Në UBT u bë hapja zyrtare e edicionit të dytë të Javës së Artit dhe Dizajnit. Në këtë ngjarje të rëndësishme morën pjesë Rektori i UBT-së, Prof. Dr. Edmond Hajrizi, dekania e Fakultetit të Artit dhe Dizajnit, Ariana Gjoni, përfaqësues të departamenteve të ndryshme, profesorë, studentë dhe mysafirë të shumtë nga fusha e artit dhe kulturës.

Rektori Hajrizi theksoi rëndësinë e këtij aktiviteti për zhvillimin dhe promovimin e artit në nivel lokal dhe ndërkombëtar. Ai u shpreh se “Java e Artit dhe Dizajnit është një mundësi për të nxitur dialogun krijues ndërmjet artistëve, studentëve dhe profesionistëve, duke përkrahur inovacionin dhe pasionin për artin në çdo formë. Kjo iniciativë ndihmon në ngritjen e një platforme të fuqishme, që bashkon kulturën, teknologjinë dhe edukimin”.

Ndërkaq, dekania Gjoni falënderoi të gjithë pjesëmarrësit dhe theksoi se “Fakulteti i Artit dhe Dizajnit në UBT është i përkushtuar për të ofruar një ambient ku talenti dhe kreativiteti fuqizohen. Java e Artit dhe Dizajnit sjell së bashku studentët dhe ekspertët nga fushat e ndryshme të artit, për të krijuar një dialog të gjallë dhe frymëzues për të ardhmen e artit dhe kulturës në vendin tonë”.

Ky aktivitet i organizuar nga Fakulteti i Artit dhe Dizajnit në UBT përfshin departamentet e Dizajnit të Integruar, Artit dhe Medias Digjitale, Aktrimit dhe Muzikës Moderne, Prodhimit Digjital dhe Menaxhimit. Java e Artit dhe Dizajnit përbëhet nga një program i pasur me ekspozita, punëtori kreative, performanca muzikore dhe diskutime të hapura që synojnë kultivimin dhe mbështetjen e krijimit të një rrjeti të gjerë lokal dhe global të krijuesve dhe profesionistëve të artit.

Ngjarja synon të nxisë bashkëpunimin ndërdisiplinor dhe të frymëzojë studentët dhe profesionistët për të eksploruar mundësi të reja në fushën e artit dhe dizajnit, duke forcuar lidhjet mes komuniteteve artistike dhe akademike.

Java e Artit dhe Dizajnit do të vazhdojë për disa ditë me aktivitete të ndryshme, duke sjellë në fokus inovacionin, traditën dhe diversitetin e kulturës bashkëkohore.

Me vendim të Këshillit Akademik, UBT i ndau ambasadorit amerikan William G. Walker çmimin më të lartë institucional Honorary Degree “Excellence in Leadership”, në ditëlindjen e tij të 90-të, për kontributin e jashtëzakonshëm dhe angazhimin e tij historik për popullin shqiptar dhe për Kosovën.

Në ceremoninë solemne për nder të ditëlindjes së ambasadorit Walker, ishin të pranishëm personalitete të larta nga institucionet vendore, përfshirë Presidenten e Republikës së Kosovës, Kryeministrin, liderë politikë, përfaqësues të institucioneve akademike dhe diplomatike, si dhe figura të njohura nga jeta publike dhe shoqëria civile.

Rektori i UBT-së, Prof. Dr. Edmond Hajrizi, theksoi se ky çmim shpreh mirënjohje të thellë institucionale dhe kombëtare për një njeri që la gjurmë të pashlyeshme në historinë moderne të shqiptarëve.

“Ambasadori William Walker nuk është vetëm një diplomat i shquar i Shteteve të Bashkuara – ai është një mik i përjetshëm i Kosovës, një zë i së vërtetës dhe një simbol i integritetit moral. Me ndarjen e këtij çmimi, ne nderojmë një jetë të tërë të përkushtuar ndaj paqes, lirisë dhe dinjitetit njerëzor”, theksoi Rektori Hajrizi.

Një jetë në shërbim të drejtësisë dhe paqes

Ambasadori Walker, i lindur më 1 qershor 1935 në Kearny të New Jersey-t, ka pasur një karrierë të gjatë e të pasur në Shërbimin e Jashtëm të Shteteve të Bashkuara, duke shërbyer në shumë vende të Amerikës Latine dhe në funksione të larta diplomatike. Por për shqiptarët, ai është bërë një figurë emblematike në fund të viteve ’90, kur mori drejtimin e Misionit të Verifikimit të OSBE-së në Kosovë, në kulmin e krizës humanitare.

Pas vizitës së tij në fshatin Reçak, ku më 15 janar 1999 ndodhi një nga krimet më të rënda kundër civilëve shqiptarë, Walker deklaroi atë që më vonë do të ndryshonte rrjedhën e historisë:

“Ajo që pashë ishte një mizori e pashprehshme, një krim kundër njerëzimit”.

Kjo deklaratë tronditi opinionin ndërkombëtar dhe konsiderohet si një nga momentet kyçe që ndikuan në ndërhyrjen e NATO-s për të ndaluar gjenocidin dhe për të sjellë çlirimin e Kosovës.

Çmimi Honorary Degree “Excellence in Leadership” përfaqëson vlerësimin më të lartë që UBT i jep një personaliteti ndërkombëtar dhe një mesazh të qartë se figura të tilla si Ambasadori Walker nuk harrohen – ato mbesin pjesë e ndërgjegjes historike dhe frymëzim për brezat që vijnë.

Një ngjarje e veçantë do të shënojë fundin e një kapitulli dhe fillimin e një të riu për maturantët e UBT International Smart Schools, të cilët këtë të shtunë do të diplomohen në një ceremoni solemne të organizuar në ambientet moderne të Parkut Shkencor, Inovativ dhe Teknologjik të UBT-së në Lipjan.

Ceremonia do të nisë në ora 18:00 dhe pritet të mbledhë nxënës, prindër, mësimdhënës dhe përfaqësues të institucioneve, duke e kthyer këtë ngjarje jo vetëm në një festë akademike, por edhe në një dëshmi të përkushtimit të UBT-së ndaj cilësisë së arsimit dhe zhvillimit të brezit të ri.

Ky moment i rëndësishëm shënon përfundimin e një faze të rëndësishme në rrugëtimin edukativ të nxënësve dhe nisjen e aventurave të reja akademike e profesionale. UBT International Smart Schools, si pjesë e sistemit arsimor të UBT-së, njihet për qasjen inovative në mësimdhënie, ndërkombëtarizimin e kurrikulës dhe përgatitjen e nxënësve për tregun global të dijes dhe punës.

Për të gjithë të interesuarit, organizatorët kanë bërë të ditur se të pranishmit janë të mirëseardhur të marrin pjesë në këtë ceremoni dhe të ndajnë nga afër emocionet dhe sukseset e maturantëve të këtij viti.

Profesorët e UBT-së, Prof. Gonxhe Beqiri dhe Prof. Engelbert Zefaj, morën pjesë në takimin “Cluster” të organizuar nga Erasmus Plus Kosova në Prishtinë. Ata përfaqësuan projektin COWEB, një iniciativë e financuar nga programi Erasmus Plus, e cila synon zhvillimin dhe fuqizimin e kapaciteteve akademike dhe profesionale në Kosovë.

Takimi kishte për qëllim mbledhjen e përfaqësuesve të institucioneve të arsimit të lartë në Kosovë që janë përfituese të projekteve të Erasmus Plus, duke krijuar një platformë për diskutim mbi sfidat, përvojat dhe mësimet e nxjerra gjatë zbatimit të këtyre projekteve. Qëllimi kryesor ishte përmirësimi dhe koordinimi i përpjekjeve në fushën e arsimit të lartë në vend.

Në këtë ngjarje, përveç përfaqësuesve të institucioneve akademike, morën pjesë edhe përfaqësues të Erasmus Plus Kosova, Ministrisë së Drejtësisë, si dhe agjencive shtetërore si Agjencia Tatimore e Kosovës (ATK) dhe Dogana e Kosovës. Ky bashkëpunim multisektorial kontribuoi në shkëmbimin e praktikave më të mira dhe ideve inovative për avancimin e arsimit dhe zhvillimit institucional.

Profesorët Beqiri dhe Zefaj prezantuan progresin e arritur dhe aktivitetet kryesore të projektit COWEB deri më tani, duke theksuar rëndësinë e bashkëpunimit ndërkombëtar dhe ndikimin pozitiv të këtij projekti në ngritjen e kapaciteteve në fushën akademike dhe profesionale. Ata nënvizuan se angazhimi i UBT-së në projekte të tilla është dëshmi e përkushtimit të universitetit për promovimin e cilësisë dhe inovacionit në arsimin e lartë.