Sport

‘Top’ dhjetë futbollistët të cilëve iu skadon kontrata në fund të këtij sezoni

Një listë me plotë emra të njohur është ajo që do t’ua prezantojmë më poshtë.

Published

2 years ago

March 11, 2024

Betim Gashi

Afati kalimtar i janarit është mbyllur thuajse para dy muaj dhe kjo do të thotë se lojtarëve që iu skadon kontrata në verën e vitit 2024 janë të lirë të negociojnë me klubet e tjera.

Një listë me plotë emra të njohur është ajo që do t’ua prezantojmë më poshtë, yje që janë të disponueshëm aktualisht si transferime falas gjatë verës së ardhshme.

Adrien Rabiot

Adrien Rabiot, mesfushori francez që aktualisht luan në Serie A, me Juventusin, do të jetë i disponueshëm si agjent i lirë në verën e vitit 2024. Kontrata e tij me Juventusin skadon në fund të sezonit aktual, duke e bërë atë një opsion tërheqës për klubet që kërkojnë mesfushorë me përvojë dhe të talentuar.

Adrien Rabiot iu bashkua gjigantëve italianë në korrik 2019 si agjent i lirë nga PSG. Duke performuar mjaft mirë për të fituar respekt të madh në Torino. Poashtu, thuhet se Juventus ka ofruar mundësinë e vazhdimit të kontratës Rabiot, kështu që është ende e mundur që ai të qëndrojë në Torino. Por agjenti i tij, është një person i vështirë për t’u përballur dhe ka shumë mundësi që francezi mund të kërkojë një largim nga Italia.

Anthony Martial

Karriera e Anthony Martial nuk ka shkuar siç duhet në “Old Trafford” dhe kjo e gjitha për shkak të lëndimeve të shpeshta të tij. Francezi pati shpeshherë paraqitje frustruese dhe asnjëherë nuk arriti t’i bindte drejtuesit e “Djave të Kuq”. Kështu sipas të gjitha gjasave kontrata e tij, nuk do të vazhdohet dhe ai do të jetë i lirë të negociojë me skuadra të tjera që nga 30 qershori i këtij viti.

Luka Modric

Një karrierë në Real Madrid e cila ka zgjatur gati 14 vjet tashmë mund të përfundojë në fund të këtij sezoni.

Pasi nënshkroi një rinovim verën e kaluar, ditët e Luka Modric në Bernabeu mund të jenë të numëruara, mirëpo ende nuk ka ndonjë gjë konkrete nga klubi apo edhe nga lojtari.

Toni Kroos

Teksa, Real Madrid ka ndërmarrë hapa për të rinovuar mesfushën e tyre në vitet e fundit, Kroos vazhdon të luajë në një nivel të lartë dhe nuk ka dyshim se ai ka më shumë për të dhënë me ‘Los Blancos’. Kështu pritet që madrilenët t’ia rinovojnë kontratën gjermanit.

Piotr Zielinski

Reprezentuesi polak është një nga yjet më të nënvlerësuar të Serie A, edhe pse roli i tij në triumfin e Napolit sezonin e kaluar ishte i jashtëzakonshëm.

Sidoqoftë, Zielinksi ishte afër largimit nga Napoli për në Arabinë Saudite verën që lamë pas. Megjithatë, është e mundur që ai të largohet nga Napoli me parametra zero në fundin e këtij edicioni.

Keylor Navas

Pas ardhjes së Gianluigi Donnarumma-s te PSG, Keylor Navas nuk ka arritur të jetë më titullar i përhershëm në formacion. Megjithatë periudha katërvjeçare në Francë e portierit nga Kosta Rika duket se do të përfundojë këtë verë.

Marco Reus

Pavarësisht se nuk ishte në gjendje t’i shpëtonte lëndimeve gjatë karrierës së tij, koha e Reus në “Signal Iduna Park” ka qenë jashtëzakonisht e suksesshme.

Fatkeqësisht, ai nuk ishte në gjendje të fitonte titullin e parë të Bundesligës me Dortmundin sezonin e kaluar dhe duket se mund t’i mbarojë koha për të fituar atë me skuadrën të cilën përfaqëson për më shumë se një dekadë dhe poashtu pritet që 33-vjeçari të largohet nga gjermanët.

Thiago Silva

Pavarësisht se është afër të 40-tave, Silva vazhdon të luajë rregullisht me Chelsea në Premier League. Megjithatë duke pasur parasysh se blutë do të jenë mjaft aktiv në afatin kalimtar të verës, ata mund të jenë të gatshëm ta lënë veteranin të largohet nga Stamford Bridge në fund të ketij sezoni.

Braziliani ka ende shumë për të dhënë në një nivel elitar dhe me shumë gjasë ofertat për të nuk do të mungojnë.

Joel Matip

Joel Matip ka vazhduar të paraqitet mjaft mirë për Liverpool-in këtë sezon, pavarësisht konkurrencës. Mirëpo, një dëmtim në fund të vitit të kaluar kundër Fulham mund ta ketë bërë atë të luajë ndeshjen e tij të fundit për “The Reds”.

Kontrata e senegalezit skadon verën e ardhshme. Në anën tjetër, Klopp ka lënë të kuptohet se Matip do të rinovoj me Liverpoolin, megjithëse pronarët e klubit mund të mos jenë të gatshëm t’i ofrojnë 32-vjeçarit një kontratë të re.

Olivier Giroud

Pavarësisht moshës së tij, Olivier Giroud ka treguar formë të shkelqyeshme në Serie A. Sulmuesi francez vazhdon të shënojë shpesh për Milanin, inteligjenca dhe cilësia e tij teknike e bëjnë atë të pandalshëm.

Kështu Milan nuk e sheh jashtë skuadrës 37-vjeçarin, të paktën edhe për sezonin e ardhshëm edhe pse kontrata e tij skadon këtë verë./UBTNews/

Sport

FIBA ia beson përsëri Kosovës Evropianin e Femrave për Shtetet e Vogla

Published

2 hours ago

February 5, 2026

Safet Zejnullahu

Është hedhur shorti për FIBA Kampionati Evropian të Femrave për Shtetet e Vogla dhe grup moshat e reja, ku Kosova ka mësuar kundërshtarët e saj.

Dardanet do të jenë në Grupin B, së bashku me Andorrën dhe Armeninë. Ndërkohë, në Grupin A janë Malta, Gjeorgjia dhe Shqipëria.

Kjo do të jetë hera e dytë që FIBA Kampionati Evropian i Femrave për Shtetet e Vogla organizohet në Kosovë, pasi më 2024 ishte organizuar në Prishtinë.

Gjatë kësaj vere, Kosova do të organizojë edhe FIBA U18 Eurobasketi i Femrave, Divizioni C, kampionat që po ashtu do të organizohet në Pejë nga 21 deri më 26 korrik, ku marrin pjesë shtatë shtete.

Kosova është në Grupin B, së bashku me Armeninë, Gjeorgjinë dhe Gjibraltarin, kurse në Grupin A janë: Malta, Shqipëria dhe Qipro.

Kjo verë do të jetë shumë e ngjeshur me aktivitete, pasi në përgjithësi, Kosova do të garojë me pesë Përfaqësuese në arenën evropiane, U20 meshkujt, U18 meshkujt dhe femrat dhe U16 meshkujt dhe femrat.

Kosova U16 femrat do të jenë në Grupin A, së bashku me Maltën dhe Gjeorgjinë, në Divizionin C, që mbahet në Maltë nga 7 deri më 12 korrik.

Kosova U16 meshkujt do të jenë në Grupi A, ku bëjnë pjesë edhe Shqipëria, San Marino dhe Moldavia. Divizioni C do të mbahet në Armeni nga 4 deri më 12 korrik.

Kosova U18 meshkujt janë në Grupi A, ku do të garojnë edhe Armenia, Andorra dhe Gjibraltari. Gara e Divizionit C do të mbahet në Shkodër nga 21 deri më 26 korrik.

Kosova U20 meshkujt do të garojë në Divizionin B, ku edicionin e kaluar kishte hyrë në Top 8, njëherë suksesi më i madh te gjeneratat e reja. Dardanët e rinj janë në Grupin C, ku marrin pjesë edhe Islanda, Portugalia, Armenia, Bosnja dhe Hercegovina dhe Qipro. Ky kampionat mbahet nga 10 deri më 19 korrik në Sllovaki. /Kosova Press/

Foto: KosovaPress

Sport

Agim Ademi në krye të FFK edhe për 4 vjet

Published

5 hours ago

February 5, 2026

Safet Zejnullahu

Agim Ademi fiton edhe një mandat në krye të futbollit kosovar. Në Kuvendin Zgjedhor të Federatës së Futbollit të Kosovës (FFK), të mbajtur sot, Ademi mori besimin e 52 delegatëve edhe për një mandat katërvjeçar.

Ademi, pasi mori për të tretën herë mandatin për të udhëhequr me Federatën e Futbollit të Kosovës, ka thënë se do të jetë në shërbim 24/7 për çështjen e futbollit. Po ashtu, ai theksoi se vota e dhënë ndaj tij, është besim për të dhe ekipin e tij.

Gjatë kuvendit u miratua edhe buxheti i FFK-së për vitin 2026, rreth 25 milionë euro.

Kryetari Ademi ka prezantuar fanellën e Dardanëve, teksa ka thënë se të gjitha ekipet nacionale do të vishen me “Adidas”.

“Ekipet tona nacionale nga ky vit do të vishen nga Adidas. Kjo është fanella e Kosovës dhe shpresoj që do të prezantohemi me të në SHBA”, ka thënë Ademi.

Sport

Davis largohet nga Dallasi pas vetëm 31 ndeshjesh

Published

8 hours ago

February 5, 2026

Safet Zejnullahu

Washington Wizards po e transferojnë Anthony Davis në një shkëmbim me tetë lojtarë me Mavericks që përfshin zgjedhje në draft për Dallas, tha të mërkurën një burim i sigurt për AP.

Wizards do të dërgojnë Khris Middleton, AJ Johnson, Malaki Branham dhe Marvin Bagley III te Mavericks së bashku me dy zgjedhje të raundit të parë të draftit dhe tre të raundit të dytë, sipas personit që foli me Associated Press, në kushte anonimiteti sepse marrëveshja ende nuk ishte miratuar nga NBA.

Kurse, Anthony bashkohet në Washington me Jaden Hardy, D’Angelo Russell dhe Dante Exum.

Lojtari që mori pjesë 10 herë në All-Star, Anthony Davis ka qenë jashtë fushave që nga 8 janari për shkak të një dëmtimi në dorën e majtë dhe nuk pritej të kthehej para pushimit të All-Star më vonë këtë muaj.

Kjo marrëveshje do të zbusë “gabimin” e ish-menaxherit të përgjithshëm Nico Harrison që shkëmbeu Luka Doncic-in për Davisin, ndërkohë që hoqi dorë nga një talent i gjeneratës së tij në kulmin e karrierës. Doncic ishte 25 vjeç në kohën e shkëmbimit.

/KosovaPress/

Sport

Manchester United përballë rrezikut të humbjes së kapitenit

Published

1 day ago

February 4, 2026

Safet Zejnullahu

E ardhmja e Bruno Fernandes të Manchester United është vënë sërish në pikëpyetje pas zbulimit të detajeve të kontratës së tij. Mesfushori portugez ka një klauzolë lirimi prej 57 milionë paundësh, e cila mund të aktivizohet vetëm nga klube jashtë Premier League, çka ka rritur spekulimet për një transferim të mundshëm, veçanërisht drejt Arabisë Saudite. Kontrata e kapitenit të “Djajve të Kuq” skadon në vitin 2027, duke e bërë verën e ardhshme vendimtare për klubin.

Fernandes ka qenë prej kohësh në radarin e klubeve saudite, të cilat më parë ishin të gatshme të ofronin rreth 100 milionë paund për shërbimet e tij. Edhe pse kjo lëvizje nuk u konkretizua, klauzola e re e bën largimin e tij më të realizueshëm. Vetë lojtari ka pranuar se ishte pranë largimit në verën e vitit 2025, duke zbuluar pakënaqësinë e tij me qëndrimin e drejtuesve të klubit.

“Klubi donte që unë të largohesha, këtë e kam të qartë. Vendosa të qëndroj për arsye familjare, por edhe sepse e dua këtë klub. Më dhemb dhe më trishton fakti që ndjeva sikur largimi im nuk do t’i shqetësonte shumë,” u shpreh Fernandes.

Që nga ardhja nga Sporting CP në janar 2020, Fernandes ka qenë shtylla kryesore e mesfushës së United, duke regjistruar mbi 300 paraqitje, 103 gola dhe 99 asistime. Edhe këtë sezon, ai mbetet një nga lojtarët më konstantë, me pesë gola dhe 12 asistime në Premier League, duke qenë pranë thyerjes së disa rekordeve historike. Megjithatë, me interesimin e rinovuar nga Arabia Saudite dhe klauzolën tashmë publike, Manchester United rrezikon të humbasë liderin e saj kryesor nëse nuk ndërmerr hapa vendimtarë për ta mbajtur në “Old Trafford”.

/KosovaPress/