Google zbuloi “aksidentalisht” pamjen e gjithë serisë së ardhshme të telefonave inteligjentë Pixel 10, pak më pak se një muaj para prezantimit zyrtar.

Android Authority arriti të merrte në dorë pamjet e Pixel 10, Pixel 10 Pro, Pixel 10 Pro XL dhe Pixel 10 Pro Fold.

Dizajnet dhe ngjyrat përputhen me atë që është mësuar rreth pajisjeve në javët e fundit, duke përfshirë një njoftim paraprak që Google e publikoi publikisht.

Thashethemet thonë se Google ka bërë përmirësime në të gjithë Pixel 10, duke përfshirë shtimin e një kamere të tretë në Pixel 10 bazë, performancë më të mirë për Pixel 10 Pro, si dhe rezistencë ndaj pluhurit për Pixel 10 Pro Fold.

Google do të zbulojë serinë e pajisjeve Pixel 10 gjatë eventit të saj “Made by Google” më 20 gusht.

Pas një dekade funksionimi, YouTube ka vendosur të mbyllë faqen e njohur “Trending” (Në trend), si dhe listën “Trending Now”, duke hapur rrugën për një sistem të ri: YouTube Charts.

Kompania njoftoi se këto ndryshime do të hyjnë në fuqi në fund të korrikut 2025. YouTube Charts do të ofrojë një mënyrë më të sofistikuar për të ndjekur përmbajtjet më të shikuara, të ndara sipas temave dhe kategorive, përfshirë: videoklipe muzikore, podkaste, trejlerë filmash e më shumë.

Përmbajtjet që lidhen me lojërat do të jenë të qasshme përmes seksionit Gaming Explore.

Ky vendim erdhi pasi mënyra e konsumimit të përmbajtjes në YouTube ka ndryshuar ndjeshëm ndër vite. Shumica e përdoruesve orientohen drejt Shorts, videove të sugjeruara nga algoritmi dhe platformave alternative si TikTok – duke shmangur seksionin Trending.

Krijuesit e përmbajtjes kanë kritikuar listën “Trending”, duke e cilësuar si të padrejtë, pasi ajo shpesh ka favorizuar markat e mëdha dhe përmbajtjet zyrtare, duke lënë në hije autorët e pavarur. Për të balancuar këtë problem, YouTube ka paralajmëruar edhe mjete të reja për krijuesit:

Inspiration Tab: Përdor inteligjencën artificiale për të sugjeruar ide kreative bazuar në interesat aktuale të audiencës;

Hype: Një funksion eksperimental, që u lejon përdoruesve të përkrahin video të caktuara që shfaqen në një playlist të zgjeruar të përmbajtjeve në trend.

Ndërkohë, YouTube Charts është aktiv në disa shtete dhe pritet të zëvendësojë përfundimisht seksionin Trending brenda pak javësh.

Donald Trump ka deklaruar se SHBA do të “fitojë” garën e Inteligjencës Artificiale (Al), ndërsa administrata e tij zbuloi Planin e saj të Veprimit për Al.

Plani i ri është hartuar për të përshpejtuar ndërtimin e qendrave të të dhënave që kërkojnë shumë energji – që drejtojnë produkte të Al – duke lehtësuar rregullat mjedisore, ndërsa zgjerojnë gjithashtu shumë shitjen e teknologjive jashtë vendit, shkruan skynews.

Plani, i cili përfshin 90 rekomandime, vjen ndërsa SHBA përpiqet të ruajë avantazhin e saj ndaj Kinës, me të dy superfuqitë që investojnë shumë në industri për të siguruar superioritet ekonomik dhe ushtarak.

Ai bën thirrje për eksportimin e softuerëve e pajisjeve të Al amerikane jashtë vendit, dhe kërkon heqjen e “burokracisë” që mund të shihet si pengesë për lulëzimin e industrisë. Në një fjalim në Uashington, Trump tha: “SHBA është vendi që filloi garën e Inteligjencës Artificiale. Dhe si president, jam këtu sot për të deklaruar se SHBA do ta fitojë atë.”

Ai shtoi se gara e armëve teknologjike me Kinën ishte një luftë që do të përcaktojë shekullin e 21-të.

Presidenti shtoi: “Ne gjithashtu duhet të kemi një standard të vetëm federal, jo 50 shtete të ndryshme që rregullojnë këtë industri në të ardhmen.”

Studiuesit polakë nga ekipi i Security Exploration arritën të hakonin çipin që ruan profilet e kartave eSIM (kartat SIM të integruara), duke hapur kuti të Pandorës me probleme të mundshme si klonimi i kartave SIM, falsifikimi dhe përgjimi i thirrjeve dhe SMS-ve.

Objektivi i sulmit të tyre ishte çipi Kigen eUICC, i cili përdoret për të ruajtur dhe menaxhuar eSIM. Studiuesit arritën të nxirrnin certifikata e të shkarkonin profile të deshifruara të kartave eSIM të përdorura nga miliarda pajisje në gjithë botën, nga telefonat celularë te pajisjet IoT te makinat industriale.

eSIM është version digjital i një karte SIM, i integruar në pajisje si softuer i instaluar në çipin eUICC. Ai lejon ndërrimin e lehtë të profileve midis operatorëve, pa zëvendësuar fizikisht kartën. Por, ky fleksibilitet është provuar të jetë dobësi: nëse hakerat mund të klonojnë një profil eSIM, në thelb marrin numrin tuaj, të lexojnë mesazhet, të fitojnë qasje në kodet një herëshe e përgjojnë thirrjet tuaja.

Sulmi nuk është i kufizuar në qasjen fizike, por disa dobësi shfrytëzohen edhe nga distanca, përmes një rrjeti. Ndërsa nuk përmendën pajisje specifike që janë të cenueshme, studiuesit paralajmëruan se çipat eSIM janë të integruar në shumicën e telefonave inteligjentë modernë e të gjithë mund të jenë të cenueshëm.

Kigen e pranoi problemin dhe u pagoi studiuesve një shpërblim prej 30,000 dollarësh dhe publikoi një patch. Ekipi që zbuloi të metën thotë se zgjidhja është vetëm një “gjilpërë në kashtë”, ndërsa problemet e thella në Java Card VM, softuerin që ekzekuton aplikacionet eSIM, mbeten.

Kjo sugjeron që prodhues tjerë të çipave eSIM kanë dobësi të ngjashme. Ajo që është më shqetësuese është se certifikatat GSMA, që supozohet të mbrojnë profilet, mund të keqpërdoren për të shkarkuar profilet eSIM në tekst të qartë. Pasi sulmuesit të kenë qasje në këto të dhëna, mund t’i përdorin për të klonuar numra ose edhe për të krijuar një “derë të pasme” për mbikëqyrje masive.

Përdoruesit nuk mund të bëjnë shumë, por është e rëndësishme ta mbani softuerin e telefonit të përditësuar, pasi prodhuesit mund të lëshojnë patch-e, të përdorin aplikacione 2FA në vend të kodeve SMS sa herë që është e mundur e të jenë të kujdesshëm nëse merrni thirrje ose mesazhe të dyshimta që kërkojnë të dhëna të ndjeshme.