Mënyra se si është e mobiluar dhoma e gjumit ka ndikim të madh në cilësinë e pushimit. Renditja e mobilieve, zgjedhja e materialeve dhe, mbi të gjitha, paleta e ngjyrave ndikojnë drejtpërdrejt në qetësinë e trupit dhe mendjes.

Ekspertët e dizajnit të brendshëm theksojnë se ngjyrat nuk janë thjesht element estetik, por kanë efekt psikologjik, duke formësuar disponimin dhe ndjenjën e rehatisë në hapësirë.

Ngjyrat që duhen shmangur

Sipas Kate Duffy, eksperte e arredimit të brendshëm, hapi i parë është të mendoni për atmosferën që doni të krijoni. Për një dhomë që nxit relaksim, duhet të shmangni tonet e ftohta dhe sterile, që krijojnë ndjesi distancimi apo ftohtësie emocionale.

Gri ose e bardha me nëntona të ftohtë mund të japin ndjesinë e sterilitetit ose të trishtimit. Në vend të tyre, rekomandohen tone të ngrohta, neutrale ose tokësore, që sjellin rehati dhe natyralitet.

Ngjyrat e ndezura, si e verdha intensive, jeshile e gjallë ose rozë e fortë, mund t’i japin energji dhomës, por nëse dominojnë, mund të shkaktojnë nervozizëm dhe vështirësi në relaksim. Përdorini vetëm në detaje: jastëkë dekorativë, perde ose tablo.

E kuqja, edhe pse lidhet me pasionin, rrit energjinë e pengon gjumin. Ajo nxit dhe oreksin, ndaj nuk është e përshtatshme për dhoma gjumi.

Si të neutralizoni ngjyrat e papërshtatshme?

Nëse muret janë lyer me ngjyra të papërshtatshme, efekti zbutet: Me mobilie të mëdha që mbulojnë sipërfaqe dominuese, me piktura, tablo ose pasqyra që krijojnë ekuilibër vizual. Me ndriçim të ngrohtë dhe të butë, që ndryshon perceptimin e ngjyrës dhe e bën më qetësuese

Ngjyrat që nxisin gjumin e mirë

Ekspertët rekomandojnë: Kaltra e butë, që qetëson mendjen e krijon ndjesi sigurie. Bezha dhe tonet rërorë, që sjellin ngrohtësi dhe stabilitet

Livanda, vjollca e hapur dhe jeshilja ulliri, për një atmosferë të balancuar dhe natyrale. Për një prekje romantike, rozë e zbehtë ose nuanca pudre, delikate dhe të balancuara.

Zgjedhja e ngjyrave të duhura mund të transformojë dhomën e gjumit në një hapësirë relaksuese dhe të qetë, që favorizon pushimin e mirë dhe rifreskimin e trupit dhe mendjes. /A.Z/UBT News/

Në ditët e sotme, veshjet sportive janë bërë pjesë e domosdoshme e garderobës për shumë adhurues të aktivitetit fizik.

Mënyra e larjes dhe mirëmbajtjes së tyre nuk ndikon vetëm në higjienën personale, por edhe në zgjatjen e jetëgjatësisë së rrobave, një problem që shpesh i shqetëson sportistët dhe entuziastët e palestrës.

Lloji i materialit

Veshjet sportive prodhohen nga fibra sintetike ose materiale të kombinuara. Përdorimi e larja e shpeshtë shkaktojnë zbehje të ngjyrës, humbje të elasticitetit dhe konsumim më të shpejtë të tyre. Prandaj, para larjes, është e rëndësishme të lexoni etiketën e kujdesit.

Pambuku: Thith shumë djersë, por thahet ngadalë e deformohet lehtë. Duhet larë pas stërvitjeve intensive për të shmangur njollat dhe erën e pakëndshme. Përdorni detergjent neutral dhe larje të butë. Pastrimi në diell duhet shmangur për të mos shkaktuar tkurrje.

Fibrat sintetike (p.sh. poliesteri): Janë më të qëndrueshme, thithin djersën e thahen shpejt. Mund të vishen disa herë pas ushtrimeve të lehta, por pas stërvitjeve me djersitje të fortë duhet larë menjëherë. Mund të përdoret lavatriçja, por jo me ujë shumë të nxehtë.

Intensiteti i stërvitjes

Frekuenca e larjes varet edhe nga sa intensiv është aktiviteti: Pas ushtrimeve të forta, sidomos me rroba pambuku, larja duhet të bëhet për të shmangur shumimin e baktereve dhe erën e pakëndshme.

Për aktivitetet e lehta me veshje sintetike, mund të shtohet numri i përdorimeve, por gjithsesi larja nuk duhet shtyrë shumë gjatë.

Kushtet klimatike dhe mjedisi i ushtrimit

Në verë: Djersitja është më e madhe, ndaj larja duhet të bëhet pas çdo stërvitjeje.

Në dimër: Nëse aktiviteti është i lehtë dhe brenda ambienteve të mbyllura, rrobat mund të përdoren 2–3 herë para larjes.

Në natyrë: Për shkak të pluhurit dhe ndotjes, veshjet duhet larë pas çdo përdorimi. Para larjes, rekomandohet fshirja e lehtë për të hequr papastërtitë sipërfaqësore.

Lëkura dhe ndjeshmëria personale

Personat me lëkurë të ndjeshme ose të prirë ndaj alergjive duhet t’i lajnë veshjet sportive pas përdorimit. Përdorimi i detergjentëve antibakterialë dhe shpëlarja e plotë ndihmojnë në shmangien e irritimeve.

Këshilla shtesë për kujdesin

Shmangni përdorimin e zbutësve, pasi dëmtojnë frymëmarrjen, elasticitetin dhe vetinë e thithjes së djersës. Pas çdo përdorimi, nëse rrobat nuk lahen menjëherë, hiqni e vendosni në një vend të ajrosur për tharje natyrale. Kjo ndihmon në ruajtjen e freskisë e cilësisë së materialit. /A.Z/UBT News/

Lëngu i limonit shpesh konsiderohet një pastrues natyral: heq yndyrën, freskon dhe lë aromë të këndshme.

Ekspertët paralajmërojnë se acidi mund të shkaktojë dëme serioze në disa materiale dhe riparimi kushton shumë më tepër sesa mendoni.

Ja sipërfaqet që nuk duhet t’i pastroni kurrë me limon dhe çfarë mund të përdorni në vend:

Guri natyral (mermeri, graniti)

Acidi gërryen kalciumin, duke lënë njolla të matta dhe dëmtime të përhershme.
Zgjidhje: pastrues pH-neutral ose detergjent i butë i holluar me ujë të ngrohtë.

Ekranet e elektronikës

Kombinimi i lagështisë dhe acidit dëmton shtresën mbrojtëse.
Zgjidhje: leckë mikrofibër e thatë ose pastrues i rekomanduar nga prodhuesi.

Sipërfaqet e lyer me bojë

Përbërësi limonen mund ta zbehë ose ta heqë bojën.
✅ Zgjidhje: sapun i butë me ujë të ngrohtë, ose për njolla – sodë buke me pak ujë.

Pajisjet prej çeliku inox

Acidi shkakton njolla dhe korrozion nëse nuk shpëlahen menjëherë.
Zgjidhje: ujë me sapun të butë dhe leckë mikrofibër, ose pastrues special për inoks.

Sipërfaqet prej bronzi dhe bakri

Limoni heq patinën, por më vonë shkakton njolla të errëta.
Zgjidhje: preparate speciale ose pastë nga sodë buke dhe ujë.

Dyshemetë prej druri (parketi)

Limoni dëmton shtresën mbrojtëse dhe mund të shkaktojë fryrje ose ndryshim ngjyre.
Zgjidhje: pastrues i posaçëm për dru dhe leckë mikrofibër.

Enët prej alumini

Reagimi i acidit me aluminin krijon njolla dhe gropëza.
Zgjidhje: detergjent i butë me ujë të ngrohtë; për njolla të forta, sodë buke.

Pëlhura me ngjyra

Limoni vepron si zbardhues dhe mund të çngjyrosë materialin.
Zgjidhje: pastrues i butë për pëlhura ose sapun i holluar.

Karroceria e makinës

Acidi dëmton shtresën mbrojtëse të llakut dhe nxit oksidimin.
Zgjidhje: shampo pH-balancuar për makina.

Edhe pse është natyral, nuk do të thotë se është gjithmonë i sigurt. Zgjidhni produktin e duhur për materialin që po pastroni – për të shmangur dëmtimet e përhershme dhe shpenzimet e panevojshme. /A.Z/UBT News/

Shpesh, mendimet për punën nuk ndalen as kur e fik kompjuterin.

Mendja vazhdon të rrotullohet rreth detyrave, afateve apo bisedave të ditës, aq sa nuk arrin të shijosh plotësisht momentet që të përkasin ty: një darkë me miqtë, një mbrëmje relaksuese në shtëpi apo pushimet që i ke pritur gjithë vitin.

Nëse ndihesh sikur nuk arrin dot të shkëputesh nga puna, sado që përpiqesh, nuk je vetëm. Shumë njerëz e kanë të vështirë të ndajnë jetën profesionale nga ajo personale, si dhe të “mbyllin” vërtet ditën.

Këtu hyn në lojë një teknikë praktike dhe shumë e thjeshtë: Metoda STOP – një mënyrë që premton të të ndihmojë të kalosh nga “modaliteti i punës” në atë të jetës së përditshme në më pak se pesë minuta.

Çfarë është metoda STOP?

E rekomanduar nga eksperti i karrierës Dan Bruce, kjo metodë përbëhet nga katër hapa të lehtë, që kanë si qëllim të rivendosin ekuilibrin mes punës dhe jetës personale. Ajo të ndihmon të mbyllësh me vetëdije ditën dhe t’i japësh vetes hapësirën që meriton.

Ja çfarë përfaqëson fjala STOP:

S – Stop & Mbyll (Ritual mbylljeje)
T – Trego fitoret (Ndaj sukseset e ditës)
O – Organizohu mendërisht (Shkarko trurin)
P – Përqendrohu në të tashmen (Kalo në “tani”)

Si zbatohet kjo metodë në praktikë?

S – Mbyll me vetëdije (Stop & Mbyll)

Ashtu si trupi ka nevojë për një rutinë para gjumit, edhe mendja ka nevojë për një “sinjal” që puna ka mbaruar. Ky hap mund të duket simbolik, por është thelbësor.

Shembuj të ritualeve të mbylljes:

Mbyll të gjitha skedat në kompjuter dhe shëno detyrat për nesër.

Rregullo hapësirën e punës.

Çaktivizo njoftimet nga aplikacionet e punës (Slack, Teams, emaili).

Thuaj me zë të lartë: “Puna për sot mbaroi.”

Kjo ndihmon trurin të kuptojë se ka ardhur momenti për të kaluar në një gjendje më të qetë.

T – Trego fitoret (Ndaj sukseset)

Shumë njerëz e mbyllin ditën duke u përqendruar tek ajo që nuk arritën të bëjnë. Ky zakon ul vetëbesimin dhe shton ankthin. Ndaj, përpiqu të fokusohesh në ato që ke bërë mirë:

Shkruaj 2-3 gjëra që shkuan mirë sot.

Kujto një koment pozitiv që ke marrë.

Mbaj një listë apo dosje me reagime që të motivojnë.

Edhe fitoret e vogla kanë rëndësi. Kështu, dita mbyllet me një ndjenjë arritjeje, jo me faj apo presion.

O – Organizohu mendërisht (Shkarko trurin)

Vetëm se kompjuteri u fik, nuk do të thotë që edhe mendja ndaloi. Shpesh, vazhdon të mendosh për punën, çka krijon lodhje të padukshme.

Zgjidhja? Nxirr ato mendime jashtë kokës:

Shkruaj çdo gjë që të rrotullohet në mendje.

Regjistro një mesazh zanor për veten si “memo për nesër”.

Krijo një listë detyrash për të mos i mbajtur mend.

Ky veprim ndihmon për të liruar trurin nga tensioni dhe për t’i dhënë fund “rrjedhës së mendimeve”.

P – Përqendrohu në të tashmen (Kalo në ‘tani’)

Mos u fokusoni vetëm tek çfarë lini pas, por edhe tek ku po shkoni. Ky hap ju ndihmon të zhvendoseni në mënyrë të vetëdijshme nga puna tek jeta personale.

Disa mënyra për t’u kthyer në të tashmen:

Bëni një shëtitje pa telefon.

Bëni disa frymëmarrje të thella dhe të vetëdijshme.

Dëgjoni muzikë, lexoni një revistë ose gatuani diçka që ju pëlqen.

Kaloni kohë me të dashurit tuaj, pa shpërqendrim nga puna.

Sa më shumë të përfshiheni në aktivitetet jashtë punës, aq më lehtë do të shkëputeni mendërisht.