Lajmet

Szunyog: Dëshirojmë që Ballkani të jetë stabil dhe i integruar në Evropë

Nga të rinjtë u përmend mungesa e liberalizimit të vizave për kosovarët.

Published

3 years ago

May 10, 2022

Betim Gashi

Udhëheqësi i Zyrës së Bashkimit Evropian, në Kosovë, Tomas Szunyog ka zhvilluar një takim me të rinjtë e Dragashit, ku tema diskutimi ishin rrugëtimi i Kosovës drejt BE-së, mundësitë e të rinjve në Kosovë dhe BE, energjia e gjelbër, si dhe transformimi digjital.

Në bashkëbisedim me të rinjtë, ambasadori Szunyog foli për punën që bën Zyra e BE-së dhe shtetet anëtare të BE-së këtu për përafrimin e Kosovës drejt vlerave evropiane.

“80 për qind e punës tonë përqendrohet në integrimin e Kosovës në BE dhe këtë po e bëjmë për ju të rinj, sepse besojmë që jeni evropianë dhe mund të kontribuoni në Bashkimin Evropian dhe në të ardhmen do të jeni anëtarë dhe qytetarë të Evropës. Duam ta shohim Kosovën në vijë me prioritetet evropiane dhe për këto prioritete duhet të përmend diçka që është fatkeqe – lufta që po ndodh në Ukrainë. Dëshirojmë që Ballkani të jetë stabil dhe i integruar në Evropë dhe i mbrojtur kundër kërcënimeve të destabilizimit të mundshëm”, thekoi përfaqësuesi i Posaçëm i BE-së në Kosovë.

“E dyta që është energjia e gjelbër, pra përpjekja e Bashkimit Evropian për ta ndryshuar mënyrën në të cilën punon ekonomia evropiane është që ajo të jetë e qëndrueshme në planin afatgjatë, për t’i ndalur ndryshimet klimatike”, tha ambasadori.

Nga të rinjtë u përmend mungesa e liberalizimit të vizave për kosovarët, me ç’rast ambasadori Szunyog tregoi se këtë fakt e përmend sa herë që takohet me drejtuesit e Bashkimit Evropian.

“Sa herë që shkoj në Bruksel e përmendi që Kosova i ka përfunduar punët për liberalizim. Ende nuk është vendosur dhe për këtë ndjej keqardhje se nuk është në dorën time, por të 27 vendeve anëtare. Është një çështje mjaft që e ngarkon marrëdhëniet tona. Dje kishte një protestë të studentëve… Qeveria e Kosovës duhet ta luajë rolin e saj, por ekziston mundësia që Kosova të bisedojë me ministrat e 27 vendeve që janë anëtarë që ata të binden se liberalizimi i vizave është i duhur. Shpresoj që kjo do të bëhet së shpejti”, tha Szunyog.

Ambasadori u pyet nëse liberalizimi i vizave ndërlidhet me zhvillimin ekonomik apo është çështje politike më shumë.

“S’ka të bëjë me zhvillim ekonomik, por me kornizë ligjore që duhet të jetë në standardet e BE-së. Çdo vit ne publikojmë raportin për të shprehur gatishmërinë e Kosovës për anëtarësim, e aty në raporte thuhet se është herët që Kosova t’i bashkëngjitet BE-së. Ajo që është me rëndësi në aspekti politik, kërkohet një unitet dhe janë pesë shtete që ende nuk e kanë njohur Kosovën”, tha tutje ai.

Ambasadori Szunyog tregoi se krahas ndihmës dhe këshillave që i japin Kosovës në procesin e integrimit evropian, ka dhe shumë investime në ekonominë e Kosovës nga shtetet e BE-së – të cilat kapin shifrën e rreth 80 milionë eurove në vit.

Aktualitet

UBT shpall thirrjen për Konferencën Ndërkombëtare të Gjuhës dhe Kulturës 2025

Published

23 hours ago

September 27, 2025

Driton Iseni

UBT ka bërë hapjen e thirrjes për pjesëmarrje në Konferencën Ndërkombëtare të Gjuhës dhe Kulturës 2025 (IC-LAC), e cila këtë vit organizohet në kuadër të Konferencës së 14-të Ndërkombëtare të UBT-së për Biznes, Teknologji dhe Inovacion.

Ky aktivitet shkencor do të bashkojë studiues, akademikë, studentë të cikleve të avancuara, doktorantë, ekspertë të fushës dhe profesionistë të arsimit nga vende të ndryshme të botës, me synim shkëmbimin e njohurive, përvojave dhe praktikave më të mira mbi gjuhën, kulturën dhe ndërthurjen e tyre në sistemet bashkëkohore arsimore.

Tema kryesore e këtij edicioni është: “Ndërtimi i sistemeve arsimore reziliente për një të ardhme të qëndrueshme.”

Datat kryesore:

Dorëzimi i abstrakteve: 10 tetor 2025
Njoftimi i pranimit & rishikimi shkencor: 17 tetor 2025
Regjistrimi i hershëm: deri më 17 tetor 2025
Regjistrimi i vonuar: deri më 20 tetor 2025
Dorëzimi i punimit të plotë: 14 nëntor 2025

Qëllimet dhe objektivat

Konferenca IC-LAC synon të hapë një hapësirë të gjërë diskutimi mbi rolin e gjuhës dhe kulturës në shoqëritë moderne, duke nxitur qasje multidisiplinare për edukimin dhe komunikimin ndërkulturor.

Fushat e diskutimit përfshijnë:

Gjuha dhe kultura në arsim
Përdorimi i teknologjisë në mësimdhënie dhe të nxënë
Komunikimi ndërkulturor dhe shumëgjuhësia
Praktikat e qëndrueshme në edukimin gjuhësor
Inteligjenca artificiale dhe ndikimi i saj në të nxënit e gjuhëve
Përkthimi, interpretimi dhe komunikimi global
Rezilienca arsimore dhe dizajnimi i kurrikulave

Dorëzimi i punimeve

Punimet e paraqitura duhet të jenë origjinale, të papublikuara më parë dhe të mos jenë në proces shqyrtimi në konferenca të tjera. Gjatësia maksimale e një punimi është 6 faqe. Punimet që nuk respektojnë kriteret e formatimit nuk do të merren në konsideratë.

Organizatorët ftojnë të gjithë të interesuarit që të kontribuojnë me hulumtimet e tyre shkencore dhe praktikat profesionale, duke u bërë pjesë e një platforme ndërkombëtare shkëmbimi idesh që synon të forcojë lidhjen mes gjuhës, kulturës dhe arsimit për një të ardhme më të qëndrueshme.

Lajmet

Gjykata spanjolle liron Dani Alves-in

Published

2 days ago

September 26, 2025

UBT News

Gjykata e Lartë e Katalonjës ka rrëzuar të premten dënimin për përdhunim ndaj ish-futbollistit brazilian Dani Alves, duke arsyetuar se çështja kishte mospërputhje dhe kontradikta në dëshmitë e paraqitura.

Alves, 41 vjeç, ishte dënuar vitin e kaluar me katër vjet e gjysmë burg për përdhunimin e një gruaje në një klub nate në Barcelonë në vitin 2022. Megjithatë, gjykata e apelit vendosi se dëshmia e akuzueses nuk kishte besueshmëri të mjaftueshme, duke theksuar se mungonin prova të qarta për të mbështetur akuzën.

“Dani Alves është shumë i lumtur. Ai është i pafajshëm, kjo është demonstruar. Drejtësia ka folur,” deklaroi avokatja e tij, Ines Guardiola.

Ndërkohë, avokatja e akuzueses, Ester Garcia, paralajmëroi se do ta çojë çështjen në Gjykatën Supreme të Spanjës, proces që mund të zgjasë deri në një vit./S.K/KP/Morung Express/

Lajmet

Caktohet data, Pogba rikthehet në fushë

Published

2 days ago

September 26, 2025

UBT News

Paul Pogba është shumë pranë rikthimit në futboll pas një periudhe të gjatë mungese tha trajneri i Monacos, Adi Hütter. Ai zyrtarisht ka konfirmuar se mesfushori francez po përparon ndjeshëm.

“Fizikisht dhe mendërisht po shkon mirë. Është stërvitur për tre muaj dhe është afër kthimit në skuadër,” deklaroi Hütter.

Sipas mediave franceze, Pogba pritet të jetë i disponueshëm më 5 tetor, në ndeshjen e Ligue 1 kundër Nice në Stade Louis II.

Ndërkohë, rikthimi në sfidën e së shtunës kundër Lorient shihet më pak i mundshëm.

Ish-mesfushori i Juventusit nuk ka luajtur një ndeshje zyrtare që prej 3 shtatorit 2023, kur u aktivizua ndaj Empolit.

Pak javë më vonë, ai u pezullua për doping dhe u dënua fillimisht me katër vite jashtë fushave. Megjithatë, në tetor 2024, Gjykata e Arbitrazhit Sportiv uli ndalimin në 18 muaj, që skadoi më 11 mars 2025.

Pas ndarjes me Juventusin, Pogba refuzoi një transferim në MLS dhe verën e kaluar nënshkroi një kontratë dyvjeçare me Monacon, e vlefshme deri më 30 qershor 2027.

Klubi monegask e ka regjistruar 31-vjeçarin edhe për Ligën e Kampionëve, ku pritet të rikthehet në tetor.

Ky rikthim do të shënojë një moment të rëndësishëm për kampionin e botës 2018, i cili synon të rifitojë formën dhe të lërë pas periudhën më të vështirë të karrierës së tij./S.K/KP/CNN/