Federata e Futbollit e Uellsit është bërë e para që ka tërhequr publikisht mbështetjen për rizgjedhjen e Gianni Infantinos në postin e presidentit të FIFA-s.

Ky vendim vjen pas humbjes së besimit ndaj drejtimit të Infantinos, veçanërisht pas planit të dështuar për shitjen e aksioneve të Kupës së Botës tek investitorë privatë.

Në një deklaratë zyrtare, Federata e Futbollit e Uellsit konfirmoi se ka tërhequr mbështetjen për kandidaturën e Infantinos për mandatin 2027–2031.

“Federata e Futbollit e Uellsit ka tërhequr mbështetjen për kandidaturën e Gianni Infantinos për rizgjedhje si president i FIFA-s për mandatin 2027–2031”, thuhet në njoftim.

Sipas federatës, një sërë dështimesh në drejtimin e organizatës kanë bërë që Infantino të humbasë besimin e tyre.

“Dështimet e fundit në qeverisjen e mirë, proceset, lidershipin, vlerat, menaxhimin e palëve të përfshira, komunikimin dhe gjykimin e shëndoshë na kanë çuar në një pikë ku Gianni Infantino ka humbur besimin tonë për të vazhduar të udhëheqë futbollin botëror. Nuk mund të pranojmë dështimin për t’i vendosur interesat e futbollit në plan të parë”, thuhet më tej në deklaratë.

Para kësaj lëvizjeje, Infantino kishte siguruar mbështetje me shkrim nga shumica e federatave kombëtare për një mandat të ri në krye të FIFA-s. Megjithatë, vendimi i Uellsit shënon rastin e parë kur një federatë tërheq publikisht këtë mbështetje, duke rritur presionin ndaj presidentit aktual të organizatës më të madhe të futbollit në botë.

D.L

Grupi i tifozëve të Spartak Moskës, “Crazy North”, ka dalë publikisht kundër transferimit të sulmuesit të Kombëtares së Shqipërisë, Mirlind Daku.

Daku i ka dhënë fund aventurës së tij te Rubin Kazani dhe pritet të prezantohet së shpejti si futbollist i Spartak Moskës. Megjithatë, lëvizja e tij nuk është pritur mirë nga një pjesë e tifozëve të klubit rus.

Në një deklaratë të publikuar në kanalin e tyre në Telegram, e cila u raportua të hënën nga mediumi rus Sport-Express, “Crazy North” shprehu kundërshtimin e plotë ndaj afrimit të sulmuesit kosovar.

“Shprehim kundërshtimin tonë të plotë ndaj transferimit të mundshëm të Mirlind Dakut në klubin tonë. Bazuar në të kaluarën e shqiptarit, parashikojmë një sërë problemesh brenda një ekipi që aktualisht është i aftë të përballet me sfida serioze. Pavarësisht bojkotit të ndeshjeve të ekipit të parë, ne mbështesim popullin vëllazëror të Serbisë. Pavarësisht se sa i mirë mund të jetë një transferim potencial sipas standardeve të kampionatit, parimet duhet të kenë përparësi mbi rezultatet hipotetike. Daku nuk duhet të jetë në ekipin tonë”, thuhet në deklaratë.

Sipas raportimeve, Sport-Express nuk e publikoi të plotë deklaratën. Në versionin e plotë, të shpërndarë nga vetë grupi në Telegram, përdoret edhe një gjuhë më e ashpër, ku thuhet:

“Qëndrimi ynë ndaj ustashëve dhe veçanërisht ndaj shqiptarëve dhe kosovarëve mbetet i pandryshuar, nuk ka pasur kurrë dhe nuk duhet të ketë kurrë lojtarë të tillë në ekipin tonë.”

“Crazy North” nuk konsiderohet grupimi më i madh i tifozëve të Spartakut, por njihet si një nga grupet më radikale në tribunën veriore të klubit.

Tifozët ultras të Spartak Moskës prej vitesh njihen për qëndrimet e tyre të forta pro-serbe dhe për lidhjet e ngushta me tifozët e Cërvena Zvezdës, grupin “Delije”.

Pavarësisht reagimeve të tifozëve, Daku vjen pas paraqitjeve shumë të mira me Rubin Kazanin dhe mbetet një nga sulmuesit më të spikatur në kampionatin rus. Megjithatë, zgjedhja e tij për të vazhduar karrierën në Rusi ka nxitur debate edhe më herët në opinionin sportiv shqiptar.

D.L

Carlos Cordeiro, një nga këshilltarët e lartë të presidentit të FIFA-s, Gianni Infantino, ka dhënë dorëheqje, vetëm pak orë pasi Konfederata Aziatike e Futbollit (AFC) iu bashkua UEFA-s dhe CONCACAF-it në kundërshtimin e planit për përfshirjen e investitorëve privatë në garat e FIFA-s.

Sipas raportimeve, Cordeiro e ka cilësuar propozimin e Infantinos si një marrëveshje të dëmshme për futbollin, duke deklaruar se ai “do të hipotekonte të ardhmen e futbollit”.

Dorëheqja e tij vjen në një moment kur kundërshtimi ndaj projektit po rritet. Pas UEFA-s dhe CONCACAF-it, edhe Konfederata Aziatike e Futbollit ka shprehur solidaritet me qëndrimin kundër planit të FIFA-s.

Carlos Cordeiro kishte shërbyer për gati pesë vjet si këshilltar i lartë i FIFA-s dhe kishte përfaqësuar organizatën në grupin e punës të Shtëpisë së Bardhë për organizimin e Kupës së Botës 2026. Ai ishte emëruar këshilltar i lartë për strategjinë dhe qeverisjen globale në shtator të vitit 2021.

Me këtë vendim, Cordeiro bëhet figura e parë e rëndësishme brenda FIFA-s që largohet nga posti si pasojë e polemikave rreth planit të presidentit Gianni Infantino, i cili ka shkaktuar reagime të forta në botën e futbollit.

D.L

FIFA ka mohuar kategorikisht pretendimet se synon të “shesë futbollin”, duke deklaruar se do të vazhdojë procesin e konsultimeve për planin e saj që parasheh përfshirjen e investitorëve privatë në aktivitetet tregtare të organizatës.

Reagimi i FIFA-s erdhi pasi UEFA dhe CONCACAF kundërshtuan publikisht projektin, duke shprehur shqetësime se ai mund të ndryshojë mënyrën e administrimit të garave më të rëndësishme ndërkombëtare, përfshirë Kupën e Botës.

Në një deklaratë zyrtare, FIFA tha se raportimet e fundit mediatike kanë krijuar keqkuptime rreth projektit dhe ritheksoi se procesi do të vazhdojë në mënyrë transparente.

“Askush nuk po e shet futbollin. Nuk është diçka që FIFA do ta merrte ndonjëherë në konsideratë”, thuhet në deklaratën e organizatës.

Sipas planit të propozuar, FIFA synon të krijojë një njësi të re tregtare me emrin FIFA Forward Enterprise, e cila do të menaxhojë të drejtat komerciale të garave kryesore të organizatës. Investitorët privatë do të kenë mundësi të blejnë vetëm pjesëmarrje minoritare dhe jo kontrolluese në këtë strukturë.

FIFA argumenton se ky model synon të krijojë më shumë mundësi financiare për federatat anëtare, duke u dhënë atyre përfitime më të mëdha nga të drejtat tregtare në vendet e tyre.

Megjithatë, plani ka hasur në kundërshtim të fortë nga UEFA, e cila e cilësoi Kupën e Botës si një trashëgimi të futbollit që nuk duhet të trajtohet si produkt investimi.

“Kupa e Botës nuk mund të trajtohet si produkt investimi. Është një nga trashëgimitë më të mëdha të futbollit dhe asnjë pjesë e saj nuk duhet t’u dorëzohet investitorëve privatë. Kupa e Botës nuk është në shitje”, deklaroi UEFA.

Mbështetje për qëndrimin e UEFA-s ka dhënë edhe CONCACAF, ndërsa Konfederata Aziatike e Futbollit ka shprehur shqetësimin se vendimet e njëanshme të FIFA-s mund të dëmtojnë strukturën e futbollit kontinental.

Sipas raportimeve, presidenti i FIFA-s, Gianni Infantino, u ka prezantuar federatave anëtare planin, duke u ofruar përfitime financiare në rast se ai miratohet. Për miratimin e projektit nevojitet mbështetja e shumicës së federatave anëtare të FIFA-s.

Debati rreth kësaj nisme vazhdon të ndajë botën e futbollit, ndërsa shumë figura të njohura të sportit kanë kërkuar që garat më prestigjioze të mbeten nën administrimin tradicional dhe larg interesave të investitorëve privatë.

D.L