Sport

Telashe për Ansu Fatin

Published

5 years ago

on

Ansu Fati nuk do të mund të riaftësohet në kohë për përballjen mes Barcelonës dhe PSG në Champions. Në fakt, rehabilitimi i “yllit” të Barçës nuk po shkon ashtu sikurse ishte parashikuar, çka ka sjellë shqetësim në kampin “blaugrana”.

Mjekët e klubit dhe vetë Ramon Cugat, kirurgu që e operoi, nuk duan të përcaktojnë afatet e kthimit, të vetëdijshëm se do të shërbente vetëm për të ushqyer ankthin dhe dëshpërimin tek lojtari. Në klub ata e kanë shumë të qartë se përparësia absolute është rikuperimi 100% i gjurit të majtë të Ansu Fati, një lojtar vetëm 18 vjeç dhe me një karrierë të gjatë përpara, kështu që koha dhe metodat që duhet ndjekur nuk kanë rëndësi.

Që në fillim, kur u krye ndërhyrja, u mendua se kthimi në fushë i talentit spanjoll me origjinë nga Guinea-Bissau do të ndodhte në ndeshjen me PSG-në, më 10 mars, pra pas katër muajsh.

Në kushte normale, tre muaj të operacionit (u dëmtua më 7 nëntor dhe iu nënshtrua një operacioni dy ditë më vonë), menisku do të duhej të konsolidohej plotësisht dhe lojtari do të fillonte stërvitjen në fushë.

Sidoqoftë, siç ka mësuar AS, realiteti është krejt i ndryshëm: gjuri i majtë vazhdon t’i shkaktojë dhimbje koke, pasi kur rritet ngarkesa e punës, gjuri pëson enjtje, për rrjedhojë, Ansu Fati është i detyruar të ulë intensitetin e ushtrimeve.

Kjo situatë nuk lejon përparimin ose djegien e fazave, ndaj stafi mjekësor që e ndjek është i detyruar të ngadalësojnë të gjithë procesin në kërkim të një zgjidhjeje që do të adresojë këtë problem të gjurit.

Situata është aq e dëshpëruar sa nuk është përjashtuar mundësia që lojtari të kalojë përsëri nëpër sallën e operacionit për të kontrolluar shkaqet e enjtjes.

Ndryshe nga Ansu Fati, situata me Gerard Piqué është shumë më optimiste dhe shpresëdhënëse. Së pari, sepse përshtypjet në ditët e fundit kanë qenë shumë pozitive dhe së dyti, në rastin e tij, nuk ka nevojë që gjuri të jetë 100% për të qenë në gjendje të luajë. Me terapinë konservatore që ai ka ndjekur për të ngjitur ligamentin e kryqëzuar në gjurin e tij të djathtë, do të konsiderohej pozitive që të arrinte 80%, aq më tepër që është 34 vjeç.

Related Topics:
Continue Reading

Sport

Kosova nis pa medalje garën në Grand Prix të xhudos

Published

2 days ago

on

June 26, 2026

By

Në Qingdao të Kinës ka nisur të premten Grand Prix i xhudos, ku në ditën e parë u paraqitën tri xhudiste nga Kosova, por pa arritur të sigurojnë vazhdim në garë për medalje.

Në kategorinë deri në 48 kilogramë, Erza Muminoviq e nisi mirë garën duke e fituar luftën e parë ndaj Su Yon Jon nga Koreja e Veriut, por u ndal në xhiron e dytë pas humbjes ndaj kinezes Wenna Zhuang.

Fatjona Kasapi u eliminua në luftën e parë në kategorinë deri në 52 kilogramë, pasi u mposht nga bartësja e parë, gjermanja Mascha Ballhaus.

Ndërkohë, edhe Flaka Loxha u ndal që në përballjen e parë në kategorinë deri në 57 kilogramë, duke pësuar nga Maysa Pardayeva e Turkmenistanit.

Të shtunën në garë për Kosovën do të zbresin Laura Fazliu dhe Dardan Cena.

D.L

Continue Reading

Sport

Holanda fiton bindshëm, Tunizia eliminohet pa pikë

Published

2 days ago

on

June 26, 2026

By

Holanda ka regjistruar një fitore të sigurt 3:1 ndaj Tunizisë në Kansas City, duke e mbyllur fazën e grupeve në vendin e parë të Grupit F me shtatë pikë.

Ndeshja nisi furishëm për holandezët, të cilët kaluan në epërsi që në minutën e tretë pas një autogoli të Ellyes Skhirit. Vetëm katër minuta më vonë, Brian Brobbey dyfishoi avantazhin, duke e çuar rezultatin në 2:0.

Tunizia u rikthye në lojë në minutën e 54-t me golin e Hazem Mastourit, por Holanda reagoi shpejt. Në minutën e 62-të, Jan Paul van Hecke vulosi fitoren me golin për 3:1.

Me këtë disfatë, Tunizia i humbi të tre ndeshjet e grupit dhe i jep fund paraqitjes në turne.

D.L

Continue Reading

Sport

Japonia pa humbje, Suedia kalon si e treta

Published

2 days ago

on

June 26, 2026

By

Japonia dhe Suedia kanë siguruar kualifikimin në fazën e nokautit të Kupës së Botës, pasi barazuan 1:1 në ndeshjen e fundit të Grupit F.

Takimi, i zhvilluar të premten në Arlington para rreth 70 mijë shikuesve, ishte vendimtar për renditjen përfundimtare të grupit. Japonia kaloi në epërsi në minutën e 56-të me golin e Daizen Maedës, ndërsa Suedia reagoi shpejt dhe barazoi gjashtë minuta më vonë, kur Anthony Elanga realizoi për 1:1.

Japonia e mbylli fazën e grupeve pa humbje, duke grumbulluar pesë pikë dhe duke siguruar vendin e dytë në grup. Ndërkohë, Suedia, që në kualifikime kishte përfunduar pas Kosovës, avancoi nga pozita e tretë me katër pikë.

Në fazën e nokautit kualifikohen tetë përfaqësueset më të mira të vendeve të treta nga 12 grupet e turneut, ndërsa Suedia ishte njëra prej tyre.

Për Japoninë, ky është kualifikimi i tretë radhazi nga faza e grupeve dhe i pesti në shtatë pjesëmarrje në Kupën e Botës.

Edhe Suedia vazhdon serinë pozitive, pasi ka kaluar fazën e grupeve në secilin prej katër edicioneve të fundit në të cilat është kualifikuar.

D.L

Foto: aljazeera

Continue Reading

Sport

Fitorja ndaj SHBA-së nuk i mjaftoi Turqisë për kualifikim

Published

2 days ago

on

June 26, 2026

By

Turqia e mbylli me fitore paraqitjen në Kupën e Botës, por suksesi 3:2 ndaj SHBA-së nuk mjaftoi për të siguruar një vend në fazën e nokautit.

Në ndeshjen e zhvilluar në Inglewood, të premten në mëngjes sipas kohës së Kosovës, turqit triumfuan falë një goli dramatik të Kaan Ayhan në minutën e 98-të. Megjithatë, dy humbjet e mëparshme ndaj Australisë dhe Paraguait rezultuan fatale për ekipin turk, që e mbylli garën në vendin e fundit të Grupit D me tri pikë.

SHBA-ja, pavarësisht humbjes, e ruajti pozitën e parë në grup me gjashtë pikë dhe avancoi në fazën tjetër. Australia u rendit e dyta me katër pikë, ndërsa Paraguai përfundoi i treti, gjithashtu me katër pikë, dhe pritet të sigurojë kalimin tutje si një nga ekipet më të mira të vendeve të treta.

Për Turqinë shënuan Arda Güler në minutën e 10-të, Burak Yılmaz në të 31-tën dhe Kaan Ayhan në minutën e 98-të. Për SHBA-në realizuan Auston Trusty në minutën e tretë dhe Sebastian Berhalter në minutën e 49-të.

Amerikanët, të cilët e kishin siguruar më herët kualifikimin, u paraqitën me një formacion të ndryshuar, duke aktivizuar nëntë lojtarë të rinj nga minuta e parë.

Turqia kishte udhëtuar drejt SHBA-së me pritshmëri të larta, pasi në plejof kishte eliminuar Kosovën, por dështimet në dy ndeshjet e para ia pamundësuan vazhdimin e garës.

Në ndeshjen tjetër të Grupit D, Australia dhe Paraguai barazuan 0:0.

D.L

Foto:.theguardian

Continue Reading

Të kërkuara