Udhëheqësi i Koresë së Veriut, Kim Jong Un, do të marrë pjesë në një paradë ushtarake në Pekin javën e ardhshme së bashku me Vladimir Putinin e Rusisë, tha ministria e jashtme e Kinës, në atë që do të jetë një vizitë historike.

Kjo vjen disa ditë pasi Presidenti i SHBA-së, Donald Trump, tha se donte të takohej me Kim-in, i cili rrallë bën vizita të huaja, dhe ndërsa Shtëpia e Bardhë përpiqet të ndërmjetësojë një marrëveshje për t’i dhënë fund luftës në Ukrainë, shkruan BBC.

Parada e Ditës së Fitores së Kinës më 3 shtator do të shënojë 80-vjetorin e dorëzimit zyrtar të Japonisë në Luftën e Dytë Botërore dhe fundin e konfliktit.

Ngjarja tani sinjalizon një fitore të rëndësishme diplomatike për udhëheqësin kinez Xi Jinping, i cili ka shtyrë për një rend të ri botëror të udhëhequr nga Pekini.

Katër persona u vranë në sulmin e natës në Kiev, ku në mesin e tyre dy viktima ishin fëmijë.  Ky është numri i pjesshëm i publikuar nga kreu i administratës ushtarake të qytetit, Timur Tkachenko.

“Operacionet e shpëtimit”, shkroi ai në Telegram, janë duke u zhvilluar në disa vende dhe rusët po synojnë në mënyrë cinike ndërtesat e banimit.

Për më tepër, në distriktin Darnytskyi, si pasojë e sulmit, shpërtheu një zjarr dhe një kopsht fëmijësh është përfshirë nga flakët.

“Tre persona u nxorën të gjallë nga rrënojat. Ka shumë mundësi që të ketë ende njerëz nën rrënoja. Janë të përfshirë alpinistë, kujdestarë qensh, psikologë, inxhinierë, zjarrfikës dhe personel shpëtimi. Pajisjet robotike po përdoren në mënyrë aktive për të pastruar zonën në mënyrë që ekipet e shpëtimit të mund të punojnë më shpejt. Në total, afërsisht 500 ekipe shpëtimi dhe 1,000 oficerë policie po punojnë njëkohësisht në Kiev”, shkroi Ministri i Brendshëm ukrainas Ihor Klymenko në Telegram.

“Çdo minutë e punës së shërbimeve tona të emergjencës ka për qëllim shpëtimin e jetëve dhe mbështetjen e atyre që kanë vuajtur më shumë nga terrori rus”, tha ai.

Sulmi i natës në kryeqytetin ukrainas ka lënë të paktën katër të vdekur dhe afërsisht 30 të plagosur.

Ish-kryeministri britanik, Tony Blair do të marrë pjesë në një takim në Uashington, të kryesuar nga Presidenti i SHBA-së Donald Trump, për të diskutuar planet për Gazën e pasluftës, ka konfirmuar BBC.

I dërguari i Lindjes së Mesme, Steve Witkoff, ka thënë se SHBA-të po hartojnë një plan shumë gjithëpërfshirës për të ardhmen pas konfliktit, shkruan BBC.

Takimi vjen pasi ushtria izraelite i paralajmëroi palestinezët se evakuimi i Qytetit të Gazës ishte i pashmangshëm, ndërsa forcat e saj përgatiten ta pushtojnë atë.

Tanket izraelite hynë në një zonë të re të qytetit gjatë natës, duke shkatërruar shtëpi dhe duke detyruar më shumë banorë të largohen, thanë dëshmitarët.

Mijëra njerëz janë zhvendosur tashmë për shkak të përparimeve të fundit izraelite kryesisht në pjesë të tjera të qytetit, ku ende jetojnë rreth një milion palestinezë.

Në fillim të gushtit, Izraeli njoftoi planet për të pushtuar të gjithë Rripin e Gazës përfshirë Qytetin e Gazës, të cilin e përshkroi si bastionin e fundit të Hamasit.

OKB dhe organizatat joqeveritare kanë paralajmëruar se një ofensivë izraelite në Qytetin e Gazës ku u shpall zi buke javën e kaluar do të kishte një ndikim të tmerrshëm humanitar.

Një person ka humbur jetën si dhe një tjetër rezulton i zhdukur pas rrëshqitjes së dheut si pasojë e shirave të rrëmbyeshëm, në qytetin Chiang Mai, të Tajlandës.

Pamjet e transmetuara nga transmetuesi tajlandez TPBS tregonin rrugë të përmbytura në pjesë të provincave Nan dhe Lampang, në lindje të Chiang Mai, raporton AP.

Departamenti për Parandalimin dhe Zbutjes së Fatkeqësive në Tajlandës, njoftoi për shumë shtëpi të prekura dhe disa persona të lënduar nga përmbytjet e menjëhershme dhe rrëshqitjet e dheut në provincat veriore.

Departamenti Meteorologjik i Tajlandës paralajmëroi për shira të rrëmbyeshëm në rajonet veriore dhe verilindore të mërkurën.

Banorët në zonat kodrinore dhe zonat e ulëta pranë rrugëve ujore u paralajmëruan për përmbytje të mundshme dhe rrëshqitje dheu.

Shiu ishte pasojë e Stuhisë Tropikale Kajiki, e cila zbarkoi të hënën pasdite në Vietnamin qendror, ku mijëra njerëz u evakuuan nga zonat me rrezik të lartë.