UEFA ka marrë masa disiplinore ndaj Crvena Zvezdës pas ndeshjes së Ligës së Evropës kundër Viktoria Plzenit, të zhvilluar më 20 gusht, të cilën skuadra serbe e fitoi me rezultat 3-0.

Në total, Crvena Zvezda është dënuar me 99,500 euro gjobë, ndërsa pjesa më e madhe e ndëshkimit lidhet me sjelljen dhe mesazhet e tifozëve në tribuna.

Gjoba më e lartë, prej 50 mijë eurosh, është vendosur për shfaqjen dhe transmetimin e mesazheve të papërshtatshme për një ngjarje sportive. Në mesin e parullave të shfaqura nga tifozët ishte edhe mesazhi “Kosova është Serbi”, i cili u përfshi në masat disiplinore të UEFA-s.

Klubi serb është dënuar gjithashtu me 20 mijë euro për bllokimin e shkallëve të stadiumit, ndërsa për përdorimin e mjeteve piroteknike është vendosur një gjobë prej 9,500 eurosh.

Një tjetër ndëshkim prej 20 mijë eurosh lidhet me sjellje raciste dhe/ose diskriminuese të tifozëve. Për këtë shkelje, UEFA ka urdhëruar edhe mbylljen e pjesshme të stadiumit, konkretisht sektorin 3 të tribunës veriore, në ndeshjen e ardhshme evropiane si vendas.

Megjithatë, kjo masë është pezulluar për një periudhë prove prej dy vitesh. Në rast se Crvena Zvezda kryen një shkelje tjetër gjatë kësaj periudhe, mbyllja e sektorit mund të aktivizohet.

Me këtë vendim, UEFA ka vendosur një ndëshkim të konsiderueshëm ndaj klubit serb, duke theksuar masat ndaj mesazheve të papërshtatshme, sjelljeve diskriminuese, bllokimit të shkallëve dhe përdorimit të mjeteve piroteknike në stadium.

D.L

Ka përfunduar aventura e Kosovës në padel në Lojërat Mesdhetare “Taranto 2026”.

Të mërkurën paradite, ekipi miks i Kosovës u eliminua në fazën çerekfinale, pasi pësoi humbje 2:0 në sete ndaj Italisë.

Ekipi italian ishte dukshëm më dominues dhe i fitoi të dy setet me rezultat identik 6:0. Për Kosovën në këtë përballje u paraqitën Donika Bashota dhe Lavdrim Krasniqi.

Megjithatë, përfaqësimi i Kosovës në padel në këto Lojëra Mesdhetare ishte pozitiv, me ekipin e parë të meshkujve dhe ekipin miks që regjistruan nga një fitore para se të ndaleshin në ndeshjet e dyta.

Ndërkohë, dy ekipet e femrave dhe ekipi i dytë i meshkujve u eliminuan që në përballjet e tyre të para.

Kështu, Kosova e përmbyll garën në padel në “Taranto 2026”, me paraqitje që i japin përvojë të rëndësishme sportistëve kosovarë në arenën ndërkombëtare.

D.L

Manchester City ka bërë një tjetër goditje të madhe në merkato, duke zyrtarizuar transferimin e supertalentit 18-vjeçar, Ayyoub Bouaddi.

Mesfushori maroken është larguar nga Lille dhe i është bashkuar kampionëve anglezë, në një transferim që, sipas raportimeve, kap shifrën e 100 milionë eurove. Bouaddi ka firmosur kontratë pesëvjeçare me Manchester Cityn.

Pavarësisht moshës së re, Bouaddi tashmë ka krijuar një përvojë të konsiderueshme në futbollin elitar. Ai ka regjistruar 96 paraqitje me fanellën e Lille dhe tetë paraqitje me Kombëtaren e Marokut.

Debutimin në nivelin senior e bëri në moshën vetëm 16-vjeçare, duke tërhequr vëmendjen e shumë klubeve të mëdha evropiane.

Pas zyrtarizimit të transferimit, Bouaddi shprehu emocionet për aventurën e re në Angli.

“Është një ditë e veçantë për mua dhe familjen time. Manchester City është klubi më i mirë në botë. Është ëndërr të jem këtu dhe ta quaj veten lojtar të Cityt”, ka deklaruar 18-vjeçari.

Tashmë mbetet të shihet se çfarë roli do të ketë Bouaddi në skuadrën e Pep Guardiolës dhe nëse do ta dëshmojë shpejt potencialin e madh që e bëri një prej talenteve më të kërkuara në Evropë.

D.L

Vëllaznimi po vazhdon të ndërtojë një skuadër konkurruese për sezonin e ri në Superligën e Basketbollit të Kosovës, duke realizuar një sërë përforcimesh të rëndësishme në ekip.

Skuadra nga Gjakova ka bërë të ditur se në radhët e saj do të jenë Eden Cingu, Meritoni Ismaili, Fatlind Shoshaj, Arbin Rushiti, Adhurim Aliaj, Adrian Ibishi, Kentrell Pulliam, DJ Davis, Vance Jackson, Emmanuel Tshimanga, Mal Syla dhe Andi Ahmeti.

Me këto transferime, Vëllaznimi synon të krijojë një ekip më të gjerë dhe më konkurrues, duke kombinuar përvojën, energjinë e lojtarëve të rinj dhe cilësitë e basketbollistëve të huaj.

Tashmë pritet që këto përforcime të japin kontributin e tyre në objektivat e klubit në elitën e basketbollit kosovar.

Vëllaznimi synon të jetë një nga skuadrat që do të luftojë për rezultate sa më të mira në sezonin e ri të Superligës.

D.L