Xhudisti ynë, Akil Gjakova ka siguruar pjesëmarrjen në çerekfinalen e Grand Prix Upper që po mbahet në Austri.

Në kuadër të kategorisë deri në 73 kilogramë, Gjakova ka mposhtur në raundin e tretë të kësaj gare xhudistin slloven, Martin Hojak. Tani, në çerekfinale, Akili do të përballet me xhudistin nga Moldavia, Adil Osmanov. Ndërkaq, në rrugëtimin e tij deri te çerekfinalja Akili regjistroi tri fitore radhazi.

Në raundin e parë triumfoi kundër xhudistit nga Kazakistani, Darkhan Koibagar, në raundin e dytë kundër austriakut, Herbert Wicker, kurse në raundin e tretë e mposhti sllovenin, Martin Hojak.

Ka përfunduar ndeshja tejet interesante mes Manchester United dhe Chelseat, ku “Djajtë e Kuq” e kanë siguruar Ligën e Kampionëve për sezonin e ardhshëm.

Pas plot 90’ minutave lojë të zhvilluara në stadiumin “Old Trafford”, Manchester United mposhti 4:1 skuadrën e Chelseat.

Golat për “Djajtë e Kuq” i shënuan Casemiro (minuta e 6’), Martial (minuta e 45+5’), Fernandes (minuta e 73’) dhe Rashford (minuta e 79’), kurse golin e nderit për Chelsean e shënoi Joao Felix në minutën e 89’.

Me pikët e reja, United zë pozitën e katërt në kuotën e 72 pikëve, krahas Chelseat që renditet në pozitën e 12 me 43 pikë të arkëtuara.

Rezultati final i ndeshjes, 4:1 në favor të United.

Java e Tottenhamit sa shkon e bëhet më e keqe, pasi që Jose Mourinho ka thënë që “Spurs” janë skuadra e vetme në karrierën e tij që ai nuk ka një lidhje të ngushtë me të.

Në një konferencë për shtyp për finalen e Ligës së Evropës kundër Sevillas, trajneri i Romës, Mourinho pranoi se Tottenhami ishte i vetmi klub me të cilin ai nuk arriti të mbante një marrëdhënie të mirë.

“Unë e kam krijuar një lidhje tejet të mirë me të gjitha klubet që kam udhëhequr. Ata tallen me mua kur them se jam tifoz i Realit, Interit dhe Romës. Kur të largohem nga ‘Giallorossi’ do të jetë e vështirë. E vetmja skuadër me të cilën nuk kam këtë marrëdhënie është Tottenham”, tha Mourinho.

“Shpresoj që fjalët e mija të mos keqinterpretohen nga tifozët e Tottenhamit, por ky është klubi i vetëm që nuk kam marrëdhënie të mira. Ndoshta sepse stadiumi ishte bosh në kohën e Covid dhe sepse presidenti Levu nuk dha shumë”, shtoi më tej Mourinho.

Aventura e Mourinhos te Tottenhami mori një fund dramatik në prill të vitit 2021, vetëm disa ditë para se skuadra kishte planifikuar të luante finalen e Carabao Cup kundër Manchester Cityt.

Graham Potter thuhet se është afër që të rikthehet në pozitën e trajnerit, me të shkarkuarin nga Chelsea që është favoriti kryesorë për të marrë drejtimin e skuadrës së Nice.

Potter ka qenë pa punë që prej se u shkarkua nga Chelsea në muajin prill, por tani thuhet se është në krye të listës së favoritëve të Nice për ta zëvendësuar Didider Digard.

Sipas “L’Equipe”, Potter është i interesuar në rolin në fjalë dhe e ka përkrahjen nga bordi i krerëve të Nice, ku veçse ka pasur bisedime mes dy palëve për rolin e trajnerit.

Po ashtu, në listën e skuadrës së Nice gjendet edhe Thiago Motta, por që ky i fundit thuhet se është i preferuari i Paris Saint-Germain për të qenë zëvendësuesi i Christophe Galtier.