Shoqëria civile në Serbi ka dënuar ashpër kërcënimet që po i bën presidenti serb, Aleksandër Vuçiq përmes tabloidëve pro-qeveritare. Disa organizata joqeveritare në Serbi kanë kërkuar nga BE-ja që “të mos mbetet vëzhgues i heshtur ndërkohë që vlerat themelore të shtetit të së drejtës po gërryhen në një vend që aspiron të anëtarësohet në Union”.

“BE-ja, së bashku me komunitetin më të gjerë ndërkombëtar, duhet të njoh situatën e rëndë dhe të veprojë për të mbrojtur të drejtat dhe liritë themelore, të cilat janë nën sulm në rritje”, thuhet në një reagim të organizatave joqeveritare në Serbi.

Thirrje i kanë bërë edhe qeverisë serbe që të ndalojë menjëherë fushatat e frikësimit të motivuara politikisht dhe të ofrojë siguri për të gjithë aktivistët.

“Presioni sistematik mbi organizatat kritike ndaj qeverisë thellon më tej krizën politike tashmë paralizuese dhe kërcënon të drejtat themelore demokratike të qytetarëve.”

Në këtë reagim po ashtu se shënjestrimi i Maja Stojanoviqit dhe Dragan Popoviqit nga presidenti i Serbisë, është vetëm një vazhdimësi e presionit të koordinuar që synon delegjitimimin dhe heshtjen e plotë të shoqërisë së pavarur civile, duke vënë në shënjestër këtë çift dhe familjen e tyre.

“Akuzat e rreme lidhur me rolin e tyre të pretenduar në organizimin e protestave studentore janë pjesë e një strategjie më të gjerë për të frikësuar të gjithë ata që kritikojnë qeverinë për tragjedinë në Novi Sad, e cila u shkaktua nga korrupsioni dhe pakujdesia. Këto sulme vijnë në një kohë kur presioni ndaj shoqërisë civile nga autoritetet po arrin nivele të paranojës masive, pasi ata tentojnë të identifikojnë të ashtuquajturit organizatorë të protestave dhe bllokadave rrugore ku përfshihen një numër i madh qytetarësh. Sulmet ndaj shoqërisë civile shërbejnë si një mjet për qeverinë që të pretendojë në mënyrë të rreme se shoqëria civile po orkestrojnë një ‘revolucion me ngjyra në Serbi’. Ky tregim, i marrë drejtpërdrejt nga libri i lojërave të Kremlinit për shtypjen e shoqërive demokratike për të instaluar pushtetin absolut, nuk do të ketë sukses në një vend që është kandidat për anëtarësim në BE”, thuhet në këtë reagim.

Shoqëria civile solidarizohet me studentët, arsimtarët dhe të gjithë qytetarët e tjerë që protestojnë sot në qytete dhe komuna anembanë Serbisë.

Më 1 nëntor në Serbi, mbetën të vdekur 15 persona.

Komisioni Qendror i Zgjedhjeve (KQZ) ka emëruar sot rreth 15 mijë komisionarë për zgjedhjet parlamentare të 9 shkurtit. Mbi 12 mijë prej tyre do të jenë në vendvotime të rregullta, rreth 300 në qendrat e votimit me kusht dhe 2 mijë e 343 do të jenë të angazhuar për qendrat komunale të numërimit.

Anëtari i KQZ-së Arianit Elshani paralajmëroi komisionarët dhe anëtarët e tjerë që do të marrin pjesë në procesin e zgjedhjeve, se në çdo klasë do të ketë kamera të vëzhgimit dhe se çdo veprim që mund të rrezikojë apo cenojë procesin zgjedhor do të ndiqet penalisht.

“Këshilli për Operacione Zgjedhore po ashtu ka shqyrtuar tabelën me nominimet e Këshillave të Vendvotimit në Kosovë dhe qendrave komunale të numërimit. Po ashtu, të vendvotimeve më kusht. Bëhet fjalë për numër të përgjithshëm prej 14 mijë e 991 persona që janë nominuar nga subjektet politike…12 mijë e 422 anëtarë të këshillave të vendvotimit, në këtë rast komisionarë do të jenë në vendvotime të rregullta. 226 komisionarë do t’i kemi në qendrat e votimit me kusht dhe 2 mijë e 343 persona do të jenë të angazhuar për qendrën komunale të numërimit. Ky është numri total i qytetarëve që do të angazhohen në procesin zgjedhor. Në çdo klasë do të ketë kamerë të vëzhgimit. Çdo lëvizje, çdo veprim i cili mund të rrezikojë apo cenojë procesin zgjedhor në secilin vendvotim do të ndiqet penalisht nga KQZ-ja dhe do të procedohet tutje”, tha Elshani.

Anëtari tjetër i KQZ-së, Alban Krasniqi tha se po shkelen parimet nëpër disa komuna, ku po bëhet vendosja e personave të subjekteve politike të një komuniteti, në emër të një komitetit tjetër.

“Ka të bëjë me fenomenin e vendosjes së personave të subjekteve politike dhe të komunitetit tjetër në emër të një të një komunitetit tjetër. Më konkretisht komuna e Dragashit që kemi marrë informacione të sakta. Ne e dimë që këtu i kemi adresuar maksimalisht kërkesat e komunitetit jo shumicë kur kanë kërkuar vende për këshillat e vendvotimit. Kemi apeluar që këto vende janë të përcaktuara vetëm për anëtarët e tyre që vijnë prej komunitetit tyre. Mirëpo, fatkeqësisht në disa pjesë kjo është keqpërdorur dhe një prej tyre është Komuna e Dragashit. Sheh emra të shqiptarëve që janë të vendosur në emër të partive boshnjake apo turke dhe e kundërta në vendvotime të caktuara…Kjo mund të shihet në dy aspekte, e para si shkelje e parimit një anëtar i një partie politike në vendvotim dhe gjithashtu edhe si përpjekje për t’i korruptuar këto pozita, për përfitime materiale qoftë të anëtarëve brenda këtyre KKZ-ve apo njerëzve të tjerë që janë të përfshirë”, tha Krasniqi.

Krasniqi potencon se ky fenomen po ndodh në Dragash, Deçan e që sipas tij mund të ketë ndodhur edhe në Mitrovicë dhe Pejë.

“Parimi që një parti politike nuk mund të ketë më shumë se një anëtar në KVV është duke u thyer në Dragash, në Deçan, ndoshta edhe në Mitrovicë dhe Pejë nëse dikush ka vendosur të tjera emra përtej emrave që i ka dërguar vetë subjekti”, tha ai.

Sipas vendimit të KQZ-së do të shqyrtohen dhe verifikohen rastet kur subjektet politike kanë nominuar persona nga komuniteti tjetër dhe të bëjnë zëvendësimin e tyre. Ndër pikat e diskutuara në mbledhjen e KQZ-së është plotësim-ndryshimi i projektit për transparencë.

Arianit Elshani tha se KQZ-ja ka siguruar laptopë që do të përdoren në qendra komunale të numërimit në kuadër të këtij projekti.

“Plotësim ndryshimi i projektit për transparencë. Si KQZ ne kemi siguruar laptopët që do të përdoren në qendra komunale të numërimit në kuadër të projektit të transparencës, në këtë rast pa kontratë. Projekti i transparencës paraqet vetëm tre procese të tenderimit të televizorëve dhe pajisje përcjellëse të televizorëve. Pastaj, mbajtësve të televizorëve dhe një tjetër proces për kabllot për lidhjen e kamerave me televizorë ose laptopët me kamera etj., dhe shumëçka tjetër. Këto janë tri kontratat që do të negociohen me operatorët”, tha Elshani.

Përveç kësaj, KQZ-ja miratoi ndërrimin e tri vendvotimeve në Leposaviq.

Për rritjen e sigurisë dhe mbrojtjes së mallrave që hyjnë në Bashkimin Evropian, më 1 prill 2025 Sistemi i Kontrollit të Importit 2 (SKI2) shtrihet në hekurudhat dhe rrugët tokësore, duke i mbuluar të gjitha mënyrat e transportit.

Sipas njoftimit të Sistemi i Kontrollit të Importit 2 (SKI2) i Bashkimit Evropian synon të rrisë sigurinë dhe mbrojtjen e mallrave që hyjnë në BE duke futur një proces doganor të standardizuar, para mbërritjes, për të gjitha mënyrat e transportit, duke përfshirë rrugët tokësore dhe hekurudhat, përveç kërkesave për rrugët ekzistuese ajrore, detare dhe të brendshme ujore.

Duke mandatuar dorëzimin e të dhënave të sakta dhe të plota të Deklaratës Përmbledhëse Hyrëse (DPH) përpara mbërritjes, SKI2 u mundëson autoriteteve doganore të vlerësojnë më mirë rreziqet që lidhen me mallrat hyrëse, duke përmirësuar kështu aftësinë e BE-së për të parandaluar dhe luftuar shkeljet doganore, dhe përfundimisht duke siguruar një mjedis tregtar të mbrojtur dhe më të sigurt.

“Nga 1 prilli i vitit 2025, transportuesit në rrugë tokësore dhe hekurudhore do të duhet të ofrojnë të dhëna për mallrat e dërguara në ose përmes BE-së përpara mbërritjes së tyre, përmes një DPH-je të plotë. Ky detyrim ka të bëjë gjithashtu me transportuesit e postës dhe ata të shpejtë që transportojnë mallra duke përdorur këto mënyra transporti, si dhe palët e tjera, si përshembull ofruesit e logjistikës. Në rrethana të caktuara, marrësit përfundimtarë të vendosur në BE do të duhet gjithashtu të paraqesin të dhënat e DPH-së në SKI2”, thuhet në njoftimin e Komisionit Evropian.

Për më tepër, operatorët ekonomikë që nuk janë gati deri në këtë datë duhet të kontaktojnë Zyrën e Shërbimit Kombëtar të Shtetit Anëtar të BE-së (Autoritetin Kombëtar Doganor) ku janë regjistruar dhe ku kanë marrë numrin e tyre RIOE për të kërkuar një periudhë implementimi më së voni deri më 1 mars 2025. Periudhat e implementimit jepen vetëm sipas kërkesës.

“Për të përmbushur kërkesat e SKI2, bizneseve të prekura do t’u kërkohet të sigurohen që të mbledhin të dhëna të sakta dhe të plota nga klientët e tyre, të përditësojnë sistemet e tyre të IT-së dhe proceset operacionale, dhe të ofrojnë trajnim adekuat për stafin e tyre. Operatorët ekonomikë do të duhet gjithashtu të kryejnë me sukses një test të vetë-pajtueshmërisë përpara se të lidhen me SKI2, për të verifikuar aftësinë e tyre për të hyrë dhe shkëmbyer mesazhe me autoritetet doganore. Mallrat mund të ndalen në kufijtë e BE-së dhe mund të mos zhdoganohen nga autoritetet doganore nëse tregtarët nuk përmbushin kërkesat e SKI2 në kohë”, thuhet më tej në njoftim.

Rreth 20 mijë raste janë raportuar në Policinë në Prishtinë gjatë vitit të kaluar. Në vitin 2024 janë realizuar mbi 800 plane operative, ku janë arrestuar mbi 2700 persona. Kështu u tha në prezantimin e raportit vjetor të Policisë rajonale të Prishtinës, ku mes tjerash u theksua se siguria publike në kryeqytet është e qetë. Megjithatë, u bë e ditur se ka rritje të numrit të veprave penale të narkotikëve.

Drejtori i Policisë së kryeqytetit, Basri Shabani tha se kanë caktuar si prioritetet për kontrollim të territorit dhe rritjes së sigurisë publike.

“Mbështetur në analizat e gjendjes së sigurisë të drejtorisë rajonale të Policisë në Prishtinë, konstatoj para juve se rendi dhe siguria publike në territorin e rajonit të Prishtinës nga të gjitha parametrat vlerësohet e qetë. Njëkohësisht ne zotohemi që do të vazhdojmë të jemi të përgjegjshëm, profesional dhe të përkushtuar gjatë gjithë kohës me qëllim të përmbushjes së misionit fisnik të Policisë së Kosovës”, u shpreh ai.

Ai bëri të ditur se ulja e numrit të veprave penale kundrejt jetës dhe trupit, si dhe veprave penale kundër pasurisë është rezultat i policimit modern e parandalues.

“Nga Policia rajonale e Prishtinës janë evidentuar 19 mijë e 874 raste të cilat janë administruar, hetuar, zbuluar dhe përcjellë në institucionet përkatëse të drejtësisë. Gjatë kësaj periudhe kohore janë realizuar me sukses mbi 800 plane operative nga më të ndryshmet, të cilat kanë rezultuar me parandalim të krimit dhe arrestimin e më se 2718 personave apo 3 për qind më tepër se në vitin 2023. Ulja e numrit të veprave penale kundrejt jetës dhe trupit, si dhe veprave penale kundër pasurisë është rezultat i policimit modern e parandalues. Ndërsa, rritja e fuqisë zbuluese nga 78 në 85 për qind ka ardhur si rrjedhojë e punës profesionale dhe të palodhshme nga hetuesit rajonal”, deklaroi ai.

Nënkoloneli Basri Shabani tha se gjatë vitit të kaluar ka pasur edhe shtim të aktiviteteve vetëdijesuese për siguri në komunikacionin rrugor.

“Kemi arritur uljen e numrit të aksidenteve në përgjithësi, e në veçanti atyre me fatalitet për minus 34 për qind. Po ashtu janë shënuar 212 mijë e 931 fletëparaqitje apo rreth 30 mijë më tepër se në vitin 2023. Gjithashtu vëmendje i është kushtuar edhe punës lidhur me sigurinë në shkolla me ç’rast janë marrë masa parandaluese, janë hartuar plane operative dhe programe të veçanta, janë realizuar shumë ligjërata dhe është bashkëpunuar ngushtë me drejtoritë komunale të arsimit dhe drejtorët e shkollave përkatëse, si në aspektin vetëdijësues edhe në atë të sigurisë duke realizuar projekte të përbashkëta”, shtoi Shabani.

Ndër tjera, Shabani tha se vitin e kaluar nga numri emergjent “192” janë pranuar rreth 300 mijë thirrje nga qytetarët.

Raporti vjetor është prezantuar nga majori Bekim Bislimi, ku tha se ka rritje të veprave penale kundër rendit kushtetues.

“Vepra penale kundër rendit kushtetues kemi ngritje. Kundër njerëzve dhe vlerave të mbrojtura është i njëjtë. Kundër jetës dhe trupit, aty hyn një kategori e madhe e veprave penale është ngritje 1.5. kundër lirive dhe të drejtave të njeriut është 20 për qind…veprat penale të narkotikëve kemi ngritje, 17.7 për qind. Veprat penale kundër ekonomisë kemi ngritje 5 për qind”, u shpreh ai.

Ndërsa, kryetari i kryeqytetit, Përparim Rama shtoi se ndihmesë për policinë e Kosovës dhe sigurinë e qytetarëve, do të jetë instalimi i qytetit inteligjent, me fokus instalimin e kamerave që do të monitorohen nga qendra e monitorimit nga policët tanë.

E një hap i rëndësishëm, sipas Ramës ka qenë krijimi i drejtorisë së kryeqytetit brenda Policisë së Kosovës.

“Një moment i rëndësishëm për sigurinë në Prishtinë, ka qenë po ashtu edhe krijimi i Drejtorisë së kryeqytetit, brenda policisë së Kosovës. Kemi bë dhe do të vazhdojmë të bëjmë përpjekje për të rritur kapacitetet teknike dhe logjistike të policisë duke ndihmuar edhe modernizimin e mjeteve dhe pajisjeve të tyre për një shërbim më të shpejt dhe më të efektshëm ndaj qytetarëve. Moment me rëndësi të madhe dhe që ka me qenë ndihmesë shumë e madhe për policinë e Kosovës, e kryeqytetit, sigurinë e të gjithë qytetarëve tanë është edhe instalimi tash i Smart City, apo i qytetit inteligjent. Me fokus, që edhe instalimin e kamerave që kanë me qenë të ndërlidhura me këtë qytetin inteligjent, ku edhe sigurojnë një siguri shtesë për policët tanë”, tha Rama.

Rama, premtoi shtimin e kapaciteteve teknike dhe logjistike, duke ndihmuar edhe në modernizimin e mjeteve dhe pajisjeve të tyre për shërbim më të shpejtë dhe të efektshëm.