Sport

Trajnerët më të trofeshëm në histori

Skocezi Alex Ferguson është padyshim trajneri më i madh në historinë e futbollit.

Published

2 years ago

March 5, 2024

Betim Gashi

1. Sir Alex Ferguson – 50 trofe

Skocezi Alex Ferguson është padyshim trajneri më i madh në historinë e futbollit sa i përket trofeve, pasi ka fituar rreth 50 tituj në gara të ndryshme.

Këto përfshijnë triumfet ndërkombëtare gjatë karrierës së tij si trajner në Skoci dhe Angli.

Gjatë kohës së tij në kampionatin skocez, Sir Alex theu ecurinë e Celtic dhe Glasgow Rangers, duke fituar me Aberdeen tituj të shumtë të Ligës dhe Kupës Skoceze.

Pëveç asaj, koha e tij me Manchester United e bëri atë ta marrë statusin e legjendës.

Alex Ferguson fitoi gjithsej 40 tituj me “Djajtë e Kuq”, poashtu ndihmoi në vendosjen e tyre si një nga skuadrat më të trofeshme në Angli dhe veten si një nga trajnerët më të mëdhenj.

2. Josep Guardiola – 39 trofe

Pep siç njihet është një nga trajnerët më të mirë të futbollit dhe më të suksesshëm në lojën moderne.

Spanjolli deri më tani ka fituar 39 tituj duke trajnuar disa prej skuadrave më të mira në botë si Barcelona, Bayern Munich dhe Manchester City.

Gama e trofeve që ai ka fituar është po aq frikësuese, nga ligat dhe kupat vendase deri te trofetë e Ligës së Kampionëve dhe sukseset e Kupës së Botës për Klube.

Në sezonin 2022/23, Pep Guardiola fitoi Premier League, FA Cup dhe UEFA Champions League. Kjo ishte gjithashtu tripleta e dytë si trajner pasi e fitoi atë me Barcelonën në 2009.

3. Mircea Lucescu – 37 trofe

Rumuni është një nga trajnerët më të suksesshëm në historinë e futbollit.

Karriera e tij si trajner përfshin vende të ndryshme nga vendlindja e tij Rumania, pastaj në Turqi, Ukrainë dhe Itali.

Gjatë një karriere që ka zgjatur 41 vjet e në vazhdimësi, 76-vjeçari ka mundur të fitojë rreth 37 tituj si trajner.

Ai aktualisht nuk është i aktivizuar në ndonjë skuadër, por së fundmi ishte pjesë e Dynamo Kyiv.

4. Jose Mourinho — 30 trofe

Trajneri portugez nuk është vetëm një nga trajnerët me më shumë trofe në historinë e futbollit, por edhe një nga trajnerët më të paguar të futbollit.

Mourinho ka fituar gjithsej 30 trofe në karrierën e tij menaxheriale.

Ai së fundmi trajnonte skuadren e AS Roma dhe fitoi titullin e tij të parë me kryeqytetasit, kur ekipi i tij fitoi Ligën e Konferencës në vitin 2022.

Me atë arritje, Jose Mourinho u bë trajneri i parë që arriti “tripletën” e UEFA-s duke fituar Champions League, Europa League dhe Conference League.

Mourinho gjatë karrierës së tij si trajner menaxhoi skuadra si: Real Madrid, Manchester United, Chelsea, Tottenham, Porto e Inter.

5. Carlo Ancelotti — 28 trofe

Carlo Ancelotti është një nga menaxherët më të famshëm të futbollit që ka marrë drejtimin e klubeve të ndryshme në të gjithë Evropën.

Italiani është trajner që nga viti 1992 kur ishte asistent i kombëtares së Italisë.

Që atëherë, Ancelotti ka drejtuar ekipe si Juventus, AC Milan, Chelsea, PSG, Real Madrid, Bayern Munich dhe Everton.

Përgjatë karrierës së tij të gjatë si trajner, Ancelotti ka arritur të fitojë 28 tituj. Ndërsa, mandati më i suksesshëm i italianit ishte me AC Milan nga viti 2001 deri në 2009.

6. Ottmar Hitzfeld — 27 trofe

Hitzfeld është një nga trajnerët më të mirë që Gjermania ka prodhuar ndonjëherë. Ai njihej me epitetin “der general” për shkak të aftësive komanduese të tij.

Gjatë karrierës së tij 31-vjeçare si trajner, Hitzfeld fitoi 27 tituj mbresëlënës kryesisht me skuadrat gjermane Borussia Dortmund dhe Bayern Munich.

Ottmar fitoi ligat dhe kupat vendase, si dhe një titull të Ligës së Kampionëve. Ai gjithashtu fitoi një titull të Kupës së Botës për Klube përpara se të pensionohej në 2014.

Poashtu, 75-vjeçari kishte drejtuar edhe Kombëtaren e Zvicres në periudhën 2008-2014.

7. Valeriy Lobanovskyi – 26 trofe

Valeriy Lobanovskyi ishte një nga trajnerët më të suksesshëm dhe me më shumë trofe të fituar.

Si trajner, ai drejtoi 7 skuadra, duke përfshirë Emiratet e Bashkuara Arabe, Kuvajtin, Dynamo Kyiv, Ukrainën dhe Bashkimin Sovjetik.

Me skuadren e Dynamo Kyiv ai arriti që të bëhej skuadra e parë nga Bashkimi Sovjetik që fitoi një trofe të madh evropian në 1975, kur mposhti skuadrën hungareze Ferencváros në finalen e Kupës së Fituesve të Kupës së Europës.

Gjatë gjithë karrierës së tij si menaxher, Valeriy Lobanovskyi fitoi 26 trofe zyrtarë, duke e bërë atë një nga trajnerët më të dekoruar të të gjitha kohërave.

8. Jock Stein — 26 trofe

Jock Stein ishte një sulmues fenomenal për Celtic si lojtar, por karriera e tij menaxheriale për është ajo për të cilën ai do të mbahet mend.

Ai e filloi karrierën e tij menaxheriale në vitin 1960 me Dunfermline në Skoci, ku më pas drejtoi edhe skuadra si Celtic, Hibernian, Leeds United dhe Kombëtaren skoceze.

Jock Stein ishte trajneri i parë i një skuadre britanike që fitoi Kupën Europiane, me Celtic.

Ai gjithashtu udhëhoqi Celtic në nëntë kampionate radhazi të Ligës Skoceze midis 1966 dhe 1974 ndërsa fitoi Kupën e Ligës Skoceze gjashtë herë radhazi.

9. Giovanni Trapattoni — 22 trofe

Italiani konsiderohet si një nga trajnerët më të suksesshëm të klubeve në historinë e futbollit italian.

Si menaxher, ai filloi karrierën e tij në Milano si trajner i ekipit të të rinjve përpara se të bëhej trajner i përkohshëm.

Më pas ai vazhdoi të drejtojë disa klube të mëdha në Itali, duke përfshirë Juventusin, Interin dhe AC Milan, si dhe klube në Gjermani, Austri, Portugali dhe së fundmi ekipin kombëtar të Republikës së Irlandës.

Trapattoni fitoi shumë trofe gjatë karrierës së tij menaxheriale, duke përfshirë shtatë tituj të Serisë A, një titull të Bundesligës dhe një titull portugez të Primeira Liga.

Për më tepër, ai drejtoi kombëtaren italiane nga viti 2000 deri në vitin 2004, duke i çuar në çerekfinale të Kupës së Botës 2002 dhe në fazën e grupeve të Euro 2004.

10. Arsene Wenger — 21 trofe

Wenger është i njohur për udhëheqjen e ekipit të pamposhtur të Arsenalit drejt një fitoreje të pamposhtur në Premier League. Megjithatë, ai është edhe një nga trajnerët me më shumë trofe në historinë e futbollit.

Francezi e filloi karrierën e tij menaxheriale në Francë, ku ai drejtoi Nancy dhe AS Monaco. Atje ai fitoi titullin e Ligue 1 dhe Coupe de France.

Në vitin 1996, Wenger u emërua si menaxher i Arsenalit, ku ai kaloi 22 vjet në krye. Gjatë kohës së tij në Arsenal, Wenger fitoi tre tituj të Premier League, shtatë FA Cup dhe shtatë Community Shields. Poashtu, udhëhoqi skuadrën në finalen e UEFA Champions League në 2006, ku ata u mundën nga Barcelona.

Ai gjithashtu numëron edhe dy tituj për Nagoya Grampus në Japoni./UBTNews/

Shkroi: Arti Haziraj

Sport

Dyfishohet mbështetja financiare për sportistet dhe trajneret femra

Published

22 hours ago

March 13, 2026

UBTNews

Ministri i Sportit dhe Rinisë, Blerim Gashani, ka marrë vendim për rritjen e koeficientit të mbështetjes financiare për sportistet dhe trajneret femra, duke e dyfishuar atë nga 200 në 400 euro.

Sipas njoftimit të Ministria e Sportit dhe Rinisë e Kosovës, ky vendim synon të forcojë mbështetjen për gratë në sport dhe të krijojë më shumë mundësi për zhvillim profesional, përkushtim dhe përfaqësim në arenën sportive.

Rritja e mbështetjes financiare konsiderohet një hap i rëndësishëm drejt fuqizimit të sportisteve dhe trajnerëve femra, duke pasur parasysh se sportistet kosovare ndër vite kanë sjellë sukseset më të mëdha ndërkombëtare për vendin.

Përmes arritjeve të tyre, ato kanë ngritur lart flamurin e Kosovo dhe kanë promovuar sportin kosovar në arenën ndërkombëtare.

Nga ministria theksohet se institucionet do të vazhdojnë të mbështesin sportistet dhe trajneret femra përmes politikave dhe mekanizmave që synojnë zhvillimin e barabartë dhe avancimin e sportit në vend.

Sport

Kombëtarja U17 vazhdon përgatitjet për kualifikimet e Evropianit 2027

Published

22 hours ago

March 13, 2026

UBTNews

Kombëtarja e Kosovës U17 ka zhvilluar kampin e radhës dyditor seleksionues në kuadër të përgatitjeve për raundin e dytë kualifikues për Kampionatin Evropian U17 2027, i cili do të mbahet në fund të këtij muaji në Antalia.

Përzgjedhësi Arbnor Morina dhe stafi i tij kanë pasur në dispozicion futbollistë nga klubet vendore, kryesisht të gjeneratës 2009, për të cilët ky është cikli i fundit në këtë grupmoshë.

Para udhëtimit drejt Antalias, përfaqësuesja U17 do të zhvillojë edhe një grumbullim dyditor në Kampin Nacional të Federatës së Futbollit të Kosovës në Hajvali, ku do të përgatiten futbollistët që do të udhëtojnë për ndeshjet kualifikuese.

Kosova bën pjesë në Grupin 7 të Ligës B, ku më 25 mars do të përballet me Kombëtaren e Holandës U17, ndërsa më 28 mars do të luajë kundër Kombëtares së Bjellorusisë U17.

Këto ndeshje do të jenë një test i rëndësishëm për futbollistët e rinj të Kosovës, të cilët synojnë paraqitje sa më të mirë në këtë fazë të kualifikimeve evropiane.

Sport

Basketbolli kosovar feston 11 vjet anëtarësi në FIBA

Published

23 hours ago

March 13, 2026

UBTNews

13 marsi do të mbetet përgjithmonë një nga datat më të rëndësishme në historinë e sportit kosovar. Në këtë ditë të vitit 2015, Federata e Basketbollit e Kosovës u pranua zyrtarisht si anëtare me të drejta të plota në FIBA, duke i hapur rrugë përfaqësimit ndërkombëtar të basketbollit të Kosovës pas shumë vitesh përpjekjesh.

Ky moment historik shënoi një kapitull të ri për basketbollin në vend, pasi Kosova u bë pjesë e familjes botërore të këtij sporti dhe fitoi mundësinë të garojë në arenën ndërkombëtare.

13 marsi përfaqëson shumë më tepër se një vendim formal. Ai simbolizon një rrugëtim të gjatë përkushtimi dhe sakrifice nga gjenerata të shumta basketbollistësh, trajnerësh, gjyqtarësh dhe punëtorësh sportivë që kanë kontribuar në zhvillimin e basketbollit në Kosovë.

Në përputhje me Planin Strategjik të Federatës së Basketbollit të Kosovës për periudhën 2026–2030 dhe me synimin për të zgjeruar komunitetin e basketbollit në vend, është vendosur që 13 marsi të shënohet çdo vit si Dita e Basketbollit në Kosovë.

Kjo ditë synon të bashkojë të gjithë dashamirët e basketbollit dhe të rikujtojë rrugëtimin, përkushtimin dhe sukseset që kanë ndërtuar historinë e këtij sporti në Kosovë.

Sport

Kosova synon avancimin për Botërorin 2027

Published

1 day ago

March 13, 2026

UBTNews

Përzgjedhësi i Kosovës në hendboll, Jesper Ostlund, ka folur për faqen zyrtare të Federatës së Hendbollit të Kosovës pas publikimit të listës së lojtarëve për ndeshjet e javës së ardhshme ndaj Bosnjë-Hercegovinës.

Takimet i takojnë fazës së dytë kualifikuese për Kampionatin Botëror të Hendbollit 2027. Ndeshja e parë do të zhvillohet të enjten në Tuzla, ndërsa takimi i kthimit është programuar të dielën në Prishtinë.

Në Kombëtare janë rikthyer disa lojtarë kyç, ndërsa emër i ri në listë është Olt Kabashi. Megjithatë, disa mungesa janë konfirmuar.

“Kemi disa mungesa, por mendoj se ende kemi ekip që mund ta sfidojë Bosnjën në një ditë të mirë,” ka deklaruar Ostlund.

Nëse Kosova eliminon Bosnjë-Hercegovinën, Kombëtarja do të ketë vetëm një pengesë tjetër drejt Botërorit. “Mendoj se kemi shansa të avancojmë. Bosnja natyrisht është favorite, por kam besim të fortë në ekipin tim dhe do të bëjmë çdo gjë të mundur,” shtoi përzgjedhësi suedez.

Në raundin e parë kualifikues, Kosova eliminoi Britaninë e Madhe, por Bosnjë-Hercegovina përfaqëson një nivel më të lartë evropian. “Është ekip fizik, me lojtarë që luajnë në skuadra të mëdha dhe me një grup të gjerë. Do të jetë një sfidë e vërtetë ta mposhtim Bosnjën,” tha Ostlund.

Ky grumbullim do të jetë i treti i suedezit me Kombëtaren e Kosovës. “Jam i kënaqur. Herën e parë kur takova ekipin e mposhtëm Britaninë e Madhe dy herë. Ishte hera ime e parë me një ekip nga Ballkani dhe e kam shijuar shumë. Në kampin e dytë kishim dhjetë lojtarë të lënduar, kështu që pata mundësinë të shoh dhe testoj shumë lojtarë të rinj,” përfundoi Ostlund.

Kosova synon të tregojë forcën e saj dhe të marrë avantazhin për fazën finale të kualifikimeve për Botërorin 2027.