Triatlonisti kosovar Albion Ymeri është shpallur zyrtarisht kampion i Ballkanit në garat e triatlonit, pas një paraqitjeje të shkëlqyer në kampionatin e mbajtur në Podgorica.

Ymeri arriti të lërë pas konkurrentët më të fortë të rajonit, duke dëshmuar formë të jashtëzakonshme dhe duke i sjellë Kosovës një tjetër sukses të rëndësishëm në sportet e qëndrueshmërisë.

Sukseset për ekipin kosovar nuk u ndalën vetëm me këtë triumf. Në këtë kampionat shkëlqeu edhe Nerenxa Kuqi, e cila fitoi medaljen e artë në kategorinë e pionierëve, ndërsa Genc Isufi u rendit i pari në kategorinë e moshës 20–30 vjeç.

Triatloni është një sport që kombinon tre disiplina të qëndrueshmërisë: notin, çiklizmin dhe atletikën, të cilat zhvillohen në këtë renditje gjatë garës.

Me këtë sukses, Albion Ymeri po vazhdon të konfirmohet si një nga sportistët më premtues të këtij sporti në rajon, duke u transformuar nga një sportist lokal në një konkurrent serioz në arenën evropiane.

Federata e Futbollit e Kosovës, në bashkëpunim me sponsorin zyrtar të Superliga e Kosovës, Albi Mall, ka vazhduar ndarjen e çmimit tradicional “Ylli i Javës”, që i jepet futbollistit më të dalluar të javës në elitën e futbollit kosovar.

Për javën e 24-të të këtij edicioni, ky çmim i është ndarë futbollistit të FC Ballkani, Almir Kryeziu. Ai pati një paraqitje shumë të mirë në ndeshjen ndaj FC Drita, ku shënoi një gol dhe asistoi në një tjetër në fitoren 3-0 të skuadrës së tij.

Vlerësimi është bërë nga Komisioni i Veteranëve të Futbollit.

Pas marrjes së çmimit, Kryeziu u shpreh i lumtur për vlerësimin dhe për fitoren e ekipit.

“Ka qenë një ndeshje e vështirë, sepse Drita ka një skuadër shumë të mirë. E kemi përgatitur shumë mirë ndeshjen dhe jemi shumë të lumtur për këtë fitore. Jemi në vendin e parë me pikë të barabarta, por kemi edhe shumë ndeshje të cilat do t’i luftojmë. Falënderoj komisionin për vlerësimin, klubin dhe jam i lumtur që jam në formë dhe po mund ta ndihmoj ekipin”, deklaroi ai për faqen zyrtare të FFK-së.

Fundjava në futbollin evropian solli ndeshje shumë interesante dhe rezultate të rëndësishme në Premier League dhe La Liga.

Premier League

Në Angli, Manchester United arriti fitore të rëndësishme në shtëpi duke mposhtur Aston Villa me rezultat 3-1. Fitore të vlefshme mori edhe Arsenal që triumfoi 2-0 ndaj Everton.

Ndërkohë, Manchester City u ndal në barazim 1-1 në transfertë ndaj West Ham United, ndërsa Liverpool barazoi 1-1 me Tottenham Hotspur.

Surprizë ishte fitorja minimale 1-0 e Newcastle United në udhëtim ndaj Chelsea.

Në ndeshjet tjera, Crystal Palace barazoi 0-0 me Leeds United, po me të njëjtin rezultat përfundoi edhe takimi mes Nottingham Forest dhe Fulham, si dhe përballja mes Burnley dhe AFC Bournemouth.

Fitore në udhëtim mori edhe Brighton & Hove Albion që mposhti Sunderland me rezultat 1-0.

La Liga

Edhe në Spanjë pati ndeshje interesante në La Liga. Real Madrid dominoi ndaj Elche CF me rezultat të thellë 4-1, ndërsa Atlético Madrid fitoi minimalisht 1-0 kundër Getafe CF.

Një fitore bindëse mori edhe Girona FC që mposhti 3-0 Athletic Club, ndërsa Real Sociedad triumfoi 3-1 ndaj CA Osasuna.

Në ndeshjet tjera, RCD Mallorca fitoi 2-1 ndaj RCD Espanyol, Real Betis barazoi 1-1 me Celta Vigo, ndërsa Real Oviedo mposhti 1-0 Valencia CF.

Ndërkohë, spektakël dhuroi FC Barcelona që mposhti Sevilla FC me rezultat të thellë 5-2.

E diela ishte gjithashtu një ditë e veçantë për klubin katalanas, pasi Joan Laporta u konfirmua si presidenti i ardhshëm i Barcelonës për herë të katërt. Ai fitoi zgjedhjet me 68% të votave, ndërsa rivali i tij Víctor Font mori 30%. Laporta siguroi 32,934 vota, duke regjistruar fitoren e dytë më të madhe në historinë e zgjedhjeve presidenciale të klubit, pas Sandro Rosell që kishte marrë 35,021 vota. Laporta u shpreh shumë krenar për këtë sukses.

Në kuadër të turneut ndërkombëtar të boksit “Montenegro Cup”, që po mbahet në Budva të Malit të Zi nga 13 deri më 22 mars 2026, sot (15 mars) në ring u paraqitën dy boksierë të ekipit tonë.

Në kategorinë 55 kg, Bashkim Bajoku u përball me boksierin ukrainas Rudyk Maksym. Pas një dueli të fortë dhe të baraspeshuar, Bajoku u mposht me rezultat të ngushtë 3:2.

Ndërkohë, në kategorinë 75 kg, Planet Berisha boksoi kundër boksierit nga Shqipëria Ergys Toci, nga i cili pësoi humbje me rezultat 4:1.

Garat në turne vazhdojnë nesër, më 16 mars, ku në kategorinë 51 kg do të paraqitet boksierja Agnesa Veseli, e cila do të përballet me boksieren nga Ukraina Sofia Turbnina.