Lajmet

Gjykata Speciale shpall aktgjykimin: Thaçi dënohet me 17 muaj, tre lirohen, një me kusht

Published

on

Lajm në zhvillim:

Ka përfunduar seanca në Gjykatën Speciale në Hagë ku u shpall aktgjykimi ndaj ish-presidentit Hashim Thaçi dhe katër të bashkakuzuarve të tij në rastin për pengim të drejtësisë.

Në bazë të vendimit të shpallur nga gjykatësi Christopher Gosnell, ish-presidenti Hashim Thaçi është dënuar me 17 muaj burgim.

Ndërkohë, Bashkim Smakaj dhe Fadil Fazliu janë dënuar secili me nga 12 muaj burgim (ku për Fazliun dënimi konsiderohet i mbuluar nga koha e kaluar në paraburgim, duke u liruar pas seancës), kurse Hajredin Kuçi është dënuar me një muaj burgim me kusht.

Nga ana tjetër, Isni Kilaj është shpallur i pafajshëm nga të gjitha akuzat dhe është urdhëruar lirimi i tij pas përfundimit të seancës gjyqësore.

Hajredin Kuçi dënohet me një muaj burgim me kusht

Gjykata Speciale në Hagë e ka dënuar Hajredin Kuçin me një muaj burgim me kusht.

Dënimi nuk do të ekzekutohet nëse Kuçi nuk kryen ndonjë vepër tjetër penale gjatë periudhës njëvjeçare të provës.

 

Fadil Fazliu dënohet me 12 muaj burgim nga Gjykata Speciale në Hagë, lirohet pas seancës

Gjykata Speciale në Hagë ka shpallur dënimin prej 12 muajsh burgim për Fadil Fazliun në rastin e pengimit të drejtësisë.

Megjithatë, ai do të lirohet menjëherë pas përfundimit të seancës, pasi koha e kaluar në paraburgim ia mbulon plotësisht dënimin e shqiptuar.

 

Isni Kilaj shpallet i pafajshëm nga Gjykata Speciale në Hagë dhe lirohet pas seancës

Gjykata Speciale në Hagë ka shpallur të pafajshëm Isni Kilajn lidhur me akuzat për pengim të drejtësisë.

Pas përfundimit të seancës, gjykatësi Christopher Gosnell ka lëshuar urdhër për lirimin e tij.

 

Bashkim Smakaj dënohet me 12 muaj burgim

Gjykata Speciale në Hagë e ka dënuar Bashkim Smakajn me 12 muaj burgim në rastin për pengim të drejtësisë, ku i akuzuar është edhe Hashim Thaçi.

 

Gjykata Speciale e shpall fajtor Thaçin, e dënon me 17 muaj burgim

Gjykata Speciale në Hagë e ka shpallur fajtor Hashim Thaçin për disa nga pika e aktakuzës në rastin për pengim të drejtësisë.

Gjyqtari Christopher Gosnell shqiptoi ndaj tij një dënim të njësuar prej 17 muajsh burgim.

 

Nis leximi i aktgjykimit në Hagë ndaj Thaçit dhe të tjerëve: Gjykatësi Gosnell zbërthen akuzat për ndërhyrje te dëshmitarët

Në Dhomat e Specializuara në Hagë ka nisur seanca për shpalljen e aktgjykimit ndaj ish-presidentit Hashim Thaçi dhe katër të bashkakuzuarve të tij — Bashkim Smakaj, Isni Kilaj, Hajredin Kuçi dhe Fadil Fazliu — në rastin që lidhet me akuzat për pengim të drejtësisë. Të pesë të akuzuarit janë të pranishëm në sallën e gjyqit, ndërsa transmetimi i seancës po zhvillohet me dhjetë minuta vonesë.

Gjykatësi Christopher Gosnell ka nisur leximin e përmbledhjes së aktgjykimit, duke shpjeguar se sipas aktakuzës, të akuzuarit kishin rënë në marrëveshje për veprime të përbashkëta me qëllim pengimin e personave zyrtarë në kryerjen e detyrave të tyre. Sipas tij, Hashim Thaçi akuzohet se ishte drejtues ose organizator i tri grupeve — ku përfshiheshin Fadil Fazliu, Bashkim Smakaj dhe Isni Kilaj me synim ndërhyrjen në dëshmitë e dëshmitarëve dhe zbulimin e informacioneve konfidenciale gjatë vizitave në Qendrën e Paraburgimit. Gjykatësi bëri të ditur se trupi gjykues ka pranuar 241 prova materiale të Prokurorisë, përfshirë audioincizimet e bisedave në paraburgim, regjistrimi i të cilave ishte i autorizuar nga gjykata.

Duke u ndalur te pika e akuzës që lidhet me Fadil Fazliun, gjykatësi Gosnell sqaroi se Thaçi dhe Fazliu akuzohen për tentativë të pengimit të personave zyrtarë lidhur me një vizitë të realizuar më 2 korrik 2023. Gjatë këtij takimi, ata kishin diskutuar gjerësisht për dëshminë e pritur të Rrustem Mustafës, të cilin Thaçi e kishte cilësuar si dëshmitar vendimtar, duke i dhënë Fazliut mesazhe specifike për t’ia përcjellë, si: “Shkurt thuaji, shkurt”, “Mos filozofo” dhe “Thuaj kam besim në ty shumë”. Po ashtu, Thaçi e kishte paralajmëruar Fazliun për pyetjet e mundshme të Prokurorisë, duke i thënë: “Ata të pyesin: A të ka thirrur kush?”.

Sipas gjykatësit Gosnell, në këtë rast bëhet fjalë për tentativë të pengimit të drejtësisë — e cila përbën vepër penale kur ndërmerren veprime konkrete — dhe jo për pengim të kryer faktikisht. Ai theksoi se kjo tentativë u konkretizua në korrik të vitit 2023, kur Fahri Fazliu, djali i Fadil Fazliut, kontaktoi dëshmitarin Rrustem Mustafa, në veprime që kishin për cak prokurorët dhe gjyqtarët dhe ku Thaçi kishte rolin e organizatorit.

 

Thaçi, Smakaj, Kilaj, Kuçi dhe Fazliu presin sot vendimin e Speciales

Ish-presidenti Hashim Thaçi, së bashku me katër të akuzuar të tjerë, presin sot shpalljen e aktgjykimit në Dhomat e Specializuara në Hagë, lidhur me akuzat për pengim të drejtësisë, të cilat mbrojtja i ka kundërshtuar si të paprovuara dhe juridikisht të gabuara.

Seanca për shpalljen e vendimit është caktuar në orën 10:00 nga gjykatësi Christopher Gosnell, i cili ka urdhëruar paraqitjen e të pesë të akuzuarve. Krahas Thaçit, vendimin do ta dëgjojnë edhe ish-drejtori i AKI-së, Bashkim Smakaj, ish-kryetari i Malishevës, Isni Kilaj, ish-ministri Hajredin Kuçi dhe Fadil Fazliu.

Në qendër të këtij procesi gjyqësor janë bisedat e regjistruara gjatë vizitave në qendrën e paraburgimit. Në fjalën përmbyllëse, prokurori Joshua Hafetz përmendi rreth 28 orë incizime të realizuara gjatë nëntë vizitave përgjatë katër muajve, të cilat Prokuroria i interpreton si dëshmi të përpjekjeve për ndërhyrje te dëshmitarët. Për këtë, ajo mbështetet te incizimet, dokumentet përcjellëse dhe verifikimet e njësisë gjuhësore të gjykatës.

Nga ana tjetër, ekipi mbrojtës i Thaçit ka kundërshtuar ashpër si interpretimin e Prokurorisë, ashtu edhe besueshmërinë e transkripteve. Sipas avokatëve, hetimet nuk kanë siguruar prova për kontakte të papërshtatshme me dëshmitarët, pjesë të bisedave kanë qenë të pakuptueshme, ndërsa transkriptimi nga personeli i Prokurorisë rrezikonte të ndikohej nga pritshmëritë e hetuesve. Po ashtu, mbrojtja ka kontestuar trajtimin si konfidencial të informacioneve që ishin publike ose kujtime të përbashkëta, duke argumentuar se dispozitat penale janë interpretuar përtej praktikës gjyqësore të Kosovës.

Për besueshmërinë e transkripteve në gjykatë dëshmoi edhe ekspertja e thirrur nga mbrojtja, Helen Fraser, e cila e vlerësoi të ulët besueshmërinë e tyre për shkak të metodës së përdorur dhe mungesës së garancive të mjaftueshme për saktësi, ndonëse sqaroi se nuk mund të pohonte që ato ishin të gabuara, duke pranuar edhe kufizimin nga mosnjohja e gjuhës shqipe. /E.A/

Continue Reading

Lajmet

Vlora Çitaku reagon pas dënimit të Thaçit në Hagë: Vendim i turpshëm dhe i papranueshëm

Published

on

By

Ushtruesja e detyrës së kryetares së Partisë Demokratike të Kosovës (PDK), Vlora Çitaku, ka reaguar ashpër pas vendimit të sotëm të Gjykatës Speciale në Hagë, e cila e dënoi ish-presidentin Hashim Thaçi me 17 muaj burgim në procesin për pengim të drejtësisë.

Përmes një reagimi publik, Çitaku e ka cilësuar këtë aktgjykim si të turpshëm dhe të papranueshëm, duke theksuar se besimi në paanshmërinë e kësaj gjykate është cenuar thellë. Sipas saj, kontestimet procedurale, proceset e njëpasnjëshme dhe zvarritjet shumëvjeçare i kanë thelluar dyshimet serioze lidhur me mënyrën se si administrohet drejtësia në Hagë, e cila, siç u shpreh ajo, nuk mund të funksionojë me dy standarde.

“Nuk ka asgjë më shqetësuese për drejtësinë sesa kur vendimet e saj pushojnë së befasuari, sepse besimi në paanshmërinë e saj është cenuar thellë. Shpreh zhgënjimin dhe shqetësimin tim të thellë për vendimin e sotëm të Gjykatës Speciale në Hagë ndaj Presidentit Hashim Thaçi dhe të tjerëve”, ka shkruar Çitaku.

Më tej, u.d. e kryetares së PDK-së paralajmëroi se ndaj asaj që e quajti padrejtësi do të ketë reagim të organizuar, duke përmendur mobilizim dhe veprime konkrete politike, juridike e diplomatike. Në fund të reagimit, ajo ritheksoi karakterin e drejtë të luftës së Ushtrisë Çlirimtare të Kosovës, duke porositur se sakrifica e popullit për liri është pjesë e pandryshueshme e historisë dhe nuk mund të njolloset asnjëherë. /E.A/

Continue Reading

Lajmet

Arrestohen dy të dyshuar për grabitjet e armatosura të argjendarive në Gjakovë

Published

on

Policia e Kosovës ka arrestuar dy persona të dyshuar për përfshirje në dy grabitje të armatosura të argjendarive në Gjakovë, të kryera më 5 dhe 16 nëntor.

Sipas Policisë, grabitja e parë kishte ndodhur më 5 nëntor, rreth orës 17:15, në rrugën “Nënë Tereza”, ku dy persona të maskuar dhe të armatosur kishin grabitur një sasi ari në vlerë rreth 30 mijë euro dhe rreth 2 mijë euro para të gatshme.

Rasti i dytë ishte raportuar më 16 nëntor, rreth orës 16:50, në rrugën “Izet Hima”. Dy persona të maskuar kishin hyrë në argjendari, ku njëri dyshohet se ishte i armatosur me një armë të gjatë, ndërsa tjetri me çekan. Ata kishin thyer vitrinën dhe kishin marrë stoli ari.

Gjatë grabitjes, njëri nga viktimat kishte tentuar t’ia marrë armën të dyshuarit, i cili më pas kishte shtënë me armë zjarri dhe e kishte plagosur atë në këmbën e djathtë.

Pas hetimeve dhe analizimit të pamjeve të kamerave të sigurisë, më 17 nëntor, Sektori Rajonal i Hetimeve në Gjakovë, në bashkëpunim me njësitë tjera policore, ka realizuar bastisje në pronat e dy personave të dyshuar, me inicialet A.U. dhe L.I., nga komuna e Deçanit.

Gjatë operacionit janë gjetur dhe sekuestruar 7 mijë e 330 euro, 100 dollarë, një veturë Golf 7, një sasi ari, dy telefona mobilë, veshmbathje që dyshohet se janë përdorur gjatë grabitjeve, si dhe një armë zjarri.

Sipas Policisë, provat e siguruara i lidhin dy të dyshuarit me të dy rastet e grabitjeve. Operacioni policor është ende në zhvillim, ndërsa veprimet e mëtejshme do të ndërmerren në koordinim me Prokurorinë kompetente./A.K/

 

Continue Reading

Lajmet

Sfida vendimtare në Dublin: Kosova kërkon fitoren ndaj Irlandës për plejofin e Ligës A

Published

on

By

Kombëtarja e Kosovës luan sonte nga ora 20:45 në Dublin ndeshjen vendimtare të xhiros së fundit të Grupit B3 të Ligës së Kombeve përballë Irlandës, sfidë kjo që përcakton vendin e dytë në grup dhe përfaqësuesen e fundit që do të zërë vend në vazon e dytë për shortin e kualifikimeve të Kampionatit Evropian “Euro 2028”, i cili tërhiqet në muajin dhjetor.

Për “Dardanët”, të cilët e fituan duelin e parë në Prishtinë me rezultat 1-0 më 24 shtator, mjafton edhe një barazim për të siguruar vendin e dytë në grup, çka u garanton automatikisht pjesëmarrjen në plejofin për inkuadrim në Ligën A të Ligës së Kombeve, si dhe pozicionimin në vazon e dytë të shortit evropian. Nga ana tjetër, Irlandës i duhet patjetër fitorja për të shmangur rënien në vazon e tretë. Vlen të ceket se në këtë fazë të plejofit do të paraqitet edhe Serbia, por përballjet mes saj dhe Kosovës nuk lejohen nga UEFA.

Pavarësisht se barazimi i kryen punë Kosovës, përzgjedhësi Franco Foda ka bërë të qartë në konferencën për shtyp të mbajtur të hënën se skuadra e tij nuk do të futet në fushë me llogari, por për të kërkuar fitoren.

“Presim të jetë ndeshje ndryshe nga ajo që ishte në Prishtinë. Jemi të vetëdijshëm që Irlanda është kombëtare shumë e fortë dhe këtë e ka treguar në ndeshjet e kaluara, sidomos kundër Austrisë në shtëpi ku morën avantazhin prej 2-0. Megjithatë, ne jemi këtu për të marrë rezultat pozitiv dhe do të tentojmë të marrim fitore”, deklaroi Foda.

Tekniku gjerman e refuzoi idenë se ndeshja do të jetë e lehtë, duke shtuar se qasja ofensive që pritet nga irlandezët mund t’i krijojë hapësira Kosovës. “Nuk mund të futesh në ndeshje për të kërkuar barazimin, në fushë duhet të futesh për të fituar. Presim që Irlanda të luajë lojë më ofensive dhe kjo do të nënkuptonte që ne do të kemi më shumë hapësira, të cilat shpresoj t’i shfrytëzojmë nëpërmjet kundërsulmeve”, përfundoi Foda. /E.A/

Continue Reading

Lajmet

Arrestohet një 31-vjeçar shqiptar në Gjermani, kishte shtatë pseudonime dhe dhjetë kërkesa policore

Published

on

Policia Federale Gjermane ka arrestuar një 31-vjeçar shqiptar në Aachen, nën dyshimin se kishte tentuar të vidhte produkte farmaceutike në një farmaci, së bashku me një 29-vjeçare nga Bullgaria.

Gjatë verifikimeve në stacionin policor, autoritetet zbuluan se shqiptari ishte i njohur për policinë me shtatë pseudonime, ndërsa ndaj tij ishin regjistruar dhjetë kërkesa për përcaktimin e vendndodhjes, të iniciuara nga Prokuroria Publike e Bremenit.

Sipas njoftimit të Policisë Federale, ngjarja ndodhi të dielën, rreth orës 11:00, në një farmaci në stacionin kryesor të trenit në Aachen. Dy personat dyshohet se kishin tentuar të merrnin produkte farmaceutike në vlerë prej rreth 28 eurosh.

Gruaja ishte ndaluar në vendin e ngjarjes, ndërsa burri ishte larguar para mbërritjes së policisë. Ai u gjet më vonë në një garazh parkimi aty pranë, ku u përpoq të largohej pasi vërejti zyrtarët. Mallrat e dyshuara të vjedhura u gjetën në dysheme pranë tij.

Gjatë shoqërimit në stacion, 31-vjeçari kundërshtoi policët dhe përdori forcë fizike ndaj tyre, por zyrtarët arritën ta neutralizonin dhe ta prangosnin.

Sipas policisë, dhjetë kërkesat për përcaktimin e vendndodhjes së tij lidhen me dyshime për vepra të ndryshme penale, përfshirë vjedhje, grabitje, kërcënime, sulme të rënda dhe sulm seksual.

Po ashtu, verifikimet zbuluan se shqiptari ishte dëbuar nga Gjermania në vitin 2023 dhe ndaj tij ishte vendosur ndalim pesëvjeçar për hyrje dhe qëndrim në këtë shtet.

Gjatë kontrollit fizik, në çantën e belit të tij u gjet edhe një thikë, lehtësisht e arritshme. Për këtë arsye, ndaj tij u shtua edhe dyshimi për vjedhje me armë.

Pas konsultimit me prokurorin, 31-vjeçari u dërgua në paraburgim në Aachen, me qëllim të paraqitjes para gjykatës për caktimin e masës së paraburgimit.

Ndërkaq, 29-vjeçarja nga Bullgaria u lirua pasi ndaj saj u ngrit kallëzim penal./A.K/

Continue Reading

Të kërkuara