Filmi me metrazh të gjatë “DUA”, me skenar dhe regji nga Blerta Basholli, sot shënon premierën botërore në Festivalin e Cannes, në kuadër të programit prestigjioz Semaine de la Critique.

“DUA” është përzgjedhur mes vetëm shtatë filmave të gjatë të këtij edicioni dhe bëhet filmi i parë nga Kosova që merr pjesë në këtë seksion konkurrues, ku garon për katër çmime kryesore. I vendosur në Kosovën e viteve ’90 dhe i frymëzuar nga përvoja personale e regjisores, filmi rrëfen historinë e një adoleshenteje introverte në kërkim të identitetit në një periudhë të trazuar politike dhe shoqërore.

Në rolin kryesor luan Piena Matoshi, ndërsa producentë të projektit janë Valon Bajgora dhe Yll Uka nga Ikonë Studio.

Si bashkëproducentë marrin pjesë Britta Rindelaub dhe Thomas Reichlin nga Alva Film , si dhe Amaury Ovise nga Kazak Productions . Projekti mbështetet nga institucione dhe fonde të ndryshme ndërkombëtare, përfshirë CNC, ARTE Cinema, Eurimages dhe Qendra Kinematografike e Kosovës.

Në qytetin e Durrësit është hapur ekspozita fotografike “Shqipëria 1921 – Eugène Pittard”, e cila sjell për publikun pamje të rralla të Shqipërisë së fillimshekullit XX.

Në ceremoninë e hapjes morën pjesë nënkryetarja e Kuvendit, Klodiana Spahiu, si dhe ambasadorja e Zvicrës në Shqipëri, Ruth Huber. Ekspozita është realizuar në bashkëpunim ndërmjet Ambasadës së Zvicrës në Tiranë dhe FotoKlub Durrës, duke ofruar një udhëtim të veçantë vizual përmes fotografive të realizuara nga akademiku dhe antropologu zviceran Eugène Pittard dhe bashkëshortja e tij, Hélène Pittard.

Gjatë viteve 1921 dhe 1924, çifti Pittard udhëtoi nëpër Shqipëri duke dokumentuar jetën e përditshme, qytetet, fshatrat, peizazhet dhe traditat shqiptare. Përmes objektivit të tyre, ekspozita sjell dëshmi autentike të historisë dhe identitetit kombëtar shqiptar, të ruajtura në fotografi me vlerë të veçantë historike dhe kulturore.

Në fjalën e saj, Klodiana Spahiu e vlerësoi këtë nismë si një kontribut të rëndësishëm në promovimin e kujtesës historike dhe trashëgimisë kulturore shqiptare, duke falënderuar organizatorët për sjelljen e kësaj ekspozite për publikun durrsak.

Sot shënohen 55 vite nga lindja e Tedi Papavramit, një prej violinistëve shqiptarë më të njohur në skenën ndërkombëtare të muzikës klasike. I lindur më 13 maj 1971 në Tiranë, ai nisi të luante violinë që në moshë shumë të vogël nën udhëheqjen e të atit, Robert Papavrami.

Talenti i tij u dallua herët, duke interpretuar që fëmijë me Filarmoninë e Tiranës vepra të njohura botërore. Në vitin 1982 fitoi bursë nga qeveria franceze për studime në Konservatorin e Parisit, duke nisur kështu një karrierë të suksesshme ndërkombëtare.

Gjatë viteve, Papavrami është vlerësuar me disa çmime prestigjioze, mes tyre çmimi “George Enescu” dhe vendi i parë në Konkursin Ndërkombëtar të Violinës “Pablo Sarasate”. Ai ka performuar në shumë skena të rëndësishme evropiane dhe vazhdon të konsiderohet një nga figurat më të rëndësishme të muzikës klasike shqiptare.

Përveç muzikës, Tedi Papavrami është angazhuar edhe në përkthimin në frëngjisht të veprave të shkrimtarit Ismail Kadare, duke dhënë kontribut edhe në promovimin e letërsisë shqiptare jashtë vendit.