Sport

Toverlani flet për objektivat me Përfaqësuesen U21 të Kosovës

I pranishëm në prezantimin e Toverlanit ishte edhe Presidenti i Federatës së Futbollit të Kosovës, Agim Ademi.

Published

4 years ago

September 15, 2022

UBT.News

Në ambientet e Federatës së Futbollit të Kosovës, sot është prezantuar trajneri i ri Përfaqësueses së Kosovës U21, Afrim Toverlani.

Më të nisur fjalën e tij, ai tregoi se do të jetë një grumbullim i kësaj kombëtareje për të pasur idenë e parë mbi gjendjen e lojtarëve dhe me pas foli për objektivat për të cilat tha se fillimisht do të jenë shumë modeste.

“Synimet do të jenë, më tepër mund të flas për synimet pas takimeve, grumbullimeve që do t’i kemi me futbollistët dhe ta shohim se çfarë skuadre mund të krijojmë nga këta futbollistë që do t’i ftojmë dhe do të varet shumë edhe nga shorti. Sepse synimet normal janë gjithmonë të secilit të ketë rezultate më të mëdha, ta kërkojë kualifikimin, mirëpo personalisht do të nisem më tepër me një modesti dhe gjatë rrugës do ta shoh se cilat mund të jenë objektivat të cilat mund t’i arrijmë”, tha Toverlani.

Ai më tutje zbuloi se ka pasur edhe tre apo katër oferta nga disa klube, duke përmendur edhe Shkëndijën e Tetovës, por që i ka refuzuar ato për ta drejtuar kombëtaren e grupmoshave të reja.

“Vitin e kaluar kam refuzuar tri oferta. Nuk kam dashur të shkojë çdokund, nuk kam dashur të punoj çdokund dhe falë Zotit i kam do kushte modeste që jo patjetër më duhet të punojë për ta siguruar një mbijetesë. Pra edhe kur të më vijnë ofertat i shqyrtoj nëse më plotësohen mua dhe atyre kushtet e përbashkëta ta marr atë detyrë. Para një javë kam pasur telefonatë, jo ofertë zyrtare por vetëm telefonatë për Shkëndijën e Tetovës, mirëpo unë jam tashmë te U21-shi dhe jo me doemos kam pranuar çdokund të punojë”, tha Toverlani.

Krejt në fund, Toverlani foli edhe për faktin se lojtarët po ikin nga Kosova drejt Shqipërisë, siç ndodhi së fundi me Medon Berishën, dhe Toverlani u tregua mjaft i ashpër me ata që e ndërmarrin një hap të tillë. Sipas tij, këta lojtarë duhet të mendojnë mira para se të largohen sepse më vonë po kërkojnë që të rikthehen.

“Dera e Federatës së Futbollit është e hapur për të gjithë futbollistët kosovarë kudo që janë. Ka futbollistë të cilët edhe po zgjedhin, por kjo është krijuar një veti jo e mirë. Nëse vjen, p.sh, je te Kosova për dy ndeshje në bankën e rezervistëve dhe menjëherë po e gjen një arsye ‘jo unë po shkoj të Shqipëria’, ne jo që duam ta ndalim dikë që të luajë për Shqipërinë, mirëpo nuk është korrekte të vish me kushtëzime nëse dëshiron ta përfaqësosh shtetin tënd. Mos harroni që për këtë shtet, për këto fanella është sakrifikuar shumë. Ata që mendojnë që mendojnë që e kanë diku tjetër më mirë, nuk po them mos ta zgjedhin atë rrugë, mirëpo është mirë të mendohen shumë mirë sepse mandej po vjen koha, ka edhe prej atyre që kanë kërkuar prap të kthehen”, ka thënë në fund Toverlani.

Toverlani gjithashtu në fund zbuloi se pjesë e stafit të tij teknik do të jenë edhe Genc Hoxha, Primoz Gliha, Liridon Kukaj dhe Naser Prapashtica tek sektori i portierëve.

I pranishëm në prezantimin e Toverlanit ishte edhe Presidenti i Federatës së Futbollit të Kosovës, Agim Ademi.

Në fund trajneri i Kombëtares U21 publikoi edhe listën prej 25 lojtarëve për grumbullimin e parë nën urdhrat e tij.

Related Topics:Kosova u21 Agim Ademi Afrim Toverlani

Up Next

Zyrtare, shkarkohet trajneri i klubit të Superligës së Kosovës

Don't Miss

Sot nis “Street Fest 2022” në Prishtinë

Sport

Meksika siguron kualifikimin dhe bën histori në Botëror

Published

22 hours ago

June 19, 2026

UBTNews

Meksika ka mposhtur Korenë e Jugut me rezultat minimal 1:0 dhe është bërë përfaqësuesja e parë që siguron kalimin në fazën nokaut të Kupës së Botës.

Goli i vetëm i ndeshjes erdhi në minutën e 50-të, kur Luis Romo shfrytëzoi një gabim në mbrojtjen koreane dhe e dërgoi topin në rrjetë.

Koreja e Jugut tentoi të barazojë në fund, por portieri meksikan Raúl Rangel bëri një pritje vendimtare në minutën e 87-të për të ruajtur epërsinë.

Ndeshja u zhvillua në “Estadio Akron” në Guadalajara, ku tifozët krijuan atmosferë të zjarrtë dhe festuan së bashku me lojtarët në fund të takimit.

Me këtë fitore, Meksika shkon në 6 pikë dhe siguron avancimin nga Grupi A, duke konfirmuar formën e shkëlqyer në këtë Botëror.

D.L

Foto: Associated Press

Sport

Goditje e rëndë për Kanadanë në Botërorin 2026

Published

22 hours ago

June 19, 2026

UBTNews

Mesfushori kanadez Ismael Koné ka pësuar një lëndim të rëndë dhe nuk do të mund ta vazhdojë garën në Kupën e Botës. Ai theu këmbën pas një ndërhyrjeje të ashpër nga Assim Madibo në minutën e 57-të, duke shkaktuar tensione të mëdha në fushë.

Madibo u ndëshkua me karton të kuq dhe më pas kërkoi falje për ndërhyrjen, ndërsa te Katari me të kuq u përjashtua edhe Homam Al Hami që në pjesën e parë.

Koné u largua nga fusha me barelë pas ndihmës së stafit mjekësor, duke marrë edhe oksigjen. Fatmirësisht, ai ishte i vetëdijshëm gjatë largimit dhe u përshëndet me duartrokitje nga i gjithë stadiumi.

Pavarësisht incidentit, Kanadaja dominoi plotësisht ndeshjen dhe shënoi fitore bindëse 6:0 ndaj Katarit. Tensione pati edhe pas përfundimit të takimit.

Pas dy ndeshjeve, Kanadaja kryeson Grupin B me 4 pikë, po aq sa ka edhe Zvicra. Bosnjë-Hercegovina dhe Katari mbeten me nga 1 pikë.

D.L

Foto: Associated Press

Lajmet

Muriqi rikthehet në Turqi: Arrin marrëveshje me Fenerbahçen

Published

24 hours ago

June 19, 2026

UBTNews

Sulmuesi i përfaqësueses së Kosovës, Vedat Muriqi, është shumë pranë rikthimit të madh në futbollin turk. Pas aventurës në La Liga me skuadrën e Mallorcas, Muriqi ka arritur një marrëveshje në parim me gjigantin nga Stambolli, Fenerbahçen.

Lajmi është konfirmuar zyrtarisht nga vetë klubi turk përmes një njoftimi në faqen e tyre, ku bëhet e ditur se shtatgjati kosovar tashmë ka zbritur në Stamboll.

“Klubi ynë ka arritur marrëveshje në parim me futbollistin Vedat Muriqi, i cili ka mbërritur në Stamboll për t’iu nënshtruar kontrolleve mjekësore dhe për të përfunduar fazën e fundit të bisedimeve për transferimin”, thuhet në njoftimin zyrtar të Fenerbahçes.

Në aeroportin e Stambollit, Muriqi ka marrë një pritje madhështore. Ai u mirëprit nga zyrtarët e lartë të klubit, si anëtarët e Bordit Drejtues, Savaş Adalet e İsmail Balcı, si dhe drejtori sportiv, Oğuz Çetin. Përveç udhëheqësisë së klubit, atij iu rezervua edhe një mikpritje e ngrohtë nga tifozët e shumtë të pranishëm, të cilët shfaqën entuziazmin dhe dashurinë e tyre për rikthimin e sulmuesit. /E.A/

Lajmet

Xhaka shënon dhe vulos fitoren e parë të Zvicrës në Botëror

Published

1 day ago

June 19, 2026

UBTNews

Kapiteni Granit Xhaka ka udhëhequr Zvicrën drejt fitores së parë në Kupën e Botës 2026, duke mposhtur Bosnjë-Hercegovinën me rezultat të thellë 4:1 në Los Angeles. Me këtë triumf, Zvicra bën një hap të madh drejt fazës nokaut, duke u ngjitur në kuotën e 4 pikëve në Grupin B, ndërsa Bosnja mbetet me vetëm një pikë.

Ndeshja u vendos në fundin e saj dramatik, ku të gjitha golat e Zvicrës u shënuan pas minutës së 74-të. Ndryshimin e madh e bënë zëvendësuesit Johan Manzambi (me dy gola) dhe Ruben Vargas, të cilët u futën në lojë në minutën e 72-të. Ndeshja u lehtësua për zviceranët edhe nga minuta e 80-të, kur Tarik Muharemoviq i Bosnjës u ndëshkua me karton të kuq pasi ndali Breel Embolon si lojtar i fundit. Për boshnjakët golin e nderit e shënoi Ermin Mahmiq në minutën e 93-të.

Vula e kësaj fitoreje erdhi nga vetë kapiteni Granit Xhaka, i cili shënoi nga penalltia në minutën e shtatë të kohës shtesë. Pas golit, Xhaka festoi me një gjest me dorë duke u kërkuar kritikëve të heshtin dhe të qetësohen.

Kohët e fundit, mesfushori ishte vënë në shënjestër të mediave zvicerane për deklaratat e tij të ashpra publike pas barazimeve me Australinë dhe Katarin, duke pretenduar se ai po krijonte një klimë “toksike” në kombëtare. Megjithatë, mediumi prestigjioz “New York Times” i vlerësoi kritikat e tij si një dëshirë të madhe për të fituar.

“Njerëzit e dinë se kush jam… Unë jam njëri që e kritikoj veten para se t’i kritikojë të tjerët. Zvicra mund të jetë krenare që ka lojtar me 148 paraqitje për këto ngjyra. Por ndoshta kjo më duhet, unë provokoj paksa. Ajo që është e rëndësishme është se ekipi është prapa meje,” deklaroi Xhaka pas ndeshjes, duke konfirmuar se fokusi i tij i vetëm mbetet suksesi në fushë. /E.A/

Foto: Associated Press