Teksa sot po shënohet dita e tretë e protestave në Kosovë ku po kërkohet drejtësi për vrasjen e Arlinda Zekajt nga ish-kunati i saj Albert Sylaj, rastet e raportuara të dhunës në familje vazhdojnë të rriten. Vetëm gjatë 24 orëve të fundit, Policia e Kosovës ka evidencuar shtatë raste të reja të dhunës e kanosjes brenda familjes në rajone të ndryshme të vendit, si në Prishtinë, Ferizaj, Gjakovë, Fushë-Kosovë e Klinë.

Në rajonin e Ferizajt janë regjistruar dy raste të ndara, ku në njërin prej tyre është arrestuar një burrë për kanosje ndaj bashkëshortes së tij, ndërsa në rastin tjetër, pas hetimeve të zhvilluara lidhur me një incident të mëhershëm, është vënë në pranga i dyshuari i dytë, i cili po ashtu është dërguar në mbajtje me vendim të prokurorit.

Raste të rënda janë raportuar edhe në  Prishtinë e Fushë-Kosovë. Në Fushë-Kosovë, një burrë ka sulmuar fizikisht bashkëshorten e tij, duke i shkaktuar lëndime për të cilat viktimës i është ofruar ndihmë mjekësore, ndërsa dorasi është dërguar në mbajtje.

Po ashtu në Prishtinë, një burrë ka dëbuar nga shtëpia ish-bashkëshorten e tij bashkë me foshnjën e saj, me ç’rast viktima është strehuar urgjentisht në strehimore, kurse i dyshuari është arrestuar.

Po në Fushë-Kosovë, dy vajza të mitura janë sulmuar fizikisht nga dy vëllezërit e tyre, të cilët ndodhen ende në arrati ndërsa policia po vazhdon hetimet.

Në Klinë është arrestuar një person nën dyshimin për ushtrim të dhunës psikike ndaj partenaires me të cilën bashkëjetonte, ndërsa në Gjakovë një grua është keqtrajtuar nga i dashuri i saj, i cili pas testimit nga policia ka rezultuar se ishte nën efektin e alkoolit.

Të gjithë të arrestuarit në këto raste, me urdhër të prokurorëve përkatës, janë dërguar në mbajtje. /E.A/

Ministri i Punëve të Brendshme, Xhelal Sveçla, ka deklaruar se nuk e sheh dorëheqjen e tij si akt që do të ndihmonte në fuqizimin apo mbrojtjen e të drejtave të grave, duke theksuar se ekzekutivi është i angazhuar maksimalisht në përmbushjen e detyrave.

Gjatë konferencës së përbashkët për media me ministren Donika Gërvalla, Sveçla u shpreh se e kupton indinjatën e protestuesve dhe se ndan të njëjtin shqetësim me ta lidhur me dështimet institucionale.

Sveçla bëri me dije se verifikimet e kryera përmes Inspektoratit Policor të Kosovës (IPK) kanë konfirmuar dyshimet për mosmenaxhim të duhur të rastit të Arlinda Zekajt. Sipas tij, raporti i dorëzuar te Kryeministri Albin Kurti evidenton shkelje të rënda nga zyrtarë të caktuar policorë, duke përfshirë mosekzekutimin e urdhrit të parë të mbrojtjes, vonesat në zbatimin e urdhrit të dytë, mospërfilljen e kërkesës për vlerësimin e rrezikut dhe dështimin për të ndërmarrë masa mbrojtëse për viktimën.

Ministri nënvizoi se asnjë suspendim nuk është i mjaftueshëm pa një hetim të plotë penal dhe se asnjë uniformë apo pozitë komanduese nuk do të shërbejë si mburojë ndaj përgjegjësisë. Po ashtu, Sveçla njoftoi se Policia e Kosovës ka identifikuar 155 raste të tjera aktive me rrezikshmëri të lartë, për të cilat është raportuar individualisht mbi masat e ndërmarra mbrojtëse. /E.A/

Ministrja e Drejtësisë, Donika Gërvalla, ka paraqitur sot raportin zyrtar mbi vrasjen e Arlinda Zekajt, duke adresohet drejtpërdrejt përgjegjësinë te një sërë institucionesh të drejtësisë e sigurisë, ndërsa ka deklaruar se ekzekutivi nuk mban asnjë përgjegjësi lidhur me rastin. Gërvalla bëri të ditur se raporti është vetëm pjesërisht i plotë, me arsyetimin se nuk kanë marrë përgjigje nga të gjitha institucionet kompetente.

Pavarësisht shkeljeve të evidentuara, ministrja theksoi se dikasteri që ajo drejton nuk ka kompetenca ligjore për të ndërhyrë apo hetuar punën e gjykatave, prokurorive apo policisë, për shkak të parimit të ndarjes së pushteteve. Ajo shtoi se pret që komisioni hetimor i Kuvendit të ndihmojë në zbardhjen e plotë të mosveprimeve institucionale.

Gërvalla bëri me dije se institucionet kishin marrë paralajmërime të përsëritura për rrezikun që i kanosej viktimës, duke filluar nga 10 korriku kur ajo raportoi dhunën fizike e psikike, e deri te kërkesat e saj të njëpasnjëshme për urdhërmbrojtje urgjente. Sipas saj, nga dokumentacioni i shqyrtuar krijohet bindja se vrasja me shumë gjasë mund të parandalohej, ndërsa ngriti pyetje edhe për ndikime të mundshme nga “qarqe politike e kriminale” në vonesat dhe neglizhencën e treguar, ani pse pranoi se raporti nuk përmban prova direkte për këtë të fundit.

E pyetur për mundësinë e dorëheqjes, Gërvalla refuzoi një hap të tillë në këtë moment, duke deklaruar se tani është koha për të identifikuar e adresuar përgjegjësitë, dhe se dorëheqja e saj nuk do të ndihmonte në këtë proces

Gjetjet e raportit sipas institucioneve:

• Gjykata Themelore në Pejë: Raporti konstaton vonesa tej afateve ligjore në trajtimin e kërkesës për urdhërmbrojtje, e cila mori mbi një muaj kohë për t’u nxjerrë. Viktima i kishte shkruar dy herë kryetarit të gjykatës duke paralajmëruar rrezikun për jetën, por përgjigja konstatoi se gjyqtari kishte vepruar brenda afateve. Po ashtu, vendimet për kthimin e saj në shtëpi dhe zbatimi i urdhrit mbrojtës nuk u jetësuan.
• Prokuroria Themelore: Ishin të informuar vazhdimisht për kërcënimet. Raporti veçon se më 23 tetor kryeprokurorja Lumturije Vuqetaj u njoftua me shkrim për kërcënimin e drejtpërdrejtë me vrasje nga Albert Sylaj, por prokurorja përgjegjëse refuzoi të hapte rast për kanosje. Dy ditë më vonë ndodhi vrasja. Aktualisht, dy prokuroret e përfshira janë suspenduar.
• Qendra për Punë Sociale (QPS): Nuk e konsideroi detyrim krijimin e kushteve për kthimin e viktimës në shtëpi, nuk dorëzoi raportin në kohë dhe mungoi në seancën gjyqësore të 5 tetorit. Vlerësimi psikologjik po ashtu përmbante të dhëna që kundërshtonin pretendimet se fëmija nuk dëshironte të qëndronte me nënën.
• Komuna: Nga pushteti lokal është pranuar vetëm një përgjigje prej shtatë rreshtash, pa asnjë informacion për masa konkrete apo plane për ditët në vijim.

Kryeministri i Shqipërisë, Edi Rama, ka ripërsëritur sot ftesën e tij drejtuar protestuesve për të hyrë në dialog. Në ditën e 18-të të tubimeve para godinës së Kryeministrisë, ai ka publikuar një video në rrjetet sociale ku shfaqet tryeza e betonit e vendosur për përfaqësuesit e protestës.

Pavarësisht një rënieje në numrin e pjesëmarrësve gjatë ditëve të fundit, tubimet po vazhdojnë me kërkesën kryesore për dorëheqjen e kryeministrit. Nga ana e tij, Rama ka bërë të ditur se mbetet i hapur për të diskutuar kërkesat, por deri më tani nuk ka ndonjë përgjigje zyrtare nga organizatorët e protestës. /E.A/