Platforma “Përshëndetje, Inspektor” ka shpallur një bojkot shtatëditor të rrjetit të shitjes me pakicë Konzum në Kroaci, duke nisur nga e shtuna, 8 shkurt deri më 14 shkurt 2025. Ky bojkot ka si shkak rritjen e çmimeve të produkteve ushqimore bazë, dhe është vendosur pas një sondazhi të publikuar nga platforma, i cili zgjati 24 orë më 5 shkurt.

Sondazhi mori 211,638 vota nga 144,732 votues, ku 31.7% e tyre votuan për bojkotimin e Konzum, pasuar nga Plodina me 29.1% dhe Studenac me 6.87%.

Bojkoti i Konzum është pjesë e një lëvizjeje më të gjerë, pasi më herët përfundoi një bojkot i tri zinxhirëve të tjerë, Lidl, Eurospin, dhe DM, si dhe disa produkte të caktuara. Në të njëjtën kohë, qytetarët janë ftuar të ndalojnë çdo formë të pagesës të premten, më 7 shkurt, e cila është e treta e këtij lloji. Pjesëmarrësit e sondazhit dhe organizatorët e bojkotit kanë shprehur shqetësimin për rritjen e çmimeve dhe kanë paralajmëruar bojkotet e tjera në të ardhmen. Gjatë procesit, serveri i platformës është përballur me dy rënje, duke shkaktuar mungesë qasjeje për më shumë se pesë orë./UBTNews/

Miliarderi dhe filantropi Bill Gates, bashkëthemelues i Microsoft, ka deklaruar se u takua me Presidentin Donald Trump në Shtëpinë e Bardhë të mërkurën për të diskutuar mbi rëndësinë e ruajtjes së ndihmës ndërkombëtare të ofruar nga Agjencia Amerikane për Zhvillim Ndërkombëtar (USAID).

Në një intervistë për NBC’s TODAY, Gates tha se ishte i angazhuar për të siguruar që ndihma e huaj, e cila është e rëndësishme për shumë shtete, të vazhdojë të mbetet në agjendën e administratës Trump.

“Kam shkuar në Shtëpinë e Bardhë për të siguruar që të mbajmë përparësi ato iniciativa që janë të bazuara në vlera,” tha Gates.

Ai shtoi se pati një takim të shkurtër me Trump dhe një diskutim më të thelluar me Susie Ëiles, shefen e shtabit të Presidentit.

Gates, i cili themeloi Fondacionin Gates në vitin 2000, theksoi rëndësinë e USAID-it, duke e cilësuar atë si një agjenci të paprecedentë në përpjekjet e saj për zhvillimin global. Ai e quajti USAID-in “më të mirën në botë” midis agjencive të zhvillimit ndërkombëtar.

Pavarësisht kritikave ndaj administratës Trump, e cila ka kërkuar reforma të mëdha dhe ka ndërmarrë veprime për të zvogëluar shpenzimet e USAID, Gates theksoi se ekspertiza dhe përvoja që agjencia ka në terren janë të vështira për t’u riprodhuar.

Në lidhje me komentet e Elon Musk, i cili ka kritikuar ashpër USAID-in, Gates tha se ai nuk ka pasur asnjë takim me të dhe shprehu dyshime për qëndrimin e Musk ndaj kësaj çështjeje.

“Unë nuk e di sa mendjehapur është ai,” shtoi Gates, duke theksuar se, megjithatë, ai ka një admirim të thellë për inovacionet që Musk ka sjellë me Tesla dhe SpaceX.

Kujtojmë se Musk e cilësoi USAID-in si një “fole krimbash”, e cila duhet mbylllur pasi është nën kontrollin e ekstremistëve të majtë në SHBA.

Ministri i Mbrojtjes izraelit tha se ka udhëzuar ushtrinë që të përgatisë plane që një numër i madh i palestinezëve të largohen “në mënyrë vullnetare” nga Rripi i Gazës, në linjë me propozimin e presidentit amerikan, Donald Trump, për territorin e shkatërruar nga lufta.

Ministri izraelit i Mbrojtjes, Israel Katz, tha më 6 shkurt se plani “do të përfshijë opsione për t’u larguar përmes pikakalimeve tokësore si dhe një marrëveshje të posaçme për largim nga deti dhe ajri”.

Ai tha se mirëpret planin “e guximshëm të Trumpit, që mund të lejojë një pjesë të madhe të popullsisë së Gazës të largohet në pjesë të ndryshme të botës”.

Katz nuk tha se nëse palestinezët do të mund të ktheheshin një ditë në Gazë, që është bërë gjerësisht e pabanuar pas fushatës ushtarake 15-mujore të Izraelit kundër Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian.

Më herët gjatë javës, Trump propozoi që shumica e popullsisë së Gazës të vendosej “në mënyrë të përhershme” diku tjetër derisa SHBA-ja të rindërtonte territorin.

Zyrtarët amerikanë më pas thanë se zhvendosja do të ishte vetëm e përkohshme, por palestinezët kanë shprehur frikën se Izraeli nuk do t’i lejojë që të kthehen më.

Detajet e planit të Trumpit, që u përmend për herë të parë muajin e kaluar, mbeten të paqarta. Ende nuk dihet se nën çfarë autoriteti mund ta merrte SHBA-ja nën kontroll Gazën ose si do të zhvendoseshin 2.3 milionë banorët e saj.

Propozimi i presidentit amerikan ka shkaktuar shqetësim se mund të rrezikohet marrëveshja e brishtë e armëpushimit mes Izraelit dhe Hamasit, grupit radikal palestinez që ka udhëhequr Gazën që nga viti 2007.

Armëpushimi me disa faza, i cili hyri në fuqi muajin e kaluar, ndaloi përkohësisht më shumë se një vit luftime në këmbim të lirimit të pengjeve izraelite dhe të burgosurve palestinezë.

Lufta në Gazë nisi më 7 tetor 2023, pasi Hamasi sulmoi Izraelin, duke vrarë afër 1.200 persona dhe duke rrëmbyer afër 250 të tjerë. Si pasojë e ofensivës izraelite, në Gazë u vranë më shumë se 47.000 palestinezë.

Lufta detyroi popullsisë prej 2.3 milionë banorësh të zhvendoseshin nga shtëpitë e tyre, shpesh më shumë se një herë, dhe shkaktoi shkatërrime të mëdha në enklavë.

Një vlerësim i dëmeve, i bërë nga Kombet e Bashkuara i publikuar në janar, tregoi se pastrimi i mbi 50 milionë tonë rrënojave të mbetura si pasojë e bombardimeve të Izraelit, mund të zgjasë 21 vjet./REL/