Në kuadër të “World Boxing Cup”, që po mbahet në Foz do Iguaçu nga 20 deri më 27 prill 2026, nesër  në ring do të ngjitet boksierja e njohur kosovare Donjeta Sadiku, medaliste botërore dhe evropiane.

Sadiku, e cila garon në kategorinë deri në 60 kilogramë, do të përballet me boksieren nga Polonia, Aneta Elżbieta Rygielska, në një duel vendimtar për sigurimin e medaljes në këtë kompeticion prestigjioz. Trajnerja e saj, Marjola Sallauka, është shprehur optimiste për paraqitjen e sportistes kosovare, duke besuar se Sadiku do të arrijë fitore dhe do të sigurojë medaljen. Megjithatë, synimi kryesor i ekipit mbetet medalja e artë.

Kjo Kupë Botërore ka rëndësi të veçantë në procesin e kualifikimit për Lojërat Olimpike Los Angeles 2028, pasi pikët e grumbulluara ndikojnë drejtpërdrejt në renditjen ndërkombëtare dhe rrugën drejt kualifikimit olimpik.

Boksierja kosovare Donjeta Sadiku ka shënuar fitore bindëse në kuadër të turneut prestigjioz “Kupa Botërore e Boksit”, që po mbahet në Foz do Iguaçu të Brazilit.

Në mbrëmjen e 22 prillit, në kategorinë deri në 60 kilogramë, Sadiku e mposhti përfaqësuesen e Zelandës së Re, Jordan Wilson, me rezultat të pastër 5:0. Ajo e nisi meçin fuqishëm që në raundin e parë, duke e rrëzuar dy herë kundërshtaren në knockdown. Dominimi i saj vazhdoi edhe në raundin e dytë, ku realizoi një tjetër knockdown, duke detyruar gjyqtarin të ndërhyjë me numërim dhe të ndalë përkohësisht kundërshtaren. Në raundin e tretë, Sadiku ruajti kontrollin e plotë të meçit dhe e përmbylli duelin me epërsi të thellë.

Ky turne ka rëndësi të veçantë, pasi pikët e fituara ndikojnë drejtpërdrejt në procesin e kualifikimit për Lojërat Olimpike “Los Angeles 2028”.

Meçi i radhës për Donjeta Sadikun është caktuar më 24 prill, duke filluar nga ora 16:00.

Chelsea ka shkarkuar trajnerin Liam Rosenior pas humbjes së thellë 3-0 të martën mbrëma ndaj Brighton në Premier League.

Kjo humbje ishte e pesta radhazi për klubin londinez në kampionat, pa arritur të shënojë asnjë gol, duke shënuar serinë më të dobët të klubit në 114 vjet. Vendimi vjen vetëm tre muaj e gjysmë pas emërimit të Rosenior, i cili kishte nënshkruar një kontratë pesëvjeçare e gjysmë si pasardhës i Enzo Maresca-s.

Në komunikatën zyrtare, Chelsea bëri të ditur se vendimi nuk ishte i lehtë, por u mor për shkak të rezultateve dhe performancave që kanë rënë nën standardet e kërkuara. Klubi gjithashtu e falënderoi Rosenior dhe stafin e tij për profesionalizmin dhe integritetin e treguar gjatë periudhës në krye të ekipit, duke i uruar suksese në të ardhmen.

Rosenior ishte emëruar më 6 janar dhe qëndroi në stolin e “Stamford Bridge” për 106 ditë.

Bashkimi i Prizrenit ka vazhduar dominimin në Superligën e Kosovës në basketboll për femra, duke e fituar titullin e kampionit të mërkurën mbrëma në palestrën “Karagaçi” në Pejë.

Në praninë e një numri të madh shikuesish, prizrenaset e mposhtën Pejën 03 me rezultat 71:61 në ndeshjen e shtatë dhe vendimtare të finales, duke e mbyllur serinë 4:3. Ky është titulli i katërt radhazi dhe i dhjeti në histori për Bashkimin.

Skuadra mysafire dominoi pjesën më të madhe të ndeshjes, duke fituar çerekun e parë 23:17 dhe të dytin 19:7. Peja 03 tentoi rikthimin në pjesën e dytë dhe u afrua në rezultat, por Bashkimi arriti ta ruajë epërsinë deri në fund, pavarësisht presionit. Më e dalluara te Bashkimi ishte Alexis Mead me 26 pikë, 8 asistime dhe 4 kërcime. Kontribut të rëndësishëm dhanë edhe Saranda Daci me 16 pikë e 8 kërcime dhe Dontavia Waggoner me 12 pikë e 6 kërcime. Te Peja 03, Paige Powell realizoi 21 pikë dhe 10 kërcime, ndërsa Adrienne Godbold shtoi 17 pikë, 10 kërcime dhe 4 asistime.

Bashkimi këtë edicion ka fituar edhe Kupën e Kosovës dhe Ligën Unike, ndërsa Peja 03 e përfundon sezonin me trofeun e Superkupës.