Sport

Situata e licencimit të FFK-së, flet ministri Çeku

MKRS ende nuk ka dhënë dritën e gjelbër për licencimin e kësaj federate.

Published

3 years ago

December 28, 2022

UBT news

Në konferencën e sotme për media pas mbledhjes së qeverisë, ministri i Ministrisë së Kulturës Rinisë dhe Sportit, Hajrulla Çeku foli rreth situatës së licencimit të Federatës së Futbollit të Kosovës (FFK).

Licencimi i FFK-së së fundmi është bërë tema më e përfolur në vend, ku MKRS ende nuk ka dhënë dritën e gjelbër për licencimin e kësaj federate.

Çeku në konferencën e sotme tha se deri tani janë licencuar nëntë federata, kurse Federata e Futbollit është një nga mbi 15 federatat e tjera që janë në procedurë të licencimit.

Po ashtu, ministri Çeku tha se në fillim të vitit të ardhshëm pritet të kompletohet procesi i licencimit të gjitha federatave të sportit.

“Licencimi është duke vazhduar si proces nga vera e këtij viti kur është miratuar udhëzimi i ri administrativ. Deri dje janë licencuar 9 federata, të fundit ishin volejbolli basketbolli dhe atletika që i morën licencat zyrtarisht nga ministria e sportit. Federata e Futbollit është një nga mbi 15 federatat që janë në procedurë të licencimit dhe po ndodh ajo e zakonshmja, komisioni i licencimit po i dërgon komente për plotësime të dokumenteve dhe të kritereve të caktuara, dhe unë besoj që me këtë dinamikë të punës nga pjesa e parë e vitit të ardhshëm do të mbyllet komplet licencimi i federatave të sportit”, tha Çeku.

Në lidhje me këtë rast, presidenti i FFK-së, Agim Ademi ka thënë se do të kompletohet së shpejti dorëzimi i dokumenteve për licencim, si dhe procesi i licencimit do të përfundoj brenda këtij viti.

Sport

Premier League, La Liga dhe Bundesliga sjellin ndeshje të zjarrta

Published

1 day ago

April 24, 2026

UBTNews

Fundjava sjell një agjendë të ngjeshur me ndeshje interesante në ligat kryesore evropiane, ku vëmendja do të jetë te përballjet në Premier League, La Liga dhe Bundesliga.

Të shtunën, në Premier League, dita hapet me ndeshjen mes Fulham FC dhe Aston Villa FC në orën 13:30. Në orën 16:00 zhvillohen disa takime njëkohësisht: Liverpool FC përballet me Crystal Palace FC, West Ham United FC pret Everton FC, ndërsa Wolverhampton Wanderers FC luan ndaj Tottenham Hotspur FC. Në mbrëmje, nga ora 18:30, spikat derbi mes Arsenal FC dhe Newcastle United FC.

Në La Liga, po të shtunën, Deportivo Alavés përballet me RCD Mallorca në orën 14:00, ndërsa në 16:15 Getafe CF luan ndaj FC Barcelona. Në mbrëmje, Valencia CF ndeshet me Girona FC në 18:30, ndërsa në 21:00 zhvillohet dueli mes Atlético Madrid dhe Athletic Club.

Nga Bundesliga, të shtunën në 15:30 1. FSV Mainz 05 pret FC Bayern Munich, ndërsa në 18:30 Hamburger SV përballet me TSG Hoffenheim.

Të dielën, në La Liga, programi nis me Rayo Vallecano ndaj Real Sociedad në orën 14:00. Në 16:15 luhet sfida Real Oviedo – Elche CF, ndërsa në 18:30 CA Osasuna pret Sevilla FC. Dita mbyllet me ndeshjen Villarreal CF – Celta Vigo në orën 21:00.

Në Bundesliga, të dielën në 15:30 VfB Stuttgart përballet me Werder Bremen, ndërsa në 17:30 Borussia Dortmund luan ndaj SC Freiburg.

Fundjava premton spektakël dhe përballje interesante në tri nga ligat më të forta evropiane.

Sport

Drilon Hajrizi shkëlqen, udhëheq Trepçën drejt fitores ndaj Pejës

Published

2 days ago

April 24, 2026

UBTNews

Basketbollisti Drilon Hajrizi është shpallur MVP i publikut pas paraqitjes së tij vendimtare në fitoren e KB Trepça ndaj KB Peja në ndeshjen e parë.

Hajrizi ishte një nga lojtarët kyç të takimit, duke kontribuar me 17 pikë dhe 6 kërcime, ndërsa u dallua edhe për saktësinë në gjuajtjet për tri pikë, ku realizoi 3 nga 4 tentime.

Me performancën e tij, ai luajti rol të rëndësishëm në momentet vendimtare të ndeshjes, duke ndihmuar Trepçën të sigurojë fitoren e parë në këtë përballje.

Sport

UEFA dënon Prestiannin me gjashtë ndeshje për sjellje homofobike

Published

2 days ago

April 24, 2026

UBTNews

Futbollisti i SL Benfica, Gianluca Prestianni, është dënuar me gjashtë ndeshje pezullim nga UEFA për sjellje homofobike gjatë një ndeshjeje të Ligës së Kampionëve.

Incidenti kishte ndodhur në përballjen ndaj Real Madrid, në kuadër të plejofit të fazës nokaut në muajin shkurt. Ndeshja e zhvilluar në stadiumin Estádio da Luz ishte ndërprerë për rreth 10 minuta pas akuzave të bëra nga Vinícius Júnior.

Fillimisht, sulmuesi brazilian kishte pretenduar për fyerje raciste, ndërsa Prestianni i kishte mohuar këto akuza, duke thënë se situata ishte keqkuptuar.

Megjithatë, sipas mesfushorit të Real Madridit, Aurélien Tchouaméni, lojtari i Benficas kishte pranuar se komentet e tij kishin qenë me natyrë homofobike.

Pas shqyrtimit të rastit, UEFA ka vendosur ta ndëshkojë Prestiannin me gjashtë ndeshje pezullim, duke theksuar qëndrimin e saj kundër çdo forme diskriminimi në futboll.

Sport

E ardhmja e Zhegrovës te Juventusi në pikëpyetje pas paraqitjeve jo bindëse

Published

2 days ago

April 24, 2026

UBTNews

E ardhmja e Edon Zhegrova te Juventus është vënë në pikëpyetje, pasi paraqitjet e tij nuk kanë qenë në nivelin e pritur, raporton Calciomercato.

Sipas këtij burimi, drejtuesit e klubit po shqyrtojnë opsionet për të shmangur një humbje financiare, ndërsa ndeshja ndaj Bologna FC 1909 konsiderohet si një moment kyç. Zhegrova, i aktivizuar në minutën e 72-të në vend të Francisco Conceição, nuk arriti të bindë, duke humbur disa topa dhe duke marrë vendime të nxituara në fazën ofensive.

Raportohet se këto veprime nuk i kanë pëlqyer trajnerit Luciano Spalletti, pasi rrezikuan balancën e skuadrës dhe i dhanë mundësi kundërshtarit për kundërsulme.

Sezoni i tij deri tani ka qenë i kufizuar, me 22 paraqitje dhe vetëm 465 minuta në total, një mesatare prej rreth 21 minutash për ndeshje, çka tregon rolin e tij jo të qëndrueshëm në ekip.

Megjithatë, Zhegrova synon të ndryshojë këtë situatë. Sipas burimeve pranë lojtarit, ai u ka kërkuar agjentëve të mos nxitojnë me oferta, pasi dëshiron të fitojë më shumë minuta dhe të dëshmojë vlerën e tij te Juventusi.

Nga ana financiare, klubi torinez e kishte transferuar nga LOSC Lille për rreth 14.3 milionë euro, me bonuse që mund ta çojnë shumën deri në 18 milionë euro. Për të shmangur humbje, Juventusi duhet ta shesë për të paktën 11.4 milionë euro.

Drejtuesit nuk dyshojnë në cilësitë teknike të Zhegrovës, por shqetësimet lidhen me vendimmarrjen e tij në fushë dhe reagimin në momente kyçe.

Vendimi përfundimtar për të ardhmen e tij pritet në fund të sezonit, ndërsa çdo paraqitje e mbetur do të jetë vendimtare për qëndrimin e tij në Torino.