Programi i Studimeve të Sigurisë në UBT është i konceptuar për t’u ofruar studentëve njohuri të avancuara teorike dhe praktike në fushën e sigurisë, duke i përgatitur ata për të kuptuar, analizuar dhe menaxhuar sfidat bashkëkohore që lidhen me sigurinë kombëtare, ndërkombëtare, emergjencat civile dhe sigurinë kibernetike.

I ndërtuar sipas standardeve moderne akademike dhe nevojave të tregut të punës, programi u mundëson studentëve të zgjerojnë njohuritë e tyre mbi zhvillimet dhe politikat e sigurisë, duke fituar aftësi për të analizuar fenomenet dhe proceset që ndikojnë në sigurinë e shteteve dhe shoqërive moderne. Përmes një kombinimi të balancuar të teorisë dhe praktikës, studentët aftësohen për të hartuar strategji, dokumente dhe politika të rëndësishme në fushën e Sigurisë Nacionale, Emergjencave Civile dhe Sigurisë Kibernetike.

Mësimdhënia zhvillohet duke u bazuar në modelet dhe kurrikulat e institucioneve prestigjioze të studimeve të sigurisë në Evropë dhe Shtetet e Bashkuara të Amerikës, si dhe në literaturën më bashkëkohore shkencore. Në të njëjtën kohë, programi është përshtatur me nevojat reale të tregut të Kosovës, duke krijuar mundësi që studentët të ndërtojnë karrierë profesionale në institucionet e sigurisë, organizatat kombëtare dhe ndërkombëtare, si dhe në sektorin privat.

Gjatë studimeve, studentët fitojnë njohuri të gjera mbi institucionet dhe aktorët e sigurisë, rreziqet dhe kërcënimet bashkëkohore, marrëdhëniet ndërkombëtare, politikën e jashtme, gjeopolitikën, sigurinë kibernetike, teknologjinë informative, metodologjinë e kërkimit shkencor dhe fusha të tjera të ndërlidhura. Kjo qasje multidisiplinare u mundëson atyre të zhvillojnë aftësi të mendimit kritik, analizës së thelluar dhe zgjidhjes së problemeve komplekse që lidhen me sigurinë në nivel kombëtar dhe ndërkombëtar.

Një vlerë e veçantë e programit është zhvillimi i aftësive praktike për menaxhimin dhe analizimin e situatave të ndryshme të sigurisë, hartimin e dokumenteve strategjike dhe politikave publike, si dhe realizimin e hulumtimeve shkencore në fusha të ndryshme të shkencës së sigurisë. Studentët inkurajohen të analizojnë zhvillimet politike dhe të sigurisë në Kosovë, rajon dhe më gjerë, duke ndërtuar kompetenca profesionale që u mundësojnë të kontribuojnë në proceset vendimmarrëse dhe në avancimin e politikave të sigurisë.

Përmes qasjes inovative në mësimdhënie, mundësive të shumta akademike dhe orientimit të fortë drejt praktikës, Programi i Studimeve të Sigurisë në UBT vazhdon të përgatisë profesionistë të aftë për të përballuar sfidat e një bote gjithnjë e më dinamike dhe komplekse.

Në vitin 2026, UBT është vlerësuar si i pari në botë në kategorinë “University Brand and Reputation” në rangimin global WURI, gjë që vërteton reputacionin dhe ndikimin e tij të jashtëzakonshëm në arsimin e lartë. Ndër sukseset më madhore, UBT ka fituar titullin “Engaged University of the Year”, duke u pozicionuar si universiteti më i mirë në botë në këtë kategori dhe duke lënë pas institucione prestigjioze nga Suedia, Kanadaja, Australia dhe Arabia Saudite.

Me mbi 25 vite traditë, inovacion të vazhdueshëm dhe ekselencë akademike, UBT mbetet padyshim alternativa kryesore dhe më e sigurt për të gjithë ata që synojnë një karrierë të suksesshme dhe me ndikim në fushën e sigurisë, politikave publike dhe marrëdhënieve ndërkombëtare.

/A.K/

Studentët e UBT-së të programit master të Fakultetit të Arkitekturës dhe Planifikimit Hapësinor, së bashku me studentët e Universitetit Teknik të Vjenës dhe profesorët e tyre, Thomas Dillinger, Skender Kosumi dhe Nina Svanda, mbajtën në Vjenë të Austrisë workshopin e dytë njëjavor të këtij semestri, në kuadër të bashkëpunimit tradicional ndërmjet këtyre dy universiteteve.

Nga UBT-ja, monitorimin e studentëve të saj e bënë profesorët Binak Beqaj, Shqipërim Ahmeti dhe Modest Gashi.

Në workshopin njëjavor në Vjenë morën pjesë aktive edhe Kryetari i Komunës së Deçanit, Bashkim Ramosaj, drejtori i Urbanizmit, Arbër Nuraj, si dhe përfaqësues të drejtorive të urbanizmit të komunave të Pejës dhe Deçanit.

Përveç angazhimit intensiv në workshop-e dhe ligjëratave të profesorëve, programi i studentëve ishte i pasur edhe me aktivitete të tjera, si ekskursionet në Parkun Kombëtar Ötscher-Tormäuer dhe në Seestadt Aspern, mbrëmjet sociale në Heuberg dhe Heurige, si dhe vizitat në garat me kuaj në Krieau të Vjenës.

Studentët e UBT-së, në kuadër të këtij bashkëpunimi të ngushtë dhe të organizuar në grupe të përziera me kolegët e tyre nga TU Wien, kanë treguar nivel të lartë angazhimi dhe pune kreative.

Projektet zhvillimore rajonale shkollore të këtyre dy komunave do të finalizohen në muajin korrik dhe pritet të ekspozohen në UBT, në TU Wien, si dhe në komunat e Pejës dhe Deçanit.

Një tjetër sukses në fushën e kërkimit shkencor vjen nga UBT, përmes një bashkëpunimi ndërkombëtar mes Fakultetit të Stomatologjisë në UBT, Fakultetit të Stomatologjisë të National Autonomous University of Mexico (UNAM) dhe Fakultetit të Stomatologjisë të Maqedonisë së Veriut.

Profesoresha e UBT-së, Dr. Jeta Kiseri – Kubati, ka publikuar studimin shkencor me titull “Bleeding on Probing Associated with Two Different Bonded Fixed Retainers: A 12-Month Evaluation” në revistën prestigjioze International Journal of Biomedicine, duke sjellë rezultate të rëndësishme në fushën e ortodoncisë dhe shëndetit periodontal.

Një aspekt i veçantë i këtij publikimi është përfshirja si bashkautore e ish-studentes së UBT-së, tashmë alumne, Diona Panxhaj, e cila vazhdon të kontribuojë në aktivitete kërkimore shkencore edhe pas përfundimit të studimeve. Ky bashkëpunim dëshmon përkushtimin e UBT-së në zhvillimin e brezave të rinj të profesionistëve dhe integrimin e tyre në projekte kërkimore me karakter ndërkombëtar.

Studimi ka analizuar ndikimin e dy llojeve të retainers fiks ortodontikë në gjendjen periodontale të pacientëve gjatë një periudhe 12-mujore. Rezultatet treguan se retainers me dizajn të sheshtë (flat retainers) shoqëroheshin me nivele më të ulëta të gjakderdhjes gjatë sondimit periodontal krahasuar me retainers me dizajn të rrumbullakët, duke sugjeruar një përgjigje më të favorshme periodontale.

Ky publikim përfaqëson një tjetër dëshmi të angazhimit të stafit akademik dhe studentëve të UBT-së në prodhimin e njohurive shkencore me ndikim ndërkombëtar, si dhe forcimin e bashkëpunimit me institucione prestigjioze të arsimit të lartë në botë.

UBT vazhdon të mbështesë kërkimin shkencor, inovacionin dhe përfshirjen aktive të studentëve dhe alumnëve në projekte që kontribuojnë në avancimin e shkencës dhe praktikës profesionale.

Profesori i UBT-së, Genc Demjaha, ishte një nga ligjëruesit e Simpoziumit të III-të të organizuar nga Shoqata e Mjekëve Shqiptarë në Austri (SHMSHA), në bashkëpunim me Odën e Mjekëve të Krahinës së Steiermarkut (Ärztekammer Steiermark), ngjarje e mbajtur në Graz të Austrisë.

Në kuadër të programit shkencor të simpoziumit, profesori Demjaha mbajti ligjëratën me temën “Parimet e Sigurisë së Pacientit në Sistemin Shëndetësor”, ku trajtoi aspektet themelore të sigurisë së pacientit dhe rëndësinë e zbatimit të standardeve bashkëkohore në kujdesin shëndetësor.

Gjatë prezantimit, ai vuri theks të veçantë në menaxhimin e rreziqeve klinike, promovimin e kulturës së sigurisë në institucionet shëndetësore, si dhe në përgjegjësinë profesionale për ofrimin e shërbimeve cilësore dhe të sigurta për pacientët. Ligjërata nxiti diskutime të rëndësishme ndërmjet pjesëmarrësve dhe kontribuoi në shkëmbimin e praktikave më të mira në fushën e sigurisë së pacientit.

Simpoziumi mblodhi mjekë, stomatologë, studiues dhe profesionistë të shëndetësisë nga Austria, Kosova, Shqipëria, Maqedonia e Veriut dhe vende të tjera evropiane, duke shërbyer si platformë për prezantimin e arritjeve shkencore, shkëmbimin e përvojave profesionale dhe forcimin e bashkëpunimit ndërkombëtar në sektorin e shëndetësisë.

Organizimi i këtij simpoziumi, për herë të parë në bashkëpunim të ngushtë me Ärztekammer Steiermark, përfaqëson një hap të rëndësishëm drejt thellimit të lidhjeve profesionale dhe institucionale ndërmjet komunitetit mjekësor shqiptar dhe institucioneve shëndetësore austriake.

Pjesëmarrja dhe kontributi i profesorit Genc Demjaha në këtë ngjarje prestigjioze dëshmojnë angazhimin e vazhdueshëm të stafit akademik të UBT-së në promovimin e dijes, shkëmbimin e ekspertizës dhe avancimin e praktikave profesionale në nivel ndërkombëtar.