UBT do të sjell për herë të parë në Kosovë ekspozitën kushtuar jetës dhe veprës së inxhinierit të njohur të shekullit XIX, Karl Gega – një figurë kyçe e historisë evropiane të inxhinierisë dhe ndërlidhjes ndërkulturore.

Ekspozita do të hapet, nesër, më 15 korrik, në Parkun Shkencor, Inovativ dhe Teknologjik të UBT-së, në Lipjan, duke filluar nga ora 17:00, duke shënuar një moment të rëndësishëm kulturor dhe shkencor për vendin dhe mbarë rajonin.

E realizuar në bashkëpunim me Fondacionin Musei Civici di Venezia, kjo ekspozitë sjell në vëmendje trashëgiminë evropiane të Karl Gegës si një inxhinier që bashkoi kulturat dhe ndërlidhi komunitetet përmes projekteve të tij vizionare.

Rektori dhe Presidenti i UBT-së, Prof. Dr. Edmond Hajrizi, ka theksuar se kjo ekspozitë është rezultat i një bashkëpunimi të frytshëm ndërinstitucional dhe dëshmi e përkushtimit të UBT-së për të promovuar dijen, kulturën dhe trashëgiminë përmes një qasjeje akademike dhe inovative.

Kontributi i studentëve dhe stafit të Fakulteteve të Artit dhe Medias Digjitale, Arkitekturës dhe Planifikimit Hapësinor, si dhe Dizajnit të Integruar, ka qenë thelbësor në përgatitjen dhe realizimin e kësaj ekspozite.

Ekspozita përfshin dokumente arkivore, plane inxhinierike, vizatime origjinale dhe materiale multimediale, duke e shndërruar në një përvojë edukative dhe vizuale që ndërlidh të kaluarën me të ardhmen, shkencën me artin, dhe trashëgiminë me inovacionin.

Përmes këtij organizimi, UBT dëshmon rolin e vet si institucion lider në krijimin e urave ndërmjet kulturave dhe shkencave të ndryshme, si dhe angazhimin e tij për të sjellë në Kosovë aktivitete me përmbajtje ndërkombëtare dhe vlerë të lartë arsimore dhe kulturore.

Me një sërë aktivitetesh akademike dhe diskutimesh të thella, është përmbyllur me sukses Akademia Verore “Zhvillimi i Qëndrueshëm dhe Inovacioni në fushën e Medias”, në kuadër të Global UBT Fest. Kjo akademi shërbeu si platformë për bashkëpunim ndërmjet studentëve, ekspertëve të komunikimit dhe profesionistëve të angazhuar në mediat kosovare, duke theksuar rëndësinë e inovacionit dhe etikës në këtë fushë.

Një nga pikat e rëndesishme të akademisë ishte ligjerata e hapur me temën: “Komunikimi si mjeti më i rëndësishëm në zhvillimin dhe transformimin e shoqërisë”. Gjatë kësaj ligjërate u diskutua roli kyç i komunikimit – verbal, joverbal dhe vizual – në formësimin e marrëdhënieve sociale dhe suksesin e një shoqërie të emancipuar. U theksua se megjithëse komunikimi është i pranishëm në çdo aspekt të jetës sonë, ai shpesh merret i mirëqenë dhe nuk analizohet si proces kompleks dhe ndikues në zhvillim shoqëror.

Pjesë tjetër e rëndësishme e programit ishte edhe forumi-tryezë debati me temën “Etika në raportimin e lajmeve të ndjeshme”, që mblodhi ish-studentë të UBT të angazhuar në media të ndryshme dhe studentë aktualë të fushës së komunikimit. Në këtë diskutim u trajtuan raste konkrete të raportimit joprofesional, me fokus në pasojat që sjellin shkeljet etike në perceptimin e publikut dhe besueshmërinë e mediave.

Studentët pjesëmarrës patën mundësinë të marrin pjesë në prezantime tematike dhe debate të drejtpërdrejta, ku ndanë pikëpamjet e tyre mbi sfidat me të cilat përballen mediat në raportimin e temave të ndjeshme. Punëtoria u zhvillua për rreth dy orë dhe ofroi një ambient të hapur për shkëmbim përvojash, duke nxitur mendimin kritik dhe vetëdijen profesionale.

Akademia Verore e këtij viti dëshmoi edhe një herë përkushtimin e UBT-së në ndërtimin e një gjenerate të re gazetarësh dhe profesionistësh të medias, të pajisur me dije, etikë dhe aftësi për të ndikuar pozitivisht në zhvillimin shoqëror dhe kulturor të vendit.

Më 11 korrik 2025, përmbylli aktivitetet e saj Akademia Verore e Fakultetit Juridik të UBT, organizuar nga prodekanja e Fakultetit, Prof. Asoc. Dr. Egzone Osmanaj. Aktiviteti, i cili u zhvillua për pesë ditë radhazi, ofroi një përvojë intensive dhe gjithëpërfshirëse në fushën e ndërmjetësimit civil, penal dhe tregtar, duke përfshirë sesi teoritë përkthehen në praktikë.

Përmbyllja e Akademisë Verore u shoqërua me një vizitë studimore në Gjykatën Themelore në Prishtinë, ku studentët u pritën nga autoritete të larta të sistemit gjyqësor, përfshirë Kryetaren e Gjykatës, Albina Shabani Rama, Nënkryetaren Ilire Vitija, Administratori i Gjykatës, Shaban Gërxhaliu, dhe gjyqtarin e Departamentit Special, Ngadhnjim Arrni.

Gjatë takimit, u zhvillua një diskutim i thelluar mbi rëndësinë dhe rolin që ka ndërmjetësimi në procedurat civile, penale dhe tregtare, si dhe mbi aplikimin e tij në praktikën gjyqësore në Kosovë. Studentët patën mundësinë të mësojnë direkt nga profesionistët e sistemit gjyqësor dhe të kuptojnë përpjekjet e vazhdueshme për të përmirësuar praktikat e ndërmjetësimit.

Vizita përfshiu një ekskursion në hapësirat e brendshme të Gjykatës Themelore, duke përfshirë sallat ku mbahen seancat gjyqësore, hapësirat administrative dhe qelitë e paraburgosurve. Ky vizitë u dha mundësinë studentëve të njoftoheshin nga afër me mënyrën se si funksionon sistemi gjyqësor në Kosovë, si dhe me procedurat që ndiqen për të garantuar drejtësinë për të gjithë qytetarët.

Kjo vizitë u vlerësua si një mundësi e shkëlqyer për lidhjen e studimeve akademike me praktikën profesionale, duke u dhënë studentëve një pasqyrë të thellë të funksionimit të sistemit gjyqësor dhe të aplikimit të ndihmës ligjore në situata reale.

Akademia Verore e Fakultetit Juridik i UBT-së ofroi një mundësi të shkëlqyer për studentët që të zhvillojnë aftësitë e tyre profesionale dhe të forcojnë njohuritë e tyre përmes një kombinimi të teorisë dhe praktikës në fushën e ligjit.

Fakulteti i Shkencave të Sportit dhe të Lëvizjes i UBT-së ka përmbyllur me sukses një tjetër edicion të Akademisë Verore, duke organizuar një seri aktivitetesh dhe garash sportive gjatë javës së kaluar. Gara të tilla si volejboll, futsall dhe pingpong u mbajtën në ambientet e kampusit, duke sjellë studentët në një atmosferë dinamike dhe të ngjeshur me emocion.

Studentët tanë u angazhuan me shumë pasion dhe energji, duke krijuar një frymë të jashtëzakonshme bashkëpunimi dhe sportiviteti në garat e futsallit, ku secili ekip tregoi aftësi të larta dhe një moral të shkëlqyer sportiv. Pjesëmarrësit kontribuuan në ndërtimin e një atmosfere pozitive dhe motivuese, e cila e bëri këtë ngjarje një festë të vërtetë të sporteve.

Aktivitetet përmbyllëse të Akademisë Verore 2025 përfunduan me shpërblime për fituesit: medalje dhe kupa që simbolizuan përkushtimin dhe angazhimin e secilit pjesëmarrës. Të gjithë ata që morën pjesë në gara u shpërblyen për performancën e tyre të shkëlqyer, ndërsa atmosfera e ngrohtë e krijuar nga organizatorët dhe pjesëmarrësit ndihmoi në rritjen e motivimit dhe pasionit për sport.