Tri partitë parlamentare opozitare ia kanë mësyrë të mërkurën Radio Televizionit të Kosovës për t’u futur brenda lidhur me ankesën për mos transmetimin e seancës së jashtëzakonshme, por ata nuk u lejuan të hyjnë brenda. Opozitarët në një konferencë për media para transmetuesit publik shprehën pakënaqësitë ndaj këtij mediumi publik. .

Mos transmetimin e seancës në kanalin qendror të RTK-së, opozita e vlerëson si të papranueshme, ‘mbytje e zërit të deputetëve dhe se kryeministri i vendit, Kurti ka në dorë Radio Televizionin e Kosovës’.

Kryetari i Grupit Parlamentarë të PDK-së, Abelard Tahiri ka thënë se pikërisht sot, qytetarët e Kosovës do të duhej të dëgjonin seancën e Kuvendit dhe të shohin se ‘si vidhen nga kapelat e zeza”.

“Tashmë aty ku ka mbërri RTK-ja, është jashtëzakonisht e frikshme. Këto momente RTK-ja, çoftë drejtori gjeneral, çoftë Dejona, kushdo vendosi që ajo që nuk kishte ndodhur më herët, pra ta zhvendos seancën e Kuvendit të Kosovës, në një program periferik dhe duke mos e transmetuar në programin qendror. Kjo është e papranueshme, sepse pikërisht sot qytetarët e Kosovës do duhej me dëgjuar dhe me pa se si vidhen nga kapelat e zeza 20 milionë euro, përmes ujit të pijshëm në vendin tonë… Këta e mbysin fjalën e lirë, zërin opozitarë, çdo zë i cili i shpërfaqë aferat e tyre korruptive me abuzimet e tyre”, ka thënë Tahiri.

Ndërsa, kryetari i Grupit Parlamentar të LDK-së, Armend Zemaj ka shtuar se sot ishte kulmi i “pafytyrësisë” dhe i shpresës që ka mbetur që dikush mund të frymojë lirshëm në Kosovën e lirë dhe të pavarur.

Sipas tij, kjo është mbytje e zërit të deputetit, fshehje nga e vërteta dhe mbytje e zërit të qytetarit përmes përfaqësimit prej të cilit kanë deleguar në Kuvendin e Kosovës.

“Ne e kemi thënë me kohë që kapja e këtij institucioni ka për qëllim devalvimin e vlerave në shoqëri dhe mbytjen në demokraci. Sot është kulmi i pafytyrësisë dhe të asaj pak shprese që ka mbetur që dikush mund të frymoj lirshëm në Kosovën e lirë dhe të pavarur…Seanca nuk u transmetua në kanalin zyrtar të RTK-së, që nënkupton mbytje e zërit të deputetit, fshehje nga e vërteta të cilat po ndodhin nga skandalet e shpërfaqura, çdo ditë për afera korruptive dhe kjo do të thotë që mbytet edhe zëri i qytetarit, përmes përfaqësimit prej të cilit kanë deleguar në Kuvendin e Kosovës”, tha Zemaj.

Po ashtu, kryetari i Grupit Parlamentar të AAK-së, Besnik Tahiri ka thënë se kjo e ‘shpërfytyron regjimin e kryeministrit Kurti se duhet të ndalet fjala, debati, argumenti’ dhe sipas tij, të mashtrojnë popullin duke fshehur të bërat e tyre.

“Fakti që në një seancë ku po trajtohet një super skandal i kësaj qeverie, ndalet për fjalimin e Kryeministrit, që ishte në një konferencë, tregon shumë saktë, drejtë e shpërfytyron regjimin e Kurtit se, duhen me ndalë fjalën debatin, argumentin dhe ashtu si kanë ardhur me mashtrim, të mashtrojnë popullin, të fshehin për të bërat e tyre, të cilat po i japin jo vetëm hije të keqe vendit por po e dobësojnë secilën pore të secilit institucion të pavarur”, ka vijuar Tahiri.

Të tri partitë parlamentare opozitare, si simbolikë, në dyert e objektit të RTK-së, vendosën kapuç të zinj.

Prokuroria Themelore në Mitrovicë – Departamenti i Përgjithshëm, ka ngritur sot aktakuzë ndaj të pandehurve A.H., E.M., dhe B.A., nën dyshimet se kanë kryer veprën penale cenimi i të drejtave të punësimit.

Të pandehurit, në janar 2020, si anëtarë të komisionit për pranimin e punëtorëve të minierën e Trepçës, në bashkëkryerje dhe me dashje kanë vepruar në kundërshtim me legjislacionin në fuqi, duke mos përfillur procedurat e rekrutimit të përcaktuara sipas udhëzimit administrativ të MPMS lidhur me rregullimin e procedurave të konkursit në sektorin publik.

Të njëjtit, kanë shkelur rregulloren e vlerësimit gjatë intervistimit me gojë të kandidatëve, ashtu që në vend të vlerësimit për çdo pyetje të saktë me 20 pikë, në rastin konkret i kanë vlerësuar kandidatët me nga 25 pikë për pyetje në total me mbi 100 deri 300 pikë, duke i sistemuar në vende pune 7 persona, dhe me këtë veprim kandidatëve të tjerë u ka mohuar të drejtën për punësim.

Prokurori i Shtetit i ka propozuar gjykatës që të pandehurit t`i shpallë fajtorë për veprën e kryer penale dhe t`i dënojë sipas ligjit.

Instituti i Gjuhëve të Huaja në UBT, në bashkëpunim me Ambasadën Italiane në Kosovë, organizoi një event të veçantë në kuadër të Javës së Gjuhës Italiane. Kjo ngjarje shënoi inaugurimin e Qendrës për Njohuritë e Gjuhës Italiane, një arritje e rëndësishme për përhapjen e studimit të kësaj gjuhe në vend.

Ceremonia u zhvillua në një atmosferë festive, duke sjellë së bashku studentë, profesorë dhe përfaqësues të Ambasadës Italiane, të gjithë të angazhuar për të thelluar lidhjet kulturore mes Kosovës dhe Italisë.

Rektori i UBT-së, Prof. Dr. Edmond Hajrizi, përshëndeti të pranishmit në këtë ngjarje të rëndësishme. Ai theksoi se hapja e Qendrës për Njohuritë e Gjuhës Italiane është një arritje e madhe për institucionin dhe për të rinjtë e Kosovës, duke e konsideruar këtë bashkëpunim me Ambasadën Italiane një hap të rëndësishëm për forcimin e lidhjeve kulturore mes dy vendeve.

Gjuha italiane, sipas rektorit Hajrizi, nuk është thjesht një mjet komunikimi, por një pasuri kulturore dhe historike që na lidh me trashëgiminë e pasur të Italisë. Dhe se ajo na ofron mundësinë të kuptojmë më mirë kulturën dhe traditat italiane, dhe të forcojmë marrëdhëniet tona kulturore dhe ekonomike.

“Njohja e gjuhës italiane është një investim në arsimimin e studentëve, duke u ofruar atyre mundësi për të zhvilluar karrierat e tyre në një treg gjithnjë e më global,” u shpreh rektori Hajrizi. Ai e përfundoi fjalimin duke shprehur besimin se njohja e gjuhës italiane do t’i ndihmojë studentët në zhvillimin e karrierave të tyre dhe do të forcojë lidhjet kulturore mes Kosovës dhe Italisë.

Pas fjalës së rektorit, Ambasadori i Italisë në Kosovë, Antonello De Riu, mori fjalën dhe shprehu përkushtimin e thellë të ambasadës për të mbështetur iniciativa që promovojnë kulturën italiane. Ai theksoi se aktivitete si ky event janë thelbësore për ndërtimin e urave të komunikimit dhe miqësisë midis popujve të Kosovës dhe Italisë.

Ambasadori De Riu inkurajoi studentët dhe të pranishmit të përfitojnë nga mundësitë që ofrohen për të njohur më mirë kulturën italiane, duke e parë atë si një mundësi për rritje personale dhe profesionale. “Le të shfrytëzojmë këtë mundësi për të thelluar njohuritë tona dhe për të forcuar lidhjet mes dy vendeve tona,” përfundoi ai, duke inkurajuar gjithashtu një angazhim të vazhdueshëm në promovimin e kulturës italiane.

Më pas, Media Grupi i UBT-së prezantoi një video të veçantë, e cila ishte përgatitur në gjuhën italiane me titra shqip nga profesorë dhe studentë që kanë studiuar dhe vepruar në Itali, duke ndarë eksperiencën e tyre dhe duke vënë në theks se sa e rendësishme është gjuha italiane për ta.  Kjo video shërbeu si një pasqyrë e angazhimeve dhe përvojave të tyre në këtë vend, duke ilustruar mundësitë e shumta që ofron gjuha italiane.

Më pas, eventi vazhdoi me shfaqjen e filmit “Perfetti Sconosciuti” të Paolo Genovese (2016), një komedi-dramë që trajton temat e marrëdhënieve dhe miqësive. Filmi u shfaq në italisht me titra në anglisht, duke ofruar një mundësi për studentët të përmirësojnë njohuritë e tyre gjuhësore në një atmosferë argëtimi.

Ky aktivitet jo vetëm që festoi kulturën italiane, por gjithashtu forcoi lidhjet ndërkulturore mes Kosovës dhe Italisë, duke promovuar bashkëpunimin dhe miqësinë ndërmjet popujve. Inaugurimi i Qendrës për Njohuritë e Gjuhës Italiane është një hap i rëndësishëm drejt avancimit të edukimit dhe ofrimit të mundësive të reja për të rinjtë kosovarë, duke e bërë italishten një pjesë të rëndësishme të arsimit të tyre./UBTNews/D.E./    

Britania e Madhe dhe Franca e kanë thirrur një takim urgjent të Këshillit të Sigurimit të Kombeve të Bashkuara për të diskutuar për gjendjen humanitare në Rripin e Gazës.

Ndërkohë, Britania është duke shqyrtuar edhe sanksionimin e dy ministrave izraelitë, tha të mërkurën kryeministri britanik, Keir Starmer.

Furnizimi me ushqim në Gazë ka shënuar rënie të madhe në javët e fundit, pasi autoritetet izraelite vendosën rregulla të reja doganore. Kjo gjendje e nxiti SHBA-në ta paralajmërojë Izraelin se, nëse nuk e përmirëson gjendjen, mund të përballet me kufizimin e ndihmës ushtarake nga ajo.

“Ne vazhdimisht po i pasqyrojmë këto me partnerët tanë”, tha Starmer në Parlament, kur u pyet për gjendjen në Gazë.

“Ka kohë që nevojitet dhe nevojitet edhe tani urgjentisht futja e më shumë ndihmave në Gazë”, tha ai.

Sekretari i Jashtëm i Britanisë, David Lammy, tha në një komunikatë se Izraeli duhet të sigurohet që civilët të mbrohen dhe që rrugët të jenë të hapura për ta lejuar ndihmën jetike të kalojë. Ai theksoi se këto çështje do të diskutohen në takimin e OKB-së.

Starmer theksoi gjithashtu se Britania po shqyrton sanksionimin e ministrit të Financave të Izraelit, Bezalel Smotrich, dhe atë të Sigurisë Kombëtare, Iamar Ben-Gvir, për shkak të komenteve të tyre në lidhje me konfliktin.

Edhe ish-sekretari i Jashtëm, David Cameron, kishte shqyrtuar sanksionimin e dyshes, para se Partia e Konservatore t’i humbte zgjedhjet në qershor.

I pyetur nëse Qeveria do t’i sanksionojë Smotrichin, që tha se t’i lësh civilët në Gazë të vdesin urie mund të arsyetohet, dhe Ben-Gvirin, që tha se përgjegjësit e dhunës së kolonëve në Bregun Perëndimor janë heronj, Starmer tha: “Jemi duke e shqyrtuar këtë, sepse këto janë, natyrisht, komente të neveritshme”.

“Izraeli duhet t’i ndërmarrë të gjitha hapat e mundshëm për ta shmangur vrasjen e civilëve, të lejojë sasi shumë më të mëdha të ndihmës në Gazë dhe t’ua mundësojnë partnerëve të OKB-së të veprojnë në mënyrë efektive”, tha Starmer./REL/