

Lajmet
Tomas Szunyog: S’ka asnjë marrëveshje në dialog që pengon vendosjen e policisë në veri
Megjithatë për pjesën veriore thotë se ka njëfarë tradite njoftimi.
Published
4 years agoon
By
Betim GashiPër shefin e Zyrës së Bashkimit Evropian në Kosovë, Tomas Szunyog, Kosova ka shënuar njëfarë progresi në një mori fushash.
Dhe këtë ai thekson se e thotë edhe raporti i fundit i Komisionit Evropian.
“Kosova ka bërë përparim apo njëfarë përparimi: lufta kundër terrorizmit, ekonomia e tregut ose reformat strukturore; digjitalizimi i ekonomisë, përmirësimi i infrastrukturës rrugore dhe hekurudhore, investimet në burimet e ripërtëritshme, doganat, taksat, politikat e ndërmarrjeve dhe ato industriale”, përmend ai fushat ku ka pasur ecje.
“Progresi i kufizuar megjithatë është progres”.
Szunyog për KlanKosova duke përmendur fushat ku nuk ka pasur përparim ka theksuar se raporti i fundit duhet të shihet si mundësi për veprime konkrete në periudhën pasuese njëvjeçare.
“Shpresojmë se vitin në vijim do të ketë më tepër vendime konkrete. Është me rëndësi të shikohet raporti si një grumbull rekomandimesh për hapa të mëtejmë – një udhërrëfyes për veprime. Puna për raportin e ardhshëm nis që tani. Kosova mund të bëjë më mirë: qytetarët e meritojnë më mire”.
Ai në disa përgjigje ka folur edhe për zhvillimet e muajve më parë në veri të Kosovës, duke potencuar se asnjë marrëveshje dialogu s’ia ndalon Policisë së Kosovës vendosjen kudo në territorin shtetëror.
Megjithatë për pjesën veriore thotë se ka njëfarë tradite njoftimi.
“Nuk ka asnjë marrëveshje në dialog që pengon vendosjen e njësive speciale policore nga jugu në veri, por që është një praktikë e zakonshme koordinimi i ngushtë me bashkësinë ndërkombëtare si dhe njoftimi paraprak i KFOR-it”.
INTERVISTA:
Në raportin e fundit të Komisionit Evropian për Kosovën, është theksuar se është bërë “pak progres” në disa fusha. A janë pritjet që Kosova mund të bëjë më shumë, apo edhe qeveria e re sipas juve ka ngecur ta bëjë atë përparim?
Tomas Szunyog: Së pari dua të shpjegoj se çfarë është raporti. Ai ofron një pasqyrë objektive për progresin drejt Bashkimit Evropian dhe përcakton rekomandimet për të ardhmen. Me fjalë të tjera: vlerëson se si Kosova është e përgatitur për anëtarësim për t’u bashkuar në BE, duke parë shumë çështje: rendin dhe ligjin, reformat në drejtësi, lufta kundër korrupsionit dhe krimit të organizuar, siguria, të drejtat themelore, reforma e administratës publike, zhvillimi ekonomik dhe konkurrenca.
Përgjithësisht për shkak të ndryshimit të kontekstit politik dhe fokusin mbi pandeminë e COVID-19, raporti vë në dukje përparimin e kufizuar në reformat lidhur me BE-në. Në pjesën më të madhe të periudhës raportuese, aktivitetet legjislative ishin të kufizuara, duke përfshirë përpjekjet për reforma. Sidoqoftë, progresi i kufizuar megjithatë është progres. Më lejoni të sqaroj se progresi që ne matim mund të rezultojë me kthim mbrapa, jo përparim, përparim i kufizuar, njëfarë progresi, progres i mirë dhe përparim shumë të mirë. Në disa nga fushat, Kosova ka bërë përparim apo njëfarë përparimi: lufta kundër terrorizmit, ekonomia e tregut ose reformat strukturore; digjitalizimi i ekonomisë, përmirësimi i infrastrukturës rrugore dhe hekurudhore, investimet në burimet e ripërtëritshme, doganat, taksat, politikat e ndërmarrjeve edhe ato industriale. Në fusha të tjera, është bërë përparim i kufizuar apo s’është bërë fare: lufta kundër krimit dhe korrupsionit, kapacitetet për të përballuar presionin e konkurrencës dhe forcat e tregut, reforma në administratë publike, cilësia e arsimit, zhvendosja drejt prodhimit të energjisë së gjelbër dhe më të sigurt.
Raporti vlerëson progresin e bërë; ai gjithashtu e bën të qartë se nuk ka rrugë të shkurta drejt BE-së – reformat duhet të zbatohen në mënyrë efektive për të sjellë rezultate të prekshme për qytetarët.
Është me rëndësi për të theksuar që ne matim progresin në terma të vendimeve të marra, legjislacionit të miratuar, masave të zbatuara dhe strukturat në fuqi. Raporti fokusohet në fakte, jo në qëllime. Më lejoni që të theksoj se është një dokument i publikuar një herë në vit dhe ajo që ka rëndësi është sesi në bashkërisht punojmë për t’i kthyer rekomandimet në realitet.
Raporti i këtij viti ofron një kuptim shumë të mirë se ku qëndron Kosova dhe jep udhëzime konkrete për 12 muajt në vijim. Qeveria, në mandatin e saj të tanishëm, ka një shumicë të fortë parlamentare dhe duke qenë kështu, një bazë të fortë për më tepër reforma drejt BE-së. Ajo po ashtu ka treguar angazhimin dhe motivin për të bërë përparim. Shpresojmë se viti në vijim do të ketë më tepër vendime konkrete. Është me rëndësi të shikohet raporti si një grumbull rekomandimesh për hapa të mëtejmë – një udhërrëfyes për veprime. Puna për raportin e ardhshëm nis që tani. Kosova mund të bëjë më mirë: qytetarët e meritojnë më mirë.
Kosova është i vetmi vend në Evropë që qytetarët e saj nuk lëvizin pa viza derisa kriteret për këtë çështje janë plotësuar prej vitesh. Pse duhet që siç thuhet “problemet e brendshme të BE-së” të peshojnë mbi kurrizin e një kombi prej 1.8 milion banorëve?
Tomas Szunyog: Jam shumë i vetëdijshëm mbi rëndësinë e liberalizimit të vizave për Kosovën dhe vërtet e kuptoj frustrimin rreth faktit që qytetarët e Kosovës mbesin të vetmit në Ballkanin Perëndimor që kanë nevojë për viza për të udhëtuar në zonën Shengen. Në këtë kuptim, Komisioni Evropian mban vlerësimin e bërë në korrik 2018 se Kosova i ka përmbushur të gjitha standardet për liberalizim vizash. Parlamenti Evropian ka rikonfirmuar mbështetjen për propozimet e bëra nga komisioni për t’i liberalizuar vizat në shumë raste, për së fundi herë në raportin e vet për bashkëpunim në luftën kundër krimit të organizuar në Ballkanin Perëndimor që I bën thirrje Këshillit Evropian për të miratuar liberalizimin e regjimit të vizave me Kosovën pa vonesa të mëtejme.
Propozimi po mbahet pezull në Këshill. Komisioni dhe Zyra e BE-së këtu në Prishtinë vazhdon shkëmbimet me vendet anëtare të BE-së në këtë çështje. Kosova mundet dhe duhet që edhe më tej të përforcojë përpjekjet duke u angazhuar gjithashtu në një dialog me shtetet anëtare dhe të kërkojë mbështetjen e tyre në mënyrë dypalëshe, si dhe të jetë e gatshme që të adresojë çdo shqetësim në lidhje me liberalizimin e vizave me të cilat mund të përballen ende disa shtete anëtare.
Aksioni kundër korrupsionit në veri të vendit dhe po ashtu vendosja e Njësive Speciale të Policisë së Kosovës pas vendosjes së reciprocitetit për targa, është bërë temë si në BE, por edhe SHBA. Nëse BE thërret Kosovën për sundim të ligjit, atëherë pse shihen me kritikë e skepticizëm aksionet në veri të vendit?
Tomas Szunyog: Ne mirëpresim dhe mbështesim përkushtimin e Kosovës për ta luftuar korrupsionin dhe krimin e organizuar dhe ritheksojmë se dhuna ndaj civileve, gazetarëve, policëve dhe autoriteteve të tjera është e papranueshme. Në të njëjtën kohë, ne theksojmë rëndësinë e dialogut të lehtësuar nga BE, i cili është mekanizmi kyç për të adresuar normalizimin gjithëpërfshirës të marrëdhënieve në mes të Kosovës dhe Serbisë, dhe inkurajojmë të dy palët që t’i shmangin veprimet që kërcënojnë stabilitetin.
Nuk ka asnjë marrëveshje në dialog që pengon vendosjen e njësive speciale policore nga jugu në veri, por që është një praktikë e zakonshme koordinimi i ngushtë me bashkësinë ndërkombëtare si dhe njoftimi paraprak i KFOR-it. Në këtë kuptim, EULEX dhe KFOR janë përgjegjësit e dytë të sigurisë, respektivisht të tretë.
Vetëm përmes dialogut mund të adresohen të gjitha çështjet e hapura në mes të Prishtinës dhe Beogradit. Inkurajojmë Kosovën dhe Serbinë që të vazhdojnë punën drejt marrëveshjes gjithëpërfshirëse ligjërisht të detyrueshme për normalizim.
Forca e Sigurisë së Kosovës (FSK) duhet të marrë leje për të dalë në pjesën veriore të vendit. A është absurde në syrin tuaj që një ushtri të marrë leje për të shkelë në një pjesë të territorit të shtetit të saj dhe kur besoni se duhet të marrë fund kjo?
Tomas Szunyog: Shkëmbimi i letrave në mes të Kryeministrit të Kosovës dhe Sekretarit të Përgjithshëm të NATO-së kërkon pëlqimin paraprak të KFOR-it për çdo mision të Forcës së Sigurisë së Kosovës në veri të Kosovës. BE nuk mund të komentojë rreth marrëdhënieve të Kosovës me NATO-n.
Janë pesë vende të BE-së që nuk e kanë njohur ende pavarësinë e Kosovës. Sa është duke punuar BE që t’i bindë këto shtete që ta njohin Kosovën?
Tomas Szunyog: Bashkimi Evropian nuk mund të komentojë për çështjen e njohjes e cila është kompetencë ekskluzive e vendeve anëtare. Mund të ju siguroj se si BE, në mbesim plotësisht të përkushtuar për ta mbështetur Kosovën për të përparuar dhe për të krijuar një shoqëri të qëndrueshme, demokratike dhe paqësore./KlanKosova.tv/
You may like
Lajmet
KQZ: Më 3 korrik fillon afati për përmirësimin e Listës Votuese dhe largimin e personave të vdekur
Published
6 hours agoon
June 23, 2025By
UBTnews
Komisioni Qendror i Zgjedhjeve ka njoftuar se periudha për kundërshtimin e pasaktësive në Listën Preliminare të Votuesve për Zgjedhjet Lokale për Kryetarë të Komunave dhe për Kuvende Komunale, do të fillojë më 3 korrik dhe do të përfundojë më 31 gusht 2025.
Gjatë kësaj periudhe 60 ditore, çdo person me të drejtë vote që nuk figuron në Listën Votuese, është caktuar gabimisht në qendër tjetër të votimit apo ka të dhëna të tjera të pasakta, mund të kërkojë nga KQZ rishikimin e saj: përmes platformës elekronike: https://qv.kqz-ks.org/sq, oseduke u paraqitur në Komisionin Komunal të Zgjedhjeve në komunën përkatëse.
Po ashtu, gjatë kësaj periudhe votuesi mund ta kundërshtojë pasaktësinë e Listës Preliminare të Votuese edhe për ndonjë emër të votuesit për të cilin pretendon se nuk duhet të figurojë në këtë listë, përfshirë edhe rastet kur në këtë listë figuron emri i ndonjë personi të vdekur. Në këtë rast, ankesa duhet të parashtrohet në Panelin Zgjedhor për Ankesa dhe Parashtresa.
Për të kundërshtuar pasaktësitë për Listën Preliminare të Votuesve, votuesi duhet të indentifikohet me njërin nga tri dokumentet: Letërnjoftim i vlefshëm; pasportë e vlefshme; leje e vozitjes e vlefshme.
Lajmet
Njësia A5 e TC Kosova A rikthehet në operim
Published
6 hours agoon
June 23, 2025By
UBTnews
Korporata Energjetike e Kosovës (KEK) njofton opinionin publik se sot, më 23.06.2025, njësia A5 e Termocentralit Kosova A është sinkronizuar me rrjetin elektroenergjetik rreth orës 10:03 të mëngjesit, duke shënuar një rikthim të suksesshëm në operim, pas realizimit të një sërë ndërhyrjesh dhe sanimesh teknike të domosdoshme.
Procesi i startimit të njësisë kishte filluar këtë mëngjes, pasi kishin përfunduar me sukses të gjitha ndërhyrjet e planifikuara, në kohë dhe me cilësi të lartë teknike.
Punimet e realizuara përfshijnë:
Sanimin e rrjedhjeve në ritejnxehëse (i përfunduar të premten);
Sanimin e rrjedhjeve në ekonomajzer (ngrohës i ujit) dhe në ekranet e kaldajës (i përfunduar të dielën);
Pastrimin me pompë presioni të ftohësve të hidrogjenit;
Pastrimin e komorave në hyrje të kondenzatorit;
Punime mirëmbajtëse në pajisjet e sistemit MRRK;
Pastrimin e kuotave rreth kaldajës nga materiale të huaja – për rritje të sigurisë dhe efikasitetit operacional.
Ky rikthim në operim konfirmon edhe një herë kapacitetin dhe gatishmërinë e ekipeve tona teknike, të cilat, me përkushtim profesional dhe koordinim të vazhdueshëm, siguruan një proces të suksesshëm dhe të qëndrueshëm të rikthimit të njësisë A5.
Kryeshefi Ekzekutiv i KEK sh.a., z. Gramos Hashani, ka falënderuar të gjithë punonjësit për angazhimin dhe përkushtimin e tyre:
“Edhe ky rast tregon përgjegjësinë që bartin punonjësit e KEK-ut, të cilët, edhe në ditë pushimi, nuk kursejnë as përpjekjet e as profesionalizmin për të mbështetur sistemin energjetik të vendit. Ju falënderoj për angazhimin dhe jam krenar për punën që keni bërë!”
Lajmet
Kriza politike, Murati fajëson partitë tjera: Po ju konvenon kjo situatë
Published
8 hours agoon
June 23, 2025By
UBTnews
Deputeti i Lëvizjes Vetëvendosje, Hekuran Murati ka vazhduar akuzat ndaj partive parlamentare që deri tani ishin në opozitë për krizën politike në vend.
Ai pas dështimit për herë të 36-të të konstituimit të legjislaturës së nëntë, tha se Kosova po humbet para nga Banka Botërore si pasojë siç tha ai të qasjes bllokuese të partive që deri tani ishin në opozitë.
Murati shtoi nevojën që Gjykata Kushtetuese të dal më shpejt me një aktgjykim në lidhje me kushtetutshmërinë e votimit të fshehtë të kryeparlamentarit.
“E dëgjuam pak më parë deputeten Bajrami më parë se tha se ky vakum ju konvenon keqbërëseve. Pyetja ime do të ishte se apo i bie që meqenëse opozita po e mundëson këtë bllokadë a janë ata keqbërësit. Atyre po iu konvenon kjo situatë. Ata që bllokojnë tentojnë të fajësojnë të tjerët për bllokada. Uroj dhe besoj se së shpejti të kemi një mendim apo aktgjykim nga Gjykata Kushtetuese që të rikonfirmohet se votimi i fshehtë ashtu siç është thënë në vitin 2014 të jetë një prej mënyrave që mund të përdoret nga deputetët. Po ashtu uroj dhe shpresoj që nuk do të ketë diktat dhe shkelje të kushtetutës dhe ligjeve nga kryetarët e partive që siç kemi dëgjuar kanë tendenca autoritare që të shfaqin votën e fshehtë në publik që do të ishte në shkelje të parimeve demokratike”, tha ai.
Lajmet
Dalja në treg të hapur të 1300 kompanive, PDK-ja nesër procedon në Gjykatë Themelore pezullimin e vendimit
Published
9 hours agoon
June 23, 2025By
UBTnews
Partia Demokratike e Kosovës do të kërkojë pezullimin e vendimit të ZRRE-së për daljen në treg të lirë të 1300 kompanive.
Deputeti i kësaj partie, Abelard Tahiri, tha se nesër do të procedojnë në Gjykatën Themelore të Prishtinës pezullimin e këtij vendimi, mirëpo paraprakisht vendosjen e një mase të përkohshme.
Sipas Tahirit, ZRRE-ja ka marrë vendim për qitjen në treg të hapur energjetik 1300 kompani në mënyrë të parregullt dhe pa përmbushur kriteret.
“Nesër do të procedojmë në Gjykatën Themelore të Prishtinës pezullimin e vendimit. Do të kërkojmë masë të përkohshme në mënyrë që ky vendim të pezullohet dhe këto kompani të furnizohen me çmimin e njëjtë të energjisë elektrike, si para marrjes së këtij vendimi. Nuk janë përmbushur kushtet dhe nuk janë përmbushur as obligimet e ZRRE-së sa i përket daljes në treg të lirë dhe ka parregullsi në marrjen e këtij vendimi”, tha ai.
Këto komente Tahiri i bëri pas dështimit për herë të 36-të të konstituimit të Kuvendit.

Llapi “blindon” yllin e skuadrës

Pas 18 vitesh martesë, çifti i njohur i showbiz-it i jep fund martesës

Putini: Përfshirja e fuqive të huaja në Lindjen e Mesme e ka sjellë botën në një pikë të rrezikshme

Shishe plastike apo qelqi në punë? Ja çfarë thonë faktet!

Kancelari gjerman: Nuk ka “arsye për ne” të kritikojmë Izraelin ose SHBA-në për sulmet ndaj Iranit

Brad Pitt: Do të punoja përsëri me Tom Cruise me një kusht

Rutte: S’do lejojmë Iranin të zhvillojë armë bërthamore

Rektori Hajrizi për Albanian Post: Metaversi është përgjigjja e njerëzimit për të rritur produktivitetin dhe zhvillimin

Darwin Nunez jep sinjale pozitive për kalimin te Napoli
Të kërkuara
-
Lajmet nga UBT2 months ago
Profesori, Arsim Hajdari, doktoron me temën “New Perspective of Biological Therapy in Treatment of Age-Related Macular Degeneration”
-
Lajmet2 months ago
Studentët e Psikologjisë në UBT zhvilluan një vizitë studimore në qendrën psikologjike “Radix” dhe Asociacionin Kosovar për Psikoterapi Trupore
-
Lajmet nga UBT3 weeks ago
UBT – Institucioni privat me më së shumti programe të akredituara nga Agjencia e Akreditimit të Kosovës
-
Lajmet nga UBT3 weeks ago
UBT rilicencohet nga MAShTI për ofrimin e arsimit profesional në katër drejtime të rëndësishme shëndetësore