Adrion Pajaziti ka dhënë kontribut në fitoren e Hajdukut të Splitit ndaj Lokomotivës së Zagrebit.

Hajduku triumfoi të hënën mbrëma në shtëpi me rezultat 2:0, në ndeshjen e vlefshme për javën e pestë të elitës së futbollit kroat.

Pajaziti asistoi në golin e dytë të Hajdukut, i cili u realizua në minutën e 55-të. Për mesfushorin 23-vjeçar ky ishte asistimi i dytë këtë sezon.

Pajaziti e kompletoi ndeshjen, ashtu si edhe Ron Raçi, ndërsa Etnik Brruti u inkuadrua në lojë në minutën e 81-të.

Brruti arriti të shënonte në minutën e 91-të, por goli i tij u anulua për pozitë jashtë loje.

Te Lokomotiva, në pjesën e parë luajti Dominik Thaqi, ndërsa Dardan Morina u inkuadrua në minutën e 82-të.

Feta Fetai e ndoqi ndeshjen nga banka rezervë.
D.L

Futbollistet e Mitrovicës sot do ta zhvillojnë ndeshjen e kthimit ndaj skuadrës ukrainase Metalist 1925, në kuadër të Kupës Evropiane.

Ndeshja e parë, e zhvilluar javën e kaluar në stadiumin “Zahir Pajaziti” në Podujevë, përfundoi pa gola, 0:0.

Ndeshja e kthimit do të zhvillohet në Shkup, me fillim nga ora 13:00, ku Mitrovica do të kërkojë fitoren dhe kualifikimin tutje në garën evropiane.

Kampionia e Kosovës arriti në Kupën Evropiane pas një kampanje pozitive në Ligën e Kampionëve. Në gjysmëfinale të raundit të parë kualifikues, Mitrovica mposhti kampionen e Moldavisë, ndërsa në finale triumfoi ndaj kampiones së Bullgarisë.

Në raundin e dytë kualifikues të Ligës së Kampionëve, mitrovicaset fillimisht pësuan ndaj Brannit norvegjez, ndërsa më pas, me fitoren ndaj Ferencvaroshit të Hungarisë, siguruan kalimin në Kupën Evropiane.

“Europa Cup” është niveli i dytë kontinental për klubet e futbollisteve dhe ky është vetëm edicioni i dytë i kësaj gare.

Për Kosovën, kjo është paraqitja e parë në historinë e Kupës Evropiane, ndërsa Mitrovica synon ta vazhdojë rrugëtimin evropian me një rezultat pozitiv ndaj Metalist 1925.

D.L

Anis Mehmeti ka refuzuar një tjetër mundësi për të vazhduar karrierën në Championship, pasi sulmuesi shqiptar synon të bëjë hapin e madh drejt Premier League.

Sipas gazetarit Ben Jacobs, Mehmeti ka vendosur të mos e pranojë ofertën e Wrexhamit, pavarësisht se klubi uellsian kishte arritur marrëveshje me Ipswich Town për transferimin e tij.

“Për momentin, Anis Mehmeti nuk ka dashur të luajë në Championship. Mehmeti ka refuzuar gjithashtu Wrexhamin, pasi ata kishin arritur marrëveshje me Ipswich Town”, ka raportuar Jacobs.

25-vjeçari, i cili është pjesë e Ipswich Town, ka tërhequr vëmendjen me paraqitjet e tij në futbollin anglez dhe duket se objektivi i tij kryesor është të luajë në elitën e futbollit anglez.

Refuzimi i Wrexhamit e lë të hapur të ardhmen e Mehmetit, i cili pritet të shqyrtojë alternativa të tjera para përfundimit të afatit kalimtar.

Nëse synimi i tij është një transferim në Premier League, ditët e fundit të afatit kalimtar mund të sjellin zhvillime të reja për të ardhmen e sulmuesit shqiptar.

D.L

Afati kalimtar veror në basketbollin kosovar ka sjellë një numër të konsiderueshëm lëvizjesh, me skuadrat e ProCredit Superligës që kanë bërë ndryshime të rëndësishme në përbërjet e tyre për sezonin e ri.

Peja është skuadra që ka regjistruar më së shumti basketbollistë gjatë këtij afati kalimtar, duke synuar të ndërtojë një ekip konkurrues për sezonin e ri.

Një prej lëvizjeve më të veçanta është rikthimi i Edmond Azemit te Sigal Prishtina. Në moshën 45-vjeçare, Azemi rikthehet te klubi me të cilin ka shkruar një pjesë të rëndësishme të historisë së basketbollit kosovar.

Ndryshime ka edhe në basketbollin e femrave. Bashkimi ka regjistruar dy basketbolliste të huaja, duke e përforcuar skuadrën për sezonin e ri dhe duke synuar rezultate më të mira në garat vendore.

Afati kalimtar ka sjellë lëvizje të shumta te klubet kosovare, ndërsa vëmendja tashmë është te sezoni i ri dhe mënyra se si përforcimet e reja do të ndikojnë në garën për trofetë e basketbollit kosovar.

D.L