Lamine Yamal ishte emri më i përfolur para ndeshjes së Spanjës ndaj Arabisë Saudite dhe mbeti në qendër të vëmendjes edhe pas përfundimit të saj. Supertalenti 18-vjeçar realizoi paraqitjen e tij të parë si titullar në Kupën e Botës dhe e kurorëzoi atë me gol në fitoren bindëse 4:0 të “Furisë së Kuqe”.

Pas vetëm 19 minutave të luajtura në barazimin befasues ndaj Kepit të Gjelbër, trajneri Luis de la Fuente vendosi t’i besojë nga minuta e parë Yamalit, i cili po rikuperohej me kujdes nga një lëndim në hamstring të pësuar në muajin prill.

Atmosfera në stadium ishte elektrizuese që para fillimit të ndeshjes. Mijëra tifozë mbanin fanella me emrin e tij, ndërsa çdo paraqitje e tij në ekranin gjigant shoqërohej me ovacione të mëdha nga tribunat.

Në fushë, Yamal tregoi menjëherë pse konsiderohet një nga talentët më të mëdhenj të futbollit botëror. Me shpejtësinë, guximin dhe kreativitetin e tij, ai i shkaktoi vazhdimisht probleme mbrojtjes saudite dhe ishte një nga figurat kryesore në lojën sulmuese të Spanjës.

Goli i tij i parë në Kupën e Botës ndezi festën në stadium dhe e futi emrin e tij në librat e historisë. Yamal u bë lojtari i shtatë që arrin të shënojë në një Botëror para se të mbushë 19 vjet.

Me këtë arritje, ai tejkaloi edhe një rekord të vendosur nga legjenda argjentinase Lionel Messi. Messi kishte realizuar golin e tij të parë në Kupën e Botës pak para ditëlindjes së 19-të në vitin 2006, ndërsa Yamal e arriti këtë sukses rreth dy javë më herët.

Ish-kapiteni i Anglisë, Wayne Rooney, vlerësoi lart ndikimin e spanjollit të ri.

“Lamine Yamal ka ardhur te Spanja dhe Barcelona si lider. Të gjithë presin shumë prej tij, por ai po e përballon presionin në mënyrë të jashtëzakonshme. Shpresoj që ta bëjë këtë edhe për 15 apo 20 vjet”, u shpreh Rooney.

Një tjetër protagonist i ndeshjes ishte Mikel Oyarzabal, i cili realizoi dy gola dhe asistoi për Yamalin. Sulmuesi spanjoll u bë vetëm lojtari i dytë që nga viti 1966 që kontribuon drejtpërdrejt në tre gola brenda 25 minutave të para të një ndeshjeje të Kupës së Botës.

Spanja e siguroi fitoren që në pjesën e parë, ndërsa Yamal u zëvendësua pas pushimit për të mos rrezikuar gjendjen e tij fizike. Stafi teknik vazhdon ta menaxhojë me kujdes supertalentin, i cili shihet si një nga armët kryesore të Spanjës në rrugëtimin drejt titullit botëror.

Me paraqitje si kjo ndaj Arabisë Saudite, Yamal po dëshmon se është i gatshëm të marrë rolin e protagonistit në skenën më të madhe të futbollit botëror.

D.L

Kombëtarja e Kosovës do ta zhvillojë ndeshjen ndaj Izraelit më 1 tetor 2026 në stadiumin Nagyerdei Stadium, në qytetin Debrecen, me fillim nga ora 20:45. Impianti modern hungarez ka një kapacitet prej rreth 20 mijë ulësesh dhe vazhdon të shërbejë si terren neutral për ndeshjet që Izraeli i zhvillon si vendas.

Përfaqësuesja izraelite edhe këtë edicion do të presë kundërshtarët jashtë vendit, ndërsa për Kosovën kjo përballje do të jetë ndeshja e tretë në grupin e saj në Ligën B të Ligës së Kombeve.

“Dardanët” po garojnë për herë të parë në histori në Ligën B, një arritje që shënon një tjetër hap të rëndësishëm në rrugëtimin ndërkombëtar të futbollit kosovar. Dueli ndaj Izraelit pritet të ketë peshë të madhe në garën për pozitat kryesuese të grupit dhe mund të jetë vendimtar për objektivat e të dyja kombëtareve.

D.L

Egjipti ka regjistruar fitoren e parë në Botërorin 2026, duke mposhtur Kanadanë me rezultat 2:1, në ndeshjen e vlefshme për Grupin F të luajtur në stadiumin “MetLife”.

Njeriu i ndeshjes ishte padyshim ylli i skuadrës, Mohamed Salah, i cili zhbllokoi sfidën në minutën e 37-të duke kaluar Egjiptin në epërsi. Vetëm katër minuta më vonë, në të 41-tën, Mostafa Mohamed dyfishoi shifrat në 2:0 pas një asisimi nga Trezeguet, duke mbyllur një pjesë të parë të shkëlqyer për afrikanët.

Kanada u rikthye në lojë në pjesën e dytë përmes një autogoli të shënuar nga mbrojtësi egjiptian Mohamed Abdelmonem në minutën e 53-të, por nuk arriti të përmbyste rezultatin deri në fund. Me këtë fitore, Egjipti mban gjallë shpresat për kualifikim në fazën tjetër, ndërsa Kanada mbetet pa pikë pas dy ndeshjeve të para. /E.A/

Kepi i Gjelbër po shndërrohet në sensacionin e vërtetë të Botërorit 2026. Pasi befasoi kampionen e Evropës, Spanjën, kombëtarja afrikane ka arritur një tjetër rezultat historik në Grupin H, duke barazuar 2:2 me dy herë fituesin e Kupës së Botës, Uruguain.

Debutuesit kaluan të parët në avantazh në minutën e 21-të me golin e Kevin Pina, por Uruguai përmbysi gjithçka brenda pjesës së parë me anë të Maximiliano Araujo dhe Agustin Canobbio. Sidoqoftë, Kepi i Gjelbër nuk u dorëzua dhe siguroi pikën e madhe në minutën e 61-të falë golit të Helio Varela, i cili shënoi vetëm tre minuta pasi u fut në lojë si zëvendësues.

Ky rezultat e lë plotësisht të hapur garën për kualifikim përpara xhiros së fundit më 26 qershor. Spanja udhëheq grupin me 4 pikë, e ndjekur nga Uruguai dhe Kepi i Gjelbër me nga 2 pikë, ndërsa Arabia Saudite mbyll tabelën me 1 pikë. /E.A/