Lajmet

Steinmeier siguron mbështetjen e gjerë për rizgjedhje në postin e presidentit

Steinmeier ka siguruar deri tani mbështetjen e gati të gjitha partive parlamentare.

Published

5 years ago

January 5, 2022

Betim Gashi

Rreth gjashtë javë para marrjes së vendimit se kush do të jetë president i Gjermanisë në pesë vitet e ardhshme, Presidenti aktual Frank-Walter Steinmeier ka sigurur një mbështetje të gjërë të partive parlamentare. Pasi partitë e koalicionit SPD, FDP dhe të Gjelbrit vendosën që ta mbështesin kandidatuarën e tij, tani edhe liderët e partive opozitare CDU dhe CSU, kanë rënë dakord ta mbështesin kandidaturën e Frank-Walter Steinmeierit.

Pas një takimi të përbashkët të partive simotra, u rekomandua që përfaqësuesit e Unionit në Asamblenë Federale të votojnë Steinmeierin edhe për një mandat pesëvjeçar.

Steinmeier i mbush 66 vjeç këtë të mërkurë. Steinmeier ka lindur në Detmold, ndërsa në vitin 2017 është zgjedhur në mandatin e parë si President. Partitë CDU dhe CSU kanë vendosur të heqin dorë nga kandidati i tyre për këtë post.

Kryetari në largim i CDU-së Armin Laschet tha në Berlin se aktualisht po përjetojmë kohëra të përçarjeve në debatin për pandeminë Corona. Veçanërisht në këto kohëra nevojitet një “zë i besueshëm” në krye të shtetit që bashkon njerëzit dhe bashkon këndvështrime të ndryshme. Vendi ka nevojë për një president që i bashkon të gjithë, për një figurë integruese.

Steinmeier ka një nivel të lartë njohurish në politikën e brendshme dhe kompetencë të veçantë për politikën e jashtme. Steinmeier e ka ushtruar mirë këtë detyrë në pesë vitetet e kaluara, nënvizoi Laschet pas këshillimeve të kryesive të partive CDU dhe CSU.

Kandidaturën e Steinmeierit e ka mbështetur edhe kreu i partisë CSU Markus Söder, i cili tha se Presidneti ka dëshmuar se është i paanshëm dhe një figurë integruese.

Wüst: “Ky post meriton respekt”

Të martën, kryeministri i landit Renania Veriore Vestfalia Hendrik Wüst e ka mbëshetur kandidaturën e politikanit të SPD Steinmeier. “Zyra e Presidentit federal meriton respekt. Nga kjo përgjegjësi politike shtetërore unë personalisht do të mbështes Frank-Walter Steinmeierin për një mandat të dytë”, tha politikani i partisë opozitare CDU.

Në dhjetor të vitit të kaluar Wüst ka bërë thirrje që Unioni CDU/CSU të ketë kandidatin e vet për president. Por ai ka ndryshuar mendjen. Tani kreu i qeverisë së NRW tha: “Unë e kam bërë gjithmonë të qartë se nuk mund të ketë kandidaturë nëse nuk ekziston shumica. Kjo vetëm do të dëmtonte dëshirën për më shumë gra në zyrat më të larta shtetërore, pas largimit të kancelares Angela Merkel.”

Mbështetje edhe nga ekologjistët

Pas SPD dhe FDP edhe të Gjelbrit e mbështetën kandidatuarën e Steinmeierit. SPD, të Gjelbrit dhe FDP së bashku kanë 776 nga 1472 anëtarët e Asamblesë së përgjithshme federale. Kjo është 39 vota më shumë sesa kërkohet në votimin e parë dhe të dytë për zgjedhjet e presidentit.

CDU dhe CSU e kanë mbështetur socialdemokratin Steinmeier edhe në mandatin e kaluar. Por asokohe Steinmeier ishte kandidat i koalicionit të madh, pra Unionit dhe SPD. Para zgjedhjes President Federal, Steinmeier ka qenë ndër tjera edhe ministër i Jashtëm, kandidat i SPD-së për kancelar dhe udhëheqës i grupit parlamentar të SPD-së.

AfD do të ketë kandidatin e vet

Partia populiste e djathtë Alternativa për Gjermani (AfD) pritet të ketë sërish kandidatin e saj në zgjedhjet presidenciale. Jemi duke diskutuar për këtë mundësi, tha një zëdhënës i partisë. Por akoma nuk ka ndonjë vendim se kush do të kandidojë në emër të AfD për postin më të lartë në vend. Kjo pritet të vendoset të hënën tjetër në një takim të krerëve të partisë. DW

Lajmet

Rama: Shtëpia në “Rrugën A” është ndërtuar pa leje dhe në pronë komunale

Published

1 hour ago

July 22, 2026

UBT News

Kryetari i Prishtinës, Përparim Rama, ka reaguar lidhur me çështjen e shtëpisë në Rrugën A, duke sqaruar se ajo është ndërtuar pa leje dhe ndodhet në pronë komunale.

Rama ka bërë të ditur se familjet që kanë banuar në këtë shtëpi janë evakuuar para dy vitesh, për shkak të punimeve në “Rrugën A” dhe rrezikut nga rrëshqitja e dheut.

Sipas tij, pavarësisht se shtëpia është ndërtuar pa leje në pronë komunale, Komuna e Prishtinës ka paguar dhe vazhdon të paguajë shpenzimet e qirasë për familjet e evakuuara.

“Kryeqyteti ka paguar dhe vazhdon të paguajë shpenzimet e qirasë për familjet e evakuuara”, ka deklaruar Rama.

Ai u ka bërë thirrje personave që të mos hyjnë në këtë zonë, duke theksuar se ajo mbetet e rrezikshme për shkak të punimeve dhe mund të paraqesë rrezik për jetën e tyre dhe të ekipeve në terren.

Rama ka theksuar se prona komunale duhet të respektohet dhe të mbrohet sipas ligjit, njësoj si çdo pronë tjetër.

“Prona është e shenjtë. E tillë është edhe kjo pronë, pronë komunale, në pronësi të Komunës dhe si e tillë meriton të njëjtin respekt dhe mbrojtje sipas ligjit”, ka thënë Rama. /A.K/

Lajmet

Nuk deklaroi mbi 10 mijë euro, Dogana i konfiskon 25% të mjeteve monetare

Published

2 hours ago

July 22, 2026

UBT News

Dogana e Kosovës ka konfiskuar 25 për qind të mjeteve monetare të padeklaruara, të zbuluara gjatë një kontrolli rutinor në Pikën e Kalimit Kufitar Vërmicë.

Sipas njoftimit të Doganës, zyrtarët doganorë kanë ndaluar për kontroll një automjet me targa vendore në hyrje të Republikës së Kosovës, pasi drejtuesi i tij kishte hyrë në pikën kufitare me shpejtësi të lartë, duke ngjallur dyshime.

Gjatë intervistimit fillestar, drejtuesi kishte deklaruar se nuk posedonte mallra apo mjete monetare që i nënshtroheshin deklarimit. Megjithatë, pas një kontrolli të detajuar, zyrtarët doganorë kanë gjetur mjete monetare që tejkalonin kufirin ligjor prej 10 mijë eurosh dhe nuk ishin deklaruar pranë autoriteteve.

Në përputhje me legjislacionin në fuqi për parandalimin e pastrimit të parave dhe financimit të terrorizmit, Dogana ka ndërmarrë masat ligjore, duke konfiskuar 25 për qind të shumës së padeklaruar, ndërsa për pjesën tjetër është kërkuar dokumentacion që dëshmon origjinën e ligjshme të mjeteve.

Sipas Doganës, rasti është proceduar sipas kompetencave ligjore dhe procedurat do të vazhdojnë deri në përfundimin e shqyrtimit administrativ dhe ligjor.

Dogana e Kosovës rikujton se çdo person që hyn ose del nga Republika e Kosovës me 10 mijë euro ose më shumë, në para të gatshme ose mjete të tjera monetare të bartshme, është i obliguar t’i deklarojë ato pranë autoriteteve doganore. Mosdeklarimi përbën shkelje të ligjit dhe mund të sjellë konfiskim të pjesshëm të mjeteve, si dhe procedura të mëtejshme për verifikimin e origjinës së tyre./A.K/

Lajmet

FSK angazhohet për shuarjen e zjarrit në deponinë e mbeturinave në Sverkë të Pejës

Published

3 hours ago

July 22, 2026

UBT News

Forca e Sigurisë së Kosovës (FSK) ka njoftuar se është angazhuar në ndërhyrjen për shuarjen e zjarrit me përmasa të mëdha që ka përfshirë deponinë e mbeturinave në fshatin Sverkë të Komunës së Pejës.

Sipas njoftimit, pas kërkesës së pranuar nga Qendra e Situatave e Sekretariatit të Këshillit të Sigurisë së Kosovës, Qendra Operative e FSK-së ka bërë menjëherë vlerësimin e rrezikut dhe të kapaciteteve reaguese.

Me urdhër të Komandantit të FSK-së, gjenerallejtënant Bashkim Jashari, janë mobilizuar njësitë e specializuara të Gardës Kombëtare, të cilat kanë nisur operacionin në terren me qëllim izolimin e vatrës së zjarrit, parandalimin e ndotjes toksike të mjedisit dhe shmangien e pasojave për shëndetin e qytetarëve.

FSK ka bërë të ditur se njësitë e saj po veprojnë në koordinim me autoritetet qendrore dhe lokale, shërbimet emergjente dhe banorët e zonës, me synimin që situata të vihet sa më shpejt nën kontroll.

Në fund, Forca e Sigurisë së Kosovës ka ritheksuar përkushtimin e saj për t’u shërbyer qytetarëve në përputhje me detyrat dhe misionin kushtetues./A.K/

Lajmet

REL: BE-ja kërkon pezullimin e rrënimit të shtëpive buzë Ujmanit

Published

4 hours ago

July 22, 2026

UBTNews

Zyra e Bashkimit Evropian ka kërkuar që të ndërpritet rrënimi i shtëpive buzë Liqenit të Ujmanit, teksa shprehu keqardhje për aksionin e një dite më parë të ndërmarrë nga autoritetet e Kosovës.

Sipas BE-së, me rrënimin e shtëpive në Ujman nuk u respektuan “procedurat e rregullta ligjore”.

Blloku evropian tha se aksioni i së martës i autoriteteve të Kosovës u ndërmor në kohën kur banorët kishin nisur procedura gjyqësore brenda afatit 15-ditor, të përcaktuar në njoftimet e ndërmarrjes publike “Ibër-Lepenc”.

“BE-ja është e shqetësuar për mungesën e respektimit të procedurës së rregullt ligjore në këtë dhe në disa raste të tjera të kohëve të fundit në veri të Kosovës që nga shkurti i këtij viti”, thuhet në reagim.

Ndërmarrja Publike Hidroekonomike “Ibër-Lepenc” tha se 11 shtëpitë e rrënuara ndodheshin ilegalisht në pronën e saj.

Kryeshefi i kësaj ndërmarrjeje, Faruk Mujka, tha se pronarëve u ishte kërkuar më 3 korrik që t’i lironin shtëpitë, por pas moszbatimit të kërkesës, Inspektorati i Ministrisë së Mjedisit dhe Planifikimit Hapësinor, në bashkëpunim me Policinë e Kosovës, nisën zbatimin e vendimit për rrënimin e tyre më 21 korrik.

Ndërkaq, BE-ja kërkoi që të ndërpriten menjëherë të gjitha rrënimet, largimet e detyruara apo marrjet në posedim të pronave, derisa të adresohen shqetësimet lidhur “me procedurën e rregullt ligjore”, duke kërkuar që autoritetet të bashkëpunojnë me banorët dhe komunat e prekura dhe të gjejnë zgjidhje ligjore.

“Masat e pakthyeshme të zbatimit në kontekstin e procedurave në zhvillim dhe pretendimeve të kontestuara pronësore ngrenë shqetësime serioze për sundimin e ligjit”, tha BE-ja, duke shtuar se pret nga Kosova që në përputhje me rrugën evropiane, të adresojë këto shqetësime me urgjencë dhe “veprime të ngjashme të mos përsëriten”.

Ndërkaq, Ambasada gjermane në Prishtinë tha se ndan shqetësimet e shprehura nga BE-ja.

“Jemi thellësisht të shqetësuar lidhur me rrëzimin e shtëpive në Ujman”, tha Ambasada gjermane, duke kërkuar që të ketë procese të rregullta ligjore.

“Ne bëjmë thirrje që veprime të tilla të ndalen menjëherë dhe bëjmë thirrje për transparencë dhe zgjidhje të ligjshme”.

Branimir Mihajlloviq, banor i Mitrovicës së Veriut dhe pronar i një shtëpie në Ujman, i tha Radios Evropa e Lirë se vitin e kaluar kishte paraqitur kërkesë për legalizimin e pronës në sistemin e Kosovës dhe ishte i gatshëm të paguante qiranë ndaj institucioneve të Kosovës.

“Unë i kam të gjitha dokumentet. Papritur si pronar u paraqit ‘Ibër-Lepenci’. Ne nuk ndodhemi fare në brezin ujor. Edhe nëse do të ishim, do të paguaja qira dhe tatime. Kam paguar edhe energjinë elektrike. Sipas ligjit, toka mund të jepet me qira dhe pikërisht këtë kemi kërkuar”, tha Mihajlloviq më 21 korrik.

Rrënohen shtëpi buzë Liqenit të Ujmanit

Ai tregoi se, së bashku me pronarët e tjerë të shtëpive, kryesisht serbë nga veriu i Kosovës, kanë paraqitur ankesë tek Avokati i Popullit dhe në Gjykatën Themelore në Mitrovicë.

“S’është mbajtur asnjë seancë. Kërkuam pezullim të përkohshëm të rrënimit, por ende nuk ka vendim”, deklaroi ai.

Liqeni i Ujmanit ndodhet në komunën e Zubin Potokut, në veriun e Kosovës, të banuar me shumicë serbe. Ai konsiderohet infrastrukturë strategjike për Kosovën, pasi shërben për furnizimin me ujë, prodhimin e energjisë elektrike dhe ujitjen.

Ndryshe, që nga viti 2024, autoritetet në Kosovë kanë nisur mbylljen e institucioneve serbe, duke i cilësuar ato si paralele dhe të paligjshme. Veprimet e Qeverisë së Kosovës në veri shpesh janë përballur me kritika nga faktori ndërkombëtar. /REL/