Lajmet

​Tahiri kritikon Kurtin: Nuk na tregoi qëndrimin e tij për kërkesat e pesëshes diplomatike

Deputeti i PDK-së përsëriti edhe njëherë kërkesat e opozitës drejtuar Kurtit.

Published

3 years ago

on

Shefi i Grupit Parlamentar të Partisë Demokratike të Kosovës (PDK), Abelard Tahiri, deklaroi se presidentes Vjosa Osmani do t’i shpallin betejë kushtetuese për shkak të mosdekretimit të kryeprokurorit Blerim Isufaj, për çka theksoi se pret që të dalin fitues. Tahiri pas mbledhjes së Kryesisë së Kuvendit, foli edhe për vizitën e pesëshes diplomatike të shtunën e fundit, për çka tha se kryeministri i vendit, Albin Kurti do të duhej të tregonte hapur qëndrimin e tij për kërkesat që ka marrë.

Deputeti i PDK-së përsëriti edhe njëherë kërkesat e opozitës drejtuar Kurtit, e që janë “bashkëpunim më i ngushtë me ndërkombëtarët, në veçanti ShBA-në”.

“Mendoj se kryeministri i vendit ua ka pasur për borxh të gjithë qytetarëve tonë por edhe klasës politike që ta mbajë një konferencë për media dhe ta jepte një sqarim pas takimit, për kërkesat që i ka marrë nga ana e tyre dhe për qëndrimin e tij. Unë nuk e di që kemi një qëndrim të qartë sa i përket këtyre kërkesave… Për ne është shumë me rëndësi të dimë pozicionin e kryeministrit, që nuk e dimë herët. Në anën tjetër, në po i kërkojmë kryeministrit të ketë bashkëpunim sa më të ngushtë me ndërkombëtarët, e në veçanti me ShBA-në”, tha ai.

Kritik u tregua edhe për qasjen e Qeverisë Kurti ndaj agresionit të Serbisë më 24 shtator.

“Ai ka qenë një akt terrorist, i sponsorizuar nga Serbia. Ne kemi nevojë të shohim qeverinë tonë, ministren e Jashtme, kryeministrin, do të duhej me qenë një ofensivë diplomatike për një muaj me radhë. Nuk po e di pse s’po e bëjnë, prej kujt po frikësohen. Pra, për një muaj asnjë veprim nga kjo qeveri në raport me këtë çështje nuk e kemi parë”, tha ai.

Sa i përket vendimit të presidentes për mosdekretimin e kryeprokurorit të shtetit, Tahiri tha se tashmë janë të bindur se Osmani ka bërë dy shkelje Kushtetuese, për çka u shpreh i bindur se vendi do të ketë një president të ri. Sipas tij, presidentja Vjosa Osmani ka bërë shkelje duke mos e dekretuar për 18 muaj kryeprokurorin Blerim Isufaj dhe se mosdekretimi ka tejkaluar kompetencat e saj.

“Nga nesër, në fund të ditës, ta kemi draftin tonë të gatshëm, ku i bazojmë shkeljet. Dhe, të njëjtin draft do ta qarkullojmë edhe me grupet tjera parlamentare… Për ne është e rëndësishme të përfundojë rasti në Kushtetuese sepse jemi të bindur se ka shkelje serioze në dy drejtime… Unë jam optimist se opozita do të jetë e bashkuar në këtë drejtim. Edhe një çështje, presidentja javën e kaluar nga kërcënoi apo me thënë na ftoi për çështjen e Kushtetueses, na tha se ‘nëse e dërgoni, hyni në një betejë politike’, pra edhe këtu presidentja e vendit tregon se nuk është e paanshme. Unë po ia kujtoj presidentes se presidenti i vendit është garant i rendit kushtetues ashtu sikurse e parasheh Kushtetuta. Nuk është presidenti për të bërë betejë politike me deputetët e Kuvendit të Kosovës. Ky është një gabim, është një reflektim i saj i brendshëm që ajo mban tashmë një anë politike, të cilën e drejton kryeministri i vendit, Albin Kurti. Presidentja po na kërkon betejë politike, por ne do t’i japim betejë kushtetuese… dhe jemi të bindur se këtë betejë e ka të humbur, pasi ka shkelje serioze të cilat e çojnë në shtëpi”, shtoi Tahiri.

Sipas tij, presidentja nuk ka diskrecion të kthejë mbrapa propozimin që vjen nga Këshilli Prokurorial.

Related Topics:
Continue Reading

Vendi

I ofendoi dhe i sulmoi policët gjatë arrestimit në Gjilan, dërgohet në mbajtje

Published

2 minutes ago

on

October 13, 2026

By

Një person është arrestuar në Sheshin e Qytetit në Gjilan pasi ka penguar zyrtarët policorë gjatë kryerjes së detyrës zyrtare.

Policia e Kosovës njofton përmes raportit 24-orësh se i dyshuari, për motive ende të panjohura, ka ofenduar pjesëtarët e policisë.

Gjatë momentit të arrestimit, ai ka bërë rezistencë, me ç’rast dy zyrtarë policorë kanë pësuar lëndime trupore dhe kanë marrë tretman mjekësor. Me vendim të prokurorit, i dyshuari është dërguar në mbajtje pas intervistimit. /E.A/

Continue Reading

Kronikë e zezë

Vdes një person në Ferizaj pasi dyshohet se ra nga lartësia në vendin e punës

Published

4 minutes ago

on

October 13, 2026

By

Sipas raportit 24-orësh të Policisë së Kosovës, një person ka humbur jetën në rrugën “Cen Dugolli” në Ferizaj, derisa po punonte në vendin e tij të punës.

Viktimat dyshohet se ka rënë në tokë nga një lartësi prej rreth 7 metrash, ku ekipi mjekësor në vendngjarje ka konstatuar vdekjen e tij.

Njësitet relevante policore kanë dalë në vendin e ngjarjes dhe me vendim të prokurorit, trupi i pajetë është dërguar në Institutin e Mjekësisë Ligjore (IML) për obduksion. Rasti është hapur për hetim nën dyshimin për asgjësim, dëmtim ose heqje të pajisjeve mbrojtëse dhe rrezikim të sigurisë në vendin e punës. /E.A/

Continue Reading

Vendi

Mblidhen komisionet parlamentare në Kuvend

Published

27 minutes ago

on

October 13, 2026

By

Dita e sotme në Kuvendin e Kosovës do të jetë e ngjeshur me aktivitete parlamentare, meqë disa komisione do të mblidhen për të diskutuar ndryshimet e propozuara në buxhetin e vitit 2026, planet e punës për sesionin vjeshtor dhe nisma të tjera ligjore. Punimet nisin në orën 10:00, ku Komisioni për Kulturë do të trajtojë rishikimin e buxhetit në fushën e tij, Komisioni për Ekonomi do të diskutojë planin e punës vjeshtor, ndërsa ai për Shëndetësi do të miratojë fushëveprimin e vet.

Në orën 11:00, diskutimet buxhetore do të vazhdojnë në Komisionin për Punë të Jashtme dhe Diasporë, ndërsa Komisioni për Buxhet do të shqyrtojë Projektligjin për Parandalimin e Pastrimit të Parave dhe Luftimin e Financimit të Terrorizmit. Më pas, në orën 13:00, shqyrtimi i ndryshimeve buxhetore do të vijojë paralelisht edhe në tri komisione të tjera: atë për Mjedis e Bujqësi, për Arsim e Shkencë, si dhe për Administratë Publike e Media.

Dita e mbledhjeve do të përmbyllet në orën 14:00 nga Komisioni i Posaçëm për Shqyrtimin e Kandidatëve për Emërim në Gjykatën Kushtetuese. Ky komision do të shqyrtojë publikimin e thirrjes publike për zgjedhjen e dy gjyqtarëve të rinj në Gjykatën Kushtetuese të Republikës së Kosovës. /E.A/

Continue Reading

Lajmet

Rikthehet Liga e Kampionëve: Sonte në program nëntë përballje me stacione kryesore në Madrid e Stamboll

Published

36 minutes ago

on

October 13, 2026

By

Ethet e futbollit elitar evropian zbarkojnë sërish në fushë sonte me ndeshjet e xhiros së dytë të fazës së ligës në Ligën e Kampionëve. Skuadrat më të mëdha të continentit do të përballen në nëntë duele mjaft interesante, ku secila pikë ka peshë të jashtëzakonshme në garën për kualifikim.

Vëmendja kryesore e mbrëmjes do të jetë në Madrid, ku Atletico Madridi përballet me Manchester Unitedin, si dhe në Stamboll te dueli i zjarrtë mes Galatasarayt dhe Barcelonës. Sfida mjaft interesante priten edhe në Angli e Itali, me Arsenalin që pret Lille-n, ndërsa Interi do të kërkojë fitoren në shtëpi përballë Club Brugge. Ndërkohë, Napoli udhëton drejt Spanjës për një përballje të fortë me Villarrealin.

Në takimet e tjera të kësaj xhiroje, Bayern Mynihu do të ndeshet me Vikingun, RB Leipzigu do të masë forcat me PSV Eindhovenin, ndërsa Lensi pret Sportingun e Lisbonës. Programi i sotëm hapet me përballjen mes Sabahut dhe Slavia Pragës.

Sa i përket orarit, sfidat Lens – Sporting dhe Sabah – Slavia Pragë startojnë nga ora 18:45, ndërsa shtatë përballjet e tjera të mbrëmjes do të luhen nga ora 21:00. Me këtë rikthim, skuadrat do të luftojnë për çdo pikë, në një format të ri ku secila ndeshje mund të jetë vendimtare për të ardhmen e tyre në garë.

Continue Reading

Të kërkuara