Arsim Rapuca, një nga profesorët e Fakultetit të Inxhinierisë në UBT dhe një nga ekspertët më të njohur në këtë fushë, ka marrë pozitën më të lartë udhëheqëse si Kryetar i Odës së Inxhinierëve të Republikës së Kosovës. Kjo është një arritje dhe një reflektim i mundësive që ofron UBT për studentët dhe profesionistët e fushës së inxhinierisë, duke u mbështetur në ekspertizën e thellë të profesor Rapucës dhe angazhimin e tij në zhvillimin e këtij profesioni.

Në krye të Odës së Inxhinierëve të Republikës së Kosovës, përveç Kryetarit Arsim Rapuca, një vend të rëndësishëm në bordin udhëheqës ka dhe Prof. Dr. Nebi Pllana, një nga ekspertët më të njohur dhe me përvojë në fushën e Ndërtimtarisë dhe Infrastrukturës. Si anëtar i zgjedhur i bordit, Prof. Dr. Pllana, pjesë e kuadrove kryesore të Fakultetit të Ndërtimtarisë dhe Infrastrukturës në UBT, sjell një kontribut për forcimin e pozicionit të Odës dhe zhvillimin e profesioneve inxhinierike në Kosovë. Ky ekip udhëheqës, i përbërë nga ekspertët e UBT-së, garanton një drejtim të sigurt dhe një angazhim të vazhdueshëm për avancimin e inxhinierisë dhe ndërtimtarisë në vend.

Në një deklaratë pas marrjes së pozitës, Rapuca falënderoi kolegët e tij inxhinierë të fushave të ndryshme si ndërtimtari, makineri, dhe inxhinieri elektrike, për mbështetjen e tyre të fuqishme dhe për votën masive që e bëri të mundur këtë angazhim të ri. Ai premtoi që do të punojë me përkushtim dhe drejtësi për të realizuar qëllimet e Odës dhe për të kontribuar në zhvillimin e profesionit të inxhinierisë në vend.

“Falenderoj të gjithë ata që më mbështetën dhe premtoj se do të punoj drejt dhe vetëm drejt për avancimin e profesionit tonë dhe për shtetin tonë”, tha Rapuca. Ai gjithashtu falënderoi bordin e zgjedhur për mbështetje dhe bashkëpunim të ngushtë, si dhe komisionin dhe Ministrinë e Mjedisit, Planifikimit Hapësinor dhe Infrastrukturës, për organizimin e suksesshëm të procesit zgjedhor.

Me një pjesëmarrje masive, mbi 75% e anëtarëve themelues të Odës së Inxhinierëve morën pjesë në zgjedhje, duke zgjedhur një bord të ri të përbërë nga profesionistë të kualifikuar dhe të angazhuar që do të kontribuojnë në forcimin e këtij profesioni në Kosovë.

Përveç krytarit Rapuca, Oda e Inxhinierëve është nën përbërjen e shumicës së profesorëve të UBT-së, duke pasur një influencë të fortë  të ekspertëve dhe udhëheqësve akademikë të njohur të cilët do të ofrojnë një qasje moderne dhe profesionale për zhvillimin e fushës.

Ky është një hap i rëndësishëm në zhvillimin e fushës së inxhinierisë dhe infrastrukturës në vend, dhe UBT do të vazhdojë të kontribuojë me ekspertizën e saj përmes edukimit dhe formimit të profesionistëve të fushës. Me angazhimin e profesorëve si Arsim Rapuca, UBT mbetet një udhëheqës i besueshëm në përgatitjen e ekspertëve të ardhshëm për sfidat e industrisë./UBTNews/D.E/

Pas një takimi të veçantë në shtëpinë e të moshuarve për festat e fundvitit, studentet e Programit të Psikologjisë në UBT, Kosovare Hamiti dhe Shqipe Shala, bashkë me studentët e tjerë të psikologjisë, ndanë emocionet dhe reflektimet e kësaj përvoje që sipas tyre është e paharrueshme.

Vizita kishte për qëllim të krijonte një atmosferë festive dhe t’i bënte të moshuarit të ndiheshin të përfshirë dhe të dashur. Gjatë këtij takimi, studentët kaluan kohë me të moshuarit, dëgjuan historitë e tyre dhe ndanë momente gëzimi. Përveç kësaj, ata krijuan një ambient të ngrohtë dhe mbështetës, duke u mundësuar të moshuarve të shijonin atmosferën e festave dhe të ndiheshin të rëndësishëm dhe të vlerësuar.

Kosovare Hamiti dhe Shqipe Shala theksuan se kjo përvojë ishte një kujtesë e fuqishme për studentët e psikologjisë dhe për të gjithë si individë për rëndësinë e ndjeshmërisë, empatisë dhe lidhjeve njerëzore. Kjo vizitë u shndërrua në një akt të vogël dashurie dhe humanizmi, një mundësi për të sjellë lumturi dhe për të ndihmuar të tjerët të ndihen të lidhur me shoqërinë.

Siç thonë studentët, “Lumturia nuk qëndron në marrjen, por në dhënien. Në këto akte të vogla zemërgjërësie, ne gjejmë thelbin e humanizmit”. Ky aktivitet i dhuroi të gjithë pjesëmarrësve një mësim të vlefshëm për rëndësinë e dhënies dhe mbështetjes në jetën e përditshme./UBTNews/

Në një mbrëmje plot emocion dhe respekt, UBT ka nderuar 18 bashkëpunëtorë profesionistë për përkushtimin e tyre të vazhdueshëm dhe kontributin e jashtëzakonshëm gjatë një dekade bashkëpunimi. Ceremonia u mbajt në kuadër të eventit festiv të fundvitit, ku u vlerësua puna dhe përkushtimi i këtyre individëve që kanë ndihmuar në ndërtimin dhe zhvillimin e suksesit të UBT-së.

Rektori i UBT-së, Prof. Dr. Edmond Hajrizi, gjatë ndarjes së çmimeve falënderoi të pranishmit dhe theksoi rëndësinë e punës së përbashkët për arritjen e vizionit të institucionit.

“Këta individë janë shembull i angazhimit profesional dhe vizionit të përbashkët për edukimin cilësor dhe zhvillimin e vazhdueshëm. Ju faleminderit për dekadën e përkushtimit që e keni dedikuar UBT-së dhe për ndikimin tuaj në formimin e një institucioni lider”, tha Hajrizi.

Emrat që u nderuan për kontributin e tyre janë: Driton Kryeziu, Marjan Ivesaj, Mustafe Hasani, Xhelal Jashari, Besian Sinani, Feti Selmani, Mimoza Sylejmani, Muhamet Gervalla, Naide Avdo, Rineta Jashari, Shkëlqim Berisha, Zejnulla Rexhepi, Aferdita Maliqi, Nagy Karoly, Ibush Luzha, Ilir Abdullahu, Blerim Zylfiu dhe Vehbi Sofiu.

Të nderuarit vlerësuan lart këtë moment dhe shprehën mirënjohjen për mundësinë për të qenë pjesë e rrugëtimit të UBT-së, duke e cilësuar atë si një shtëpi të dytë ku puna dhe përkushtimi janë shpërblyer gjithmonë.

Kjo iniciativë është një tjetër dëshmi e angazhimit të UBT-së për të vlerësuar dhe fuqizuar burimet njerëzore si shtyllë kryesore e suksesit të saj. Në një atmosferë festive, ceremonia u mbyll me një mesazh të fuqishëm për vazhdimin e bashkëpunimit dhe përballjen me sfidat e reja që sjell 2025-a./UBTNEWS/