Edhe në rangimin e Webometrics, UBT ka dëshmuar sërish lidershipin e tij si institucioni më i mirë privat i arsimit të lartë në Kosovë dhe jo vetëm.

Ky rangim i UBT-së, përveç që dëshmon progresin e vazhdueshëm të institucionit, ai po ashtu konfirmon përkushtimin e institucionit ndaj ngritjes së cilësisë akademike dhe shtimit të kërkimit shkencor.

Rritja e vazhdueshme dhe e konsiderueshme e numrit të citimeve të publikimeve të stafit është tregues i qasjes serioze të institucionit ndaj shkencës dhe impaktit shoqëror të saj në njërën anë, si dhe cilësisë së punimeve dhe publikimeve shkencore të stafit, në anën tjetër – mbështetur gjithmonë nga infrastruktura hulumtuese dhe përkrahja institucionale ndaj këtyre të fundit.

Rangimi i “Webometrics” publikohet çdo gjashtë muaj nga “Cybermetrics Lab”, një njësi e Këshillit Kombëtar Kërkimor të Spanjës, e cila analizon mijëra institucione të arsimit të lartë në mbarë botën, duke përdorur një sërë kriteresh, përfshirë transparencën akademike dhe ndikimin e punimeve shkencore.

UBT, vitet e fundit, është renditur si institucioni më i mirë jo vetëm në Kosovë, por edhe në shumë fusha si teknologjia, inovacioni, cilësia, inteligjenca artificiale gjenerative, ndërmarrësia dhe publikimet shkencore, sipas vlerësimeve të organizatave të njohura botërore, duke dhënë kështu një kontribut të veçantë për Kosovën në botë./UBTNews/

U publikua studimi i përbashkët i profesorëve të Shkencave Politike dhe Studimeve të Sigurisë në UBT, Prof. Dr. Avni H. Alidemaj dhe Prof. Dr. Alban Maliqi,  një studim i rëndësishëm me temën “Enhancing Minority Rights in Kosovo and the Balkans: Legal Avenues to Inclusion” – Fuqizimi i të drejtave të pakicave në Kosovë dhe Ballkan: Rrugët ligjore drejt përfshirjes.

Studimi është botuar në një nga revistat shkencore më të mira në Indonezi, e indeksuar në SCOPUS (Q 2), një nga platformat më prestigjioze për hulumtime shkencore.

Studimi i profesorëve të UBT-së trajton sfidat me të cilat përballen shoqëritë shumëetnike të rajonit, duke u fokusuar në të drejtat dhe liritë themelore të pakicave, që shpesh mund të çojnë në përshkallëzimin e konflikteve dhe ndërhyrjen e shteteve të tjera. Autorët e punimit theksojnë rëndësinë e një kornize ligjore të fortë për mbrojtjen e të drejtave të pakicave, duke u mundësuar atyre pjesëmarrje aktive në proceset vendimmarrëse dhe duke siguruar përfshirjen e tyre në shoqërinë dhe zhvillimin politik.

Një aspekt i rëndësishëm i studimit është krahasimi i Kosovës me shtetet e tjera të Ballkanit në lidhje me fuqizimin e të drejtave të pakicave. Studimi analizon praktikat më të mira ligjore dhe mundësitë për të avancuar statusin dhe pjesëmarrjen e pakicave, duke mbështetur proceset e integrimit dhe të kohezionit social. Sipas autorëve, Kosova ka një kornizë ligjore për mbrojtjen e të drejtave të pakicave që është më përparimtare dhe më gjithëpërfshirëse sesa shumë vende të tjera të Ballkanit Perëndimor.

Ky studim është një shembull tjetër i angazhimit të UBT-së për të kontribuar në avancimin e hulumtimeve shkencore dhe për të ofruar analiza të thelluara për çështje kyçe që ndihmojnë në zhvillimin e shoqërive shumëetnike dhe të drejtave të njeriut. Ai shërben si një burim i vlefshëm për të gjithë ata që merren me politikën e komuniteteve, të drejtat e njeriut dhe studimet e integrimit në rajon dhe më gjerë./UBTNews/

UBT mori pjesë në panairin më të madh botëror të teknologjisë në arsim, Bett, i cili u mbajt në Londër, Britani e Madhe, në një ngjarje prestigjioze që mbledh profesionistë, institucione arsimore dhe kompani të njohura nga mbarë bota.

Ftesa për të marrë pjesë në këtë panair erdhi në mënyrë të veçantë për Rektorin e UBT-së, Prof. Dr. Edmond Hajrizi, si dhe për profesorin Hasan Metin dhe Elita Hajrizin, të cilët ishin përfaqësues të këtij institucioni në këtë ngjarje të rëndësishme.

Bett është një nga ngjarjet më të rëndësishme globale që ofron mundësi për të zhvilluar bashkëpunime të reja, për të shkëmbyer eksperienca dhe për të parë inovacionet më të fundit në fushën e teknologjisë dhe arsimit.

Ekipi i UBT-së pati mundësinë për të zhvilluar takime me përfaqësues të disa prej kompanive më të mëdha dhe më të rëndësishme në botë, si Microsoft, Meta, Google dhe shumë të tjera, duke hapur mundësi të reja për avancimin e edukimit dhe teknologjisë në institucionin që ata përfaqësojnë.

Vitin e ardhshëm, UBT ka marrë një ftesë në panairin Bett, ku do të prezantojë produktet e tij të avancuara të teknologjisë në arsim në një panair prestigjioz, duke përfshirë zhvillimet më të fundit në fushat e Teknologjisë 3.0 dhe 4.0, Inteligjencës Artificiale (AI), Smart City, si dhe më shumë se 40 produkte të tjera inovative. Ky do të jetë një moment i rëndësishëm, në të cilin UBT do të paraqesë arritjet e tij dhe potencialin e jashtëzakonshëm në fushën e teknologjisë dhe arsimit.

Panairi do të shndërrohet në një mundësi për të përfaqësuar Ballkanin në skenën globale, duke e konsoliduar kështu vizionin në avancimin e dijes dhe teknologjisë./UBTNews/

Në kampusin modern dhe inovativ të UBT-së, u zhvillua një ngjarje e rëndësishme, ku tetë studentë të Fakultetit të Gjuhës Angleze arritën të mbrojnë me sukses temën e diplomës, duke shënuar një arritje të shquar në një kohë kur njohuritë dhe aftësitë në gjuhën angleze janë më të rëndësishme se kurrë. Në një botë ku gjuha angleze është kthyer në një kërkesë themelore për tregun e punës dhe për të gjithë ata që dëshirojnë të jenë konkurrent në nivel ndërkombëtar, ky diplomim është një hap i domosdoshëm drejt mundësive të pafundme.

Ky moment triumfi është kulmi i një periudhe të gjatë përkushtimi dhe angazhimi të thellë, gjatë së cilës këta të rinj kanë investuar ditë e natë për të arritur majat e dijes dhe për t’u përgatitur për sfidat që i presin në karrierën e tyre profesionale. Ata kanë përvetësuar jo vetëm gramatikën dhe fjalorin e gjuhës angleze, por gjithashtu kanë studiuar thellësisht kulturën, letërsinë dhe traditat e pasura që e shoqërojnë atë, duke u bërë kështu profesionistë të vërtetë të një fushe që ofron mundësi të pafundme në tregjet e punës, jo vetëm kombëtare, por edhe ndërkombëtare.

Në këtë ngjarje të shënuar, Dekania e Fakultetit, Prof. Dr. Alma Lama, shprehu një krenari të thellë për suksesin e studentëve dhe nënvizoi rëndësinë e përgatitjes akademike që ata kanë marrë. Ajo theksoi se gjuha angleze është një nga asetet më të vlefshme që mund të kenë ata, jo vetëm për t’u integruar në tregun e punës, por edhe për të kontribuar në avancimin e shoqërisë dhe për të pasur mundësi të realizojnë karriera ndërkombëtare. Prof. Lama gjithashtu falënderoi profesorët për përkushtimin dhe punën e tyre të palodhur, të cilët me pasion kanë formuar dhe edukuar këtë brez të ri profesionistësh.

E sipas dekanes, këta të diplomuar tani janë më të gatshëm se kurrë të përballojnë sfidat e tregut të punës dhe të kontribuojnë në zhvillimin e shoqërisë, duke sjellë njohuri të thella dhe ide të reja, të mbështetura nga një arsim i shëndoshë dhe një angazhim i palëkundur. Ky diplomim është një dëshmi e mundësive të jashtëzakonshme që gjuha angleze ofron dhe një hap i sigurt në një rrugëtim të suksesshëm për të gjithë të diplomuarit, të cilët tashmë janë të gatshëm të ndërtojnë të ardhmen e tyre në një botë gjithnjë e më të ndërlidhur dhe ndërkombëtare./UBTNews/