Lajmet

Trajtimi i rasteve të dhunës seksuale, Kurti: Institucionet të mos i hedhin fajin njëra-tjetrës

Sipas tij, dhunuesit e abuzuesit në shumë raste nuk kanë marrë dënimet e merituara.

Published

on

Kryeministri Albin Kurti ka thënë se dhunuesit e abuzuesit në shumë raste nuk kanë marrë dënimet e merituara. Edhe në rastet kur viktimat raportojnë dhunën, Kurti tha se institucionet nuk i kanë kryer e zbatuar obligimet ligjore. Kështu ka deklaruar ai gjatë lansimit të protokollit shtetëror për trajtimin e rasteve të dhunës seksuale. Ministrja Albulena Haxhiu deklaroi se nga viti 2019 janë shënuar mbi 300 raste të dhunimeve seksuale.

Shefi i ekzekutivit, Albin Kurti ka thënë se jo rrallëherë sistemi i drejtësisë ka pësuar nga brishtësia e vet, në mungesë të mekanizmave të mirëfilltë të cilët përcaktojnë fushëveprimet ku adresohen lëndët përkatëse.

“Protokolli shtetëror për trajtimin e rasteve të dhunës seksuale është një dokument pune për tu përdorur nga të gjitha institucionet përgjegjëse për trajtimet e rasteve së dhunës seksuale. Ky protokoll shtetëror synon të qartësojë të gjitha institucionet përgjegjëse se nuk ka rëndësi nëse viktima apo e mbijetuara kontakton së pari me urgjencë, denoncon rastin në polici, kontakton me mbrojtësin e viktimave, apo kërkon ndihmë në qendrën e specializuar të shërbimeve për gratë e dhunuara. E rëndësishme është që pavarësisht se cili institucion merr informacionin i pari për rastin, duhet të fillojë trajtimin me përgjegjshmëri dhe profesionalizëm dhe duhet të përmbushen të gjitha nevojat specifike të viktimave, nëpërmjet qasjes shumë sektoriale e të koordinuar”, ka thënë Kurti.

Sipas tij, qëllimi kryesor i këtij protokolli është standardizimi i veprimeve të nevojshme për një reagim të vazhdueshëm, gjithëpërfshirës e me përgjegjshmëri për mbrojtjen, identifikimin, fuqizimin dhe riintegrimin e viktimave.

“Nuk mund të lejohen papërgjegjësi të tilla, ku institucionet i hedhin fajin njëra-tjetrës për mosveprim dhe gjithashtu shmangin përgjegjësitë apo neglizhojnë thirrjet e viktimave të dhunës, kur ato trokasin në dyert e institucioneve. Shpeshherë në rastet e paraqitura, institucionet nuk i kanë kryer e nuk i kanë zbatuar obligimet ligjore, duke i lënë viktimat pa trajtimin që u takon dhe që ato e meritojnë. E po ashtu në raste të këtilla, dhunuesit dhe abuzuesit nuk e kanë marrë dënimin e merituar”, ka shtuar Kurti.

Kurti shtoi se viktimave u takon përkrahja institucionale, shëndetësore e psikologjike.

Në lansimin e protokollit shtetëror për trajtimin e rasteve të dhunës seksuale, Kurti tha se përfshin të gjitha detyrimet për mbrojtjen e menjëhershme të viktimës.

“Protokolli përfshin zbatimin e të gjitha detyrimeve të parashikuara ligjërisht për mbrojtje të menjëhershme të viktimës, si dhe shërbimet gjithëpërfshirëse: Marrjen e pëlqimit të informuar, ofrimin e përkthyesve të gjuhës, interpretëve të gjuhës së shenjave në rast nevoje, trajtimin në ambiente të përshtatshme miqësore, ofrimin e infrastrukturës së plotë që mundëson qasjen e personave me nevoja të veçanta, ofrimin e shërbimeve të profesionistëve të së njëjtës gjini me viktimën si dhe shmangien e lodhshme të intervistimit të shumëfishtë”, tha Kurti.

Me miratimin e këtij protokolli, shefi i ekzekutivit theksoi se përpilimi i dokumentit mundëson dhe lehtëson punën për ta eliminuar dhunën seksuale ndaj grave.

E, ministrja e Drejtësisë, Albulena Haxhiu tha se protokolli shtetëror për trajtimin e rasteve të dhunës seksuale është një nga dokumentet më të rëndësishme që ka hartuar Ministria e Drejtësisë.

“Të dhënat e viteve të fundit në Kosovë tregojnë për një rritje të rasteve të dhunës seksuale. 311 raste të ekzaminuara në Institutin e Mjekësisë Ligjore, vetëm për periudhën 2019-2021. Të dhënat gjithashtu tregojnë një numër të konsiderueshëm të fëmijëve, vajza e djemtë të kësaj forme të dhunës, krahasuar me numrin e të rriturve. Ndërsa, në numrat e rritur janë gratë ato që me përqindje më të lartë lajmërojnë apo kallëzojnë një incident të dhunës seksuale, krahasuar me burrat”, ka thënë Haxhiu.

Më tej, ministrja Haxhiu është zotuar se do të vazhdojë përpjekjet për zvogëlimin e rasteve të dhunës seksuale.

“Ajo çfarë i jep vlerë këtij mjeti mjaft të rëndësishëm në punën e përditshme institucionale është përllogaritja e kostove financiare bazuar në nevojat përkatëse që e kthejnë këtë protokoll në një mjet të zbatueshëm realisht. Dhe që të arrihet kjo është detyrë e secilit institucion përgjegjës që për nevojat që ka për të praktikuar detyrimet dhe përgjegjësitë e mirë-përcaktuara në protokoll, të përkthejnë kostot financiare me buxhete të planifikuar e të alokuara në shpenzimet e realizuara”, ka shtuar ajo.

Shefi i misionit të EULEX-it të Kosovë, Lars Gunnar Ëigemark tha se 85 për qind të dhunës seksuale të raportuara kanë qenë gra nën moshën 18-vjeçare.

“85 për qind e dhunës seksuale të raportuara kanë qenë gra nën moshën 18-vjeçare. Mirëpo, ka edhe burra e djemë të cilët kanë qenë pjesë e kësaj dhune seksuale apo viktimë, mirëpo nuk janë raportuar për shkak të stigmatizmit meshkujt më pak duan që të raportojnë dhe sidomos komuniteti LGBTI hezitojnë të raportojnë dhunën seksuale. Dhe për shembull grupeve të ndryshme të cenueshme, djemve e vajzave të rinj është vështirë për ta që të raportojnë, ose personave që kanë probleme shëndetësore e mendore që e kanë të vështirë të klasifikojnë se çfarë ka ndodhur me ta. 228 raste janë klasifikuar si dhunim për këto vjet, një numër i vogël i këtyre rasteve ka arritur deri në seanca gjyqësore dhe kanë marrë një vendim gjyqësor”, ka deklaruar ai.

Lansimi i protokollit shtetëror për trajtimin e rasteve të dhunës seksuale po bëhet në kuadër të 16 ditëve të aktivizmit kundër dhunës me baza gjinore.

Gjatë këtyre ditëve janë vrarë dy gra, ku dyshohet se janë viktima të bashkëshortëve të tyre.

Rajoni

UBT përfaqësohet me sukses në Konferencën Ndërkombëtare të Pedodontisë në Turqi

Published

on

Prof. Dr. Aida Rexhepi dhe Ligj. Aferdita Gashi nga Katedra e Pedodoncisë dhe Stomatologjisë Preventive të Fakultetit të Stomatologjisë përfaqësuan UBT-në në Konferencën Ndërkombëtare të Pedodontisë në Antalia të Turqisë.

Me një prezantim të studimit të tyre shkencor mbi prevalencën e hipomineralizimit të molarit dhe incizivit te fëmijët e moshës 8-11 vjeç, përfaqësueset e UBT-së treguan ekspertizën e institucionit në hulumtime të avancuara në shëndetin oral dhe stomatologjinë pediatrike.

Konferenca u zhvillua në Antalia të Turqisë, më 4-7 tetor 2025, nën ombrellën e Shoqatës së Pedodonteve të Turqisë. Ky aktivitet ofroi një platformë ndërkombëtare për shkëmbimin e njohurive, diskutimin e metodave më të fundit në stomatologji pediatrike dhe prezantimin e rezultateve të studimeve shkencore nga specialistë të fushës.

Continue Reading

Lajmet

Ngrihet aktakuzë për shitblerje të narkotikëve dhe armëmbajtje pa leje në Gjakovë

Published

on

By

Prokuroria Themelore në Gjakovë, ka ngritur aktakuzë, kundër të pandehurit E.M nën dyshimin për shitje dhe shpërndarje të narkotikëve.

Sipas aktakuzës, ndër të tjera ceket se më datë 11.08.2025 rreth orës 21:25 në Gjakovë Rr. “Gasper Karaqi”, i pandehuri me qëllim të shitjes ose shpërndarjes pa autorizim posedon, substanca apo preparate të cilat me ligj janë shpallur si narkotikë, substanca psikotrope ose analoge, në atë mënyrë që derisa i pandehuri ka qenë duke lëvizur përgjatë rrugës së lartcekur me automjetin e tij Audi A6 me targa të regjistrimit …., në një pik kontrolli është ndalur nga zyrtarët policor të NJRSH-së, ku gjatë kontrollit në çantën e të pandehurit gjenden dhe sekuestrohen gjashtë (6) qese të mbushura me substancë narkotike.

Ashtu që nga ana e hetuesve në mënyrë urgjente është kryer kontrolli dhe bastisja në banesën e të pandehurit me ç’rast janë gjetur dhe sekuestruar substanca narkotike, një peshore digjitale, dy palë gërshërë, një lugë metalike, shirit ngjitës, shkrepës dhe qese të vogla të zbrazëta, të cilat kanë shërbyer për përgatitjen dhe më pas shitjen apo shpërndarjen e substancës narkotike, të cilat janë sekuestruara nga hetuesit policor, me ç’rast pas ekzaminimit nga AKF sipas raportit është konstatuar substancë narkotike e llojit kokainë me peshë të përgjithshme 342.06 gram”, thuhet në komunikatë.

Më tej thuhet se gjithashtu i pandehuri nga data e pa vërtetuar e deri më datë 11.08.2025, rreth orës 21:25 në Gjakovë, ka mbajtur në pronësi armë në kundërshtim me Ligjin për Armë Nr.05/L-022, dhe atë një pistoletë me gaz të llojit Zoraki dhe një karikartor, e sekuestruar nga ana e policisë.

Me këto veprime i pandehuri E.M., ka kryer veprat penale “Blerja, posedimi, shpërndarja dhe shitja e paautorizuar e narkotikeve, substancave psikotrope dhe analoge” nga neni 267 par.1 të KPRK-së dhe “Mbajtja në pronësi, kontroll ose posedim të paautorizuar të armëve” nga neni 366 par.1 të KPRK-së”, thuhet në njoftim.

Në fund thuhet se prokurori i çështjes me rastin e ngritjes së aktakuzës, i ka propozuar gjykatës që të pandehurin ta shpallë fajtor dhe të dënohet sipas ligjit për veprat penale të cilat i vihen në barrë./D.B/KP

Continue Reading

Lajmet

​Zbulohet sasi e konsiderueshme mallrash të padeklaruara në pikën kufitare Vërmicë

Published

on

By

Zyrtarët doganorë në pikën kufitare në Vërmicë kanë parandaluar tentativën për të futur në territorin e Republikës së Kosovës mallra të padeklaruara, gjatë një kontrolli rutinë të zhvilluar sot.

Sipas njoftimit të Doganës, gjatë kontrollit të një automjeti të udhëtarëve, janë gjetur 18 thasë me 144 palë mbathje sportive të markës “Nike”, të cilat ishin fshehur në bagazhin e automjetit dhe nuk ishin deklaruar në momentin e hyrjes në territor.

Pala në fjalë nuk posedonte faturë për mallin, dhe sipas procedurave ligjore, malli është ndaluar përkohësisht në pikën kufitare deri në përfundimin e procedurave”, njofton Dogana e Kosovës. /D.B/KP

Continue Reading

Lajmet

Rektori Hajrizi u uron studentëve mirëseardhje dhe një fillim të mbarë të vitit akademik 2025/26

Published

on

Rektori i UBT-së, Prof. Dr. Edmond Hajrizi, u ka uruar mirëseardhjen studentëve të rinj dhe atyre aktualë në fillimin e vitit të ri akademik 2025/26. Në fjalën e tij, Rektori Hajrizi theksoi rëndësinë e këtij fillimviti, i cili sjell mundësi për suksese, përvoja të reja edukative dhe zhvillim personal e profesional.

Lexoni mesazhin e plotë të Rektorit Hajrizi:

Të dashur studentë të rinj dhe studentë aktualë të UBT-së,

Në emër të UBT-së dhe në emrin tim personal, ju urojmë mirëseardhje në fillimin e vitit të ri akademik 2025/26.

Ky është një fillimvit që na bashkon për më shumë suksese, përvoja të reja edukative e akademike, si dhe mundësi për zhvillim personal dhe profesional.

UBT mirëpret gjeneratën e re të radhës, e cila bashkë me studentët aktualë, që kanë besuar në edukimin dhe zhvillimin profesional të ofruar nga UBT, do të kontribuojë në një vit të pasur akademik.

Besojmë fuqimisht se, ashtu si gjithmonë, do të veprojmë për të arritur synimet tona kryesore: Top Education for Top Students, duke mbështetur jo vetëm studentët, por edhe zhvillimin e vendit dhe suksesin e Kosovës në arenën globale.

Ju keni zgjedhur të studioni në institucionin më prestigjioz, tashmë të dëshmuar edhe në nivel global, ku cilësia dhe inovacioni janë parimet themelore.

UBT është ranguar ndër universitetet më të mira në botë për cilësi, inovacion, ndërmarrësi, zhvillim të qëndrueshëm, teknologji dhe inteligjencë artificiale, dhe së fundmi, renditet në vendin e parë në botë për angazhimin dhe impaktin në shoqëri.

Për herë të parë në Kosovë dhe në rajon, UBT ka integruar Inteligjencën Artificiale, teknologjitë më të avancuara dhe infrastrukturën e kompletuar të një Qyteti të Mençur, së bashku me një staf cilësor, në rritje, dhe shumë të përkushtuar, në mënyrë që ju të jeni sa më të suksesshëm.

Kështu, gjatë studimeve, ju do të keni mbështetje të plotë nga profesorët, mentorët dhe strukturat tona akademike, duke ju dhënë hapësirën e duhur për të mësuar, krijuar dhe ndërtuar karrierën tuaj.

Ne jemi të përkushtuar t’ju ofrojmë një përvojë studimi të pasur, që jo vetëm do të ndikojë në jetën tuaj personale, por gjithashtu do të kontribuojë në shoqëri dhe në zhvillimin e Kosovës.

Ju uroj një vit akademik të suksesshëm, të mbushur me dije, përvoja dhe arritje të reja. Le të jetë ky vit një hap i sigurt drejt realizimit të ëndrrave tuaja!

Me respekt,

Prof. Dr. Edmond Hajrizi

President dhe Rektor i UBT-së

Continue Reading

Të kërkuara