Deputetja e Lëvizjes Vetëvendosje Shqipe Mehmeti- Selimi, njëherësh bashkëshortja e Rexhep Selimit, nuk ka votuar  Donika Gërvallën për kryetare të Kuvendit të Kosovës.

Në pamjet që shihen nga Kuvendi i Kosovës, deputetja Selimi nuk ka votuar fare gjatë procesit të votimit për deputeten nga radhët e koalicionit Guxo–LVV–Alternativa, Donika Gërvalla.

Deputetët e legjislaturës së nëntë kanë dështuar sërish në konstituimin e Kuvendit të Kosovës. Lëvizja Vetëvendosje propozoi për kryeparlamentare sërish emrin e Albulena Haxhiut. Pas kandidaturës së Haxhiut, kandidatura tjetër e LVV-së ishte Donika Gërvalla.

Njëjtë si Haxhiu, as emri i Gërvallës nuk gjeti përkrahjen e deputetëve të Kuvendit të Kosovës. 57 vota për, 56 kundër dhe 3 abstenime nuk mjaftuan që Gërvalla të zgjidhet kryeparlamentare.

Kryesuesi i seancës, Avni Dehari, përfundoi seancën e sotme duke caktuar 22 gushtin si datë të mbledhjes tjetër të deputetëve.

Seanca e radhës mbahet të premten në ora 11:00.

Aktgjykimi i Gjykatës Kushtetuese thotë se deputetët duhet të zgjedhin me votim të hapur kryeparlamentarin, si dhe një kandidat për kryeparlamentar mund të votohet vetëm deri në tre herë.

Deputetja e Aleancës për Ardhmërinë e Kosovës, Time Kadrijaj ka deklaruar se Lëvizja Vetëvendosje qëllimshëm po propozon emra të cilët nuk e kanë përkrahjen e partive opozitare.

Këto komente Kadrijaj i bëri pas ndërprerjes së seancës konstituive ku dy kandidatet e propozuara të LVV-së për kryetare të Kuvendit, Albulena Haxhiu dhe Donika Gërvalla dështuan të sigurojnë votat për kryekuvendare.

Deputetja e AAK-së, Time Kadrijaj beson që edhe në seancat e ardhshme do të propozohen kandidatë që nuk e kanë mbështetjen e partive opozitare.

“Nuk kishim një kërkim falje bile as ndjesë e as keqardhje që për gjashtë muaj po e mbajnë pengë konstiutimin e Kuvendit të Kosovës….e kanë ditur se Albulena Haxhiu nuk e ka përkrahjen nuk merr votë, propozohet prapë Albulena Haxhiu dhe propozohen njerëz të cilët e dinë që nuk e kanë përkrahjen e partive opozitare. Megjithatë, ne si parti opozitare kemi ofruar alternativat të cilat nuk I ka pranuar LVV dhe po propozon kandidat me qëllim që të mos marrin shumicën dhe të mos konstituohet Kuvendi”, tha ajo.

Deputetja, Kadrijaj akuzoi Lëvizjen Vetëvendosje se kjo e fundit nuk është e interesuar ta zhbllokoj situatën politike.

“Me zhvillimet që po bëhen ndoshta se meriton asnjë kandidat i Vetëvendosjes të ketë votën e opozitës, edhe duhet me e shqyrtua por ne kemi ofruar alternativa në mënyrë që t’i kontribuojmë zhbllokimit të situatë dhe për zhbllokimin e situatës po shihet se këta nuk janë të interesuar”, theksoi Kadrijaj.

Në vazhdimin e sotëm të seancës konstituive sot Lëvizja Vetëvendosje propozoi për kryekunvendare fillimisht Albulena Haxhiu e cila nuk arrit t’i siguroj votat dhe më pas propozoi Donika Gërvallën e cila po ashtu nuk mori 61 votat për tu zgjedhur kryetare e Kuvendit të Kosovës.

E pas këtyre dy dështimeve seanca u ndërpre për të vazhduar të premten me fillim nga ora 11:00.

Rafineritë kineze kanë bërë porosi të reja për naftë bruto ruse që do të transportohen nga portet që zakonisht furnizojnë Indinë, pasi kërkesa nga vendi i Azisë Jugore për naftën bruto të Moskës ka rënë pas tarifave të Presidentit të SHBA-së Trump.

Të paktën 15 ngarkesa me naftë ruse janë siguruar nga rafineritë kineze për dorëzimin në tetor dhe nëntor, thanë analistët.

Kina dhe India dolën si blerësit kryesorë të naftës ruse pas pushtimit të Ukrainës nga Moska në vitin 2022, gjë që i shtyu vendet perëndimore të shmangnin eksportet e saj, shkruan CNN.

Trump në korrik kërcënoi të vendoste tarifa dytësore për mallrat nga vendet që importojnë naftë ruse për të ushtruar presion mbi Moskën që të përfundojë luftën në Ukrainë.

Më herët këtë muaj, ai njoftoi një tarifë shtesë prej 25% për eksportet indiane në SHBA, përveç një takse tjetër prej 25% për importet e naftës dhe gazit rus. Kjo çoi në uljen e ndjeshme të blerjeve nga vendi.

Që nga java e kaluar, rafineritë shtetërore dhe private të Kinës kishin blerë rreth 13 ngarkesa me naftë të papërpunuar ruse perëndimore për dorëzimin në tetor dhe të paktën dy ngarkesa për nëntorin, tha Muyu Xu, analist i lartë i naftës së papërpunuar në Kpler, e cila gjurmon të dhënat e mallrave dhe të transportit.

15 ngarkesat me naftë, secila prej të cilave zakonisht varion nga 700,000 deri në 1 milion fuçi, do të ngarkohen nga portet ruse të Arktikut dhe Detit të Zi – furnizime që zakonisht shkojnë në Indi në vend të Kinës, duke pasur parasysh distancën e saj, tha Xu.

Kompania Rajonale e Ujësjellësit “Prishtina” mbajti ceremoninë e nënshkrimit të marrëveshjeve të kontributit për projektin “Climate Appropriate Urban Development: Sewage Prishtina (incl. Sewage I/II)” për komunën e Prishtinës dhe atë të Fushë Kosovës.

Projekti me vlerë totale prej 53 milionë euro, i mbështetur nga partnerët ndërkombëtarë, pritet të sjellë ujëra dhe lumenj më të pastër, një mjedis më të shëndetshëm dhe përfitime të prekshme për 40 për qind të popullsisë së Kosovës.

Kryetari i Prishtinës, Përparim Rama, tha se ky projekt është më shumë se infrastrukturë, duke e cilësuar si një investim në dinjitetin dhe cilësinë e jetës së qytetarëve.

“Ky projekt është më shumë sesa beton dhe tubacione. Ai është një dëshmi e kujdesit tonë për cilësinë e jetës, një linjë e re në hartën e dinjitetit të përbashkët. Në këtë sallë sot ne po nënshkruajmë një kontratë për të ardhmen e qytetit tonë, për fëmijët tanë, familjet tona, për çdo qytetar që meriton të jetojë në një mjedis dinjitoz, me ujë dhe ajër të pastër. Ky projekt prek jetën e përditshme të mijëra qytetarëve: nga lumenjtë që duam t’i kthejmë në pasuri publike e te shëndeti që sot vuan nga pasojat e infrastrukturës së munguar”, tha Rama.

Komuna e Prishtinës e ka marrë përgjegjësinë me vendosmëri ku 9 milionë euro të planifikuara për periudhën 2025–2027, do të shpërndahen në tri pagesa vjetore për të siguruar zbatimin e plotë të projektit.

“Ky angazhim përfshin ndërtimin e 1.2 km të seksionit kryesor të gypit në Kalabri, çka do të çojë në përmirësimin konkret dhe të prekshëm të rrjedhës si dhe të trajtimit e menaxhimit të ujërave të zeza. Këto janë investime në jetë, në shëndet dhe në të ardhmen e përbashkët”, vazhdoi ai.

Nënkryetari i Fushë Kosovës, Besnik Osmani, e cilësoi projektin si vendimtar për komunën.

“Një projekt, i cili për ne është vendimtar. Komuna e Fushë Kosovës ka pësuar një rritje, qyteti është dyfishuar edhe me popullsi edhe ekonomi dhe ky projekt vjen në kohën vendimtare edhe për të tashmen edhe për të ardhmen. Kemi punuar me ekspertë të projektit, kemi vazhduar me zotimet tona. Ky do të jetë një projekt, i cili nuk do të zgjasë më shumë se 36 muaj. Ajo që është më e rëndësishme në këtë projekt është edhe pjesa e ambientit miqësor për qytetarët. Do të na krijojë një ambient më miqësor edhe për qytetarët”, tha ai.

Gjithashtu edhe ambasadori i Gjermanisë në Kosovë, Jörn Rohde, tha se marrëveshja e komunave në vlerë prej 11 milionë eurosh është një hap i madh për ujërat e pastra dhe shëndetin publik.

“Ky marrëveshje e përbashkët e komunave në vlerë prej 11 milionë eurosh do të çojë në lumenj më të pastër, komunitete më të shëndetshme dhe një cilësi më të mirë jete për qindra mijëra njerëz. Zonja dhe zotërinj, uji është jetë dhe qasja në ujë të pastër është një e drejtë e njeriut. Për shumë kohë, ujërat e zeza të rajonit të Prishtinës kanë rrjedhur të patrajtuara në lumenjtë e Kosovës. Lumenjtë kryesorë, në veçanti, kanë vuajtur nga ndotja e rëndë, duke rrezikuar si shëndetin publik ashtu edhe burimet ujore. Projekti ynë i përbashkët do ta ndryshojë këtë”, potencoi Rohde.

Kryeshefi ekzekutiv i Kompanisë Rajonale të Ujësjellësit Prishtina, Arsim Fetahu, bëri të ditur se projekti nuk do të përfshijë vetëm Prishtinën dhe Fushë Kosovën, por edhe komunat e Graçanicës, Obiliqit dhe Podujevës.

“Përveç dy komunave që kemi cekur, zgjidhje e problemit për ujërat e ndotura do të ndodhë edhe në dy komunat e tjera: për komunën e Graçanicës dhe atë të Obiliqit. Gjithashtu edhe në komunën e Podujevës jemi në zgjidhjen e problemit me ujërat e ndotura. Ky projekt i ujërave të zeza është një projekt i rëndësishëm që do të bëjë zgjidhje për banorë që do të ndikojë në krijimin e kushteve më të mira për këta banorë. Ky projekt, në aspektin teknik, nënkupton pastrimin dhe në fund, me anë të impiantit, mundësinë që uji i pastruar të derdhet në lumin”, theksoi ai.