Këshilltari kryesor i presidentit ukrainas Volodymyr Zelensky, Mihajlo Podoljak, ka reaguar pas liderët evropianë paralajmëruan Uashingtonin kundër një marrëveshjeje paqeje për Ukrainën me Rusinë pa dëshirën e Kievit.

Podoljak ka shkruar në rrjetin X se suksesi i vërtetë do të vijë duke i dhënë fund luftës jo sipas kushteve të Rusisë, por me kushte të drejta të vendosura nga Ukraina, SHBA dhe Evropa.

“Rri i qetë. Emocionet e nxituara janë padyshim të panevojshme sot. Suksesi i vërtetë i politikës së jashtme amerikane, dhe natyrisht presidenti Trump personalisht, si dhe çdo aktor tjetër politik global, nuk do të përcaktohet vetëm nga dëshira për t’i dhënë fund luftës shpejt. Lufta mund të kishte përfunduar dje sipas ultimatumeve ruse – por kjo do të ishte krejtësisht e kotë. Këto kushte duhet të jenë racionale, të arsyeshme në këtë fazë të luftës, të bazuara strategjikisht dhe të justifikuara ekonomikisht. Ne nuk duhet të harrojmë pasojat globale reputacionale dhe politike”, tha Podoljak.

Donald Trump tha dje se ka arritur marrëveshje me presidentin rus Vladimir Putin për t’i dhënë fund luftës në Ukrainë.

Lëvizja e Trump ka alarmuar kryeqytetet evropiane që duan të luajnë një rol qendror në bisedimet e paqes, sepse çdo marrëveshje për Ukrainën do të kishte pasoja për sigurinë e tyre.

“Është e qartë se çdo marrëveshje pas shpinës sonë nuk do të funksionojë. Çdo marrëveshje do të duhet gjithashtu që Ukraina dhe Evropa të jenë pjesë e saj,” tha shefja e politikës së jashtme evropiane Kaja Kallas.

“Pse po u japim atyre (Rusisë) gjithçka që ata duan para se të fillojnë negociatat,” tha Kallas në një takim të ministrave të mbrojtjes të NATO-s me homologun e tyre ukrainas në Bruksel, duke shtuar se “Ky është qetësim – nuk funksionoi kurrë.”

Sekretari amerikan i Mbrojtjes Pete Hegseth tha të mërkurën se ishte joreale që Ukraina të kthehej në kufijtë e saj të para vitit 2014 dhe se anëtarësimi i Ukrainës në NATO nuk do të ishte pjesë e një marrëveshjeje paqeje.

Në vitin 2014, Rusia pushtoi dhe aneksoi gadishullin ukrainas të Krimesë.

Në një deklaratë të lëshuar të mërkurën vonë pas bisedimeve në Paris, ministrat e jashtëm të fuqive evropiane, përfshirë Britaninë, Francën dhe Gjermaninë, thanë se Evropa duhet të jetë pjesë e çdo negociate të ardhshme për Ukrainën.

Por jo të gjithë liderët evropianë u alarmuan nga masa e Trump. Kryeministri hungarez Viktor Orban, një aleat i Trump, vlerësoi presidentin amerikan dhe kritikoi deklaratat e ministrave. “Nuk mund të kërkosh një vend në tryezën e bisedimeve. Duhet ta fitosh atë!”

“Rusia po përgatitet për një konflikt më të gjerë në Evropë, dhe do të ishte një “kurth vdekjeprurës” të besohet se Donald Trump dhe Vladimir Putin mund të gjejnë një zgjidhje për luftën në Ukrainë”, kështu ka deklaruar Dovile Sakaliene, ministrja e Mbrojtjes së Lituanisë.

Sakaliene i bëri deklaratat e forta gjatë samitit të NATO-s në Bruksel. Ajo theksoi nevojën urgjente që Evropa të forcojë kapacitetet e saj ushtarake dhe industrinë e mbrojtjes, duke paralajmëruar se koha për veprim është e kufizuar.

“Nëse vendosim të biem në iluzionin se Trump dhe Putin do të gjejnë një zgjidhje për të gjithë ne – ky do të ishte një kurth vdekjeprurës. Ose Evropa do të marrë në dorë sigurinë e saj dhe do të vendosë për të ardhmen e saj me SHBA-në, ose do të përballemi me pasoja të rënda,” deklaroi ajo.

Sakaliene nënvizoi se SHBA-ja është një pjesë thelbësore e NATO-s, por shtoi se është koha që Evropa dhe Kanadaja të rrisin investimet në mbrojtje dhe të mos mbështeten vetëm tek fuqia ushtarake amerikane.

Ajo paralajmëroi gjithashtu për një bashkëpunim të shtuar mes Kinës dhe Rusisë, duke e cilësuar këtë si një kërcënim të madh për botën demokratike.

“Në pak vite, Rusia – me shpejtësinë e zhvillimit të industrisë së saj të mbrojtjes dhe ushtrisë – do të ecë përpara. Ukraina është vetëm faza e parë e një zgjerimi perandorak të Rusisë,” theksoi ministrja lituaneze.

Ndërkohë, Sekretari amerikan i Mbrojtjes, Pete Hegseth, gjatë vizitës së tij në Bruksel, kërkoi që shtetet anëtare të NATO-s të rrisin shpenzimet për mbrojtjen, duke nënvizuar se Ukraina nuk mund të mbështetet pafundësisht tek SHBA-ja. Ai shtoi se është joreale të pritet që Kievi të rimarrë të gjithë territorin e tij të pushtuar nga Rusia.

Kancelari gjerman Olaf Scholz ka reaguar lidhur me ngjarjene rëndë të ndodhur në Mynih teksa një shofer përplasi me makinën e tij në një turmë demonstruesish në qytet, Ai tha se autori duhet të ndëshkohet dhe të dëbohet nga vendi.

“Autori nuk duhet të presë mëshirë. Ai duhet të ndëshkohet dhe duhet të largohet nga vendi,” ka thënë Scholz.

Kancelarja bëri thirrje gjithashtu për ndëshkimin e sulmuesit në masën e plotë që ligji e lejon “për rastet e terrorizmit”.

Shtetasi afgan që ngiste makinën e tij mbi demonstruesit në Mynih kishte aplikuar më parë për azil në Gjermani, por kërkesa e tij ishte refuzuar, tha Joachim Herrmann, ministër i brendshëm në shtetin gjerman të Bavarisë. Sipas tij, burri megjithatë kishte të drejtë të qëndronte në vend. Ai ka precedentë penalë për vjedhje dyqanesh dhe krime të lidhura me drogën, “por sipas hetuesve, ai nuk ka të dhëna paraprake për dhunë”, tha politikani.

Një sondazh i fundit i kompanisë Gallup që ka matur opinionet e amerikanëve për presidentët e gjallë të SHBA-së tregon se ish-presidenti Barack Obama mbetet më i favorizuari, ndërsa presidenti Joe Biden ka vlerësimin më të ulët midis pesë liderëve.

Sipas sondazhit të publikuar të martën, i kryer midis 21 dhe 27 janarit, menjëherë pas inaugurimit të dytë të Trumpit, 59 për qind e amerikanëve e favorizojnë më së shumti Obamën, me 36 për qind që kanë shprehur opinion të pafavorshëm ndaj tij.

Ai pasohet nga ish-presidenti George W. Bush, i cili ka një vlerësim prej 52 për qind, ndërsa 34 për qind nuk e favorizojnë atë.

Ish-presidentët Bill Clinton dhe Donald Trump janë kanë vlerësim të barabartë me 48 për qind. Megjithatë, vlerësimi i pafavorshëm ndaj Clintonit qëndron në 41 për qind, ndërsa ai ndaj Trumpit është më i lartë, 50 për qind.

Biden ka marrë një vlerësim të favorshëm prej 39 për qind, më i ulëti në mesin e pesë liderëve të përfshirë në sondazh. Shumica e të anketuarve, përkatësisht 57 për qind, e shohin atë në mënyrë të pafavorshme.

“Vlerësimet ndaj Trumpit dhe Bidenit janë në thelb të pandryshuara nga ato të një sondazhi pas zgjedhjeve të vitit 2024, duke treguar që asnjëri nuk ka marrë një rritje imazhi nga lajmet rreth tranzicionit presidencial”, tha Gallup.