Pjesëtarë të Listës Serbe kanë qenë të përfshirë në trazira të vazhdueshme në veri, ka thënë sot ministri i Punëve të Brendshme Xhelal Sveçla.

Këto deklarata ministri Sveçla i bëri me rastin e lansimit të raportit “Siguria në veri të Kosovës pas sulmeve terroriste në Basnjka dhe kanalin e Ibër Lepenc”, derisa shtoi se beteja e vazhdueshme e autoriteteve të Kosovës për shtirje të sovranitetit në pjesën veriore të vendit, ka demaskuar aspiratat e Serbisë për territorin e Kosovës.Ministri Sveçla tha po ashtu se strukturat paralele serbe kanë bashkëpunuar me Beogradin zyrtar dhe kanë pranuar urdhra nga presidenti i Serbisë, Aleksandër Vuçiq e Milan Radoiçiq.

Ai shtoi se që nga viti 2023, janë ashpërsuar aktet e tilla kriminale, sipas tij duke u kthyer në sulme që vetëm Rusia ka kryer në Ukrainë, e Serbia në Kosovë.

“Ne numërojmë qindra sulme ndaj policisë, mediave e qytetarëve e cila pas gjithë këtyre qëndron Serbia. Integrimi i shumë folur i strukturave paralele serbe në institucione tona, sipas marrëveshjes së Brukselit, ka mundësuar instalim të strukturave që kanë raportuar Serbisë dhe Vuçiqit, dhe kanë pranuar urdhra nga ta, duke qenë kazi i institucioneve tona… Me fillimin e vitit 2023, e deri më tash siç jo vetëm ne por mbarë bota e ka parë, janë ashpërsuar aktet e tilla kriminale, duke kthyer në sulme që vetëm Rusia ka kryer në Ukrainë, Serbia në Kosovë”,  u shpreh Sveçla.

Ai ka thënë po ashtu se Lista Serbe nuk nund të thotë se nuk ka qenë e përfshirë në sulmet ndaj pjesëtarëve të KFOR-it, ku në maj të vitit 2023, protestuesit serbë në Zveçan janë përleshur me pjesëtarë të misionit të NATO-s në Kosovë, duke lënë të plagosur mbi 90 paqeruajtës.

“Nën petkun e përfaqësuesve politikë të serbëve të Kosovës pas takimeve me presidentin serb, Aleksander Vuciq, udhëheqësit e Listës Serbe kanë qenë të përfshirë drejtëpërdrejt në trazirat e vazhdueshme atje, ndërsa njerëzit me të afërt ishin sulmues aktiv të pjesëtarëve të KFOR-it, Policisë dhe të institucioneve tona. Nuk mund të thotë Lista Srpska se nuk ka qenë në përfshirë në sulmet e pjestarëve të KFOR-it. Asistentë, shoferë, truproje të Listes Srpska janë identifikuar dhe tash një pjesë e tyre janë në arrati”, tha ai.

Se ka shtim të sulmeve të armatosura ndaj Policisë së Kosovës, tha Skender Perteshi nga Qendra Kosovare për Studime të Sigurisë.

“Të gjeturat kryesore të raportit janë që, më shumë se një vit që prej sulmit që kanë ndodhur në fshatin Banjskë, shumica e individëve që kanë qenë pjesë e këtij sulmit, ende gjenden të lirë në Serbi, janë larguar në Serbi. Po ashtu edhe udhëheqësi kryesor ish-nënkryetari i Listës Serbe Milan Radojçiq ende nuk është sjell para drejtësisë. Pas tetorit të vitit 2023, kemi një intensitet të lartë dhe një shtim të sulmeve të armatosura ndaj Policisë se Kosovës, institucioneve lokale e qendrore të shteti që janë pjesë të veriut të vendit, ka sulme edhe ndaj misionit evropian EULEX-i dhe ndaj KFOR-it dhe popullatës civile”, tha ai.

Raporti “Siguria në veri të Kosovës pas sulmeve terroriste në Basnjka dhe kanalin e Ibër Lepenc” është lansuar nga Instituti për Siguri dhe Reziliencë – PREVENT, analizon situatën e sigurisë në komunat veriore të Kosovës pas sulmeve të 24 shtatorit 2023 dhe 29 nëntorit 2024 si dhe rrezikun që paraqesin organizatat ekstremiste dhe terroriste si “Mbrojtja Civile” dhe “Brigada e Veriut”.