 17 janar.

Publikuar

nga

Vlefshmëria e certifikatës për vaksinimin dhe shërim nga COVID-19 për ata më të vjetër se 18-vjeç po zgjatet nga gjashtë në nëntë muaj dhe vendimi do të zbatohet nga 1 shkurti, njoftoi Qeveria e Sllovenisë në faqen e saj zyrtare në internet.

Autoritetet sllovene kanë marrë gjithashtu një vendim që një person i dërguar nga policia në karantinë shtatëditore kur hyn në Slloveni nuk mund ta ndërpresë atë pas pesë ditësh me një test negativ PCR.

Vendimi hyn në fuqi të hënën, më 17 janar, është publikuar në faqen e Ministrisë së Punëve të Brendshme të Sllovenisë.

Masat e reja në Slloveni janë në fuqi që nga 10 janari për shkak të përhapjes së variantit omicron të koronavirusit, të cilat përfshijnë shkurtimin e vlefshmërisë së testeve negative për hyrje në vend, kështu që testi PCR është i vlefshëm për 48 orë dhe antigjen i shpejtë vetëm 24 orë.

Fëmijët nën moshën 12-vjeç dhe pasagjerët në transit nëpër Slloveni, me kohëzgjatje jo më shumë se 12 orë, përjashtohen nga detyrimi për të pasur dokumente COVID për hyrje në Slloveni.

Vazhdo të lexosh

Lajmet

Jimmy Donaldson, njeriu me fitimet më të mëdha nga YouTube për vitin 2021

Donaldson tejkaloi për nga fitimet 10-vjeçarin Ryan Kaji, i cili kryesoi listën e përvitshme dy vitet e fundit.

Publikuar

nga

Jimmy Donaldson, 23-vjeçar me prejardhje nga Amerika, i njohur ndryshe edhe si MrBeast, ishte më i paguari i vitit 2021 nga YouTube, sipas Forbes. Ai ka gjeneruar më shumë se 10 miliardë shikime në platformë dhe arriti 54 milionë dollarë fitime.

Donaldson tejkaloi për nga fitimet 10-vjeçarin Ryan Kaji, i cili kryesoi listën e përvitshme dy vitet e fundit.

Bashkërisht, dhjetë “YouTuber-ët” më të paguar arritën shifrën 300 milionë dollarë në vitin 2021, sipas revistës amerikane.

Në vendin e dytë renditet Jake Paul, kjo shënon edhe pozicionimin e tij të parë në topdhjetëshe që nga viti 2018, dhe vëllai i tij Logan, i cili u rikthye, meqë mungoi që nga viti 2017.

Gjatë pandemisë, shumica e mediave tradicionale e patën të vështirë të përshtaten. Filmat u shtyen, oraret e telenovelave u ndryshuan dhe lansimi i videolojërave u shtye. Për platformën YouTube, kjo mund të konsiderohet një “lloj shpërthimi”.

Sipas ekspertëve, në vitin 2021, kjo platformë kishte 2.3 miliardë përdorues në nivel botëror. YouTube thotë se një miliard orë përmbajtje vizuele konsumohen në platformë çdo ditë./UBTNews

Vazhdo të lexosh

Art

Një faqe e librit rreth historisë së Spider-Man u shit për 3 milionë dollarë

Rekordi i mëparshëm për një faqe të një libri komik amerikan ishte 657 mijë e 250 dollarë.

Publikuar

nga

Vetëm një faqe e një libri komik të vitit 1984 për Spider-Man, u shit në ankand të enjten për një çmim 3.36 milionë dollarë.

Krijimtaria artistike e Mike Zeck për faqen 25 nga “Secret Wars No. 8” të Marvel Comics sjell paraqitjen e parë të kostumit të zi të Spidey. Kostumi simbiotik përfundimisht do të çonte në shfaqjen e personazhit Venom.

Rekordi i mëparshëm për një faqe të një libri komik amerikan ishte 657 mijë e 250 dollarë. Këtë rekord e mbante një faqe e librit “The Incredible Hulk” të vitit 1974.

Të enjten po ashtu edhe disa kopje të mbetura të “Action Comics No.1”, u shitën për 3.18 milionë dollarë, duke e vënë atë në mesin e librave më të shtrenjtë të shitur.

Asnjë nga shitësi apo blerësit nuk u identifikuan./UBTNews

Vazhdo të lexosh

Të kërkuara