Sport
Silvinjo shpall sot listën e kuqezinjve për ndeshjet me Çekinë dhe Ukrainën
Sot, trajneri i Kombëtares shqiptare, Silvinjo, do të publikojë listën e lojtarëve që do të jenë pjesë e dy përballjeve vendimtare për mbylljen e këtij viti në Ligën e Kombeve. Shqipëria do të presë Çekinë më 16 nëntor, ndërsa tri ditë më pas, më 19 nëntor, do të luajë kundër Ukrainës në shtëpi. Këto janë ndeshjet e fundit të grupit për këtë vit dhe përballjet pritet të jenë vendimtare për ecurinë e mëtejshme të kuqezinjve.
Adrion Pajaziti dhe Marash Kumbulla janë dy nga mungesat e sigurta për këto ndeshje. Pajaziti, mesfushori që debutoi në Kombëtare në tetor, ka pësuar një dëmtim që e ka lënë jashtë fushës me klubin e tij, ndërsa Kumbulla u detyrua të largohej nga fusha pas një dëmtimi në derbin mes Barcelonës dhe Espanjolit.
Një tjetër mungesë e mundshme është Rei Manaj, i cili pritet të mos jetë gati as për ndeshjen e fundjavës së klubit të tij, Sivaspor, ndaj Fenerbahçes. Manaj ka pësuar një dëmtim muskulor që vazhdon ta mbajë të larguar nga fushat.
Ndërkohë, vjen një lajm pozitiv për sulmin e Kombëtares. Indrit Tuci, sulmuesi i Spartës së Pragës, u aktivizua në Ligën e Kampionëve dhe është rikthyer në formë të plotë. Tuci pritet të zëvendësojë Mirlind Dakun, i cili do të mungojë në ndeshjen e parë kundër Çekisë për shkak të pezullimit.
Kapiteni Berat Gjimshiti gjithashtu do të rikthehet në mbrojtje, pas mungesës në shtator dhe tetor për shkak të një lëndimi. Gjimshiti pritet të sjellë përvojën e tij të çmuar në repartin mbrojtës, që përforcohet edhe më shumë me lojtarë si Ismajli, Ajeti dhe Mihaj.
Për pozicionet e sulmit, janë të konfirmuar Myrto Uzuni, Mirlind Daku, Indrit Tuci dhe Taulant Seferi, duke bërë të pamundur grumbullimin e Kristian Shpendit. Megjithatë, trajneri Silvinjo njihet për befasitë e tij dhe nuk përjashtohet mundësia e ndonjë përfshirjeje surprizë.
Në repartin e mesfushës pritet të thirren Kristjan Asllani, Ylber Ramadani, Qazim Laçi dhe ndoshta Amir Abrashi. Ndërkohë, në krahët e sulmit do të mbështeten lojtarët si Jasir Asani, Nedim Bajrami, Lindon Selahi, Taulant Seferi dhe Ernest Muçi. Në mbrojtje, në të djathtë do të jetë një mes Ivan Balliut dhe Elseid Hysajt, ndërsa në të majtë Mario Mitaj do të ketë përkrahje nga një mes Andi Hadrojt dhe Naser Alijit.
Silvinjo do të zhvillojë edhe një konferencë për shtyp sot në orën 11:00, ku pritet të japë më shumë detaje mbi listën dhe pritshmëritë për këto ndeshje të rëndësishme./UBTNews/
Kryesuesit e Premier Ligës dhe UEFA Champions League (UCL), Liverpool, rifillojnë angazhimet e tyre evropiane duke u mburrur me një rekord të përsosur prej gjashtë fitoresh nga gjashtë ndeshje, ndërsa zotërojnë rekordin më të mirë të mbrojtjes në këtë kompeticion me vetëm një gol të pësuar.
Ky gol i vetëm erdhi në ndeshjen e parë kundër Milanit në shtator, që do të thotë se ata mund të bëhen vetëm skuadra e dytë në historinë e Kupës Evropiane/UCL pas Leeds në 1969/70 që fiton gjashtë ndeshje radhazi pa pësuar gol.
“Të kuqtë” do të ballafaqohen me skuadrën franceze Lille në “Anfield Road” duke synuar fitoren e radhës për të vazhduar kështu dominimin në fazën e ligës së Ligës së Kampionëve.
Përballjet e Lille kundër skuadrave angleze i japin besim etiketës së tyre të dobët, pasi ata kanë fituar vetëm një nga dhjetë ndeshjet e fundit të UCL kundër tyre dhe kanë humbur gjashtë të fundit radhazi.
Sulmuesi kosovar Edon Zhegrova nuk do të luajë në këtë ndeshje për shkak të lëndimit.
Kjo ndeshje do të zhvillohet nga ora 21:00 dhe këto janë formacionet e mundshme:
Liverpool: Alisson; Bradley, Endo, Van Dijk, Robertson; Gravenberch, Mac Allister; Salah, Szoboszlai, Gakpo; Nunez.
Lille: Chevalier; Meunier, Diakite, Ribeiro, Ismaily; Andre, Bouaddi; Bakker, Cabella, Sahraoui; David.
Lara Colturi, skiatorja shqiptare, ka arritur një paraqitje të shkëlqyer në garën e Kupës së Botës në ski për femra, që u zhvillua sot në pistën e Kronplatz në Itali. Ajo mori pjesë në disiplinën e sllallomit gjigant dhe u rendit e katërta, duke konfirmuar sërish nivelin e lartë të konkurrencës së saj.
Në përfundim të dy zbritjeve, Colturi mbeti jashtë podiumit vetëm për pak të mijtat, duke regjistruar një kohë totale prej 1’56”50. Pas zbritjes së parë, ajo u kualifikua në vendin e tetë me kohën 57”00, ndërsa në zbritjen e dytë arriti të përmirësojë rezultatin dhe të kalojë disa pozita, duke ndaluar kronometrin në 59”50.
Për këtë sezon, Colturi ka siguruar dy vende të dyta dhe një vend të pestë, duke u renditur gjithmonë ndër skiatoret më të mira. Paraqitja e saj e shkëlqyer, në veçanti në garën e sotme, tregon për një të ardhme premtuese për 18-vjeçaren shqiptare. Ajo ka treguar se ka kapacitetin të kalojë me sukses zbritjen e parë, gjithmonë duke konkurruar për pozita të larta dhe renditje ndër më të mirat./UBTNews/
Kombëtarja shqiptare do të niste edicionin kualifikues për Kupën e Botës 2026 më 21 mars me një ndeshje ndaj Anglisë, që do të luhet në stadiumin “Wembley” në Londër.
Sipas njoftimit të Departamentit të Komunikimit në Federatën Shqiptare të Futbollit (FSHF), biletat për këtë ndeshje kanë dalë tashmë në shitje. Tifozët shqiptarë mund të sigurojnë biletat duke ndjekur disa hapa të thjeshtë:
Krijimi i një llogarie: Tifozët duhet të regjistrohen në platformën e dedikuar për biletat përmes email-it dhe të plotësojnë të dhënat bazë. Linku për regjistrimin është: https://www.wembleystadium.com/tickets.
Përdorimi i linkut të dedikuar: Pas krijimit të llogarisë, tifozët do të kenë mundësinë të blejnë biletat për ndeshjen duke përdorur linkun e dedikuar për tifozët shqiptarë: Biletat e ndeshjes.
Çmimet e biletave: Biletat janë të ndara në tre kategori dhe çmimi ndryshon në varësi të vendit të zgjedhur në stadium. Tifozët shqiptarë mund të zgjidhin vendet në sektorët 126, 127, 128, 129, 130, 131 dhe 132.
Sigurimi i biletave për këtë ndeshje të rëndësishme është një mundësi për të mbështetur Kombëtaren shqiptare në një sfidë të madhe për kualifikimet e Kupës së Botës 2026.
Atalanta e Berat Gjimshitit do të përballet sot në orën 18:45 me Shturm Gracin në sfidën e parafundit të fazës së grupeve në Ligën e Kampioneve. Kjo ndeshje ka një rëndësi të madhe për ekipin italian, i cili aktualisht ndodhet në vendin e 13-të të grupit me 11 pikë, dhe një fitore do t’i siguronte menjëherë kalimin në fazën “play-off”.
Pavarësisht se ky është objektivi i parë për Atalantën, fitorja ndaj Shturm Gracit ka një rëndësi edhe më të madhe, pasi do të rrisë shanset e ekipit për të arritur një vend mes 8 më të mirave të Europës. Ndeshja në letër duket e thjeshtë, por ekipi i Bergamos është i vetëdijshëm se çdo gabim mund të ndikojë në shanset e tyre për të avancuar më tej.
Nga minuta e parë, pritet që mbrojtësi i kombëtares shqiptare, Berat Gjimshiti, të jetë titullar në këtë sfidë, duke luajtur një rol të rëndësishëm në mbrojtjen e skuadrës.
Një fitore ndaj Shturm Gracit është thelbësore për Atalantën, jo vetëm për të siguruar kalimin në fazën tjetër, por edhe për të shmangur rrezikun që mund të sjellë një humbje. Ky është një moment i ndjeshëm, pasi ndeshja e fundit në grup do të jetë kundër Barcelonës së Hansi Flikut, një sfidë shumë e vështirë për të cilën Atalanta duhet të jetë e gatshme./UBTNews/
Rektori Hajrizi mori pjesë në ceremoninë përkujtimore të 19-vjetorit të vdekjes së Presidentit Dr. Ibrahim Rugova
Rektori i UBT-së përcjell punimet e Forumit Ekonomik Botëror Davos 2025
Liverpool-Lille: Formacionet e mundshme, Zhegrova mungon në ‘Anfield’
Kurti merr pjesë në Forumin Ekonomik në Davos, pritet nënshkrimi i Marrëveshjes së Tregtisë së Lirë me EFTA-n
Akulli, rrezik për banorët e një ndërtese në Bregu Diellit
Davos – Scholz: SHBA-ja do të mbetet një nga aleatet më të afërta dhe më të domosdoshme të Gjermanisë
Subjektet politike me më së shumti vëzhgues për zgjedhjet e 9 shkurtit
KQZ akrediton edhe 15,889 vëzhgues të subjekteve politike
Shefi i ushtrisë izraelite jep dorëheqje për shkak të sulmit të 7 tetorit
-
Bota3 months agoTrump premton paqe në Liban nëse rikthehet në Shtëpinë e Bardhë
-
Bota3 months agoKoreja e Veriut rrit frikën në botë, lëshon raketën e re balistike ndërkontinentale
-
Bota2 months ago“Ethet” e kthimit të Trump! Takohen Macron e Starmer, zbardhet fokusi i diskutimeve
-
Lajmet2 months agoRektori Hajrizi: Çdo sukses i joni është një sukses për Kosovën!