Carlo Ancelotti ka nisur zyrtarisht një epokë të re te Brazili, duke bërë ndryshime të mëdha në skuadër pas eliminimit zhgënjyes nga Kupa e Botës 2026. Trajneri italian ka publikuar listën e parë prej 26 lojtarësh për ciklin e ri, me synim ndërtimin e një ekipi konkurrues për Botërorin 2030.

Në listën e re nuk janë përfshirë 16 futbollistë që ishin pjesë e ciklit të kaluar, ndërsa tetë lojtarë kanë marrë për herë të parë ftesën nga kombëtarja braziliane. Debutuesit janë Pedro Moresco, Otávio, Arthur Dias, Jair Cunha, Matheuzinho, Mauro Júnior, Breno Bidon dhe Gabriel Bontempo.

Në skuadër janë rikthyer edhe disa futbollistë që munguan në Botërorin e fundit, mes tyre Estêvão, André Santos dhe João Pedro.

Ndryshimet më të mëdha janë bërë te veteranët. Neymar, Danilo, Casemiro, Fabinho, Alex Sandro, Alisson dhe Ederson janë disa prej emrave të njohur që nuk janë përfshirë në listën e re të Ancelottit.

Brazili u eliminua nga Kupa e Botës 2026 në fazën e 1/8 së finales, pasi u mposht 2:1 nga Norvegjia, me të dy golat për nordikët që i shënoi Erling Haaland.

Pas këtij dështimi, Federata Braziliane e Futbollit vendosi të nisë një kapitull të ri nën drejtimin e Ancelottit. Italiani ka marrë për detyrë të ndërtojë një skuadër të re për Kupën e Botës 2030, e cila do të zhvillohet në Spanjë, Portugali dhe Marok.

Në qendër të projektit të ri pritet të jenë Vinícius Júnior dhe Raphinha, ndërsa Ancelotti llogarit shumë edhe në Endrickun, të cilin e sheh si një prej liderëve të së ardhmes së “Seleçaos”.

“Është e vërtetë që kemi provuar shumë sulmues këtë vit. Situata është e qartë, kemi shumë lojtarë të rinj jashtëzakonisht të talentuar dhe duhet t’i mbështesim në zhvillimin e tyre. Njëri prej tyre është i njohur: Endrick. Kemi sulmues të tjerë që luajnë shkëlqyeshëm dhe të tjerë që lihen jashtë formacionit. Kemi alternativa të mira, por Endrick do të jetë një lojtar i rëndësishëm për Brazilin në të ardhmen”, ka deklaruar Ancelotti.

Skuadra e re e Brazilit do të ketë mundësinë të testohet në ndeshjet e ardhshme ndaj Australisë dhe Indisë, në kuadër të përgatitjeve për ciklin e ri. Brazili do të përballet me Australinë më 25 dhe 29 shtator, ndërsa më 3 tetor do të luajë ndaj Indisë në Kolkata.

Këto ndeshje do të jenë testet e para për Ancelottin pas eliminimit nga Kupa e Botës dhe një mundësi për trajnerin italian që të vlerësojë lojtarët e rinj dhe të nisë ndërtimin e Brazilit për objektivat e ardhshëm.

D.L

Gjilani ka shënuar fitore 1:0 ndaj Ballkanit në ndeshjen e zhvilluar të mërkurën, duke marrë tri pikë të rëndësishme.

Fitore me rezultat identik ka regjistruar edhe Feronikeli ’74, që ka mposhtur Dritën me rezultat 1:0.

Të dyja ndeshjet u karakterizuan me rivalitet të fortë, ndërsa Gjilani dhe Feronikeli ’74 arritën t’i ruajnë epërsitë deri në fund dhe të sigurojnë fitore të rëndësishme në kampionat.

D.L

Një ndeshje spektakolare është zhvilluar të mërkurën mbrëma në “Stamford Bridge”, ku Chelsea ka triumfuar 6:3 ndaj Leeds Unitedit në kuadër të raundit të tretë të Kupës EFL.

Leeds Unitedi e nisi furishëm takimin dhe arriti të kalojë në epërsi 2:0, por Chelsea reagoi në mënyrë të jashtëzakonshme dhe përmbysi gjithçka duke shënuar gjashtë gola.

Cole Palmer dhe Danny Welbeck realizuan nga dy gola, ndërsa Pedro Neto dhe Valentin Barco shënuan nga një herë. Morgan Rogers ishte ndër më të dalluarit te londinezët me tri asistime, ndërsa Barco kontribuoi edhe me një asistim.

Për Leedsin realizuan Traik Muharemoviq, Brenden Aaronson dhe Dominic Calvert-Lewin.

Me këtë fitore, Chelsea ka siguruar kualifikimin në 1/8 e finales së Kupës EFL, ndërsa Leeds Unitedi është eliminuar nga gara.

D.L