Organizata INPO, në raportin e “monitorimit të aktiviteteve të prokurimit të Qeverisë së Kosovës”, ka bërë të ditur se nga 16 ministri dhe Zyra e Kryeministrit në vitin 2023, rreth 296 aktivitete janë të anuluara, prej tyre 218 të ritenderuara kanë përfunduar me kontrata, ndërsa 78 aktivitete kanë mbetur të pa realizuara.

Përmes këtij raporti thuhet se Ministria e Infrastrukturës ka shënuar nivelin më të lartë të dështimeve në aktivitete të anuluara me 60 për qind.

Sipas këtij raporti, vlera financiare e aktiviteteve të anuluara është mbi 13 milionë euro buxhet, ku kryeson Ministria e Arsimit me mbi 5 milionë euro.

Në publikimin e këtij raporti monitoruesi i INPO-s, Diellor Gashi tha se të dhënat janë mbledhur nga platforma e E-Prokurimit.

“INPO këtë vit ka përgatitur raportin mbi anulimet e aktiviteteve të prokurimit të cilat janë bërë nga institucionet e nivelit qendror apo ministritë kontraktuese që përfaqësojnë ato. Raporti analizon të gjitha anulimet e aktiviteteve edhe të prokurimit që janë bërë gjatë vitit 2023 të dhënat janë mbledhë të gjitha nga platforma e-prokurimit”, tha Gashi.

Hulumtuesi, Arbër Kabashi bëri të ditur se Ministria e Infrastrukturës ka shënuar nivelin më të lartë të dështimeve në aktivitetet e anuluara me 60 për qind, Ministria e Kulturës Rinisë dhe Sportit me 51.5 për qind, Ministria e Arsimit Shkencës dhe Teknologjisë me 50 për qind, Ministria e Punëve të Brendshme me 44 për qind dhe Ministria e Bujqësisë me 33.3 për qind.

“Numri më i madh shprehet te Ministria Infrastrukturës, me 60 për qind të rasteve të anuluara, pastaj MKRS, me 51.5 për qind, MASHT-i me 50 për qind, MPB-ja me 44 për qind dhe Ministria e Bujqësisë me 33.3 për qind. Në lidhje me vlerën financiare të aktiviteteve të anuluara, të dhënat tregojnë për gjithsej 13.4 milionë euro buxhet të planifikuar për këto aktivitete por, që nuk ka arritur të shpenzohet. Nga ana tjetër, nga vlera financiare, sipas ministrive në këtë listë kryeson Ministria Arsimit me gjithsej 5.5 milionë euro të planifikuar në aktivitet të prokurimit që janë anuluar, pastaj MINT me 4 milionë euro, Ministria e Shëndetësisë dhe Mjedisit me nga 1 milionë euro si dhe MPB-ja me aktivitete që arrijnë shumën deri në mbi 600 mijë euro”, theksoi Kabashi.

Në këtë raport ka edhe listë rekomanduese qëaktivitetet e prokurimit të mos anulohen dhe përsëritën në të ardhmen.

Prokuroria Themelore në Prizren, Departamenti i Krimeve të Rënda, ka ngritur aktakuzë kundër pesë personave, të dyshuar për kryerjen e veprës penale “Keqpërdorimi i pozitës apo autoritetit zyrtar” në bashkëkryerje.

Sipas aktakuzës ndaj S.M., F.T., E.M., F.M., dhe V.Sh, ngjarja lidhet me vlerësimin e dëmeve nga vërshimet në Komunën e Mamushës më 29 janar 2021.

Të pandehurit, në cilësinë e anëtarëve të komisionit për vlerësimin e dëmeve, përpiluan një listë me 169 përfitues të ndihmës financiare publike prej 416,874.77 euro. Nga kjo shumë, mbi 120,000 euro u përfituan në mënyrë të paligjshme nga persona të përfshirë në kundërshtim me ligjin ose që nuk ishin fare fermerë.

Kryetari i komisionit, S.M., dhe anëtarët e tij akuzohen se kanë tejkaluar kompetencat e tyre, duke përfshirë 43 fermerë në listën e përfituesve në kundërshtim me vendimet dhe opinionet ligjore, si dhe duke futur 13 persona të tjerë që nuk ishin të kualifikuar.

Këto veprime i shkaktuan buxhetit të Kosovës dëm material të konsiderueshëm.

“Me këto veprime, të pandehurit e lartcekur kanë kryer veprën penale “Keqpërdorimi i pozitës apo autoritetit zyrtar”, thuhet në njoftimin e Prokurorisë Themelore të Prizrenit.

Prokuroria ka kërkuar nga gjykata që, pas shqyrtimit gjyqësor dhe administrimit të provave, të pandehurit “të shpallen fajtorë dhe të dënohen” në përputhje me ligjin.

Në muajin shtator, Radio Evropa e Lirë, publikoi një hulumtim që zbardhte një skemë të përfshirjes së zyrtarëve komunal të Mamushës në falsifikimin e dokumenteve të Kosovës.

Mamusha është një ndër komunat më të vogla të Kosovës, me rreth 5.600 banorë, në shumicë të komunitetit turk.

Mamusha udhëhiqet nga Abdylhadil Krasniq nga Partia Demokratike Turke e Kosovës (KDTP)./REL/

Vendimi i moscertifikimit të Listës Serbe për zgjedhjet e 9 shkurtit 2025 në Kosovë, nuk ka bazë në ligj dhe pasqyron faktin se sa shumë kryeministri i Kosovës Albin Kurti dëshiron t’i eliminoj serbët nga këto hapësira. Kështu ka thënë sot Zllatan Elek, kryetar i Listës Serbe, gjatë një konference për media të mbajtur sot në selinë e kësaj partie në Mitrovicë të Veriut duke shtuar se kjo është dhunë institucionale dhe juridike ndaj popullit serb dhe Listës Serbe.

Sipas tij, kryeministri Kurti nuk e dëshiron Listën Serbe në Kuvendin e Kosovës, por vetëm serbët e dëgjueshëm, ndërsa tha se kërcënimet e tilla nuk do ta pengojnë partinë që ai udhëheqë të luftoj me të gjitha mjetet demokratike për popullin serb këtu.

Ai paralajmëroi poashtu ankesë në adresë të PZAP-së, duke thënë se pret një përgjigje pozitive nga kjo e fundit.

“Mendoj se një gjë e tillë është bërë më urdhër të Albin Kurtit, në mënyrë që të përfitoj lehtë disa poena politikë. Do të jem i qartë kësaj radhe. Ky vendim nuk ka bazë në ligj dhe pasqyron faktin se sa shumë Kurti dëshiron t’i eliminoj serbët nga këto hapësira. Kjo është dhunë institucionale dhe juridike ndaj popullit serb dhe Listën Serbe sepse Kurti nuk dëshiron t’i shoh në Parlamentin e Kosovës, sepse dëshiron që aty t’i ketë serbët e dëgjueshëm siç është i ashtuquajturi ministër Nenad Rashiq… Dua nga këtu të përsëris se kërcënime të tilla neve nuk na pengojnë që ne me të gjitha mjetet demokratike të luftojmë për popullin tonë. Prandaj gjatë ditës do t’i dërgojmë ankesë PZAP-së dhe nga ta pres një vendim të qartë i cili do ta hedh poshtë këtë vendim të Kurtit i cili është anti demokratik dhe anti serb. Njerëzve nga ambasada e SHBA-së dhe përfaqësuesve të BE-së për gjykimin e një vendimi të tillë”, ka thënë Elek.

Komisioni Qendror i Zgjedhjeve nuk e ka certifikuar Listën Serbe për pjesëmarrje në zgjedhjet e 9 shkurtit 2025 për shkak të “thirrjeve nacionaliste” të kryetarit të kësaj liste, Zllatan Ellek, gjatë prezantimit të listës zgjedhore.

Megjithatë, për këtë moscertifikim kanë reaguar ambasada e SHBA-së, ambasadori gjerman e ai britanik si dhe BE-ja duke kërkuar që ky vendim mos të politizohet.

Kryeprokurori i Prokurorisë Speciale të Republikës së Kosovës, Blerim Isufaj ka pritur sot në takim pune një delegacion nga Prokuroria e Posaçme kundër Korrupsionit dhe Krimit të Organizuar të Republikës së Shqipërisë, kryesuar nga kreu i kësaj prokurorie, Altin Dumani.

Gjatë këtij takimi dy kryeprokurorët diskutuan për ngritjen e nivelit të bashkëpunimit, koordinimit dhe efikasitetit në luftën kundër krimit dhe forcimin e sundimit të ligjit në të dyja shtetet.

Po ashtu, kryeprokurori i Prokurorisë Speciale të Republikës së Kosovës, Blerim Isufaj dhe kreu i Prokurorisë së Posaçme kundër Korrupsionit dhe Krimit të Organizuar të Republikës së Shqipërisë (SPAK), Altin Dumani, nënshkruan edhe marrëveshje bashkëpunimi për krijimin e ekipeve të përbashkëta hetimore, të përbërë nga prokurorë të të dyja prokurorive përkatëse.

“Qëllimi i nënshkrimit të kësaj marrëveshjeje në mes të dy krerëve të institucioneve të ndjekjes parashikon bashkëpunim të ngushtë dhe koordinim të veprimeve të të dyja prokurorive në fusha të rëndësishme të luftës kundër krimit që prekin interesat ekonomike, financiare dhe shoqërore të të dyjave vendeve”, thuhet në njofitm.

Kryeprokurori Isufaj dhe kreu i Prokurorisë së Posaçme, Dumani, nënshkrimin e kësaj marrëveshjeje e kanë vlerësuar të rëndësishme, duke theksuar se ky është një hap drejt përmirësimit të sigurisë dhe sundimit të ligjit në dy shtetet përkatëse, si dhe drejt ndërtimit të një partneriteti të fortë në mes të dy institucioneve të drejtësisë.