Lajmet

Si t’i tregoni punëdhënësit në një intervistë pune se cilat janë pritshmëritë për pagën?

Melissa Phipps ka dhënë disa këshilla.

Published

4 years ago

on

Paga është njëra ndër arsyet themelore që dikush kërkon të jetë në një marrëdhënie pune. Puna në vetvete është diçka nga e cila mund të nxjerrësh të mira në shumë dimensione, por pavarësisht të gjithave, paratë janë ato që na mbajnë atje.

Në shumicën e intervistave të punës, punëdhënësi kërkon një mendim nga kandidati rreth kërkesës apo pritshmërisë që ai ka për pagën.

Autorja për planifikimin e pensioneve dhe financave personale, Melissa Phipps, thotë se punëdhënësit i bëjnë pyetjet në lidhje me pagën, sepse duan të kuptojnë nëse mund ta përballojnë atë, por edhe për të parë sesa kandidatët e vlerësojnë vetën dhe punën që bëjnë.

SI TË PËRGATITENI PËR PËRGJIGJET?

Të vendosësh për një pagë të caktuar mund të jetë e vështirë, sepse nganjëherë nuk do ta dini as se çfarë pune do ta bëni saktësisht dhe nëse puna juaj përkon me atë vlerë. Duke mos pasur një përgjigje të duhur, ekziston një mënyrë për t’u përgatitur për pyetjen dhe për të marrë atë që dëshironi.

Në mënyrë që ta përgatitni një përgjigje të duhur për pagën është mirë që fillimisht të kuptoni sesa fitimprurëse është ajo industri, në të cilën po tentoni të kyçeni, si dhe të analizoni zonën gjeografike me fitimet.

KËSHILLAT QË JU DUHEN PËR PËRGJIGJE TË MIRA!

Thoni që jeni fleksibil: Mund të përpiqeni të përgjigjeni më një përgjigje si: “Pritjet e mia të pagave janë në përputhje me përvojën dhe kualifikimet e mia”. Ose, “Nëse kjo është puna e duhur për mua, jam i sigurt që mund të arrijmë një marrëveshje për pagën” . Kjo do të tregojë se jeni të gatshëm të negocioni.Shembull: Kërkesat e mia për pagë janë fleksibile, por unë kam përvojë të konsiderueshme në këtë fushë, gjë që besoj i shton vlerë kandidaturës sime. Pres të diskutoj më në detaje, se cilat do të jenë përgjegjësitë e mia në këtë kompani. Pastaj, ne mund të përcaktojmë një pagë të drejtë për pozicionin tim.
Përgjigje e duhur sepse: Të kërkosh më shumë informacione përpara se ta caktoni një shifër, është një mënyrë e mirë për ta shmangur përmendjen e një vlere nga punëdhënësi. Pas kësaj, mund të bëni pyetjen, se çfarë kompania parashikon që t’i ofrojë kandidatit të punësuar.

Ofroni një shifër të përafërt: Edhe nëse filloni duke theksuar fleksibilitetin tuaj, shumica e punëdhënësve do të dëshirojnë të dëgjojnë një shifër specifike. Në këtë rast është mirë që të tregohet një vlerë, por duke e specifikuar që jeni rreth kësaj vlere (më shumë apo më pak), por që nuk është fikse. Kjo do t’ju lejojë të qëndroni fleksibil, ndërsa i jepni punëdhënësit një përgjigje të qartë. Këtë përgjigje duhet ta jepni bazuar në kualifikimet apo përvojën tuaj në atë industri.

Mendoni për pagën tuaj aktuale: Përveç të tjerave, përgjigja për pagë mund të jetë edhe duke marrë si pikënisje pagën në punën aktuale, apo atë në të kaluarën, sidomos nëse lëvizja juaj po bëhet në të njëjtën industri. Por kjo këshillë, nuk duhet të aplikohet në rastet kur po filloni punën në një vend me ekonomi tjetër.

Jepi vetes një ngritje: Mendoni se çfarë vlere do ta konsideronit si rritje të drejtë nga punëdhënësi aktual apo ai i kaluar. Pasi ta keni menduar një vlerë që e konsideroni që është e drejtë për përvojën tuaj, thojani atë punëdhënësit, pasi t’ju ketë pyetur rreth pagës. Kjo mund të jetë një pikënisje e mirë në punën e re.

Jepni vetëm numra me të cilët do të ishit të kënaqur: Nuk ka nevojë që ta thoni një vlerë, që përveç që nuk përkon me arritjet tuaja profesionale, as nuk do të t’i mbulojë shpenzimet e familjes dhe vetes. Në fundit të fundit, punëdhënësi përsëri do ta jap vlerën vendimtare, pasi ta keni negociuar.

Theksoni aftësitë tuaja: Në përgjigjen tuaj, ju mund të theksoni në mënyrë të hollësishme pse jeni një punonjës i mirë për pozicionin, i cili po kërkohet. P.sh. ju mund të thoni: “Bazuar në përvojën time 10 vjeçare në këtë fushë, unë do të prisja një pagë në intervalin prej X euro deri në X euro”. Para se të përmendni ndonjë numër, kujtojani intervistuesit, pse ai ose ajo duhet t’ju ofrojë një pagë fillestare.

Jini të gatshëm të negocioni: Shumë kandidatë hezitojnë, që të kërkojnë më shumë para, sepse frikësohen që kjo do të jetë arsye që ta humbasin fare atë ofertë pune. Por, është shumë në rregull që të përpiqeni të negocioni për një pagë fillestare.

ÇFARË NUK DUHET TË THUHET

Shmangni një shumë të caktuar: Nuk është shumë e preferueshme që të përmendni një shumë specifike, derisa punëdhënësi ta përmendë atë. Pas kësaj, negociata do të jenë më shumë në favorin tuaj.

Mos e çmoni veten më shumë sesa duhet: Nuk do të ishte mirë që të kërkoni një pagë shumë të lartë, në rast që pasi të keni hulumtuar, e keni kuptuar që puna të cilën do ta bëni do të vlejë sa gjysma e saj. Mund ta vlerësoni kaq shumë veten, në rast se faktet tregojnë që ju keni qenë në gjendje më përpara të bëni ndryshime.

Mos jini negativ: Edhe nëse shuma që ju ofrohet duket fyese, përgjigjuni me hijeshi dhe pyesni nëse ka vend për të negociuar. /Akademi Pune/

Related Topics:
Continue Reading

Lajmet

Kushtetuesja publikon aktgjykimin e plotë

Published

13 minutes ago

on

October 8, 2025

By

Gjykata Kushtetuese e Kosovës ka publikuar aktgjykimin e plotë për konstituimin e Kuvendit të Kosovës.

Ajo ka konstatuar se seanca konstituive e Kuvendit, e filluar me 15 prill 2025 nuk ka përfunduar si rezultat i mos zgjedhjes së nënkryetarit të Kuvendit nga radhët e deputetëve të komunitetit serb, dhe Kuvendi nuk është konstituuar në pajtim me përcaktimet e paragrafit 1 të nenit 66 (Zgjedhja dhe mandati) dhe paragrafët 1 dhe 4 të nenit 67 (Zgjedhja e kryetarit dhe nënkryetarëve) të Kushtetutës së Republikës së Kosovës.

Gjykata ka urdhëruar që seanca konstituive e Kuvendit të përfundojë brenda afatit të mbetur prej 12 ditëve nga hyrja në fuqi e këtij Aktgjykimi.

Kushtetuesja ka urdhëruar të gjithë deputetët e zgjedhur të Kuvendit që gjatë procedurës së zgjedhjes së nënkryetarit të Kuvendit nga radhët e deputetëve të komunitetit serb, të ushtrojnë funksionin e tyre kushtetues në interesin më të mirë të Kosovës dhe në pajtim me Kushtetutën dhe rregulloren e Kuvendit./D.B/KP

Continue Reading

Lajmet

Në pritje të aktgjykimit të plotë, Ambasada gjermane bën thirrje për zbatimin e vendimeve Kushtetueses

Published

14 minutes ago

on

October 8, 2025

By

I ngarkuari me Punë në Ambasadën e Gjermanisë në Kosovë, Christian Böttcher, është takuar të mërkurën me kryetarin e Gjykatës Kushtetuese, Nexhmi Rexhepi.

Ambasada bënë të ditur se Böttcher ka vlerësuar punën e gjykatës dhe rikonfirmuar mbështetjen e plotë të Gjermanisë për punën e gjykatës, teksa ka bërë thirrje për zbatimin e vendimeve të Gjykatës Kushtetueses.

Ambasada Gjermane kërkon nga të gjithë aktorët politikë të zbatojnë vendimet e Gjykatës, pasi siç thuhet ky është një detyrim kushtetues për deputetët, për konstituimin e Kuvendit.

“Të gjithë aktorët politikë duhet të zbatojnë vendimet e Gjykatës – ky është një detyrim kushtetues për deputetët. Mosveprimi jo vetëm që zgjat, por edhe thellon krizën politike, duke dëmtuar vendin. Siç u tha më parë: Është koha e duhur për ta vënë vendin në vend të parë, jo politikën partiake”, thuhet në njoftim.

Deputetët e Kuvendit të Kosovës janë në pritje të publikimit të aktgjykimit të plotë të Gjykatës Kushtetuese në lidhje me seancën konstituive.

Kushtetuesja më 30 shtator ka dalë me një njoftim ku ka thënë se seanca konstituive e Kuvendit të Kosovës, që ka nisur më 15 prill, nuk ka përfunduar, pasi që nuk është zgjedhur nënkryetari nga komuniteti serb.

Vendimi i Kushtetueses ka ardhur pas ankesës së Listës Serbe, partisë më të madhe të serbëve në Kosovë, lidhur me votimin ndaras të kandidatëve për nënkryetarë të Kuvendit nga radhët e komuniteteve jo shumicë.

Kushtetuesja ka urdhëruar deputetët e Kuvendit të konstituojnë legjislaturën e nëntë brenda afatit 12-ditor prej publikimit të aktgjykimit të plotë, por pa specifikuar pasojat juridike në rast se nuk kompletohen trupat e legjislativit./D.B/KP

Continue Reading

Lajmet

​Gërvalla merr pjesë në Takimin e Ministrave të Jashtëm në kuadër të Procesit të Berlinit

Published

15 minutes ago

on

October 8, 2025

By

Zëvendëskryeministrja dhe ministrja në detyrë e Punëve të Jashtme dhe Diasporës, Donika Gërvalla, po merr pjesë në Takimin e Ministrave të Jashtëm të Procesit të Berlinit, që zhvillohet më 8 dhe 9 tetor në Belfast të Irlandës së Veriut, me pjesëmarrjen edhe të sekretares së Shtetit për Punë të Jashtme të Britanisë së Madhe, Yvette Cooper.

Takimi bashkon ministrat e punëve të jashtme të vendeve të Ballkanit Perëndimor dhe të shteteve pjesëmarrëse në këtë proces.

Në fokus të diskutimeve të këtij viti janë temat e sigurisë dhe zhvillimit rajonal si dhe domosdoshmëria e bashkëpunimit përballë sfidave dhe kërcënimeve të përbashkëta në një botë gjithnjë e më të paqëndrueshme, raporton KosovaPress.

Gjatë punimeve të këtij procesi, Gërvalla do të zhvillojë një sërë takimesh bilaterale me homologë dhe përfaqësues të lartë të vendeve pjesëmarrëse.

Procesi i Berlinit, i nisur në vitin 2014, mbetet nisma qendrore për bashkëpunim politik, ekonomik dhe shoqëror mes vendeve të Ballkanit Perëndimor dhe partnerëve evropianë./D.B/KP

Continue Reading

Lajmet

Përurohet rruga që lidh zonën e dytë ekonomike të Gllavicës me magjistralen mes Shtimes dhe Ferizajt

Published

2 hours ago

on

October 8, 2025

By

Në komunën e Shtimes sot është përuruar rruga që lidh Zonën e dytë Ekonomike të Gllavicës me rrugën magjistrale mes Shtimes dhe Ferizajt, investim ky që pritet të ndikojë drejtpërdrejt në zhvillimin ekonomik të komunës dhe më gjerë.

Kryetari i Komunës së Shtimes, Qemajl Aliu, tha se kjo rrugë është një hap i rëndësishëm drejt funksionalizimit të zonës ekonomike.

“Jemi në përurimin e rrugës që të dërgon te zona e dytë ekonomike në Gllavicë, rrugë e cila këtë zonë ekonomike e lidh me rrugën magjistrale mes Shtimës dhe Ferizajt. Është investim mbi 600 mijë euro, rrugë me gjerësi shtatë metra, me kanale kulluese, kanalizim atmosferik për ujëra të zeza, trotuar, me ndriçim, me të gjitha normat e një rruge që i lidhë magjistralen mes dy qyteteve”, tha Aliu.

Ai shtoi se rruga është në shërbim të funksionalizimit të zonës ekonomike, ndërsa përveç saj, komuna ka bërë edhe investime të tjera në këtë zonë.

“Kjo rrugë është në shërbim të funksionalizimit të zonës ekonomike dhe përveç kësaj rruge, ne kemi bërë afro gjysmë milioni euro investime në zonën ekonomike dhe presim që pranverën e ardhshme, siç edhe jemi zotuar me fillu funksionalizimin dhe vendosjen e bizneseve në këtë zonë, e cila do të ndihmojë dhe shërbejë në zhvillimin ekonomik të gjithëmbarshëm në Komunën e Shtimes, por edhe përreth. Kjo zonë ekonomike ka diku 37 hektarë dhe pritet me qenë një nga zonat më të mëdha me biznese”, tha Aliu.

Ky investim i ka kushtuar Komunës së Shtimës mbi 600 mijë euro./D.B/KP

Continue Reading

Të kërkuara