Lajmet

Testi për fuqinë politike

Ndikimi i udhëheqjes së re në LDK dhe PDK.

Published

on

Më 17 tetor 2021, qytetarët e Kosovës do të zgjedhin kryetarët e rinj dhe asambletë komunale në 38 komuna.

Këto zgjedhje, sipas njohësve të politikës do të jenë një sfidë krejtësisht tjetër prej asaj që u pa në zgjedhjet e fundit parlamentare të 14 shkurtit të këtij viti.

Në zgjedhjet parlamentare, Lëvizja Vetëvendosje fitoi mbi 50 për qind të votave e që ia mundësoi formimin e qeverisë pa pasur nevojë për koalicione me partitë shqiptare.

Por, a ka gjasa që të përsëritet mbështetja e njëjtë ndaj partisë së Albin Kurtit?

Njohësit e politikës në Kosovë mendojnë se jo. Ata e arsyetojnë këtë mendim me faktin se në zgjedhje lokale më shumë ka ndikim kandidati që garon për kryetar të komunës sesa çdo premtim e mbështetje që mund të vijë nga qendra.

Albert Krasniqi nga organizata Demokraci Plus (D+) thotë për Radion Evropa e Lirë se çdo krahasim i rezultateve të zgjedhjeve lokale me ato nacionale është i paqëndrueshëm, meqë historikisht në Kosovë rezultatet e këtyre zgjedhjeve kanë dalluar.

“Tradicionalisht kanë qenë rezultate të ndryshme. Garohet për nivele të ndryshme të qeverisjes, janë aktorë të ndryshëm zgjedhorë të cilët e kërkojnë mbështetjen e qytetarëve dhe në këtë mënyrë nuk mund të dalim me konkludime të qarta që të projektojmë forcën reale të subjekteve politike”, thotë Krasniqi.

Kush, sa komuna i fitoi më 2017?

Në zgjedhjet lokale të vitit 2017 më së shumti komuna kishte fituar subjekti politik Lista Serbe, gjithsej dhjetë: Mitrovicë e Veriut, Zveçan, Zubin Potok, Leposaviq, Gracaniça, Kllokot, Novobërdë, Partesh dhe Shtrëpcë.

Lista Serbe u pasua nga Lidhja Demokratike e Kosovës me tetë komuna të fituara: Fushë Kosovë, Gjilan, Istog, Lipjan, Pejë, Viti, Vushtrri dhe Podujevë.

Aleanca për Ardhmërinë e Kosovës fitoi shtatë komuna: Deçan, Gjakovë, Junik, Klinë, Obliqi, Rahovec, dhe Suharekë.

Në zgjedhjet lokale të vitit 2017, Partia Demokratike e Kosovës mori udhëheqjen e pesë komunave: Dragash, Gllogoc, Ferizaj, Kaçanik dhe Shtime.

Ndërkaq, tri komuna i fitoi Lëvizja Vetëvendosje: Prishtinën, Prizrenin dhe Kamenicën. Por, më vonë kryetari i Prishtinës, Shpend Ahmeti dhe ai i Kamenicës, Qëndron Kastrati u larguan nga partia e Albin Kurtit.

Një komunë e kishte fituar Nisma Socialdemokrate, përkatësisht Malishevën dhe një Partia Demokratike Turke, përkatësisht Mamushën.

Hanin e Elezit e fitoi kandidati i pavarur, Refki Suma, ndërkaq Skenderajin, kandidati i pavarur, Bekim Jashari.

Për Lëvizjen Vetëvendosje ndryshuan gjërat, pasi në muajin shkurt të vitit 2020, kryetari i Komunës së Podujevës nga LDK-ja, Agim Veliu dha dorëheqje për t’u bërë ministër i Punëve të Brendshme. Në zgjedhjet jashtëzakonshme që u zhvilluan në Podujevë, LDK-ja e humbi këtë komunë pas shumë vitesh dhe aty fitoi Shpejtim Bulliqi i Lëvizjes Vetëvendosje.

Të vetmen komunë që e kishte Aleanca Kosova e Re, atë të Mitrovicës Jugore, e humbi pasi kryetari i kësaj komune, Agim Bahtiri kaloi në Lëvizjen Vetëvendosje, nën logon e së cilës parti garon sërish më 17 tetor 2021.

Ndikimi i udhëheqjes së re në LDK dhe PDK

Imer Mushkolaj, njohës zhvillimeve politike në Kosovë thotë se viteve të fundit ka ndryshuar perceptimi qytetar sa i takon zgjedhjeve lokale.

Ai thotë se qytetarët çdo ditë e më shumë po shohin se çfarë u ofrojnë atyre kandidati për kryetar të komunës sesa premtimet që vijnë qoftë nga udhëheqësit e qeverisë apo kryetarët e partive politike.

“Është një avancim në raport me atë sesi njerëzit e një komune e shohin lidershipin lokal dhe votojnë pikërisht për atë që e premton ose mund ta realizojë lideri lokal e jo për premtimet që mund t’i japë lideri nacional apo kryetari i partisë”, thotë Mushkolaj për Radion Evropa e Lirë.

Megjithatë, Mushkolaj nuk e përjashton mundësinë që të ketë efekt negativ në rezultatin e Lëvizjes Vetëvendosje, ndërrimi i udhëheqjes të të dyja partive më të mëdha opozitare, Lidhjes Demokratike të Kosovës dhe Partisë Demokratike të Kosovës.

Këto dy subjekte politike së fundi zgjodhën kryetarët e rinj, LDK-ja Lumir Abdixhikun ndërsa PDK-ja Memli Krasniqin.

Albert Krasniqi nga Demokraci Plus thotë se zgjedhjet lokale do të jenë një test i mirë për LDK-në dhe PDK-në në mënyrë që të shohin sesa produktive kanë ndryshimet në parti.

“Kjo mund të jetë një matës i asaj sesa këto ndryshime do të përkrahen nga qytetarët”, thotë Krasniqi.

“Jo domosdoshmërish përkrahja për një kandidat në një komunë mund të përkthehet edhe si përkrahje për liderin politik të asaj partie politike”, thotë Krasniqi.

Komisioni Qendror i Zgjedhje (KQZ) ka thënë se është duke bërë përgatitjet e fundit për zgjedhjet lokale.

Sipas KQZ-së, numri i qytetarëve me të drejt vote brenda vendit është 1 milion e 885 mijë e 448 votues.

KQZ-ja ka njoftuar se tashmë ka shtypur rreth 1 milion e 700 mijë fletë të votimit për kryetarë ndërsa që 1 milion e 700 mijë të tjera për kuvende komunale.

Në këto zgjedhje, qytetarët mund të votojnë për kryetarin e komunës dhe një asamblist.

Aktualitet

KEK thirrje bizneseve që kanë dalë në treg të hapur

Published

on

Korporata Energjetike e Kosovës ka lëshuar një njoftim duke thënë se inkurajojnë të gjithë konsumatorët që ende nuk kanë siguruar furnizues të energjisë elektrike të lidhin kontrata komerciale me KEK.

“Korporata Energjetike e Kosovës (KEK sh.a.) inkurajon të gjithë konsumatorët që ende nuk kanë siguruar furnizues të energjisë elektrike, që të lidhin kontrata komerciale të drejtpërdrejta me KEK, për të siguruar furnizim të qëndrueshëm.”

KEK thotë se deri tani ka lidhur 15 marrëveshje komerciale.

“Sipas vendimit të Zyrës së Rregullatorit për Energji (ZRRE), KEK është e licencuar për furnizim në treg të hapur dhe deri më tani ka lidhur me sukses 15 marrëveshje komerciale, duke përfshirë edhe ndërmarrje publike strategjike.”

KEK ka listuar disa arsye se pse duhet të zgjidhet KEK’u si furnizues.

“Pse të zgjidhni furnizimin komercial direkt nga KEK?

·         Furnizimi nga Furnizuesi i Mundësisë së Fundit është një zgjidhje e përkohshme, me periudhë 60-ditore dhe çmime më të larta nga tregu.

·         Sipas udhëzimeve të ZRRE-së, konsumatorët që nuk zgjedhin furnizues kalojnë automatikisht te FMF për 60 ditë, ku çmimet janë më të larta se në tregun e lirë. Pas afatit, kontratat me furnizues të rregullt është e detyrueshme.

·         Marrëveshjet komerciale me KEK ofrojnë çmime konkurruese, furnizim të qëndrueshëm dhe transparencë.

·         KEK siguron furnizim referuar në çmimet e tregut të publikuara në bursën zyrtare të energjisë ALPEX.”

“Veproni tani! Lidhja e kontratës komerciale është hapi më i sigurt për të shmangur pasigurinë dhe kostot e larta të furnizimit përmes FMF-së.”

Continue Reading

Lajmet

​Osmani fton në takim partitë për dekretimin e datës së zgjedhjeve lokale

Published

on

By

Presidentja e Republikës së Kosovës ka ftuar në takim partitë politike, ku pritet të diskutohet data e zgjedhjeve të reja lokale.

Këshilltari për media i presidentes Vjosa Osmani, Bekim Kupina bëri të ditur për KosovaPress se takimi do të mbahet të mërkurën.

“Në bazë të kompetencave kushtetuese, Presidentja Osmani ka ftuar subjektet politike në takim të mërkurën, më 4 qershor 2025, për konsultime për caktimin e datës së zgjedhjeve lokale. Menjëherë pas konsultimeve, Presidentja do të caktojë datën e zgjedhjeve”, ka thënë ai.

Ende nuk dihet ora se kur do të mbahet takimi.

Continue Reading

Lajmet

Global UBT Fest 2025 – Festivali veror i dijes po vjen së shpejti

Published

on

By

Jeni të ftuar të bëheni pjesë e ngjarjes më të madhe dhe më emocionuese të verës në botën e dijes dhe inovacionit! Global UBT Fest 2025 është festivali veror i dijes që mbledh në një vend mbi 30 shkolla verore të ndryshme, me mbi 300 folës kombëtarë dhe ndërkombëtarë nga fusha të ndryshme të shkencës, teknologjisë, artit, kulturës dhe zhvillimit personal.

Ky festival unik zhvillohet gjatë gjithë muajit Korrik 2025, duke ju ofruar një program të pasur dhe shumëdimensional që synon të zgjojë kuriozitetin, të frymëzojë dhe të lidhë njerëz nga e gjithë bota.

Çfarë do të përjetoni në Global UBT Fest 2025?

  • Forume të dedikuara me diskutime dhe debate mbi temat më të rëndësishme dhe aktuale të kohës;
  • Punëtori praktike që ju japin mundësi të mësoni aftësi të reja dhe të zhvilloni potencialin tuaj në fusha të ndryshme;
  • Gara të ndryshme që sfidojnë kreativitetin dhe dijen tuaj, me mundësi për çmime dhe njohje;
  • Koncerte dhe aktivitete kulturore që sjellin argëtim dhe një atmosferë festive për të gjithë pjesëmarrësit;
  • Eksperienca unike që vetëm Global UBT Fest mund t’ju ofrojë — një mundësi për rrjetëzim, shkëmbim ideje dhe krijim lidhjesh të reja në një mjedis stimulues.

Ky festival është projektuar për të ofruar një eksperiencë gjithëpërfshirëse dhe të paharrueshme për çdo pjesëmarrës, qoftë student, profesionist apo thjesht një person që kërkon të zhvillojë veten dhe të zgjojë pasionin për dijen.

Regjistrimi është tashmë i hapur: REGJISTROHU TANI

Mos e humbisni shansin për t’u bërë pjesë e kësaj ngjarje të jashtëzakonshëm.

Për më shumë informacion dhe për të siguruar vendin tuaj, vizitoni: https://forms.office.com/e/kwSSxXfsq0

Bashkohuni me ne këtë verë në Global UBT Fest 2025 dhe përjetoni verën më të pasur me dije, inspirim dhe argëtim!

Continue Reading

Lajmet

Takimi i radhës me Dr. Tanja Tamminen: Studentët e UBT-së thellojnë njohuritë mbi sigurinë evropiane dhe diplomacinë ndërkombëtare

Published

on

By

Në vazhdën e aktiviteteve ndërkombëtare akademike dhe angazhimit të UBT-së për të sjellë ekspertizë globale në auditorë, studentët e Studimeve të Sigurisë zhvilluan me sukses takimin e radhës me Dr. Tanja Tamminen, eksperte e njohur në fushën e politikës së jashtme dhe sigurisë së Bashkimit Evropian.

Ky takim u zhvillua si vazhdim i ligjëratës së mëparshme dhe dëshmon interesimin e ndërsjellë për thellimin e bashkëpunimit ndërmjet UBT-së dhe ekspertëve ndërkombëtarë. Temë qendrore e diskutimit ishte dinamika e përfshirjes së Bashkimit Evropian në misionet civile të menaxhimit të krizave, si dhe ndikimi i tyre në vendet e Ballkanit Perëndimor, përfshirë Kosovën.

Studentët patën mundësinë të ngrenë pyetje më të thelluara dhe të diskutojnë çështje praktike që lidhen me sfidat dhe rolin strategjik të BE-së në garantimin e sigurisë në rajonet me ndjeshmëri politike dhe institucionale. Diskutimi u pasurua me përvoja të drejtpërdrejta nga misionet EULEX në Kosovë dhe EUAM në Ukrainë, të cilat Dr. Tamminen i ndau me pjesëmarrësit me shumë transparencë dhe profesionalizëm.

Ky takim u mundësua falë përkushtimit të Profesor Naim Dedushaj, i cili ka luajtur një rol kyç në ndërtimin e urave të komunikimit me profesionistë të profilit të lartë në nivel evropian. Për më tepër, u diskutuan edhe hapa konkretë për praktika studentore në institucionet evropiane, duke hapur mundësi të reja për studentët që synojnë karrierë ndërkombëtare në fushën e diplomacisë dhe sigurisë.

Continue Reading

Të kërkuara