

Bota
Trump paralajmëron amerikanët për ndikimin e tarifave, kërcënon BE-në e Britaninë me luftë tregtare
Published
7 months agoon
By
UBTnewsPresidenti i Shteteve të Bashkuara, Donald Trump, i ka paralajmëruar amerikanët se mund të përballen me “vuajtje” ekonomike, për shkak të tarifave tregtare që sapo i ka vendosur ndaj partnerëve tregtarë të SHBA-së.
Ai gjithashtu kërcënoi me luftë më të gjerë tregtare, për t’i përfshirë edhe Bashkimin Evropian (BE) dhe, mbase, edhe Britaninë e Madhe.
“A do të ketë vuajtje? Po, mbase (dhe mbase jo!)” shkroi Trump më 2 shkurt në platformën e vet sociale në lidhje me ndikimin që mund ta kenë tarifat te konsumatorët amerikanë.
“Megjithatë, do t’ia vlejë barra qiranë”, shtoi ai.
Trump u tha gazetarëve se synon të bisedojë me liderët e Kanadasë dhe Meksikës, më 3 shkurt, në lidhje me tarifat – të cilat ekspertët thonë se mund ta trazojnë ekonominë botërore.
Por, Trump nuk tregoi nëse po i rishqyrtonte veprimet e tij.
“Nuk pres asgjë shumë dramatike“, tha ai.
Trump tha se tarifat ndaj mallrave nga BE-ja do të “vendosen patjetër” dhe se kjo do të ndodhë “shumë shpejt”.
Ai gjithashtu la të kuptohej se edhe Britania e Madhe mund të përballet me tarifa.
BE-ja tha më 2 shkurt se do të kundërpërgjigjej “fuqishëm”, nëse Trumpi vendos tarifa, pavarësisht se shpreson në shmangien e një lufte tregtare përmes bisedimeve.
“Bashkimi Evropian shpreh keqardhje për vendimin e SHBA-së për të vendosur tarifa ndaj Kanadasë, Meksikës dhe Kinës“, tha një zëdhënës i Komisionit Evropian.
Vendet e prekura – Kanadaja, Meksika dhe Kina –kanë kërcënuar se do të ndërmarrin veprime hakmarrëse, derisa gjithashtu kanë bërë thirrje për bisedime tregtare në vend të tarifave, të cilat mund t’i rrisin çmimet për konsumatorët dhe t’i dëmtojnë ekonomitë e të gjitha palëve të përfshira.
Trump tha se ai i vendosi këto tarifa ndaj fqinjëve të SHBA-së derisa të ndalet fluksi i emigrantëve dhe i fentanilit të paligjshëm në Shtetet e Bashkuara, megjithëse shkaktari i këtyre çështjeve është shumë i diskutueshëm dhe përfshin një sërë faktorësh të ndërlikuar.
Ai gjithashtu ka thënë se këto tarifa do të ndihmojnë në uljen e deficitit tregtar me partnerët kryesorë dhe do të nxisin prodhimin industrial në SHBA.
Trumpi e bëri të ditur premtimin e kamotshëm ekonomik më 1 shkurt, duke thënë se Uashingtoni do t’i godasë Kanadanë dhe Meksikën me tarifa prej 25 për qind për të gjitha mallrat, megjithëse produktet energjetike kanadeze do të përballen me një tarifë prej 10 për qind. Tarifat e reja përfshijnë gjithashtu një taksë prej 10 për qind për mallrat nga Kina, përveç atyre të vendosura më parë.
Trump tha se tarifat për mallrat nga të tre vendet do të hyjnë në fuqi më 4 shkurt.
Ai nuk i kushtoi rëndësi kërcënimit të Kanadasë për veprime hakmarrëse, duke thënë: “Nëse duan ta luajnë lojën, nuk e kam telash. Mund ta luajmë lojën sa të duan ata”.
Trump shkroi se, pa tregtinë me SHBA-në, “Kanadaja nuk do të jetë vend i qëndrueshëm. E vrazhdët, por e vërtetë! Prandaj, Kanadaja duhet të bëhet shteti ynë i dashur i 51-të. Taksa shumë më të ulëta dhe mbrojtje shumë më e mirë ushtarake për popullin e Kanadasë – DHE ASNJË TARIFË!”
Kryeministri kanadez, Justin Trudeau, tha se tarifat hakmarrëse ndaj importeve nga Shtetet e Bashkuara do të hyjnë në fuqi më 4 shkurt.
Trudeau ka njoftuar synimin për t’u larguar nga posti i kryeministrit, dhe partia e tij Liberale do ta zgjedhë liderin të ri më 9 mars. Zgjedhjet pritet të mbahen në pranverë.
Kanadaja synon të vendosë tarifa prej 25 për qind ndaj importeve nga SHBA-ja, duke përfshirë pijet, produktet kozmetike dhe letrën.
Presidentja meksikane, Claudia Sheinbaum, tha se do të japë hollësi mbi përgjigjen e vendit të saj më 3 shkurt.
Edhe Kina ka thënë se do t’i kundërpërgjigjet Trumpit./REL/
Bota
Shefi i ushtrisë izraelite: Duhet ta pranojmë marrëveshjen për pengjet
Published
9 hours agoon
August 25, 2025By
UBT News
Shefi i Shtabit të Forcave të Mbrojtjes të Izraelit (IDF) ka deklaruar se ekziston një marrëveshje në tryezë për pengjet e mbetura në Gaza, raportojnë mediat izraelite.
Gjeneral Lejtnant Eyal Zamir raportohet të ketë thënë se ushtria izraelite ka krijuar kushtet për një marrëveshje dhe se tani vendimi është në duart e kryeministrit Benjamin Netanyahu, raporton Channel 13 News, sipas BBC.
Të martën, kabineti i sigurisë së Izraelit pritet të diskutojë propozimin më të fundit të ndërmjetësve rajonalë, të cilin Hamasi e ka pranuar një javë më parë.
Ky zhvillim vjen pas demonstratave masive në Izrael këtë muaj, ku qindra mijëra qytetarë u mblodhën në Tel Aviv duke kërkuar fundin e luftës në Gaza dhe një marrëveshje për lirimin e pengjeve të mbajtura nga Hamasi. Forumi i Familjeve të Pengjeve dhe të Zhdukurve tha se Zamir shprehu “atë që shumica e izraelitëve po kërkojnë”, përfshirë një marrëveshje për kthimin në shtëpi të të gjithë 50 pengjeve të mbetur, prej të cilëve besohet se 20 janë gjallë, si dhe fundin e luftës.
Grupi ka paralajmëruar një tjetër ditë protestash masive të martën.
Propozimi më i fundit, nga ndërmjetësit në Egjipt dhe Katar, thuhet se bazohet në një kornizë të avancuar nga i dërguari amerikan Steve Witkoff në qershor.
Ai parasheh që Hamasi të lirojë rreth gjysmën e pengjeve në dy faza gjatë një armëpushimi fillestar 60-ditor. Po ashtu do të zhvilloheshin negociata për një armëpushim të përhershëm.
Zyra e Netanyahut kishte deklaruar më herët se Izraeli do të pranonte marrëveshje vetëm nëse të gjithë pengjet lirohen menjëherë.
Të shtunën, avionë dhe tanke goditën pjesë të qytetit të Gazës, teksa Izraeli vazhdoi planin për të marrë nën kontroll zonën më të madhe urbane të territorit.
Aktualitet
Rektori i UBT-së, në mesin e pesë liderëve më të mirë globalë të arsimit të lartë nga Triple E Awards
Published
10 hours agoon
August 25, 2025By
Driton Iseni
Një vlerësim tjetër ndërkombëtar për Kosovën dhe arsimin e lartë: Themeluesi dhe Rektori i UBT-së, Prof. Dr. Edmond Hajrizi, është përzgjedhur në mesin e pesë liderëve më të shquar globalë për çmimin prestigjioz Triple E Awards – Udhëheqësi Universitar i Vitit (Kategoria Globale).
Kjo përzgjedhje e vendos Rektorin Hajrizi krah personaliteteve që kanë transformuar arsimin e lartë dhe rolin e tij në shoqëri, duke e bërë UBT-në një shembull unik të inovacionit, zhvillimit dhe vizionit në nivel ndërkombëtar.
Në këtë kategori shumë konkurruese, finalistët tjerë krahas Rektorit Hajrizi janë:
Nuno Fernandes – President, American Public University System (Shtetet e Bashkuara)
Marie-Josée Lamothe – Drejtoreshë, McGill Dobson Centre for Entrepreneurship (Kanada)
Christina Ionescu – Mount Allison University (Kanada)
Zaur Samadov – Trinity College Dublin & Open Incubator (Irlandë)
Rektori Hajrizi është përzgjedhur për lidershipin e tij transformues të dëshmuar në arsimin e lartë. Si themelues vizionar i UBT-së, ai ka ndërtuar një ekosistem që e pozicionon universitetin si një nxitës të inovacionit, qëndrueshmërisë dhe rinovimit shoqëror.
Që nga themelimi i UBT-së me vetëm 29 studentë në vitin 2004, deri te zhvillimi në një institucion lider kombëtar me mbi 15,000 studentë sot, ai ka integruar ndërmarrësinë, transformimin digjital dhe qëndrueshmërinë në çdo nivel.
Nën udhëheqjen e tij, UBT ka gjeneruar mbi 100 spin-off-e, mbi 1,000 vende pune çdo vit dhe ka nisur iniciativa si UBT Accelerator, Kampi i Inovacionit, dhe Qendra e Inovacionit Digjital. I njohur ndërkombëtarisht për zhvillimin e kampusit të mençur, energjinë e rinovueshme dhe përafrimin me Objektivat e Zhvillimit të Qëndrueshëm (SDG), puna e tij dëshmon se si universitetet mund të shërbejnë si motorë të zhvillimit ekonomik dhe përparimit shoqëror.
Të qenurit në mesin e këtyre liderëve të shquar globalë është një dëshmi e lidershipit vizionar të Rektorit Hajrizi, njohjes ndërkombëtare dhe kontributit të tij të qëndrueshëm në arsimin e lartë dhe shoqëri.
Aktualitet
Presidentja Osmani: Rusia po synon destabilizimin e Ballkanit
Published
10 hours agoon
August 25, 2025By
Driton Iseni
Forca me ndikim të keq, si Rusia, po përpiqen të ushtrojnë ndikim në Ballkan sepse kanë “interesa strategjike” dhe synojnë të destabilizojnë sistemin e vlerave të BE-së dhe NATO-s, ka deklaruar Presidentja e Kosovës, Vjosa Osmani, në një intervistë ekskluzive për TVP World.
Duke folur në margjinat e Forumit Evropian në Alpbach, të shtunën, Osmani paralajmëroi për rritjen e ndikimit të “trekëndëshit të së keqes” – Rusisë, Kinës dhe Iranit – dhe theksoi sfidat më të ngutshme për Kosovën.
“Shpesh them se kur shohim forca të tilla si Rusia, Kina dhe Irani – ky trekëndësh i së keqes – duke tentuar të ndikojnë në Ballkanin Perëndimor, ata nuk e bëjnë këtë nga bamirësia, por sepse kanë një interes strategjik”, tha Osmani.
Ajo shtoi se për Kosovën problemi më i madh mbetet Serbia. Duke cituar Misionin e Vëzhgimit Evropian, Osmani theksoi se është dëshmuar që Serbia, “e ndihmuar dhe e shtyrë nga Rusia”, ka ndërhyrë edhe në zgjedhjet e fundit parlamentare në Kosovë.
“Sfida jonë më e madhe, siç kam thënë, është fakti se Serbia vazhdon t’i shohë shtetet fqinjë si shtete të përkohshme”, u shpreh ajo, duke e krahasuar këtë qasje me “mentalitetin imperialist dhe hegjemonist të Rusisë”.
Megjithatë, Osmani theksoi se në skenën e madhe politike të Kosovës “nuk ka ndikim rus apo serb, gjithçka është lokale”.
Ajo gjithashtu rikujtoi se Kosova ka synim të qartë integrimin në BE, por mungesa e një shumice parlamentare po e pengon realizimin e projekteve evropiane dhe bashkëpunimin me administratën amerikane.
Aktualitet
Donjeta Sadiku drejt Botërorit të Boksit
Published
11 hours agoon
August 25, 2025By
Driton Iseni
Nga 13 gushti deri më 2 shtator 2025, boksierja kosovare Donjeta Sadiku, së bashku me trajneren dhe selektoren Marjola Sallauka, po zhvillon përgatitje intensive në kampin stërvitor në Sheffield të Anglisë.
Ky kamp përfaqëson një hap vendimtar në rrugëtimin drejt Kampionatit Botëror të boksit, i cili do të mbahet nga 4 deri më 14 shtator në Liverpool të Anglisë.
Sadiku ka dëshmuar prej kohësh cilësitë e saj si një nga emrat më të fuqishëm të boksit botëror. Ajo ka fituar medaljen e bronztë në Kampionatin Botëror 2022 në Stamboll, një tjetër medalje të bronztë në Kampionatin Evropian 2022 në Budva, si dhe ka shkëlqyer këtë vit me triumfe të njëpasnjëshme duke fituar medalje të arta në tri turnetë prestigjioze: Strandja në Bullgari, Brussels Capital Tournament në Belgjikë dhe Feliks Stamm në Varshavë të Polonisë.
Me këtë përvojë, pritshmëritë dhe besimi janë të mëdha: që Donjeta Sadiku të kurorëzohet në Liverpool si Kampione e Botës, duke sjellë medaljen e artë në Kosovë.

Profesori i UBT-së, Bahri Gashi, pjesë e rrjetit prestigjioz ndërkombëtar të recensimit shkencor në Taylor & Francis

Kransiqi i LVV-së në KQZ me aksion simbolik pas vendimit të PZAP-së për Listën Serbe

Kosova humb 114 milionë euro për energji, Shoqata e Prodhuesve fajëson institucionet

Barcelona shqyrton alternativa për ndeshjen ndaj Valencias për shkak të vonesave në “Camp Nou”

UBT ofron Master në Psikologji me standarde evropiane

Andre Onana mbetet në Manchester United, nuk ka oferta për portierin

Arsenali synon të nënshkruajë me Piero Hincapie, sfidon Tottenhamin

Apple pritet të sjellë ndryshime të mëdha në dizajnin e iPhone, duke nisur me modelin 17 Air

Droni i ri Bayraktar TB2T-AI thyen rekordin e lartësisë në kategorinë e tij
Të kërkuara
-
Lajmet nga UBT3 months ago
UBT organizon debat rreth zgjerimit të BE-së dhe ruajtjes së vlerave evropiane
-
Lajmet nga UBT3 months ago
UBT – Institucioni privat me më së shumti programe të akredituara nga Agjencia e Akreditimit të Kosovës
-
Lajmet nga UBT3 months ago
UBT rilicencohet nga MAShTI për ofrimin e arsimit profesional në katër drejtime të rëndësishme shëndetësore
-
Kërkime2 months ago
Profesori i UBT-së, Musa Sabedini, publikon punim shkencor në revistën ndërkombëtare JGPSCD në SHBA