Twitter paditet për qira të papaguar në selinë e tij në Londër

Platforma është paditur nga Crown Estate.

Published

3 years ago

January 24, 2023

UBT news

Kjo nuk është hera e parë që Twitter është futur në telashe për mospagesë së qirasë.

Twitter është paditur nga Crown Estate mes akuzave për qira të papaguar në selinë e tij në Londër.

Crown Estate, e cila menaxhon një mori pronash që i përket monarkisë, paraqiti një çështje në Gjykatën e Lartë javën e kaluar.

Zyra e Twitter është e vendosur pranë Piccadilly Circus në qendër të Londrës – por raportet kanë sugjeruar se gjigandi i teknologjisë ka hequr shenjat dhe logot nga hapësira në muajt e fundit.

Sipas The Daily Telegraph, Twitter kishte nënshkruar një qira prej 2.6 milionë funte në vit për katin e tretë, por mosmarrëveshja lidhet me borxhet e qirasë në katin e parë në të njëjtën ndërtesë.

Elon Musk mori përsipër kompaninë në një marrëveshje prej 44 miliardë dollarësh (35 miliardë £) vitin e kaluar, dhe më pas filloi të shkurtonte mijëra vende pune.

Kjo nuk është hera e parë që Twitter përballet me akuza për qira të papaguar në zyrat e tij.

Në fillim të këtij muaji, qiradhënësi i selisë së saj në San Francisko pretendoi se kompania i detyrohej 136,260 dollarë (110,073 £).

Twitter ende nuk ka komentuar mbi akuzat e fundit të bëra nga Crown Estate./UBTNews/

Apple drejt marrëveshjes së re me Intel për prodhimin e çipave

Published

22 minutes ago

December 8, 2025

UBT News

Apple përdorte për vite me radhë çipat e Intel në laptopët dhe kompjuterët desktop, por u largua prej tyre pasi kompania lançoi çipat e saj të serisë M, të dizajnuar plotësisht brenda Apple.

Tani duket se dy kompanitë janë pranë një marrëveshjeje të re, por këtë herë rolet do të jenë të ndryshme. Intel nuk do të ketë asnjë rol në fazën e projektimit, ai shërben vetëm si prodhues çipash për Apple.

Apple synon të mos mbështetet tërësisht te TSMC për prodhimin e çipave të saj, dhe Intel paraqet një alternativë të rëndësishme.

Sipas analistit të GF Securities, Jeff Pu, pritet që Apple dhe Intel të arrijnë një marrëveshje për prodhimin e një pjese të çipave të serisë A për modelet iPhone jo-Pro, duke filluar nga viti 2028.

Fillimisht, Intel do të prodhonte vetëm një përqindje të vogël të këtyre çipave, ndërsa TSMC do të mbetet furnizuesi kryesor.

Muajin e kaluar, analisti Ming-Chi Kuo raportoi se Intel pritet të nisë prodhimin e çipave të serisë M të Apple për modelet më të ulëta të Mac dhe iPad, duke filluar nga mesi i vitit 2027.

Për prodhimin e këtyre çipave të serisë M, Apple do të përdorë procesin e avancuar 18A të Intel, i cili konsiderohet si teknologjia më e hershme nën 2nm e prodhuar ndonjëherë në Amerikën e Veriut. /A.Z/UBT News/

Teknologji

Netflix bëhet pronar i Warner Bros dhe HBO pas marrëveshjes gjigante

Published

3 days ago

December 5, 2025

UBT News

Netflix ka fituar garën për blerjen e “Warner Bros.” dhe “HBO” në një marrëveshje prej rreth 72 miliardë dollarësh (plus borxhin), një lëvizje që mund të riformësojë rrënjësisht industrinë e Hollywoodit.

Megjithatë, marrëveshja pritet të hasë rishikim të rreptë rregullator në SHBA dhe jashtë saj.

“Warner Bros. Discovery” synon të ndahet në dy kompani të veçanta në vitin 2026: Netflix do të blejë pjesën “Warner”, ndërsa “Discovery Global” do të mbajë CNN-in dhe kanalet e tjera kabllore.

Paramount konsiderohej pretendent kryesor, madje me mbështetje politike nga presidenti amerikan Donald Trump, por Netflix e kaloi me një ofertë më agresive dhe duke pranuar të njëjtën tarifë të lartë “breakup fee” në rast dështimi të marrëveshjes.

Shumë politikë dhe figura të industrisë kanë shprehur shqetësime për ndikimin në konkurrencë dhe në kinematë tradicionale.

Netflix thotë se asetet e WBD-së janë plotësuese dhe premton të ruajë publikimet teatrale për filmat e “Warner Bros.” Sipas analistëve të Bank of America, nëse blerja finalizohet, Netflix do të bëhet fuqia dominuese e padiskutueshme në botën e transmetimit. /A.Z/UBT News/

Teknologji

Windows 11 dhe procesorët, lista e re e Microsoft shkakton konfuzion

Published

3 days ago

December 5, 2025

UBT News

Microsoft ka përditësuar dokumentacionin zyrtar të Windows 11, duke dhënë informacion mbi procesorët që janë të pajtueshëm me sistemin operativ.

Ky përditësim u mundëson përdoruesve të kontrollojnë në mënyrë të sigurt nëse procesori i tyre mund të drejtojë Windows 11, pa pasur nevojë për metoda jozyrtare për të kaluar kërkesat e sistemit.

Megjithatë, përditësimi ka sjellë pak konfuzion. Në vend që të listohen modelet konkrete të procesorëve, dokumentacioni i ri tregon vetëm seritë e procesorëve – për shembull, “Intel Core i7 (gjenerata 14)” ose “Intel Core 7000X Series”.

Kjo do të thotë se disa procesorë të njohur si të mbështetur më parë mund të mos shfaqen qartë, ndërsa disa të tjerë mund të përfshihen, edhe pse nuk janë zyrtarisht të pajtueshëm.

Interesante, ky format i ri i listës aplikohet vetëm për procesorët Intel, ndërsa për procesorët AMD dhe Qualcomm, lista vazhdon të tregojë çdo model të mbështetur, si më parë. /A.Z/UBT News/

Teknologji

Gemini futet në Google Maps, përvoja e udhëtimit nuk do jetë më e njëjta!

Published

3 days ago

December 5, 2025

UBT News

Google Maps po përgatitet të sjellë një përvojë më të avancuar navigimi për përdoruesit e Android dhe iPhone, falë integrimit të funksionalitetit të ri të inteligjencës artificiale Gemini.

Ky përditësim synon të ofrojë një navigim më të thjeshtë, më të personalizuar dhe më të përshtatshëm për të gjithë përdoruesit.

Në versionin më të ri, ikona e mikrofonit është zëvendësuar me simbolin e Geminit, duke sinjalizuar prezencën e asistentit të ri AI.

Me aktivizimin e tij, në ekran shfaqet unaza që tregon se Gemini është gati të marrë komanda me zë. Sistemi i ri do të mbështesë të gjitha mënyrat e lëvizjes: me makinë, transport publik, në këmbë dhe me biçikletë.

Përmes komandave zanore, përdoruesit kërkojnë destinacione, rrugë alternative, informacione për trafikun apo vendndodhje të caktuara pa pasur nevojë të prekin ekranin. Kjo rrit ndjeshëm sigurinë gjatë ngasjes dhe e bën navigimin më praktik.

Google shfrytëzon inteligjencën e Geminit për të ofruar sugjerime të personalizuara e navigim fleksibël, duke e kthyer aplikacionin në një asistent të zgjuar për çdo udhëtim. Funksioni është në fazën testuese dhe pritet të shpërndahet tek përdoruesit gjatë javëve të ardhshme.

Ky integrim ndryshon mënyrën se si përdoruesit ndërveprojnë me Google Maps, duke kombinuar navigimin tradicional me AI për një eksperiencë më të qetë, më të thjeshtë dhe më efikase. /A.Z/UBT News/