Sport

Trajnerët më të trofeshëm në histori

Skocezi Alex Ferguson është padyshim trajneri më i madh në historinë e futbollit.

Published

3 years ago

March 5, 2024

Betim Gashi

1. Sir Alex Ferguson – 50 trofe

Skocezi Alex Ferguson është padyshim trajneri më i madh në historinë e futbollit sa i përket trofeve, pasi ka fituar rreth 50 tituj në gara të ndryshme.

Këto përfshijnë triumfet ndërkombëtare gjatë karrierës së tij si trajner në Skoci dhe Angli.

Gjatë kohës së tij në kampionatin skocez, Sir Alex theu ecurinë e Celtic dhe Glasgow Rangers, duke fituar me Aberdeen tituj të shumtë të Ligës dhe Kupës Skoceze.

Pëveç asaj, koha e tij me Manchester United e bëri atë ta marrë statusin e legjendës.

Alex Ferguson fitoi gjithsej 40 tituj me “Djajtë e Kuq”, poashtu ndihmoi në vendosjen e tyre si një nga skuadrat më të trofeshme në Angli dhe veten si një nga trajnerët më të mëdhenj.

2. Josep Guardiola – 39 trofe

Pep siç njihet është një nga trajnerët më të mirë të futbollit dhe më të suksesshëm në lojën moderne.

Spanjolli deri më tani ka fituar 39 tituj duke trajnuar disa prej skuadrave më të mira në botë si Barcelona, Bayern Munich dhe Manchester City.

Gama e trofeve që ai ka fituar është po aq frikësuese, nga ligat dhe kupat vendase deri te trofetë e Ligës së Kampionëve dhe sukseset e Kupës së Botës për Klube.

Në sezonin 2022/23, Pep Guardiola fitoi Premier League, FA Cup dhe UEFA Champions League. Kjo ishte gjithashtu tripleta e dytë si trajner pasi e fitoi atë me Barcelonën në 2009.

3. Mircea Lucescu – 37 trofe

Rumuni është një nga trajnerët më të suksesshëm në historinë e futbollit.

Karriera e tij si trajner përfshin vende të ndryshme nga vendlindja e tij Rumania, pastaj në Turqi, Ukrainë dhe Itali.

Gjatë një karriere që ka zgjatur 41 vjet e në vazhdimësi, 76-vjeçari ka mundur të fitojë rreth 37 tituj si trajner.

Ai aktualisht nuk është i aktivizuar në ndonjë skuadër, por së fundmi ishte pjesë e Dynamo Kyiv.

4. Jose Mourinho — 30 trofe

Trajneri portugez nuk është vetëm një nga trajnerët me më shumë trofe në historinë e futbollit, por edhe një nga trajnerët më të paguar të futbollit.

Mourinho ka fituar gjithsej 30 trofe në karrierën e tij menaxheriale.

Ai së fundmi trajnonte skuadren e AS Roma dhe fitoi titullin e tij të parë me kryeqytetasit, kur ekipi i tij fitoi Ligën e Konferencës në vitin 2022.

Me atë arritje, Jose Mourinho u bë trajneri i parë që arriti “tripletën” e UEFA-s duke fituar Champions League, Europa League dhe Conference League.

Mourinho gjatë karrierës së tij si trajner menaxhoi skuadra si: Real Madrid, Manchester United, Chelsea, Tottenham, Porto e Inter.

5. Carlo Ancelotti — 28 trofe

Carlo Ancelotti është një nga menaxherët më të famshëm të futbollit që ka marrë drejtimin e klubeve të ndryshme në të gjithë Evropën.

Italiani është trajner që nga viti 1992 kur ishte asistent i kombëtares së Italisë.

Që atëherë, Ancelotti ka drejtuar ekipe si Juventus, AC Milan, Chelsea, PSG, Real Madrid, Bayern Munich dhe Everton.

Përgjatë karrierës së tij të gjatë si trajner, Ancelotti ka arritur të fitojë 28 tituj. Ndërsa, mandati më i suksesshëm i italianit ishte me AC Milan nga viti 2001 deri në 2009.

6. Ottmar Hitzfeld — 27 trofe

Hitzfeld është një nga trajnerët më të mirë që Gjermania ka prodhuar ndonjëherë. Ai njihej me epitetin “der general” për shkak të aftësive komanduese të tij.

Gjatë karrierës së tij 31-vjeçare si trajner, Hitzfeld fitoi 27 tituj mbresëlënës kryesisht me skuadrat gjermane Borussia Dortmund dhe Bayern Munich.

Ottmar fitoi ligat dhe kupat vendase, si dhe një titull të Ligës së Kampionëve. Ai gjithashtu fitoi një titull të Kupës së Botës për Klube përpara se të pensionohej në 2014.

Poashtu, 75-vjeçari kishte drejtuar edhe Kombëtaren e Zvicres në periudhën 2008-2014.

7. Valeriy Lobanovskyi – 26 trofe

Valeriy Lobanovskyi ishte një nga trajnerët më të suksesshëm dhe me më shumë trofe të fituar.

Si trajner, ai drejtoi 7 skuadra, duke përfshirë Emiratet e Bashkuara Arabe, Kuvajtin, Dynamo Kyiv, Ukrainën dhe Bashkimin Sovjetik.

Me skuadren e Dynamo Kyiv ai arriti që të bëhej skuadra e parë nga Bashkimi Sovjetik që fitoi një trofe të madh evropian në 1975, kur mposhti skuadrën hungareze Ferencváros në finalen e Kupës së Fituesve të Kupës së Europës.

Gjatë gjithë karrierës së tij si menaxher, Valeriy Lobanovskyi fitoi 26 trofe zyrtarë, duke e bërë atë një nga trajnerët më të dekoruar të të gjitha kohërave.

8. Jock Stein — 26 trofe

Jock Stein ishte një sulmues fenomenal për Celtic si lojtar, por karriera e tij menaxheriale për është ajo për të cilën ai do të mbahet mend.

Ai e filloi karrierën e tij menaxheriale në vitin 1960 me Dunfermline në Skoci, ku më pas drejtoi edhe skuadra si Celtic, Hibernian, Leeds United dhe Kombëtaren skoceze.

Jock Stein ishte trajneri i parë i një skuadre britanike që fitoi Kupën Europiane, me Celtic.

Ai gjithashtu udhëhoqi Celtic në nëntë kampionate radhazi të Ligës Skoceze midis 1966 dhe 1974 ndërsa fitoi Kupën e Ligës Skoceze gjashtë herë radhazi.

9. Giovanni Trapattoni — 22 trofe

Italiani konsiderohet si një nga trajnerët më të suksesshëm të klubeve në historinë e futbollit italian.

Si menaxher, ai filloi karrierën e tij në Milano si trajner i ekipit të të rinjve përpara se të bëhej trajner i përkohshëm.

Më pas ai vazhdoi të drejtojë disa klube të mëdha në Itali, duke përfshirë Juventusin, Interin dhe AC Milan, si dhe klube në Gjermani, Austri, Portugali dhe së fundmi ekipin kombëtar të Republikës së Irlandës.

Trapattoni fitoi shumë trofe gjatë karrierës së tij menaxheriale, duke përfshirë shtatë tituj të Serisë A, një titull të Bundesligës dhe një titull portugez të Primeira Liga.

Për më tepër, ai drejtoi kombëtaren italiane nga viti 2000 deri në vitin 2004, duke i çuar në çerekfinale të Kupës së Botës 2002 dhe në fazën e grupeve të Euro 2004.

10. Arsene Wenger — 21 trofe

Wenger është i njohur për udhëheqjen e ekipit të pamposhtur të Arsenalit drejt një fitoreje të pamposhtur në Premier League. Megjithatë, ai është edhe një nga trajnerët me më shumë trofe në historinë e futbollit.

Francezi e filloi karrierën e tij menaxheriale në Francë, ku ai drejtoi Nancy dhe AS Monaco. Atje ai fitoi titullin e Ligue 1 dhe Coupe de France.

Në vitin 1996, Wenger u emërua si menaxher i Arsenalit, ku ai kaloi 22 vjet në krye. Gjatë kohës së tij në Arsenal, Wenger fitoi tre tituj të Premier League, shtatë FA Cup dhe shtatë Community Shields. Poashtu, udhëhoqi skuadrën në finalen e UEFA Champions League në 2006, ku ata u mundën nga Barcelona.

Ai gjithashtu numëron edhe dy tituj për Nagoya Grampus në Japoni./UBTNews/

Shkroi: Arti Haziraj

Sport

Enzo Maresca po e fiton sfidën e madhe pas Guardiolas te Manchester City

Published

20 minutes ago

September 15, 2026

UBTNews

Një analizë e BBC-së vë në pah se si Enzo Maresca po e menaxhon me sukses një nga detyrat më të vështira në futbollin modern: zëvendësimin e Pep Guardiolas te Manchester City. Pavarësisht presionit të madh, tekniku italian po e bën këtë tranzicion të duket i lehtë, duke udhëhequr Cityn drejt katër fitoreve në po aq ndeshje në Premier League, ku ndan kryesimin me Arsenalin.

Testi më i madh i Marescas erdhi në fundjavë me fitoren 1:0 ndaj Manchester Unitedit në “Old Trafford”, ku City luajti shumicën e kohës me një lojtar më pak pas përjashtimit të Phil Foden. Qetësia e skuadrës pasqyroi vetëpërmbajtjen e trajnerit në vijën anësore. Ndryshe nga sezoni i kaluar te Chelsea, ku një karton i kuq në të njëjtin stadium e bëri të reagonte me panik, këtë herë Maresca ruajti gjakftohtësinë, vlerësoi situatën dhe bëri lëvizje vendimtare taktike, si kalimi i Rayan Cherkit në të djathtë dhe inkuadrimi i Iliman Ndiayes.

BBC vëren një kontrast të madh mes Marescas dhe Guardiolas. Italiani shfaqet gjithmonë i buzëqeshur në konferenca për media dhe ka sjellë një frymë të re në stërvitje, përfshirë vendosjen e muzikës “house” për të rritur disponimin e lojtarëve. Kapiteni i ri, Ruben Dias, konfirmoi se parimet bazë të lojës mbeten të ngjashme me ato të Guardiolas, por me detaje të reja taktike që mbajnë vulën e trajnerit të ri.

Përderisa zëvendësimi i menaxherëve legjendarë si Ferguson apo Wenger solli kriza te klubet e tyre, Maresca po e përqafon këtë sfidë si një privilegj dhe nuk ndjen presion nga hija e paraardhësit të tij. Pavarësisht humbjes fillestare 3:0 ndaj Arsenalit në Superkupë, City është rikthyer fuqishëm me pesë fitore radhazi në të gjitha garat. Me ndeshjet e radhës ndaj Norwichit dhe Sunderlandit, Maresca është rrugës për të kompletuar një fillim pothuajse të përsosur në krye të gjigantit anglez.

D.L

Sport

Dy golat ndaj Sassuolos e ndryshojnë situatën e Zhegrovës, por e ardhmja mbetet e paqartë

Published

2 hours ago

September 15, 2026

UBTNews

Dy golat e shënuar ndaj Sassuolos kanë përmirësuar ndjeshëm situatën e Edon Zhegrovës te Juventusi, por e ardhmja e sulmuesit kosovar në Torino ende nuk është e sigurt.

Sipas “Tuttomercatoweb”, emri i Zhegrovës vazhdon të përmendet në mesin e lojtarëve që mund të largohen nga Juventusi gjatë afatit kalimtar të janarit.

Në garë për shërbimet e tij është edhe Atalanta, e cila po e monitoron nga afër situatën e reprezentuesit të Kosovës.

Klubi nga Bergamo po shqyrton mundësinë e huazimit të Zhegrovës me opsion për blerjen e kartonit të tij në fund të sezonit. Megjithatë, deri më tani nuk ka pasur kontakte zyrtare mes dy klubeve dhe Atalanta nuk ka bërë ende ndonjë ofertë konkrete për Juventusin.

Sipas mediumit italian, gjithçka mund të varet nga situata e të dyja skuadrave në janar, si dhe nga roli që Zhegrova do të ketë te Juventusi deri në atë periudhë.

Dy golat ndaj Sassuolos padyshim që i kanë dhënë një shtysë të rëndësishme kosovarit, por mbetet për t’u parë nëse kjo paraqitje do të mjaftojë për ta bindur Juventusin që ta mbajë atë në skuadër.

D.L

Sport

Pesë lojtarët e paprekshëm të Mourinhos te Real Madridi

Published

2 hours ago

September 15, 2026

UBTNews

Real Madridi i José Mourinhos po merr gradualisht formë, ndërsa tashmë kanë filluar të dallohen qartë lojtarët kryesorë mbi të cilët trajneri portugez po ndërton projektin e tij të ri.

Sipas “Marca”, vetëm pesë futbollistë të ekipit të parë kanë qenë titullarë në të gjashtë ndeshjet zyrtare të zhvilluara deri më tani. Edhe pse është ende herët për të nxjerrë përfundime përfundimtare, ky pesësh duket se përbën boshtin e skuadrës, të paktën derisa përforcimet e reja të përshtaten plotësisht.

Në këtë grup bën pjesë fillimisht Thibaut Courtois. Portieri belg, pavarësisht se po i afrohet moshës 35-vjeçare, vazhdon të paraqitet në nivel të lartë dhe mbetet një prej pikave më të sigurta të formacionit madrilen. Mourinho nuk duket se ka ndërmend t’i japë pushim, pasi Courtois vazhdon të gëzojë besimin maksimal të trajnerit.

Krahas tij janë edhe tre prej emrave më të rëndësishëm të repartit ofensiv: Kylian Mbappé, Jude Bellingham dhe Vinícius Junior.

Mbappé dhe Bellingham e kanë nisur sezonin në mënyrë fantastike. Francezi ka realizuar shtatë gola dhe ka dhuruar një asistim, ndërsa anglezi ka shënuar tri herë dhe ka regjistruar tri asistime.

Ndërkohë, Vinícius Junior ende po kërkon të rikthejë formën dhe vetëbesimin e tij më të mirë. Pavarësisht kritikave dhe vërshëllimave të tifozëve, Mourinho vazhdon t’i besojë brazilianit dhe duket i vendosur ta mbajë atë si një prej pjesëve kryesore të projektit të tij.

Pesëshen e plotë e mbyll Federico Valverde. Uruguaiani e kishte përfunduar sezonin 2025/26 mes shumë pikëpyetjesh, ndërsa përplasja me Aurélien Tchouaménin kishte ndikuar në pozitën e tij brenda skuadrës.

Megjithatë, Mourinho duket se ka arritur ta lërë pas atë situatë dhe t’ia rikthejë Valverdes rëndësinë që kishte në formacion. Fakti se mesfushori uruguaian ka qenë titullar në të gjitha ndeshjet e deritanishme tregon qartë se ai vazhdon të jetë një prej lojtarëve më të besuar të trajnerit portugez.

Courtois, Mbappé, Bellingham, Vinícius dhe Valverde – ky është, të paktën në këtë fazë të sezonit, boshti mbi të cilin Mourinho po ndërton Real Madridin e tij të ri.

D.L

Sport

Rodri: T’i thuash “jo” Real Madridit nuk ishte e lehtë

Published

3 hours ago

September 15, 2026

UBTNews

Mesfushori Rodri ka pranuar se refuzimi i një oferte nga Real Madridi nuk ishte aspak një vendim i lehtë. Spanjolli ka vlerësuar veçanërisht mënyrën se si ishte trajtuar nga klubi madrilen gjatë bisedimeve.

Në deklaratat e raportuara nga “Mundo Deportivo”, Rodri ka treguar se para se të merrte vendimin përfundimtar, iu desh të shqyrtonte me kujdes shumë faktorë. Ai ndodhej përballë një zgjedhjeje të vështirë mes dy prej klubeve më të mëdha të futbollit botëror.

“T’i thuash ‘jo’ Real Madridit nuk ishte e lehtë, sidomos pasi më trajtuan shumë mirë”, u shpreh Rodri.

Mesfushori theksoi se vendimi kërkonte një analizë të kujdesshme, pasi bëhej fjalë për një hap të rëndësishëm në karrierën e tij.

“M’u desh të merrja parasysh shumë gjëra dhe të merrja një vendim vërtet të rëndësishëm, që përfshinte dy prej klubeve më të mira në botë”, deklaroi ai.

Në fund, Rodri shpjegoi se zgjedhjen e tij e bazoi kryesisht në aspektin sportiv, ambiciet personale dhe mundësinë për t’u zhvilluar më tej si futbollist.

“E mora vendimin duke u bazuar në aspektin sportiv, në atë që më entuziazmonte më shumë dhe në vendin ku ndieja se mund të fitoja dhe të rritesha më shumë si lojtar”, përfundoi Rodri.

D.L