Lajmet

Të ikësh nga Rusia për lirinë e fëmijës së palindur

“Unë do të kisha qëndruar”, tha ajo. “Isha gati për marrje në pyetje dhe burg”.

Published

on

Më 21 korrik, autoritetet ruse akuzuan këshilltaren e pavarur të qytetit Novosibirsk, Khelga Pirogova, për shpërndarjen e “informacionit të rremë që diskrediton forcat e armatosura” dhe nisën një hetim penal. Të nesërmen, ajo u largua në Gjeorgji në heshtje.

“Miqtë e mi më informuan se ishte hapur një çështje penale ndaj meje”, tha Pirogova në një intervistë telefonike ekskluzive për Siberia Realities të Radios Evropa e Lirë.

“Gjithçka ndodhi shumë shpejt”.

Në mëngjesin e 21 korrikut, tha ajo, kur ende përballej vetëm me një akuzë administrative, nuk e kishte ndërmend të largohej nga Rusia.

“Unë do të kisha qëndruar”, tha ajo. “Isha gati për marrje në pyetje dhe burg”.

Por, një kallëzim penal dhe perspektiva e dënimit me burgim deri në 10 vjet ishte një tjetër çështje për deputeten 33-vjeçare, e cila është disa muajshe shtatzënë me fëmijën e saj të parë.

“Zgjedhja ishte ndërmjet [dëshirës sime për të luftuar akuzat] dhe jo vetëm lirisë sime, por të ardhmes së fëmijës tim”, tha ajo. “Nuk mund ta lejoja që të futesha në burg menjëherë pas lindjes së foshnjës”.

Prigorova u zgjodh në Këshillin e qytetit të Novosibirskut me mbështetjen e liderit politik të opozitës, Aleksei Navalny, në vitin 2020.

Që atëherë, vetë Navalny është burgosur me akuza që ai i hedh poshtë si të motivuara politikisht dhe shumë nga mbështetësit e tij aktivë janë ndjekur penalisht ose janë detyruar të largohen nga vendi.

Në qershor 2021, Fondacioni Kundër Korrupsionit i Navalnyt dhe rrjeti i tij i zyrave rajonale u mbyllën pasi u cilësuan si organizata “ekstremiste” nga Qeveria ruse.

Në fillim të këtij muaji, politikani i shquar i opozitës, Ilya Yashin, u akuzua sipas të njëjtit ligj për “diskreditimin e forcave të armatosura”, të cilin presidenti Vladimir Putin e nënshkroi vetëm disa ditë pasi filloi pushtimin në shkallë të gjerë të Ukrainës më 24 shkurt.

Deputeti i këshillit të rrethit të Moskës, Aleksei Gorinov, ështe zyrtari i parë i zgjedhur që u dënua sipas këtij ligji me shtatë vjet burgim.

Akuzat kundër Pirogovas burojnë nga një postim në Twitter në mes të korrikut, në të cilin ajo komentonte në mënyrë sarkastike për rusët e varfër që shprehnin mirënjohje ndaj qeverisë që pagoi për funeralet e të afërmve të tyre të vrarë duke luftuar në Ukrainë.

“Më dukej e tmerrshme që të afërmit që sapo kishin humbur një burrë, një vëlla apo një djalë, në vend që të vajtojnë për faktin që i dashuri i tyre u largua, mahniteshin që u ishte organizuar një funeral kaq i mrekullueshëm me kaq shumë ushqime, në të cilin funeral ju mund të ftonit gjysmën e fshatit”, tha Pirogova.

Pirogova e fshiu shpejt postimin, por “screenshot-i” u bë viral. “E rilexova dhe pashë se mund të kuptohet në mënyrë të gabuar”, tha ajo duke shtuar: “Dhe, është kuptuar në mënyrë të gabuar”.

Postimi, tha ajo, ishte “shumë emocional”.

Edhe pse ajo fshiu postimin, nënkryetari i Këshillit Bashkiak të Novosibirskut, Andrei Panfyorov, i partisë në pushtet Rusia e Bashkuar, denoncoi Pirogovan në Komitetin Hetues dhe nisi hetimin kundër saj.

Por, Pirogova beson se postimi i saj në Twitter ishte vetëm një pretekst, pasi ajo ishte kritike e hapur e Putinit dhe luftës në Ukrainë.

“Qëllimi i tyre i vetëm është që t’i dëbojnë të gjithë njerëzit me bindje opozitare nga vendi”, tha ajo për Radion Evropa e Lirë. “Nuk ka rëndësi se çfarë preteksti përdorin”.

Kur Pirogova mori vesh për akuzat penale kundër saj, ajo mori vendimin të largohej menjëherë nga Rusia.

“E kuptova që nuk kisha kohë as t’i mblidhja gjërat”, tha ajo. “Ata mund të më prisnin kudo”.

“Isha në qendër të qytetit dhe shkova direkt në aeroport”, vazhdoi ajo.

“Nuk mund të them se kush më ka ndihmuar të blej biletën, por nuk e kam pasur problem t’i kaloj kufijtë, as në Rusi dhe as në Gjeorgji. Nuk kishin arritur ende të më fusnin në listën e ndalimit të fluturimeve… Kjo është një nga arsyet pse mendoj se qëllimi i tyre i vërtetë ishte të më shtynin të largohesha nga vendi”.

Që kur u largua nga Rusia, ajo thotë se i është hequr barra e autocensurës. Ajo kujtoi se sa e çuditshme ishte për të që e quajti hapur luftën në Ukrainë një “luftë” gjatë intervistave me gazetarë nga Gjeorgjia.

“Të jem e sinqertë, ishte mjaft e çuditshme”, tha ajo. “Ka vazhduar për pesë muaj dhe tani për herë të parë, pa menduar, pa hezituar apo filtruar fjalët e tua, mund të thuash vetëm ‘luftë’ dhe të mos kesh frikë”.

Ajo shtoi se ka kaluar nëpër postimet e saj në mediat sociale në muajt e fundit dhe ka shtuar komente që tregojnë se atë që donte të thoshte me të vërtetë.

Pirogova planifikon të vazhdojë punën si anëtare e këshillit të qytetit nga distanca për aq kohë sa të jetë e mundur./REL/

Continue Reading

Lajmet

Presidentja e Maqedonisë së Veriut: Të turpëruar nga thirrjet anti-shqiptare në Kumanovë

Published

on

By

Presidentja e Maqedonisë së Veriut, Gordana Siljanovska Davkova, ka thënë se populli maqedonas është i turpëruar nga thirrjet fashiste ndaj shqiptarëve, nga tifozët në ndeshjen e basketbollit mes Maqedonisë dhe Rumanisë në fundjavë në qytetin e Kumanovës.

Për shkak të analfabetizmit tonë sportiv, që ndodh për të kush e di të satën herë, me të drejtë nuk ndalen reagimet ndaj incidentit të tmerrshëm në ndeshjen e basketbollit në Kumanovë, ku disa tifozë të papërgjegjshëm qëlluan me plumba urrejtjeje ndaj bashkëqytetarëve tanë shqiptarë — por në fakt, na goditën të gjithëve, madje edhe vetveten, dhe sërish jemi të turpëruar”, ka shkruar ajo në Facebook.

Siljanovska Davkova ka thënë se Maqedonia nuk do të lejojë më që arenat sportive të kthehen në “arena tifozësh gladiatorësh”. Sipas presidentes maqedonase, mësimi i parë se “si të brohorasësh” mësohet në shtëpi e më pas në shkolla. Ajo ka thënë se shteti duhet t’u kundërvihet urrejtjes së tifozëve dhe të mësojë se si të brohorasin. Sipas saj, Maqedonia e Veriut ka nevojë për “një alfabet të brohoritjes si kënaqësi sportive”.

“Maqedoni e pastër”, “Shqiptari i mirë është shqiptari i vdekur” dhe “Dhoma e gazit për shqiptarët”, janë disa nga parullat e kënduara nga tifozët vendas, thirrje të lidhura me retorikën naziste të shfarosjes. Thirrjet u bënë në praninë e kryeministrit maqedonas e zyrtarëve të lartë shtetërorë.

Continue Reading

Lajmet

Një mërgimtar arrestohet në Serbi teksa po vinte në Kosovë

Published

on

By

Një mërgimtar nga Gjermania është arrestuar në Serbi teksa kishte marrë rrugën për në Kosovë.

Behar Preniqi është ndaluar nga autoritetet serbe nën arsyetimin e krimeve të luftës duke pretenduar se ai ishte pjesë e UÇK-së.

Raportohet se Preniqi është arrestuar në Bajakovo në pikën kufitare mes Serbisë dhe Kroacisë.

Continue Reading

Lajmet

Pritja në pikat kufitare për të hyrë në Kosovë deri në 10 minuta

Published

on

By

Qendra Kombëtare për Menaxhim Kufitar i ka përditësuar të dhënat mbi fluksin në pikat kufitare.

Sipas të dhënave të publikuara nga kjo qendër, aktualisht pritjet për të hyrë në Kosovë janë të shkurtra.

Pritjet më të gjata janë në pikën kufitare në Jarinjë dhe Muçibabë ku pritjet për të hyrë në Kosovë shkojnë deri në 10 minuta, kurse në pikat tjera kufitare raportohen pritje nga tre deri në pesë minuta.

Continue Reading

Lajmet

Policia shqipton mbi 2 mijë gjoba për kundërvajtësit e trafikut brenda 24 orëve të fundit

Published

on

By

Policia e Kosovës ka shqiptuar 2027 gjoba për kundërvajtësit e trafikut brenda 24 orëve të fundit.

Në 24 orët e fundit janë raportuar 107 aksidente trafiku me dëme materiale kurse 53 aksidente trafiku kanë përfunduar me të lënduar.

Policia e Kosovës ka arrestuar 20 persona, 8 janë dërguar në mbajtje, kurse 3 persona janë në vuajtje të dënimit.

Continue Reading

Të kërkuara