Lajmet

Sllovakia ndryshon Kushtetutën për të mundësuar zgjedhjet e parakohshme

Sipas sondazheve të fundit, opozita ka shanse të mira që të fitojë në zgjedhjet e parakohshme.

Publikuar

Parlamenti i Sllovakisë ka amendamentuar Kushtetutën e shtetit për të mundësuar mbajtjen e zgjedhjeve të parakohshme.

Nëntëdhjetë e dy ligjvënës mbështetën amendamentin që mundëson mbajtjen e zgjedhjeve të parakohshme, nëse për një vendim të tillë votojnë shumica e Këshillit Kombëtar të Sllovakisë prej 150 ulësesh. Kushtetuta e Sllovakisë më herët nuk ka lejuar mbajtjen e zgjedhjeve të parakohshme.

Pasi Qeveria e udhëhequr nga kryeministri sllovak Eduard Heger, nuk i mbijetoi mocionit të mosbesimit në Parlament në dhjetorin e kaluar, presidentja Zuzana Caputova u dha afat ligjvënësve që deri në janar të bënin ndryshimet kushtetuese.

Partitë opozitare iniciuan mocionin e mosbesimit pas disa muajsh krizë politike. Caputova i kërkoi kabinetit të Heger që të qëndronte në pushtet si Qeveri në detyrë.

Presidentja sllovake tha se ajo do të zgjedhë një kryeministër të ri dhe do të betohet Qeveria e re, nëse ligjvënësit nuk i bëjnë ndryshimet kushtetuese deri më 31 janar.

Këshilli Kombëtar ka caktuar seancë për të enjten për të debatuar lidhur me datën e mundshme të mbajtjes së zgjedhjeve të përgjithshme. Partitë që aktualisht janë pjesë e koalicionit qeverisës thanë se preferojnë që zgjedhjet të mbahen më 30 shtator, ndërkaq opozita kërkon që zgjedhjet të mbahen më herët, në maj ose qershor.

Sipas sondazheve të fundit, opozita ka shanse të mira që të fitojë në zgjedhjet e parakohshme.

Zgjedhjet e rregullta parlamentare në Sllovaki ishin të parapara të mbaheshin në shkurt të vitit 2024.

Lajmet

​Ziv: Urrejtja hebreje ende ekziston

Kështu tha ajo gjatë ceremonisë përkujtimore në Ditën Ndërkombëtare të Përkujtimit të Holokaustit.

Publikuar

nga

Antisemitizmi që çoi në Holokaust ende ekziston, pasi sot shihen lëvizje në ekstremet e politikës evropiane dhe botërore, të cilët me krenari ngrenë flamurin e shëmtuar të antisemitizmit, i cili më shumë kërcënon t’i kthejë shoqëritë demokratike dhe të qytetëruara në ato që gllabërojnë njerëzit e tyre.

Kështu ka thënë ambasadorja e Shtetit të Izraelit në Republikën e Kosovës, Tamar Ziv, gjatë ceremonisë përkujtimore në Ditën Ndërkombëtare të Përkujtimit të Holokaustit.

Ziv tha se kjo ditë përkujtimore vjetore është një mundësi e vërtetë për të kujtuar ata që u vranë, për të nderuar ata që mbijetuan dhe ata që rrezikuan jetën e tyre për të shpëtuar të tjerët, si dhe për të vazhduar punën për t’u siguruar që tmerret e shkuara nuk do të ndodhë më kurrë.

“Është detyra jonë të punojmë pa pushim për të vazhduar kërkimin, edukimin dhe luftimin e mohimit. 78 vjetori i çlirimit të Aushvicit u shënua me përpjekje të gjera për të mbledhur dëshmitë e tmerreve, për të mbledhur prova, për të dokumentuar ngjarje të tmerrshme dhe për të kryer kërkime ende të vazhdueshme për të siguruar që kujtimet e viktimave nuk do të harrohen kurrë, si dhe duhet punuar në mënyrë që shumë mësime vendimtare për të gjithë njerëzimin që duhet të jenë në mendjet dhe zemrat tona, nuk do t’i shpëtojnë kurrë ndërgjegjes sonë kolektive. Të dashur miq, le të mos bëhemi indiferentë. Antisemitizmi që çoi në Holokaust ende ekziston. Sot, ne shohim lëvizje në ekstremet e politikës evropiane dhe botërore, të cilët me krenari ngrenë flamurin e shëmtuar të antisemitizmit, i cili më shumë kërcënon t’i kthejë shoqëritë demokratike dhe të qytetëruara në ato që gllabërojnë njerëzit e tyre”, tha ai.

Sipas saj, kujtimi i tmerreve të Holokaustit, bëhet edhe më i vështirë me kalimin e çdo viti, sikundër çdo vit, gjithnjë e më shumë, numri i të mbijetuarve që kanë qenë dëshmitarë të këtyre mizorive, zvogëlohet.

“Diskurset antisemite nuk jetojnë vetëm në burgjet tona, por edhe në zemrat e perëndimit të lirë dhe demokratik. Urrejtja hebreje ekziston ende. Antisemitizmi ekziston ende. Mohimi i Holokaustit ekziston ende. Ai është aktiv në platformat virtuale… duke përhapur helm. Ne duhet të përdorim çdo mjet në dispozicionin tonë, nga arsimi dhe legjislacioni, siguria dhe zbatimi, për të penguar dhe zhdukur urrejtjen, racizmin, antisemitizmin dhe të gjitha format e tjera të urrejtjes. Mjerisht, në botën e sotme, ka ende zëra duke përfshirë edhe ata zyrtarë, si në Iran, që predikojnë një narrativë se Holokausti është një trillim. Në një botë të lajmeve të rreme dhe teorive konspirative, ka përpjekje të vazhdueshme për të rishkruar historinë përmes përdorimit të tregimeve të shtrembëruara që përdorin qëllimisht informacionin e nxjerrë jashtë kontekstit”, tha ajo.

Kurse kryeministri Albin Kurti tha se për të parandaluar që diçka si Holokausti të ndodhë përsëri në të ardhmen, nuk duhet të harrojmë kurrë atë që ndodhi në të kaluarën.

“Ka gjithashtu shumë histori të njerëzve të guximshëm në mbarë Evropën dhe më gjerë – duke përfshirë familje nga Kosova – të cilët me dëshirë u siguruan strehim miqve, fqinjëve dhe refugjatëve hebrenj, ndonjëherë në rrezik të madh për vetveten. Jo vetëm tmerret e Holokaustit, por edhe shembulli i këtyre njerëzve të guximshëm, duhet të na frymëzojë sot. Ata duhet të na frymëzojnë që të bëjmë gjithçka që mundemi, për të parandaluar dhe luftuar dhunën sistematike shtetërore – deri dhe duke përfshirë gjenocidin – kudo që ndodh në botë. Këtu në Kosovë, ku u krye gjenocidi i fundit i shekullit të 20-të, ne jemi më se të gatshëm të bëjmë pjesën tonë në këtë detyrë të shenjtë. Pas pushtimit ilegal të Ukrainës nga Rusia, ne iu bashkuam menjëherë sanksioneve të SHBA-së dhe BE-së kundër atyre që ishin përgjegjës. Në nivel ushtarak, ushtarët e Kosovës kanë marrë pjesë me entuziazëm në Defender Europe dhe këtë vit ne do të jemi nikoqirë të stërvitjeve në vendin tonë. Pas marrjes së Afganistanit nga Talibanët, ne mirëpritëm 1,893 refugjatë afganë në Kosovë, dhe jemi gjithashtu të gatshëm të pranojmë deri në 5,000 refugjatë nga Ukraina. Së fundi, si pjesë e programit tonë Gazetarët në Rezidencë, kemi pranuar 12 gazetarë nga Ukraina dhe katër nga Afganistani”, tha ai, duke shtuar se mënyra më e mirë për të nderuar kujtimin e të humburve nuk është vetëm përmes fjalëve, por edhe përmes veprimeve tona.

Në këtë ceremoni me nga një fjalë rasti të pranishmit i përshëndeti edhe Matthias Konrad, zëvendësambasador i Republikës Federale të Gjermanisë, dhe Lekë Rezniqi trashëgimtar i Asllan Rezniqi, i cili kishte shpëtuar hebrenj gjatë Holokaustit dhe është njohur nga Qendra e Përkujtimit të Holokaustit “Yad Vashem” si “Fisnik mes Kombeve”.

Ndërkohë, artistët kosovarë Valton Beqiri, ish-ministër i Kulturës i Republikës së Kosovës, njëherësh kompozitor, pianist, aranzhues e dirigjent, dhe sopranoja Besa Llugiqi interpretuan dy këngë që identifikohen me Holokaustin. Kurse, aktorja Fitore Jashari interpretoi një monolog bazuar në romanin e Annelies Marie “Anne” Frank, një vajzë hebreje e lindur në Gjermani, e cila mbante një ditar në të cilin dokumentonte jetën e fshehur nën persekutimin nazist.

Gjithashtu, është paraqitur dokumentari “Ata më dhanë jetë” me protagoniste Rena Quint, e mbijetuar e Holokaustit.

Në fund, janë ndezur gjashtë qirinj, një nga një, në kujtim të gjashtë milionë viktimave të Holokaustit, nga ana e Ambasadores Ziv, kryeministrit Kurti, zëvendësambasadorit Konrad, kryetarit të Bashkësisë Hebraike të Kosovës, Votim Demiri, si dhe Lekë Rezniqi e Zana Mustafa-Bukoshi, trashëgimtare e Faik Sharri dhe Sabrije Sharri, të cilët kishin shpëtuar hebrenj gjatë Holokaustit dhe janë njohur nga Yad Vashem si “Fisnikë mes Kombeve”.

Vazhdo të lexosh

Lajmet

Rahoveci kompenson mbi 450 bujq që pësuan nga vërshimet

Kështu njoftoi kryetari Latifi.

Publikuar

nga

Komuna e Rahovecit në bashkëpunim me Ministrinë e Bujqësisë pritet t’i kompensojnë 243 bujq të cilët u dëmtuan nga vërshimet.

Sipas një njoftimi publik nga kryetari i Rahovecit, Smajl Latifi, paraprakisht janë kompensuar 214 bujq derisa në pritje janë edhe 83, të cilët tha se do të kompensohen në ditët në vazhdim.

“Komisioni për Shqyrtimin e Ankesave të MBPZHR-së, pas shqyrtimit të ankesës së bazuar në faktet, argumentet dhe dëshmitë e ofruara prej komunës së Rahovecit, dje i ka kualifikuar edhe 243 bujq, të cilët do të dëmshpërblehen. Sipas raportit të Drejtorisë Komunale për Bujqësi, i cili po vazhdon të shqyrtohet në MBPZHR, përkatësisht në Komisionin për Ankesa të kësaj ministrie, nga: 540 bujq që u janë dëmtuar kulturat e tyre nga fatkeqësitë natyrore, ditë më herët 214 bujq janë kompensuar, kur i shtojmë edhe 243 të kualifikuar që do të kompensohen, na mbetet ta vazhdojmë ‘betejën’, edhe për 83 bujq”, ka shkruar Latifi.

Përmes një postimi në Facebook, Latifi ka thënë se e falënderon Komisionin për Shqyrtimin e Ankesave të MBPZHR-së për bashkëpunimin konstruktiv me Drejtorinë Komunale të Bujqësisë e cila i ka ofruar këtij komisioni dëshmi shtesë.

Vazhdo të lexosh

Lajmet

​Haradinaj: Ligji i Pagave nuk i përmbush kërkesat e policëve, kryeministër reflekto

Ai tha se policë janë të pakënaqur me këtë trajtim që po ju bëhet.

Publikuar

nga

Anëtari i kryesisë së Aleancës për Ardhmërinë e Kosovës, Daut Haradinaj ka kërkuar nga kryeministri i Kosovës, Albin Kurti, që të reflektojë lidhur me pagat e Policisë së Kosovës.

Haradinaj ka thënë se trajtimi i tyre në Ligjin e Pagave as për së afërmi nuk i përmbush nevojat e tyre. Madje ai ka treguar se shumë policë i kanë shkruar dhe janë ndjerë të pakënaqur me ketë trajtim që po ju bëhet.

“Çdo herë, Policia e Kosovës është në krye të detyrës. Ne, me të drejtë krenohemi me punën e tyre. Por, trajtimi i tyre në Ligjin e Pagave as për së afërmi nuk i përmbush nevojat e tyre. Shumë prej tyre më kanë shkruar, të zhgënjyer me nivelin e trajtimit që ju jep ky ligj. Edhe pse pritej që t’iu rritet paga, me ligjin e ri për shumë pjesëtarë madje parashihet edhe ulja e tyre. Kryeministër, reflekto”, ka shkruar Haradinaj në Facebook.

Qeveria e Kosovës të mërkurën e bëri publik koeficientin për pagat në sektorin publik. Në Polici, drejtori i përgjithshëm do të ketë pagë me koeficient 14.5, ndërsa polici i thjeshtë koeficient 5. Kadeti policor do të ketë koeficientin 2.

Vazhdo të lexosh

Lajmet

“Putin synon të kapë Donbasin deri në mars”

Edhe Zelensky dhe zyrtarë të lartë ukrainas paralajmëruan se Rusia po planifikon një ofensivë të re në muajt e ardhshëm.

Publikuar

nga

Një zyrtar i inteligjencës ukrainase tha se ai mendon se luftimet në Ukrainën lindore do të intensifikohen gjatë muajve të ardhshëm, pasi qëllimi i presidentit rus, Vladimir Putin është “të pushtojë Donbasin deri në muajin mars”.

“Ne presim ngjarje shumë aktive gjatë periudhës shkurt-mars. Qëllimi i Putinit është të pushtojë Donbasin deri në mars”, tha Andriy Yusov, një përfaqësues i Inteligjencës së Mbrojtjes të Ukrainës.

Andrii Chernyak, një tjetër përfaqësues i Drejtorisë kryesore të Inteligjencës të Ministrisë së Mbrojtjes së Ukrainës, tha se ka shenja se Rusia po përgatitet për një ofensivë të madhe për të kapur pjesët lindore të vendit.

Komentet erdhën pasi presidenti ukrainas, Volodymyr Zelensky dhe zyrtarë të lartë ukrainas paralajmëruan se Rusia po planifikon një ofensivë të re të madhe në muajt e ardhshëm, duke u kërkuar vazhdimisht aleatëve perëndimorë më shumë armë, tanke dhe avionë luftarakë./UBTNews/

Vazhdo të lexosh

Të kërkuara